Read idege ỊSẸKARAYA 12 Bible Online

ỊSẸKARAYA 12 - idege bible

ỊSẸKARAYA 12

¹Ẹla ọlẹ ri ẹrụ ọlẹ ká Amkpaa du kaka ya dodehe chajị nya ẹpwụma nya Isirẹlụ. Amkpaa-à họ uhye-ọgba bala odehe bala ọ-họ ká angịnyị ehe dịhụ lẹ. Ọ yẹkẹẹ,

²M̀ juwa ka họ ká iJerusalẹm ka lala ẹkpẹ nya ere ọlẹ ká alẹpwụma ịkịla ịlẹ kị kụ dagaga jwọọ wuu ka nwa kị ka juwa ya. Ụka ká aluji nya alụma ịwẹ-ẹ́ dagaga ju iJerusalẹm, ị tịtị ka ya epweji ịkịla ịla iJuda dada ịnyịnyị.

³Lụka ọọwa, m̀ ka họ ká iJerusalẹm ka lala ẹjwọ olilo nmọ̀ndọ̀ọọ ọlẹ kọ ka ri olo ha alodehe. Ẹpwụma ọhẹ-lọhẹ kọ maga nyọka hwọọ hwáa, ẹjwọ ọọwa ka haa ang. Alodehe wuu ka yẹ julawụlẹ nyọka dẹwụ tụ iJerusalẹm pyịpyị.

⁴Ụka ọọwa, m̀ ka chị uhi ju anyịrẹ nyaa bala ọ-họ ká angị kụ anyịrẹ ịịwa ka wogbu. Ala iJuda tị lẹ, m̀ ka kpẹhị rịraa. M̀ tị ka kpụ anyịrẹ nya aluji nya idu chwiichwii.

⁵“Ụka ọọwa, alogang ịla iJuda ka juwa ya ẹ-ẹpwụ-ẹpwụ yẹkẹẹ, Amkpaa Ohe Oluhye Agụgụ à ya ọngịrị ha angịnyị nyamwụ ịlẹ kị kụ iJerusalẹm lẹẹ lẹ.”

⁶“Ụka ọọwa, m̀ ka họ alogang ịla iJuda ka lala ila ọlẹ kị kaa hu da ka ẹpwụ nya ọ̄rụ́ lee ẹpwụ nya ẹrụ nya ogu nya igbi kọọ rụ ila pịlẹtẹẹ. Ịnyịnyị ị ka ta alẹpwụma ịdagaga ju wuu ayịreji jẹkpẹ da jahị da lẹlẹ. Ala iJerusalẹm tị ka hụ lokpunyi e-epweji nyaa.”

⁷“Am Amkpaa ka họ ká angịdẹwụ nya ala iJuda ka kụrụ jene, chajị ká ihi ọlẹ ká anyị ịtụma nya iDevidi bala ala iJerusalẹm la-á ka lụmẹ gụ ịnya ala iJuda ịkịla ka.

⁸Lụka ọwẹ, m̀ ka chẹwụ ke ala iJerusalẹm. Angịlẹ kị la dẹwụ-dẹwụ gụ ẹ-ẹpwụ nyaa wuu ka lọngịrị jaabwọ ká iDevidi la lụka nyamwụ. Anyị ịtụma nya iDevidi ayịdang ka kpẹhị rịrị lala am Ohe Oluhye, lala olegu-ẹrụ nyam am Amkpaa ọlẹ kọ wẹẹ kpaa ụgbẹyị.

⁹Lụka ọọwa, ang ọlẹ kam chị eje kam ka họ ri ọ-ka ta ẹpwụma ọnyị myị ọnyị ọlẹ kọ wẹ kaka mwẹla ta iJerusalẹm ayịreji.”

¹⁰“M̀ ka họ ká anyị ịtụma nya iDevidi bala angịkịla ịla iJerusalẹm ka la olegu nya ahyẹẹrwẹrwa bala ịnya abwọ ọrịrị. Ị ka yẹ ọngọlẹ kịịwa ayịdang nwụ bwula ọ-ya ụwangga gwọọ. Ọọwa, ị ka bida chajị nyamwụ jaabwọ ká angịnyị-ị̀ bida nya ọnyị nyamwụ olookpokpo. Ị ka bida onyuujujwo lala ọngọlẹ ká ọnyị ọlẹng nya ọgbanyẹ nyamwụ gbu.

¹¹Lụka ọọwa, ịda ọlẹ kị ka ba i-iJerusalẹm ka lụmẹ lala ịda ọlẹ kị ba chajị nya ịHadadị-ịRimọn ụteeji nya iMegido.

¹²Ala Isirẹlụ wuu ka bida onyobyi-obyi. Alugbiyegu ọnyọnyọọnyị ka juwa bida ebwebweebwo. Alẹng ka hụhụ bida ẹ-ẹga ọdatị hi anyang. Alugbiyegu nya anyị ịtụma nya iDevidi tụ alugbiyegu nya ịNatan ka họ ịnyịnyị.

¹³Alẹng i-bwu ugbiyegu nya iLivayị ka hụ datị hi anyang. Alẹng i-bwu ugbiyegu nya iChimeyi ka hụ datị hi anyang.

¹⁴Ịnyịnyị-ịnyịnyị alẹng bala anyang i-bwu ugbiyegu ihihi ịkịla wuu à ka hụ datị hi awụlẹ juwa bida lẹ.”