Read idege ỊSẹfaniya 3 Bible Online

ỊSẹfaniya 3 - idege bible

ỊSẹfaniya 3

¹IJerusalẹm epweji nya angị la egbeju-ọngịrị ọwẹ lee! Alụwa ri angị ji libyi bala ọ-kaa ba alịnyaa-ịnyaa ẹtẹ, ị ri enyi gu obyi lẹ!

²Alụwa-á myị ke ụrụ la Amkpaa, ị́ myị wo ọmẹjẹ ka, ị́ myị dahịhile Amkpaa lọkịlẹtụ nyaa ka, ị́ myị-ị̀ bịlẹ ụbwọ ọdada bwu ẹga nyamwụ ka ịnyịnyị.

³Alegbeju ịla iJerusalẹm lala egabẹ ịlẹ kị juwa warụ teleko nya iyo ịlẹ kị ye wu ri, angịleje ịluwa chahị nyànya nya okpoko lala ikirọm ịlẹ ka imyi nwụ. Ị́ị ri ang hi nọ u-uhye gbe alụtụrụ ka.

⁴Alọmwụ ịlụwa ri angị hi ọbọọchẹ, ị kaa họ ílà. Angịkiliya kpa ibyi wẹ Ube nya Amkpaa bwula ọ-pyị ehile ọgbẹna nyọka kpa la ang.

⁵Amkpaa tị juwa e-epweji ọwẹ wẹẹ. Ọwa kaa họ ang ọ-la kpakpa, ọ́ọ̀ họ ang onyobyi ka. Ẹnụ myị ẹnụ, ọ kaa họ ang opwoku ha angịnyị nyamwụ, angị họ ang onyobyi ịlẹpwụ nyaa tị juwa họ ang onyobyi kịlahị-ịlahị, la ọ-jẹ oyoyi kpong-kpong ka.

⁶Amkpaa yẹkẹẹ, M̀ gu ẹpwụma lụmẹ-lụmẹ cheji lẹ. M̀ ta egwalọ bala ebe iluhye nyaa ayịreji gbanggbang, epweji nyaa kpụ egwawụ-egwawụ, opeje nyaa chị nyóoo, ọngọngọhẹ-ẹ́ẹ̀ chịpwụrụ bwu ụwa kaka, ọngọngọhẹ-ẹ́ be bwu ụwa myị ka.

⁷M̀ me kpá ká angịnyị nyam ka jum ihi, kị ke ụrụ la ụbwọ ọlẹ kam wẹẹ gbilaa ụ-ụrụ, ịnọ m̀ tị́ ka hịnyọ la ọ-yaa akama lẹ. Jaabwọ myị abwọ kam yaa akama ka ba, ị tị juwa charịnya nyọka họ ang onyobyi kịlahị-ịlahị.

⁸“Anụ angịnyị nyam, anụ godayị kpọọọ gbe ẹnụtụrụ ọlẹ kam ka gbe ẹla ju alepwoja wuu mẹ. M̀ nwụlanọ nyọka tụ alepwoja bala alọpyị ọnyị myị ọnyị guru chajị kam ka wụ́ agbama ọtụka-ọtụka nyam taa lẹ. Ila nya agbama nyam ka ta odehe wuu ayịreji.

⁹“Ụka ká ẹnụ ọọwa-á wẹ, m̀ ka họ ká ẹla ọlọnụ nya alụma ọnyị myị ọnyị ka la charị-charị. Ị ka gbịgba ham am Amkpaa lawụlẹ wuu lẹlẹ.

¹⁰Angịnyị nyam ịlẹ kị nyi epepe ka ẹga ọhwẹẹ lala oye-ihu nya ala Itiyopyiya wẹwẹ ka warị kaka ha ọhaha ham.

¹¹Ụka ọọwa, anụ angịnyị nyam-ḿ tụtụm ka la egbeju-ọngịrị tam kpụ oyoyi ka junu kaka. M̀ ka gba ọng myị ọng ọlẹ kọọ hi obọchẹ bala o-hu ịlọmwụ ngana-ngana chịịrụ hi ẹpwụ nyanụ. Ánụ tụtụm ka hi ọbọọchẹ ọlịnyị ọ-ọgbọdọ nyam kaka.

¹²M̀ tị ka bà hi angị la dụmwọ hụwa ọ-ọpyị nyanụ. Angịịwa ka warị wẹ ẹga nyam kam ka daa ụbwọ.

¹³Ala Isirẹlụ angịnyị nyam ịlẹ ka hi lọhịhị-ị́ ka họ ang onyobyi kaka, ị́ ka me ọnọọkịla kaka, ị́ tị ka da angịnyị lụgbaa kaka. Ị ka ye ang ri bala ọ-hụ lokpunyi, ọngọngọhẹ-ẹ́ ka chị uhi jwaa kaka.”

¹⁴Anụ ala Isirẹlụ ee, anụ mwu eje kanụ chị ụkwa dọọọ! Anụ ala iJerusalẹm ee, anụ chị ọkẹkẹnị kanụ kpa ọkịlẹtụ nyanụ wuu yụya mẹ!

¹⁵Amkpaa kpụba la ọ-yẹnụ akama lẹ. Ọ tụ aluji nyanụ wuu kịnyaa hiinu lẹ. Amkpaa Adịrahụ nya ala Isirẹlụ juwa tanụ, ánụ tụtụm ka chị uko nya akama ọhẹ ọka chịnụ ọgụ kaka.

¹⁶Ụka juwa warị ị-ịlahị kị ka byi ala iJerusalẹm ya anụ nyị ju uhi kaka, anụ ala ịSayọn, anụ nyị myị ká abwọ nyị chịịnụ pyẹpyẹ ọọ-la uhi ojuju kaka.

¹⁷Amkpaa Ohe Oluhye nyanụ juwa tanụ, ọ ka kpa ọngịrị nyamwụ kụrụ hanụ. Ọ ka la irya ọnyịịla ẹ-ẹga nyanụ, ọ ka ya ọhịhị onyeewe hanụ, ọ ka mwu eje bala ọ-chị ọkẹkẹnị junu.

¹⁸Amkpaa yẹkẹẹ, Anụ angị kaa bida lụka nya ọhụhụ nya ụya ọyaya, m̀ kpa uko nya akama rụ hiinu lẹ, ị́ ka chị oyi junu kịlahị kaka.

¹⁹Ụka juwa warị ị-ịlahị, kam ka yẹ angị tụụnụ pyịyị akama. M̀ chị angị la dẹwụ-dẹwụ bala ọ la ọngọdụbwọ ka da, m̀ ka kpa angịlẹ kị wu kpa rụ nya anyịhị nyà tịrẹkpẹ wẹ ẹpwa. M̀ ka yẹ oyoyi ọlẹ kị hu jwaa ka ri ihi ọlala. M̀ ka họ ká alodehe wuu ka mịla oja haa.

²⁰Ụka juwa warị ị-ịlahị, kam ka kpa angịnyị nyanụ ịlẹ kị nyi epepe tụ epwoja ịkịla da wuu nyà tịrẹkpẹ. Ụka ọọwa, m̀ ka họ kanụ ka lehe bala ọ-la ẹnyị ọnyịịla ẹ-ẹga myị ẹga nya odehe ọlẹ wuu. M̀ ka họ ānụ ka kịlahị ẹ-ẹpwụ nya ang myị ang ịlẹ kanụ juwa họ wuu kpụ ānụ ka kpẹhị nya ịlọnụ yẹ gede-gede.