Read idege ỊHAGAYỊ 2 Bible Online

ỊHAGAYỊ 2 - idege bible

ỊHAGAYỊ 2

¹Ụka kọ pwụ ẹnụtụrụ iwo imiiye da ẹnụtụrụ ọhọhẹ nya ọya ọharwiye nya ẹka oheeye ọwẹ-ọwẹ, Amkpaa du ịHagayị ọlọmwụ myịmyị.

²Ọ du ịHagayị ẹrụ nyị tọ iSerubabẹlụ ịgọvụnọ nya ala iJuda bala iJochuwa olegbeju okiliya tụ angịlẹ kị nyà wuu wo yẹkẹẹ,

³“Angịhyẹ nyanụ juwa kị kpịtịya jaabwọ ká Ube Ịgọgọ ọlẹ kpẹ̀hị kaka ba lụka onyogo nyamwụ wẹẹ-ẹ́? Ányị ọ tị́ lanụ ẹ-ẹhị-ị̀ wẹ mẹ? Ọ́ me ang ọlahịchịng ọhẹ-lọhẹ kaka!

⁴Am Amkpaa Agụgụ tị jam byinu anụ iSerubabẹlụ bala iJochuwa bala anụ alọpyị ọlẹ wuu ya ọkịlẹtụ ā kpụnụ enyi kpong-kpong ka. Anụ kịnyaa lụkụrwọ ọhọhọ mẹ. M̀ juwa tanụ.

⁵Jaabwọ kam myị ọnụ nyọka juwa tanụ ụka kanụ gba kpehe bwu ọpyị nya Ijipiti lẹ, m̀ juwa ịnyịnyị wẹẹ. Anụ chị uko kaka.

⁶“Ụka kọ nọ chẹẹ, m̀ ka hụ́ uhye-ọgba bala odehe tụ ịpyị bala Ihu ịtụka jigi-jigi.

⁷M̀ ka hụ́ epwụma datị-datị wuu jigi-jigi. Ọọwa, ị ka tụ ang-ụdụ nyaa wuu tuu wẹ ẹgẹlẹ lẹ, m̄ ka yaa myị̀ Ube nyam ọlẹ lẹlẹ.

⁸Okpoko onyoowuru bala okpoko ịgọm olodehe ọlẹ wuu ri nyam.

⁹Ụ́hị nya Ube Ịgọgọ onyeewe ọlẹ ka kpẹ̀hị gụ ịnya onyogo wẹẹ. Am̀ ẹgẹlẹ ā ka ya okpunyi ha angịnyị nyam lẹ. Jaabwọ ká am Amkpaa Agụgụ ya à wẹ lẹlẹ.”

¹⁰Ụka ọọwa, Amkpaa Agụgụ myịmyị ya ẹla ta ịHagayị ọlọmwụ ẹnụtụrụ iwo imiiye da ẹnụtụrụ ohene nya ọya ohikichu ẹ-ẹpwụ nya ẹka oheeye nya adịrahụ oriri nya ịDarịyọsị.

¹¹Ọ byi ịHagayị yẹkẹẹ, “Tọ angịkiliya wo kị wẹ ịtọ ọlẹ jaabwọ ká oyaya nya ehile ri wẹẹ,

¹²‘Ó-ri ká ọngịnyị á ya iyo ọlịgọgọ ọlẹ kị ya kịla iya bwẹhị ẹ-ẹpwụ nya awụrụ nyamwụ juwa chịpwụrụ kam̀, kọ ya awụrụ ọọwa kịla ịkaa lee ang oriri ọmyị̀myị lee ere lee ida lee ụma nya ang oriri ọkịla, ọọwa du ká ang oriri ọọwa ka lịgọgọ myị ịnyịnyị-ị́?’ ” Ụka ká ịHagayị tọ angịkiliya ịtọ ọwẹ, ị wẹ ya nyị ehe.

