Read idege ỊSẹfaniya 2 Bible Online

ỊSẹfaniya 2 - idege bible

ỊSẹfaniya 2

¹Anụ alụma ọ-jẹ oyi nya ẹla ka ee, anụ tụ ịlọnụ michi kanụ tụ irya nyanụ chị awụlẹ mẹ.

²Anụ họ ịnyị liwe ọlẹ kọ hi hanụ-ụ̀ wẹ mẹ, ene ká agbama ọtụka nya Amkpaa ka hireji wẹ uhye nyanụ tụụnụ hụrụ lala ewoo nya ang, ene ká ẹnụ ọọwa ka pwụ eji mẹ.

³Anụ angị la dụmwọ ịlọpyị ọlẹ, kanụ-ụ̀ ju ihi nya ehile nya Amkpaa, anụ bịlẹ Amkpaa kọ ka chịnụ da mẹ. Anụ họ abwẹla ọlakpakpa bala ọ-kpa ịlọnụ keji ha Amkpaa. Ọhẹka ọ ka chẹwụ keenu hi agbama nyamwụ ẹnụ kọ wẹẹ ka ta ang wuu ayịreji.

⁴Ọngọngọhẹ-ẹ́ ka hi e-epweji nya ịGasa ka, epweji nya Achịkẹlọn ka kpụ̀ egwawụ-egwawụ. Ị ka ku ala Achịdọdụ rụ lakụ-lakụ hi ẹnụ tuhye, epweji nya Ẹkịrọn lẹ, ị ka dọọ abwọ pwụrẹ-pwụrẹ.

⁵Anụ ala iFilisitiya ee, anụ angị kụ ọnụ-enyi, anụ ri enyi gu obyi lẹ! Amkpaa cheje nyọka yẹnụ akama lẹ. Anụ ala iKenan-ń gba hi akama ọwẹ koo, Amkpaa ka yẹnụ akama gbee ká ọngọngọhẹ nyanụ-ụ́ ka be myị ka.

⁶Ọpyị nyanụ ọlọnụ-enyi ọwẹ ka dụwa ri amẹ-amẹ ká angịgbikpịlọ ka kpa ịkpịlọ nyaa ga ri bala ọ-ka nwụ ẹpwang ẹga kị ka ya ịkpịlọ nyaa ju.

⁷Ala iJuda ịlẹ kị la ogbugbu ka ya ọpyị nyanụ la. Ị ka kpa ịkpịlọ nyaa ri ụ-ụwa. Ị ka nune lodu ẹ-ẹpwang ịlẹ ká ala Achịkẹlọn rụnyẹ rụ hi. Amkpaa Ohe Oluhye nyaa ka haa ọnahị, bala ọ-ka họ ká ang wuu ka há haa myịmyị.

⁸Amkpaa Agụgụ yẹkẹẹ, M̀ wo jaabwọ ká ala iMowabụ kpa angịnyị nyam họ, bala jaabwọ ká ala Amọn do angịnyị nyam juwa hwàhwa nyọka nu ọpyị nyaa la lagbụrụ.

⁹M̀ jam ya nya ịlẹhị-ịlẹhị nyori jaabwọ ká am Amkpaa Ohe Oluhye nya ala Isirẹlụ jam hịhị lẹ, iMowabụ bala Amọn á ka jẹ-ẹ̀ be myị kaka, ị ka ta ayịreji gbanggbang lala ịSọdọm bala iGomora. Ọpyị nyaa ka yẹ ri ị̀gàāmā-ị̀gàāmā bala ụjẹ nya ịma, ị ka ta ayịreji gbe oyi myị oy, angịnyị nyam ịlẹ kị ka hi la ogbugbu ka wụ ang-ụdụ nyaa wụ bala o-nu ọpyị nyaa la.

¹⁰Ịịwẹ ala iMowabụ bala ala Amọn à ka ye uri nya ọbọọchẹ ohihi nyaa lẹ. Uri ọwẹ ri ajị nyọlẹ kị do angịnyị nyam am Amkpaa Agụgụ bala ọ-kpaa họ.

¹¹Amkpaa ka chị uhi jwaa. Ọ ka ta ijiga nya alodehe wuu ayịreji. Ụka ọọwa, alụma ọnyị myị ọnyị ka gbịgba họọ, ọ-ọpyị myị ọpyị ọlẹ kị kụ.

¹²Anụ ala Itiyopyiya ee, Amkpaa ka nwụnụ ịnyịnyị.

¹³Amkpaa ka kpa ọngịrị nyamwụ ta ọpyị nya Asiriya ayịreji, ká iNineve ẹpwa-ụtụrụ nyamwụ ka kpụ egwawụ-egwawụ, ụwa ka da luhwo-luhwo.

¹⁴Epweji kpá kọọ hi ọbọọchẹ ene-ene, ka yẹ ri ẹga ọ-ga ri ang nya iyo ịlẹpwa. Ụwa ka ri ẹga ká iyo ịlẹpwamẹ ụma ọnyị myị ọnyị ka wẹ kaka kụ. Epwii bala ịchịnụ odu ka kụ ụwa juwa be ẹkọ bwu ẹpwang ị-kpụ egwawụ-egwawụ ịlụwa. Ajeyi ka tụ ọnang ịlụwa ku, ekeji nya isida ịnyịịla-ịnyịịla ịlẹ kị ri igbilo nya ebe ịlụwa ka gba kụ odehe ha enyi bala ẹnụ.

¹⁵Epweji nya aleju ọlẹ ịnọ kọ nwa ịlọmwụ gẹdẹ ene-ene, ká alụwa kụ lokpunyi juwa byi ịlaa epweji ọhẹ nyị́ gụ ịnyịwa odehe kaka. Tị yẹ-ẹ̀ wẹ mẹ, ọ kpụ egwawụ-egwawụ lẹ, ọ ri ẹpwa nya iyo ịlẹpwamẹ lẹ, angị chịpwụrụ bwu ụwa wuu, hụlọ ẹhụ jwọọ bala ọ-chị kéè.