Read idege ỊSẸKARAYA 1 Bible Online

ỊSẸKARAYA 1 - idege bible

ỊSẸKARAYA 1

¹Ụka ọhẹ ẹ-ẹpwụ nya ọya ọhaneku nya ẹka oheeye ọlẹ ká ịDarịyọsị ri adịrahụ ọtụka nya iPechiya, Amkpaa du ọlọmwụ ịSẹkaraya ẹrụ ọlẹ. ỊSẹkaraya ri ọnyị nya iBerekiya, adamwụ ọgbahị ri Ido.

²Ụka ọọwa, Amkpaa byi ịSẹkaraya kọ ka ya ẹrụ ọlẹ kọ dọọ tọ angịnyị ịịlẹ, Am Amkpaa Agụgụ wụ ẹjẹ lụmẹ-lụmẹ ta adanụ igogo anyị.

³Ma, ọlẹẹlẹẹ lẹ, m̀ jam byinu ya anụ nyà tịrẹkpẹ wẹ ẹga nyam mẹ aalẹ, m̀ tị̀tị̀ ka jahị kpata wẹ ẹga nyanụ kam ka danụ ụbwọ.

⁴Ānụ họ lala adanụ igogo anyị kaka. Lụka nyaa lẹ, alọmwụinyogo ya ẹrụ nyam jaa, byaa ya nyị pẹhi ụgbẹyị nya ọhịhị ọtịpyọ kịị nyị hịnyọ la ang onyobyi ọhọhọ mẹ. Ị́ tị myị ke ụrụ lam lee ọ ju ẹla nyam ọọwa ihi ka.

⁵Adanụ igogo anyị-ị́ jam daalẹ kaka. Alọmwụ ịịwa-á tị lọhịhị daalẹ kaka ịnyịnyị.

⁶Ọna ịlẹ kam du alọmwụ anchẹ nyam kaka daa bala ehile ịlẹ kam ya du kịla wuu tị wu adanụ igogo anyị. Ụka ọọwa, ịwa ayịdang jẹ kpụ ị yẹ irya da, juwa yẹkẹẹ, Ee, ahị à wụrụ akama ịlẹ chịlọhị ọgụ lẹ. Amkpaa Agụgụ yẹhị akama ịlẹ pwoku ọhọhọ ịtịpyọ nyahị bala jaabwọ kọ ya ọwa nyị ka họhị.

⁷Ụka ọhẹ, ẹ-ẹpwụ nya ẹnụtụrụ iwo imiiye da ẹnụtụrụ ohene nya ọya iwo kụrụ ookpokpo ọlẹ kọ ri ọya nya ịchẹbatị nya ẹka oheeye nyọlẹ ka ịDarịyọsị ri adịrahụ ọtụka, Amkpaa-à ya ẹrụ ọlẹ ham am ịSẹkaraya lodu ẹ-ẹpwụ nya ọyị ọ-yẹ a-arụrụ lẹ.

⁸Lodu ọọwa, m̀ yẹ ọngọhẹ kọ juwa kụ ụnyịrẹ ọnyọmịla. Ọ jẹ kaka godayị ẹ-ẹpwụ nya ekeji ịmatụlụ ọ-ọkpọọ ọhẹ. Anyịrẹ ịkịla ji ẹkpẹ nyamwụ. Ọhẹ nyaa lọmịla, ọkịla la bwuru-bwuru. Ohihi lowuru. Ọnyọnyọọnyị nyaa la ọngọ kwọọ kụ.

⁹Ụka ọọwa, m̀ to olegu-ẹrụ ọlẹ kọ wẹẹ ya ẹla tam wo yẹkẹẹ, “Ayịbahị ee, ị tị́ kpa anyịrẹ ịwẹ wẹ kị ka họ anyị-ị̀?” Ọọwa, ọ wẹm yẹkẹẹ, “M̀ juwa ka mẹ etu nyaa jẹng.”

¹⁰Ọọwa, ọlẹng ọlẹ kọ godayị ẹ-ẹpwụ nya ekeji ịmatụlụ à ya jem ya Amkpaa nyị du anyịrẹ ịwẹ kaka ga wụla odehe yẹ lẹlẹ.

