Read idege ỊSẸKARAYA 11 Bible Online

ỊSẸKARAYA 11 - idege bible

ỊSẸKARAYA 11

¹Anụ ala iLibanọn ee, anụ wụrụ agbayị ị-ka ịnyanụ da dodo, ká ila-ā jẹ wẹ kaka rụ ekeji nya isida nyanụ ịwẹ kanụ yẹ!

²Anụ ekeji nya ịsayịpịrẹsị, anụ be ẹkọ ida lala angịnyị mẹ, chajị ekeji nya isida ta ayịreji, ekeji ilihi-ihi ịnyịịla ịwẹ ịnyị! Anụ ekeji nya ooku ịla ịBachan tị bẹẹ? Anụ ya eko kpụ ọnụ ịnyịnyị mẹ, chajị ị tụrụ ipyinu ochowu kpịlẹẹ ọtụka ọlẹ ju eji lẹ!

³Anụ wo wẹẹ—angịgbikpịlọ juwa jida, amẹ ịjwọọ́jwọọ́ ịlẹ kị la ta ayịreji wuu lẹ! Ánụ ke ụrụ, anụ ka wo egabẹ kị lalẹẹ warụ, chajị ipyinu ịlọkpọọ nya ịJọdan myị kụrwa-kụrwa lẹ.

⁴Ụka ọhẹ, Amkpaa Ohe Oluhye nyam byim yẹkẹẹ, Họ lala ahụ nyaa ri ọngọgbikpịlọ ịlẹ kị juwa ka kpa kaka nwụ mẹ.

⁵Angị ra ịkpịlọ ịwẹ kaa nwaa la ọ-jẹ ọjụjụ ka. Angịlala ịlẹ kị gyaa ra tịtị chị ọkẹkẹnị ju okpoko nyaa juwa yẹkẹẹ, Ẹẹla-à lẹẹ wẹẹ ka-á! M̀ kpụ ụdụ ugbẹnyị lẹ! Angịgbikpịlọ ịlẹ kị laa la lụbwọ-lẹta lẹ, ị́ jujwo nya ịkpịlọ nyaa ka.

⁶Ịnyịnyị ọ la ẹ-ẹga nyam am Amkpaa lẹ. Ḿ ka myịmyị-ị̀ yẹ ahyẹẹrwẹrwa nya alodehe kaka. M̀ ka tụ angịnyị ehe aanịna ahị ju awụlẹ. Adịrahụ nyaa ịwa wuu ka kpaa yẹ ụhị. Ị ka kpa akama onyobyi-obyi wẹ ọpyị ọlẹ, ḿ tị ka chị ọngọhẹ nyaa da ka.

⁷Ụka ọọwa, alọhị nya ịkpịlọ ịwẹ à dirom lẹ, m̄ gbe ịkpịlọ ịlẹ kị wẹẹ nwụlanọ gbe ụka kị ka nwaa lẹlẹ. M̀ go ị́gọ́dọ́ imiiye ju ụbwọ. M̀ wụrụ ọ́gọ́dọ́ ọhẹ Ọnahị, m̀ wụrụ ọkịla Oliku-iku. Ọọwa, m̄ juwa kpẹhị rịrị ịkpịlọ ịịwa lẹlẹ.

⁸Ẹ-ẹpwụ-ẹpwụ nya ọya ookpokpo, m̀ ku angịgbikpịlọ angị ịta ịhyẹ ịlẹ kị juwa bam ẹtẹ. M̀ wụ ịkpịlọ ịịwa ayịdang ẹjẹ wụ ịnyịnyị. Ẹla nyaa chịm aga pwẹẹpwẹẹ.

⁹Ọọwa, m̄ byi ịkpịlọ ịwẹ yẹkẹẹ, “Ḿ ka ri ọngọ gbenu gbe kaka. Ọkpịlọ ọhẹ-lọhẹ lẹpwụ nyanụ kọ juwa ka gbu lẹ, ọ gbu mẹ. Ọlẹ kọ tị juwa ka ta ayịreji lẹ, ọ ta mẹ. Ịlẹ kị hi lẹpwụ nyanụ ā wu awụlẹ ri lala ijwo-à wu iyo mẹ.”

¹⁰Ọọwa, m̄ hu ọ́gọ́dọ́ nyam ọlẹ kam wụrụ Ọnahị-ị̀ wẹ lẹ, m̄ mwọọ eku nyọka tụ iro ọlẹ ká Amkpaa nwa ta alẹpwụma datị-datị wuu biri lẹlẹ.

¹¹Iro ọọwa myị ẹnụ ọọwa. Alọhị nya ịkpịlọ ịwẹ juwa yẹm lẹ, ị jẹ bwula ọhọhọ nyam nyori Amkpaa-à wẹẹ kpam ya ẹla lẹ.

¹²Ọọwa, m̄ byaa yẹkẹẹ, “Ó-ri kọ hanụ lẹ, anụ nwụm uri nyam mẹ. Ọ́ tị haanụ kaka lẹ, anụ kpọọ ụ-ụwa mẹ.” Ọọwa, ị wa okpoko onyoowuru iwo ịta jum ụ-ụbwọ pwụchẹkẹ lẹlẹ.

¹³Ụka ọọwa, Amkpaa byim yẹkẹẹ, “Ya okpoko ịwẹ chị kele ka ẹga ọ-ya okpoko ju u-Ube Ịgọgọ mẹ.” Ọọwa, m̄ go okpoko onyoowuru iwo ịta ịwẹ kị myaa lẹhị kị hu mem-m̀ wẹ chị kele ka ẹga ọ-ya okpoko ju olube nya Amkpaa lẹlẹ.

¹⁴Ọọwa, m̄ mwụ ọ́gọ́dọ́ oheeye ọlẹ kam wụrụ Oliku-iku eku lẹ, owolawụlẹ nya ala iJuda bala ala Isirẹlụ à myị lẹlẹ.

¹⁵Ọọwa, Amkpaa-à byim yẹkẹẹ, “Họ lala ahụ nyaa ri ọngọgbikpịlọ myịmyị wẹẹ. Ugbẹnyị lẹ, ọngọgbikpịlọ ohideeji ā tị ka ri lẹ.

¹⁶Ọwẹ ka ri ọ-kpa chabwọ jaabwọ kam wẹẹ ka hu ọngịnyị ohideeji ọhẹ ri Adịrahụ nya ọpyị ọlẹ. Ọngọọwa ka lala ọngọgbikpịlọ ọlẹ kọ kaa kpahị ju ịkpịlọ ịlẹ kị juwa kpa ịlaa kaka gbu lee obyibyi ka. Ọọ ya utoji ha ịlẹ ká ang họ lee ọya ang oriri ha ịlẹ kị la kpịra-kpịra ka. Ọ dachichi kaa wu ịkpịlọ ịlẹ kị hye gụ wuu nwụ ri bala ọ-hụlaa achụ́ hwẹẹhwẹẹ.

¹⁷“Ọngọgbikpịlọ ohideeji ọwẹ ri enyi gu obyi lẹ! Ọ nyẹẹkpẹ da ịkpịlọ nyamwụ! Ẹwụ ā ta ọngịrị nya ugburubwọ nyamwụ ayịreji, kị gwọọ ang ẹ-ẹhị nya upwuriri. Ụbwọ nyamwụ ā gbuba lẹtẹ-lẹtẹ, ká ẹhị nya upwuriri nyamwụ á kpụ idu chwiichwii.”