Read idege ỊSẸKARAYA 13 Bible Online

ỊSẸKARAYA 13 - idege bible

ỊSẸKARAYA 13

¹Amkpaa Agụgụ yẹkẹẹ, “Ẹnụ ká ụka ọọwa-á pwụ eji, ị ka wụrụ ẹmwụ-enyi ọhẹ nyọka hụ́ anyị ịtụma nya iDevidi bala ala iJerusalẹm wuu chajị kị ka la charị-charị bwu ẹpwụ nya ang onyobyi ọhọhọ bala ijiga ịkpụkpụ nyaa.

²Lụka ọọwa, m̀ ka họ ká ọngọngọhẹ-ẹ́ ka wo ẹnyị nya ekpeku ịlẹ kịị gbịgba ha ụ-ụrụ kaka. M̀ ka taa tuuu hụrụ bwu ọpyị ọlẹ. M̀ ka ku alọmwụ ịnịịkịla rụ gbanggbang tụ alegu inyibyi ịlẹ kịị kpaa họ ụkụrwọ.

³Ó-riri ká ọngọkịla ọhẹ-lọhẹ-ẹ́ dọmwụ nyọka yẹ ọmwụ myịmyị, ịnamwụ bala adamwụ ka byọọ ahụ nyị ka gbu chajị ahụ nyị juwa kpa ẹnyị nya Amkpa ayẹ ọmwụ ọnọọkịla. Ọọwa, adamwụ bala ịnamwụ ị-mọọ-ọ̀ ma à ka ya ẹma gwọọ huruḿḿ lẹ, ọ ka gbu lẹlẹ.

⁴“Ụka ọọwa-á pwụ, ọlọmwụ ọnyị myị ọnyị ka ju oyi nya o-ya ọọwa nyị jẹ-ẹ̀ yẹ ọmwụ. Ọngọhẹ-ẹ́ ka dọmwụ kụrụ awụrụ ọlala ịnya ọlọmwụ nyọka kpa pịrị angịnyị ju kaka.

⁵Ọkọkọ nya ọọwa, ọ ka yẹkẹẹ, ‘Am-ḿ ri ọlọmwụ koo. Ọlẹrụ m̄ ri lẹ. Erụ m̄ kaa wu mwiiji nyọlẹ kị mam gbee daalẹ lẹ.’

⁶Ó-ri ká ọngọhẹ-ẹ́ taa wo yẹkẹẹ, ‘Ee lẹ, ekpuru ịlanyị à tị́ tị̀ tị̄-ị̀ wẹ ọ-ọkịlẹtụ nyang-ǹg?’ ọ ka byaa yẹkẹẹ, ‘Ẹ-ẹpwa nya oligu nyam ị họm ang ịwẹ lẹ.’ ”

⁷Amkpaa Agụgụ yẹkẹẹ, Oge nya ẹwụ ee, wuleji jahị da ọngọgbikpịlọ nyam, ọngọ wẹẹ họ ụkụrwọ ham, ká nwọọ kpịlagada deeji mẹ! Aalẹ, ịkpịlọ ka nyí epepe, m̀ ka taa ayịreji.

⁸Ebwo imiiye ẹ-ẹpwụ nya ebwo ịta nya angịnyị ịlọpyị ọlẹ ka gbu, ebwo ookpokpo kẹnẹ-kẹnẹ à ka hi lẹ.

⁹Jaabwọ ká ọlụdụwa kaa hyà okpoko onyoowuru i-ila kọ kaa hagụ ọọwa, ịnyịnyị m̄ ka nwụ̀ angịnyị ebwo ọhata ọlẹ kọ be-è wẹ rịrị bwula ọ-yaa akama chajị ká abwẹla nyaa ka hagụ ọọwa lẹ. Lẹ, ị ka raabwọ ham lẹ, m̄ ka wẹ abwọ ọrịrị nyaa lẹlẹ. M̀ ka byaa ya ị ri angịnyị nyam, ị tịtị ka ya am Amkpaa nyị ri Ohe Oluhye nyịwa.