¹¹Ọọwa, angị kụ anyịrẹ ịkịla à tịrọnụ ya je olegu-ẹrụ nya Amkpaa ọlẹ kọ dayị ẹ-ẹpwụ nya ekeji ịmatụlụ yẹkẹẹ, “Ahị ga tụ odehe da wụlọọ yẹ wuu lẹ, ahị yẹ nyori odehe wuu nọ kem lokpunyi.”

¹²Ọọwa, olegu-ẹrụ nya Amkpaa-à yẹkẹẹ, “Amkpaa Agụgụ ee, à wụ ẹjẹ ta iJerusalẹm bala epweji ịla iJuda ẹ-ẹpwụ nya ẹka irwiye gbẹgbịlẹ myị lẹ! Ọ tị́ ka nọ da ka ụka oyina ene ká ka yẹ ahyẹẹrwẹrwa nyaa-à?”

¹³Ọọwa, Amkpaa-à ya ẹla lọnahị bala lomyi ọ-kpụ ọngịnyị ẹjẹ ta olegu-ẹrụ ọlẹ kọ wẹẹ ya ẹla tam lẹlẹ.

¹⁴Lẹ, olegu-ẹrụ ọọwa-à byim yẹkẹẹ, “Kele ká ya dodehe mẹ, Amkpaa Agụgụ ya ọwa nyị la ọháha ọtụka-ọtụka ẹ-ẹga nya iJerusalẹm epweji nyọwa ọlẹ kịị nyị ri Ọgbọdọ nya ịSayọn.

¹⁵Ọwa nyị tị wụ ẹjẹ ọtụka-ọtụka ta alepwoja ịkịla ịwẹ kii nyị hụ lokpunyi wẹ. Ọ ya agbama ọpyịnyẹng kọọwa nyị ju ta angịnyị nyọwa lẹ, alepwoja ịịwa nyaa kụ uhye nya ọọwa yẹ angịnyị nyọwa akama kpoye nya oyi lẹlẹ.

¹⁶“Lẹẹlẹ, Amkpaa ya ọwa nyị nyà tịrẹkpẹ chị epweji iJerusalẹm ọgụ kọọwa nyị ka yẹ alụwa ahyẹẹrwẹrwa lẹ. Ọ ya nyị ka myịmyị-ị̀ nwụ Ube Ịgọgọ nyọwa bala ọ-ka ma epweji nya iJerusalẹm nwụ wẹẹ.”

¹⁷Olegu-ẹrụ ọọwa byim ya am nyị ya ịnyịnyị yẹkẹẹ, “Amkpaa Agụgụ ya ang nyị ka há ha epweji nyọwa myịmyị wẹẹ. Ọ ya ọwa nyị ka hu iJerusalẹm ọlẹ kọ ri ịSayọn nya epweji nya ịlọwa, kọọwa nyị ka da alụwa ụbwọ.”

¹⁸Ụka ọkịla kam hu ẹhị hwaa, m̀ yẹ àchụ̀ nya iyo ine.

¹⁹Ọọwa, m̄ tọ olegu-ẹrụ ọlẹ kọ wẹẹ ya ẹla tam wo yẹkẹẹ, “Etu nya àchụ̀ nya iyo ịlẹ bẹẹ?” Ọ wẹm yẹkẹẹ, “Àchụ̀ ịwẹ ku ọmwakpa nya ẹpwụma ịnyịịngịrị ilodehe ịlẹ kị nyi ala iJuda bala ala Isirẹlụ bala ala iJerusalẹm epepe.”

²⁰Ọọwa, Amkpaa-à mẹ angị hyà ụwa angị ine ịhyẹ kị kpa ọjị ọhyụwa jẹm lẹlẹ.

²¹M̀ tọọ wo yẹkẹẹ, “Ịịyẹ ị tị warị kị ka họ-ọ̀?” Ọ wẹm yẹkẹẹ, “Alụma ịlẹ kị ta ọpyị nya iJuda ayịreji bala o-nyi alụwa epepe wẹẹ, ịwa angị hyà ụwa ịwẹ à warị kị ka chị uhi ju bala ọ-taa ayịreji gbanggbang lẹ.”