Read idege ỊHABAKUKU 2 Bible Online

ỊHABAKUKU 2 - idege bible

ỊHABAKUKU 2

¹M̀ ka kpụ uhye nya ọ̀da nyam kaka hụhụ, kam ka hụ gbe ọ-ka wo ẹla ọlẹ ká Amkpaa ka ya tam, bala jaabwọ kọ[1] ka wẹ eru ọchịchị nyam.

²Ọọwa, Amkpaa-à wẹm yẹkẹẹ, Da ẹla ọlẹ kam wẹẹ ka wụrụ mẹjẹng ju mẹ. Aa dọọ ba uginikpo kọ la gede-gede, ọlẹ kọ ri ká ọngịnyị á juwa kpa ụnyẹ kpa rụ kọ ka jẹ-ẹ̀ wọọ myị.

³À ka dọọ ju, chajị ang ịlẹ kam wẹẹ wụrụ mẹjẹng juwa ka họ jịra, ụka kị ka họ jịra kpangga-á pwụ lẹka. Ụka ọọwa tị juwa wẹẹ lagaga kị ka họ jịra pyii. Ó-ri ká ụka ọọwa-á họ atịmẹ wẹwẹ, à ju ugbodu godayị gbe ọ-họ jịra nyaa mẹ, ọ́ ka tata lụmẹ ene ká ụka ọọwa ka họ kaka.

⁴À tị́ jẹ lẹ, angị hi ọbọọchẹ dahịhile ịlaa, ọhịhị nyaa-á la kpakpa ka, ọngọ họ ang ọnyịịla tị ka juwa hị, chajị ọ ya ọmịmyị nyamwụ kpụnịrọm.

⁵Ụdụ ri ang ọ-pịrị ọngịnyị ju. Alịpyọ-ọnụ kaa hi ọbọọchẹ, ịị mwụ ịnyọ kaka. Ị lala igu à ri angịnyị, ịngịngịhyẹ-ẹ́ẹ̀ nwaa kaka. Ịnyị à du kị kaa kụrụ ẹpwụma datị-datị yaa ji ekpeleji nya ịlaa lẹ.

⁶Ụka tị juwa wẹ ị-ịlahị ká angị ri alagba wuu ka kpa angịlẹ kị waa hu utungguru, ị ka kpaa họ byaa yẹkẹẹ, Anụ ri enyi gu obyi lẹ, anụ angị nu angịkịla ang-ụdụ ju ụjị ha ịlọnụ. Anụ me kanụ kịnyaa juwa kpụ ụdụ bwula ọ-họ angịnyị ri pyịyọọ-ọ́?

⁷Lụka ọmwaa, angịlẹ kaanụ ayịdang kpaa uri ka wuleji wirim kaka yẹ rịrịịnụ, nunu ang ịlẹ kanụ la wuu hiinu. Ọọwa, anụ ka kụ abwabwọ juwa ju uhi che kpákpakpaakpa lẹlẹ.

⁸Anụ tị́ jẹ lẹ, anụ pwọ alụma datị-datị ugu. Angị ihihi nya alụwa tị̀tị ka pwọọnụ ugu ugbẹnyị, chajị anụ nwụ iru nya angịnyị nwụ, anụ họ alodehe bala epweji datị-datị tụ alụwa wuu ọkwọ onyobyi.

⁹Anụ ri enyi gu obyi lẹ! Anụ kpụ ụdụ pwụụpwụụ bwula ọ-họ angịnyị ri. Anụ ya ụdụ chị àjẹ ju ẹpwa nyanụ, ká ang oluhi-uhi ọhẹ-ẹ́ ka wunu ọyị myị kaka.

¹⁰Anụ tị kpa oyoyi wẹ ugbiyegu nyanụ, ya ọhịhị nya ịlọnụ ta ayịreji bwula ọlẹ kanụ ta ẹpwụma datị-datị ayịreji lẹ.

¹¹Ajwọ ri ajwọ ịlẹ kanụ kpa me ebe nyanụ, ị ka ri ibeenu tụụnụ pyịpyị chajị nya ang onyobyi nyanụ, akịnawụ nyanụ ka chịịnụ arụ ịnyịnyị.

¹²Anụ ri enyi gu obyi lẹ! Anụ nwụ pweji nyanụ lokpoko ịlẹ kanụ ye bwula ọ-họ angịnyị agbụrụ, bala angịnyị ọnwụnwụ.

¹³Alụma datị-datị nwụ ịlaa lụkụrwọ ododu ịnọ kị ka la ang, ụkụrwọ ịịwa tị rụ ila kpụ agbụ pwụrwẹ-pwụrwẹ, Amkpaa Agụgụ à họ du kọ lịnyị lẹ.

¹⁴Ị-ịlahị, angị jẹ jaabwọ ká Amkpaa lụmẹ kaka ba kà ju iru myị odehe pwẹẹpwẹẹ jaabwọ ká enyi kaa myị ihu ịtụka.

¹⁵Anụ ri enyi gu obyi lẹ, anụ angị tụ ere yi ọngịnyị ọọnanụ. Anụ tụ ere rịraa gbee kị gbu ere, chajị kanụ ka yaa jaabwọ kị yi ịpwụ ji lọhị-lọhị.

¹⁶Oyoyi ka ri nyanụ ịnyịnyị kpá wẹẹ! Ánụ ka la ihi ụka ọọwa kaka, Anụ ka nwa ere juwa yata gboogbòogboo, Amkpaa ka yẹnụ akama, ihi ọlẹ kanụ la ene ka yẹ ri oyoyi hanụ.

¹⁷Anụ tị́ jẹ lẹ, anụ tụrụ ekeji ilipyinu nya iLibanọn chị e-eji! Ị tị̀tị ka kpanụ beji ịnyịnyị. Anụ ta iyo ịlụwa ayịreji, anụ nwụ angịnyị bala ọ-ta epweji ịlẹga myị ẹga ayịreji, ang onyobyi ọlịnyịnyị ka chị uhi junu lẹ.

¹⁸“Ukpeku tị́ ju apyobwuna nya ịyẹ kpá lẹẹ mẹ? Ọngịnyị ehe à tị́ kpụ ụbwọ họọ, ang nya ọnọọkịla ojiga-à ri lẹ, ọngọ kpa ụbwọ họọ dahịhilọọ kpá tị-ị̀ wẹẹ, ọ dahịhile ojiga ọ-jẹ ya ẹla ka.

¹⁹A ri enyi gu obyi lẹ! Ahụ ọngọ wẹẹ wụrụ ukpeku nya okoji kọ ka wuleji kaka dang ụbwọ lee ịnya ẹjwọ kọ ka wo lang. Anụ ya kpá ka ukpeku ka jẹ-ẹ̀ ya irya nya Amkpaa dodehe-é? Okpoko onyoowuru bala okpoko ịgọm ị ya kwọọ hịla-hịla ịịwẹ odu lẹ, ị́ la ọhịhị juwa ka.

²⁰Amkpaa juwa u-Ube nyamwụ, alodehe wuu ā bà tọọọ i-ijata nyamwụ.”