¹³Ọọwa, ịHagayị à taa wo yẹkẹẹ, “Ọngọlẹ kọ kpa ibyi ọọ-la ọlẹ kọ ya ịnyịrọ gu ogu tị bẹẹ? Ó-ri ká ọngọọwa-á ya ịnyịrọ kịla ọhẹ nya ang oriri ịwẹ, ọọwa du ká ang ọọwa ka ju ibyi ịnyịnyị-ị́?” Angịkiliya wọọ yẹkẹẹ, “Ịnọọ, ang ọọwa ka ju ibyi ịnyịnyị.”

¹⁴Ọọwa, ịHagayị à byaa yẹkẹẹ, Amkpaa ya ịwẹ-ịwẹ alụma ọlẹ bala ụkụrwọ ọlẹ kịị họ nyaa la a-ahị nyọwa lẹ. Ang myị ang ọlẹ kịị nyị kaa ya kịla iya họwa wuu nyị ri ang o-ju ibyi.

¹⁵Amkpaa yẹkẹẹ, “Anụ me irya ju iwe-ahụrụ nyanụ ọkẹkpẹ wẹẹ. Ene kanụ-ụ̀ dọmwụ nyọka ma Ube nya Amkpaa nwụ,

¹⁶ánụ kele ka ogu nya igbi nyanụ lirya nyọka ye myị obwuhu imiiye, ookpokpo kẹnẹ-kẹnẹ anụ tịị ye lẹ. Ánụ hu ang kele nyọka ye ere chị myị egba iwo ịrụ bwu ọta-ere nyanụ, ẹgba iwo imiiye kẹnẹ-kẹnẹ anụ-ụ̀ ye lẹ.

¹⁷M̀ bịrị ang-ẹrụ nyanụ wuu—m̀ họ ị họ ákpichi bala ọ-da ebwubwu, m̀ do ekpawẹ kaka taa ayịreji, ánụ tị myị yẹ irya da nyà wẹ ẹga nyam ka.

¹⁸Bwu alẹ kọ ri ẹnụtụrụ iwo imiiye da ẹnụtụrụ ohene nya ọya ohikichu ọlẹ kanụ ya itiwe nya Ube nyam yeji kpá wẹ lẹ, anụ-ụ̀ wụlayẹ jaabwọ ká iwe-ahụrụ nyanụ ka la kịlahị mẹ.

¹⁹Anụ tị́ ya ajẹ nya ang-ẹrụ nyanụ wu kpá lẹ. Alakọnụ bala ikiledu bala ipomegraneti bala olivu ịlẹrụ nyanụ á tị nwụ lẹka. M̀ tị jam myị ọnụ hanụ ya bwu ọlẹẹlẹẹ kịlahị lẹ, m̀ ka wahị kụrụụnụ lẹ.”

²⁰Ẹnụtụrụ iwo imiiye da ẹnụtụrụ ohene ọọwa-ọọwa, Amkpaa ya ẹla ta ịHagayị ugbabwọ oheeye

²¹yẹkẹẹ, Byi iSerubabẹlụ ịgọvụnọ nya ala iJuda mẹ, ọ hi pyịnyẹng kam ka hụ́ uhye-ọgba bala odehe jigi-jigi lẹ.

²²M̀ ka pwọ ịdịrịhụ nya alepwoja datị-datị ọmwụ cheji, kam ka nu ọngịrị nya ọpyị ọkpakpa nyaa. M̀ ka kpa ang ịrụnyẹ ị-kpa dẹwụ bala angị kwaa kụ nọnọ. Anyịrẹ ka gbu, angị kụ anyịrẹ ịịwa wuu ka jahị dawụlẹ nwụ awụlẹ.

²³Ẹnụtụrụ ọọwa, m̀ ka hu iSerubabẹlụ ọnchẹ nyam ri adịrahụ[1] Opwoku irya nyam, chajị am Amkpaa Agụgụ à chwọọ lẹ.