Read idege ỊSẸKARAYA 14 Bible Online

ỊSẸKARAYA 14 - idege bible

ỊSẸKARAYA 14

¹Anụ kpẹhị chịng mẹ, ẹnụtụrụ ọlẹ ká Amkpaa hunọ juwa warị lẹ-ẹ̄. Ẹnụ ọọwa, ang ịlẹ wuu kị wụwụ kpa rụ bwu iJerusalẹm wẹẹ, ị ka kpaa warị kị ka gaa gịla awụlẹ a-ahị nyanụ gede-gede.

²Amkpaa ka tụ alẹpwụma datị-datị ju lawụlẹ kpaa dẹwụ ta ala iJerusalẹm. Alẹwụ ịịwa ka kụrụ iJerusalẹm. Ị ka waa ẹpwa wụ bala o-wu anyang chị beji lagbụrụ. Ị ka go ẹhya nya angịnyị ịlụwa kpa ka agba. Ma, angị hi ẹhya ohihi tị ka hi hụ am̀ i-iJerusalẹm.

³Ọọwa, Amkpaa-à ka kele kaka dẹwụ ta alẹpwụma ịkịla ịwẹ jaabwọ kọ dẹwụ ha angịnyị nyamwụ lụka ọkẹkpẹ lẹlẹ.

⁴Lụka ọọwa, ọ ka godayị ọ-Ọgbọdọ nya Olivu ọlẹ kọ ji ọmwẹnụ-ụtụrụ nya iJerusalẹm. Ọgbọdọ nya Olivu ọwẹ ka gu ene imiiye hi awụlẹ kpooó, la apewa nyaa ka dụwa ri ọkpọọ ọtụka-ọtụka bwu ọmwẹnụ-ụtụrụ kaka ju ka ọmwẹnụ-obyi. Ụpa ọhẹ nya ọgbọdọ ọwẹ ka tụ tuuu koye nya ẹtẹ. Ụpa nyamwụ ọkịla ka tụ tuuu ka koye nya edii.

⁵Anụ ka rụnyẹ be bwu ọkpọọ ọwẹ kọ jẹ lalaala ka pwụ Asalụ. Anụ ka rụnyẹ rụ jaabwọ ká adanụ igogo anyị rụnyẹ ụka ká ọpyị ọ-hụ́ jigi-jigi ji lụka ká Usiya ri Adịrahụ nya ala iJuda. Ụka ọọwa, Amkpaa Ohe Oluhye nyam à ka warị la alegu-ẹrụ nyamwụ wuu tụ ịlọmwụ da lẹlẹ.

⁶Lụka ọọwa, ohu ọhọhọ lee eji ọnyirii-nyiri lala orírì-í ka ji ka.

⁷Ahịgboo kem à ka ji ụka ọọwa lẹ. Ó-ri alodu wẹwẹ ukpowu-ú ka ji ka. Amkpaa kẹnẹ-kẹnẹ à jẹ jaabwọ ká ụka ọwẹ ka la lẹlẹ.

⁸Lụka ọọwa, enyi onyeewe ọ-ya ọhịhị ha ka mwụ bwu iJerusalẹm. Ẹhya nya enyi ọọwa ka mwụ ju ka Ihu Ọlịma-ịma. Ẹhya ọkịla ka mwụ ka Ihu iMeditareniya. Enyi ọọwa ka juwa mwụ ụka wuu tụ alinehe tụ alụhyọọ.

⁹Ọọwa, Amkpaa-à ka ri Adịrahụ nya odehe wuu lẹlẹ. Ọwa ụbwọọmwụ kẹnẹ-kẹnẹ à ka ri Amkpaa ọlẹ ká ọng myị ọng ka gbịgba ha lẹ.

¹⁰Ọpyị ọlẹ wuu bwu ịGẹba ẹ-ẹtẹ lalaala ka ju ka iRimọn e-edii nya iJerusalẹm ka dụwa pẹẹpẹẹ lala ụtẹẹji ọgbamgbam. IJerusalẹm tị ka la gedee gụ ẹga ịdagaga jwọọ wuu. Angịnyị ka kwọọ ẹpwa bwu Ogirigba nya iBenjamịn kele ka pwụ ogirigba onyogo bala o-bwu ụwa lalaala ka ju ka Ogirigba Ọlọtụpịrịhyoo yahị da bwu ẹgẹwẹ ka Ube Oluhye nya ịHananẹlụ lalaala ka pwụ ẹga ọ-họ ere nya adịrahụ.

