Read idege ỊHAGAYỊ 1 Bible Online

ỊHAGAYỊ 1 - idege bible

ỊHAGAYỊ 1

¹Ụka ọhẹ ẹ-ẹpwụ nya ẹka oheeye nyọlẹ ká ịDarịyọsị ri adịrahụ ọtụka nya ọpyị nya iPechiya, Ohe Oluhye du ọlọmwụ ịHagayị ẹrụ. Ẹnụtụrụ ọhọhẹ nya ọya ọharwọnyẹ nya ẹka ọwẹ Amkpaa-à dọọ ẹrụ ọọwa tọ iSerubabẹlụ ịgọvụnọ nya ala iJuda ọnyị nya iChiyalutiyẹlụ bala iJochuwa olegbeju okiliya ọnyị nya iJehosadakị lẹ.

²Ụka ọọwa, Amkpaa Agụgụ byi ịHagayị yẹkẹẹ, “Angịlẹ juwa ya ụka ọlẹ nyaa pwoku ọ-ka ma Ube nya Amkpaa nwụ lẹka.”

³Ọọ-lajị nya oyaya ọọwa lẹ, Amkpaa du ịHagayị ẹrụ ọlẹ tọ angịnyị nyamwụ yẹkẹẹ,

⁴Ịyẹ tị́ du kaanụ lịlọnụ kụ ẹpwa ịlẹ kanụ nwụ gbịlẹ-gbịlẹ wẹ lẹẹlẹẹ, ká Ube nyam am tị kpụ egwawụ-egwawụ dụwẹ mẹ?

⁵Ánụ yẹ iwe-ahụrụ nya ịlọnụ-ụ̀ wẹ ka-á?

⁶Ịnọ anụ hụ ajẹ nya ang-ẹrụ kpá bwọbwọọbwọ, ánụ tị ye wụ myị ẹpwụtụbwọ ka. Anụ ye ang ka ri kpáà wẹẹ, ọ́ tị la gbuu ka kpụnụ ka. Anụ ye ere ka nwa ịnyịnyị kpáà wẹẹ, ọ́ tị la pịlẹ kpụ̀ ọ-ka wunu ọnụ ka. Ang ịkụrụ-kụrụ nyanụ-ụ́ họ ịnyịrọ lanụ gbigbiigbi myị ka. Anụ ye uri nya ụkụrwọ ọlẹ kanụ họ wuu kpá myị ịnọ lẹ, anụ tị kpa kaka ju ọ-ọwáa.

⁷Anụ wụla iwe-ahụrụ nya ịlọnụ yẹ kanụ jẹ ang odudu ká ang ịwẹ wuu wẹẹ họ ẹ-ẹga nyanụ mẹ.

⁸Anụ wule kele ka ikiti kaka tụrụ ekeji kanụ kpa nyà kaka ma Ube nyam am Amkpaa nwụ mẹ. Ánụ họ ịnyị lẹ, ụwa-à ka hám lẹ anụ ka gbịgba ham jaabwọ kọ pwoku lẹlẹ.

⁹“Anụ dahịhile kanụ ka ye ang-ẹrụ wụ lụmẹ-lụmẹ bwu ẹrụ nyanụ, ánụ tị ye myị ẹpwụtụbwọ ka ịịlẹ pwụchẹkẹ. Ịlẹ kanụ kpakpa nyà pwụ ẹpwa kpá, m̀ daa igbachịwụ hụrụ. Anụ jẹ ang odudu kam họ ịnyị-ị́? Ang odudu ri Ube nyam am Amkpaa Agụgụ kpụ egwawụ-egwawụ dụwẹ, ọng myị ọng nyanụ tị wẹẹ chị ịga ju ẹpwa nya ịlọmwụ ọnwụnwụ.

¹⁰Ịnyị à du ká enyi-í do kpụ ịngịngịhyẹ ka há ọ-ọpyi myị kaka lẹ.

¹¹Am à kpa ẹnụ ọchangịrị ọtụka ọwẹ wẹ uhye nya ọpyị ọlẹ tụ ịgbọdọ bala ẹrụ nya igbi bala ịnya alakọnụ bala ịnya olivu nyanụ bala ang-ẹrụ ọnyị myị ọnyị wẹ lẹ. Ẹnụ ọwẹ chị angịnyị ehe bala iyo ileji bala ang myị ang ọlẹ kanụ maga nyọka wụ ẹ-ẹrụ.”

¹²Ọọwa lẹ, iSerubabẹlụ bala iJochuwa bala angịlẹ kị nyà bwu ịBabịlọn wuu à ju ihi nya ẹrụ ọlẹ ká Amkpaa Ohe Oluhye nyaa du ọlọmwụ ịHagayị taa lẹlẹ. Ọọwa, ị juwa ju ihi nya Amkpaa lẹlẹ.

¹³Ụka ọọwa, ịHagayị à ya ẹrụ ọlẹ ká Amkpaa dọọ je angịnyị yẹkẹẹ, “Amkpaa ya ọwa nyị juwa tanụ.”

¹⁴Amkpaa chị irya nya iSerubabẹlụ ịgọvụnọ nya ala iJuda bala iJochuwa olegbeju okiliya bala angịlẹ kị nyà bwu ẹpwụ nya ọnyọhị oriri ahị-une. Ọọwa, ị wẹ kaka dọmwụ nyọka nwụ Ube nya Amkpaa Agụgụ Ohe Oluhye nyaa lẹlẹ.

¹⁵Ị dọmwụ nya ụkụrwọ ọọwa ẹnụtụrụ iwo imiiye da ine (24) nya ọya ọharwọnyẹ ẹ-ẹpwụ nya ẹka oheeye nyọlẹ ká ịDarịyọsị dọmwụ nyori adịrahụ ọtụka.