Read idege ỊSẸKARAYA 10 Bible Online

ỊSẸKARAYA 10 - idege bible

ỊSẸKARAYA 10

¹Anụ raabwọ bịlẹ Amkpaa kọ do enyi hanụ lụka nya ụrwẹnụ mẹ, ọ tị ka do hanụ ịnyịlẹhị. Ọwa-à kaa họ ká egbamwụ kaa nyí enyi bala ọ-họ ká enyi kaa do du ká ang-ẹrụ nya ọng myị ọng kaa há lẹ.

²Anụ tị́ jẹ lẹ, angịnyị-ị̀ ka ọlọmwụ ka ẹga nya ekpeku, alegino yẹ ọmwụ ọnọọkịla, ẹla ọlẹ kị ya nyọka ju angịnyị ẹjẹ ri ododu. Lẹẹlẹ, angịnyị juwa chị ịbalo lala ịkpịlọ, juwa yẹ akama chị ị́ la ọngọgbikpịlọ ka kpaa ụgbẹyị ka.

³Amkpaa yẹkẹẹ, “Agbama nyam juwa wuru jahị da angị wẹẹ gbenu lala angịgbikpịlọ lụmẹ, M̀ ka yẹ alegbeju ịwẹ akama. Am à la ala iJuda lẹ, m̀ wẹ kam ka kpaa lala ịkpịlọ nyam lẹ. M̀ ka họ kị ka lọngịrị kwangkwang lala anyịrẹ ị-kpa dẹwụ.

⁴Ẹ-ẹpwụ nya ala iJuda alegbeju nya angịnyị nyam à ka bwu lẹ. Alegbeju ịịwa ka lọngịrị lala ẹjwọ ọ-chị ịnawụ achụ, ị ka godayị giri-giri lala ang-abwọ ị-kpa dẹwụ.

⁵Ala iJuda ka kụrụ lala angịdẹwụ ịtụka, ị ka jẹ̀ aluji nya chẹẹchẹẹ jaabwọ kịị kpa ata ba ịwa. Ị ka dẹwụ chajị Amkpaa juwa taa, ị ka kụrụ aluji ị-kpa anyịrẹ dẹwụ.

⁶M̀ ka ju ala iJuda ọngịrị, M̀ ka chị ala Isirẹlụ da. M̀ ka ye ahyẹẹrwẹrwa nyaa, kpaa nyà tịrẹkpẹ wẹ ẹpwa nyaa. Ọ ka lala am nyaa nyẹẹkpẹ daa ẹnẹnẹhẹ lẹka. Am kpakpaakpa à ri Amkpaa Ohe Oluhye nyaa lẹ, M̀ ka wẹ abwọ ọrịrị nyaa.

⁷Ala Isirẹlụ[7] ka lọngịrị lala angịdẹwụ ịtụka, ọkịlẹtụ ka kpaa nyiii lala angị nwa ere. Anyị ịtụma nyaa ka kpịtịya nya ọkụrụ-kụrụ ọwẹ, ịwa tịtị ka chị ọkẹkẹnị ọọ-lajị nya ang ịlẹ ká am Amkpaa họ-ọ̀ wẹ.

⁸M̀ ka wụrụ angịnyị nyam lẹhị-ẹhị, kam ka taa guru, chajị m̀ chaa da lẹ. Ị ka pyẹ ju iru jaabwọ kị la ene-ene.

⁹Ịnọ m̀ nyaa epepe pwụụpwụụpwụụ ju ka ụma datị-datị, ị tị ka kpịtịya nya pwụ ẹga ịlụrụ ịlẹ kị ji. Ịwa bala anyị nyaa ka juwa lọhịhị kị ka nyà tịrẹkpẹ wẹ Isirẹlụ.

¹⁰M̀ ka kpaa nyà bwu Ijipiti bala Asiriya, kam ka yaa kụ ẹpwa i-Giliyadị bala iLibanọn gbee kị ka pyẹ myị ụwa wuu pwẹẹpwẹẹ.

¹¹Ị́ chịpwụrụ bwu ẹpwụ nya akama lala ihu ọ-mwụ gbụrụ-gbụrụ, m̀ ka họ enyị o-gu agbụ ka kpụba. Ụjẹ-ẹmwụ olihu ịNayịlị ka chị ọhụ kịra-kịra. Ọbọọchẹ ohihi nya ala Asiriya ka myị, ọngịrị ọtụka nya ala Ijipiti ka cheju.

¹²M̀ ka ju angịnyị nyam ọngịrị lịlọm, kị ka gbịgba ham bala ọ-ba ọmẹjẹ nyam jẹ.” Ẹla ọlẹ ká Amkpaa ya à wẹ lẹlẹ.