¹¹Angịnyị ka kụ iJerusalẹm lokpunyi. Ụ̀nụ nya akama ọhẹ-ẹ́ tụtụm ka haa kaka.

¹²Amkpaa ka kpa ẹdụrụ onyobyi-obyi kaka jụ alẹpwụma ịlẹ kị dẹwụ tụ iJerusalẹm pyịpyị. Angịịwa ka ri egu kụ lahị kpa ang ri, chajị ịnyịrọ nyaa ka mama pwọ pwọ̀ọ̀ọ̀ ụka kị juwa lahị-lahị. Egbahị nyaa ka wọwọ rụ kporii, alalẹ nyaa tịtị ka mama jwaa ẹ-ẹpwụ ọnụ ịnyịnyị.

¹³Ụka ọọwa, Amkpaa ka chị uhi ọtụka-ọtụka jwaa gbee ká ọng myị ọng ka yụbwọ dụrụ ọọnamwụ kịrẹkpẹ juwa mwẹla tọọ.

¹⁴Ala iJuda ka dẹwụ chẹkpẹ ju ala iJerusalẹm. Ị ka wụ ang-ụdụ nya alẹpwụma ịkịla wụ. Okpoko ịgọm bala okpoko onyoowuru bala ang ịkụrụ-kụrụ ịlẹ kị ka go wuu ka kịlẹhị kịla.

¹⁵Ẹdụrụ onyobyi-obyi ka jụ anyịrẹ bala anyịrẹ-ịkamẹlụ bala ibyiyó bala ụma nya iyo ọnyị myị ọnyị ịlẹ kị juwa ị-ịkampụ nya aluji.

¹⁶Ụka ọọwa, angịlẹ kị hi lọhịhị bwu ẹpwụ nya alẹpwụma ịlẹ wuu kị mwẹla tụ iJerusalẹm pyịpyị ka kele ka ụwa ẹka myị ẹka kaka gbịgba ha Amkpaa Agụgụ lala adịrahụ. Ị ka la Ọhụhụ nya Adáa.

¹⁷Ẹpwụma ọhẹ-lọhẹ am̀ odehe kọ myị kele ka iJerusalẹm kaka gbịgba ha Amkpaa Agụgụ lala adịrahụ ka aalẹ, enyi-í ka do ha alụwa ka.

¹⁸Ó-ri ká ala Ijipiti-í pwa nyọka kele ka la ọhụhụ ọwẹ aalẹ, Amkpaa ka ya ẹdụrụ onyobyi-obyi jwaa jaabwọ kọ ya jụ alẹpwụma ọnyị myị ọnyị ọlẹ kọ myị ka iJerusalẹm ka la ọhụhụ ọwẹ ka.

¹⁹Ẹdụrụ onyobyi-obyi ọwẹ à ri akama ọlẹ ká Amkpaa ka yẹ ala Ijipiti bala alẹpwụma ịkịla ịlẹ kị pwa nyọka ka iJerusalẹm kaka la Ọhụhụ nya Adáa lẹ.

²⁰Ụka ọọwa, ị ka dọmwụ da ụpwụ ba atang ịlẹ kị ya pịlẹ anyịrẹ ya “Ịlẹ ri nya Amkpaa lẹ.” Ẹchụ ị-kpa kpụ́ ang ilube nya Amkpaa ka lịgọgọ ịnyịnyị lala ịja ị-kpa họ ụkụrwọ ẹ-ẹga nya ogidi.

²¹Ị dọmwụ ka chị ịgọ ju ẹchụ ọ-kpa kpụ́ ang ọnyị myị ọnyị ịla iJerusalẹm bala iJuda ha Amkpaa Agụgụ. Ọng myị ọng kọ ka wẹ iJerusalẹm nyọka gbịgba ka kpa ẹchụ ọhẹ bwu ẹpwụ nyaa kpụ́ iyo ịlẹ kị ya kịla iya myị. Alọhị-ị́ tụtụm ka ji Ube nya Amkpaa Agụgụ lụka ọọwa kaka.