Read idege ỊHABAKUKU 3 Bible Online

ỊHABAKUKU 3 - idege bible

ỊHABAKUKU 3

¹Ụka ọhẹ lẹ, am ịHabakuku à raabwọ yẹkẹẹ,

²Amkpaa ee, m̀ wo ohi oruru nyang, ụkụrwọ ẹbyẹbyị ịlẹ ká họ du kam ju uhi nyang. Ụkụrwọ ịtụka ịlẹ kaa họ gbalẹ-gbalẹ lẹẹ, họ ịlịnyị loyi nyahị chẹẹ mẹ, à ju agbama ju, tị yẹ ahyẹẹrwẹrwa nyahị chẹẹ mẹ.

³Ohe Oluhye, à wẹẹ warị myịmyị bwu ọpyị nya Ẹdọm myịmyị, Ahụ Ọngọ Ọlịgọgọ juwa wẹ bwu ikiti nya ịParan. Ụmụmẹ nyang myị uhye-ọgba pwẹẹpwẹẹ, ị jam gwogbo hang ẹ-ẹga myị ẹga nya odehe.

⁴Ahụ ayịdang chị ahị ịraapya lala ẹnụ, ahịgboo juwa hụ́ myịrị-myịrị bwu ẹpwụtụbwọ nyang, ẹga ká ọngịrị ọtụka nyang ji.

⁵Amkpaa, à du ẹdụrụ inyibyi ji ịlahị nya ịlọng, à kpa akama tụ ịlọng da ẹ-ẹkpe-ẹkpẹ warị.

⁶Ụka ká godayị chịng, odehe hụ́ jigi-jigi, ọ-mwụrụ yọyị nyang kem du ká alụma datị-datị juwa che kpákpaakpa. Ịgbọdọ i-bwu orogo-orogo bwuru pwụrwẹ-pwụrwẹ, ikiti ịlẹ kị juwa gbalẹ-gbalẹ pwọ pẹẹpẹẹ, ụgbẹyị ọlẹ kaa chị ọngịrị nyang ehe juwa pyịyọọ.

⁷M̀ yẹ ká ala iKuchan juwa kpa igbeene a-abwabwọ, Ala iMidiyan juwa ju uhi hụ́ kpákpaakpa.

⁸Amkpaa ee, Ihu ā wụ ẹjẹ ta ugbeene lẹ-ẹ́? Ẹla nya ihu ịtụka-à jung agbama lẹẹ lẹ-ẹ́? À kụ anyịrẹ ị-họ ẹga nyang, kpa ọkụrụ-kụrụ wẹ angịnyị nyang.

⁹À gba uda nyang kpehe bwu ẹpwụ nya ọhyanggba, go ịcha kụ uda ká da, enyi ologo ā kpa be ọ̀ba nya Ihu bala ịba ichiche lẹ.

¹⁰Ụka ká ịgbọdọ yẹng, ị ju uhi che jigi-jigi. Ukpenyi ọtụka-ọtụka do, enyi oleji bene kpum̀, ágbụ ogugu nyamwụ nwa ka uhye gbọnọ-gbọnọ.

¹¹Ẹnụ bala ọya godayị kpọọ ụka ká ịcha ịlẹ ká da yẹ hwoó kam̀ lagaga, ká ụwangga ọ-chị ahị ịraapya nyang kam̀ pyii.

¹²À chẹwụ kam̀ bwu ọpyị lagbama oluhi-uhi. À tụ́ alụma datị-datị wuu ata tudu eje ẹ-ẹpwụ nya ikẹjẹ-awụrụ nyang.

¹³À kpehe nyọka chị angịnyị nyang da, tụ adịrahụ ọlẹ ká chụ. À kpa olegbeju nya alọkwọ nọnọ, à ta ọngịrị nyamwụ ayịreji wutẹ-wutẹ.

¹⁴Angịdẹwụ wẹ tuuu lala igbachịwụ kị ka nyiihi epepe, ahị nwaa gbọ̀ọ ịwa nyị ka ye ikpehika wu du ọnụ lẹ, à tị kpa ang-abwọ ang-abwọ nyaa ịlaa taa ayịreji.

¹⁵À jẹdịyẹ bwu ẹpwụ nya Ihu ọtụka la anyịrẹ nyang, enyị ọtụka ọwẹ chị awụụ pwụtụ-pwụtụ.

¹⁶M̀ wo ẹlẹwẹ lẹ, ugbodu gum ene, ịnyịrọ chem dadaada, ịnyịrọ nyam gbu oje-oje, ata hụm nyewu-nyewu. M̀ hị hụ kpọọọ gbe ọ-ka yẹ ụka ká Ohe Oluhye ka yẹ aluji nyahị ịwẹ kị wẹẹ beehi ẹpwa akama.

¹⁷Ó-ri ká ikiledu-ú nwụnwụ ka, ká alakọnụ-ụ́ nwụnwụ ka, ká olivu-ú tị̀tị nwụ ka, ká ang-ẹrụ ịkịla ọhẹ-lọhẹ-ẹ́ háha ka, bala ịkpịlọ o-gbugbu, ká ịna-á hi ji ẹpwụ iku ji ka,

¹⁸m̀ ka chị ọkẹkẹnị kpọkpọọkpọ. M̀ ka chị ọkẹkẹnị chajị Ohe Oluhye à ri ọngọchịmda lẹ.

¹⁹Amkpaa Ọngọlahị kaa ya ọngịrị ham, ọ họ kam ya ata rịrị eje giri-giri lala apyị. Ọ kpam lokpunyi kpoye nya ịgbọdọ ọlẹ ri nya olegbeju nya angị mwu eje. Ị ka du ogum dịrẹ abwọ ọrịrị ọlẹ.