Read idege ỊHABAKUKU 1 Bible Online

ỊHABAKUKU 1 - idege bible

ỊHABAKUKU 1

¹Ụka ọhẹ, Amkpaa wụrụ mẹjẹ ịHabakuku ọlọmwụ dọọ ẹrụ ọlẹ kọ ka yọọ dodehe.

²“Ahyu! Amkpaa ee, ányị ọ tị́ ka tata ka ba ene ká ka wo ẹkọ ọlẹ kam wẹẹ be nya ọ-bịlẹng ká ka dam ụbwọ mẹ?” M̀ chị eko wụrụng ya ang onyobyi ọhọhọ yịrị ẹga yịrị lẹ-ẹ̄, á tị wẹ kaka chịhị da ka.

³Ányị tị́ du ká ya iwe da ká ang ọtịpyọ ọhọhọ m̄ ka juwa yẹ ụka wuu ịnyị? Ịyẹ tị́ du ká juwa yẹ ang onyobyi ọhọhọ ịlịnyị chịng? M̀ yẹ ká angịnyị juwa ta ang ayịreji bala ọ-họ awụlẹ agbụrụ, angị kaa rwarụ bala ọ-mwẹla kụ dagaga jum.

⁴Ehile la dẹwụ-dẹwụ, ọ́ kpụ ịngịngịhyẹ kaka, ị pẹhi ẹla ọ-họ kpẹẹkpẹẹ deeji, angị họ ang onyobyi yẹ angị họ ang ọnyịịla juju, ị pyị ehile anyoko lijẹẹhị.

⁵Ọọwa, Amkpaa-à wẹ angịnyị nyamwụ yẹkẹẹ, “Anụ chẹhị kaka yẹ ẹpwụma ịkịla ịdagaga junu wẹẹ. Ang ọlẹ kanụ ka yẹ ka lanụ ahịbwuu. M̀ juwa ka họ ịngịhyẹ loyi nyanụ, ị́ dọmwụ ya ẹla ọọwa jenu, ánụ ka myị ang ọọwa nyị ri ịnyịlẹhị ka.

⁶M̀ juwa ju ala ịBabịlọn ọngịrị ká ọngịrị nyaa ka la gidogboo am̀ odehe lẹ. Ị ri ụma oluhi-uhi, o-jujwo nya ọngịnyị ka. Ị juwa chẹwụ tụ odehe ọlẹ da nu ịpyị bala epweji nya angịkịla la.

⁷Ala ịBabịlọn ịwẹ la uhi-uhi, ịị chị uhi ju angịnyị, ịwa-à da ehile nya ịlaa kaa họ ang myị ang kọ háa lẹ, ọngọngọhẹ-ẹ̀ chaa dee myị ka.

⁸Anyịrẹ ị-kpa dẹwụ nyaa la ịmịla lala ẹka i-wu anụ, ị la wuru-wuru lala ịchịwanụ ịlẹ ká imyi nwụ. Angị kụ anyịrẹ nyaa juwa yahị da warị myị̀myịịmyị bwu ẹga ọlụrụ, anyịrẹ nyaa chị ata-eji kwangkwang. Ịị wẹ wirim lala ogbe à chabwọ kpoo gu ọnyị-ụnụ.

⁹Angịdẹwụ nyaa wuu kaa wẹ nyọka kụrụ lagbụrụ ịnyị. Ị wẹ tuuu chị uhi ju ọng myị ọng. Angịlẹ kịị wu kpa rụ bwu ẹwụ ju iru lala apwụ bala amẹ.

¹⁰Ịdịrịhụ la ala ịBabịlọn ịwẹ ẹpẹpẹ, alegbeju laa lala ụbwọ nya ọjị. Ajẹ ọ-chị yẹ epweji dada ọhẹ-ẹ́ẹ̀ kaa kwaa iwe ka, ịị tụ ịpyị guru gbudum, wule ju ka epweji ọọwa kaka dẹwụ kụrwọọ.

¹¹Ịị chị agaga rụ kịlahị la ogodayị-ka lala igbachịwụ, ị ri angịnyị inyibyi lụmẹ, ị dahịhile ọngịrị nya ịlaa bala ijiga ịlẹ kịị kpụ.”

¹²Amkpaa ee, à tị́ juwa gbe oyi myị oyi, ahụ à ri Ọngọ lịgọgọ, Ohe Oluhye nyam lẹ. Á tịtọ nyọka tahị ayịreji gbanggbang ka. Amkpaa Ọngọgbem gbe ee, à chụ ala ịBabịlọn, jwaa ọngịrị ká ka kpaa yẹhị akama chajị nya ang onyobyi ọhọhọ nyahị ịnyị.

¹³Tị yẹ wẹẹ, ang onyobyi ọhọhọ wụng ẹjẹ. À ka yẹ ala ịBabịlọn ịwẹ chịng kị ka kịnyaa la ang onyobyi nyaa ịwẹ-ẹ́? Ịyẹ tị́ du ká hwaa ujiji kị wẹẹ ta angị ri angịnyị ịnyịịla gwaa ayịreji mẹ?

¹⁴À họhị ahị angịnyị ehe āhị̄ lala iyenyi ịlẹ kịị wu nwụ, bala ang ịwụlọọ-wụlọ ịlẹ kị la olegbeju ọ-kpaa ụgbẹyị ka.

¹⁵Ala ịBabịlọn kpa ịkụja wu angịnyị lala iyenyi. Ị gbilaa kpa rụ kpịla-kpịla lala iyenyi ẹ-ẹpwụ nya ụgbọwụ, juwa da iwuru ju angịlẹ kị wu kpa rụ.

¹⁶Ị dọmwụ kaa gbịgba bala ọ-kịla iya ha ụgbọwụ nyaa, chajị ị byi ịlaa ká ụgbọwụ nyaa à du kị ye ang ọnyịịla ọnyị myị ọnyị.

¹⁷Ee lẹ, ịịwẹ ị ka kịnyaa juwa họ agbụrụ ọwẹ, bala ọ-kụrụ ụma datị-datị chẹẹchẹẹ la ọ-yẹ ahyẹẹrwẹrwa nyaa ka pyịyọọ lẹlẹ-ẹ́?