Read idege ỊSẸKARAYA 2 Bible Online

ỊSẸKARAYA 2 - idege bible

ỊSẸKARAYA 2

¹Ụka ọkịla kam hu ẹhị hwaa, m̀ yẹ ọlẹng ọhẹ kọ kpa ang ọ-kpa me ang ori ụ-ụbwọ.

²Ọọwa, m̄ tọọ wo yẹkẹẹ, “Ale ā tị́ wẹẹ ka-āà?” Ọ wẹm ya ọwa nyị juwa ka me iJerusalẹm ori kọọwa nyị ka jẹ jaabwọ kịị nyị la udiyo bala o-ju ẹpwụ kaka ba.

³Ụka ọọwa lẹ, olegu-ẹrụ ọlẹ kọ wẹẹ ya ẹla tam à jẹ tụ wẹ ịlahị lẹ, olegu-ẹrụ ọkịla à wẹ kaka tọọ lẹlẹ.

⁴Olegu-ẹrụ nya ọgbanyẹ à byi olegu-ẹrụ ọkịla yẹkẹẹ, “Chị agaga kele ká byi okolobya ọ-kpa ori ọ-kpa me ang ọlaanyị mẹ, ị-ịlahị angịnyị bala iyo ileji ka lụmẹ i-iJerusalẹm gbee ká ụwa-á ka nwa ị ka kụ ẹ-ẹpwụ nya ẹga kị chị ugulọ ju ka. Iru nyaa ka kụ wẹ odehe nya egwalọ.

⁵Amkpaa lịlọmwụ myị ọnụ ya ọwa nyị ka ri ugulọ ọ-chẹwụ ke nyaa dagaga jwaa lala ịla. Ọ ya ọwa nyị tị ka nọ ẹpwa ụ-ụwa taa ẹ-ẹpwụ nya ụmụmẹ nyọwa.”

⁶Amkpaa yẹkẹẹ, “Am à nyiinu epepe ju ka ịkịka ine nya odehe ọlẹ wuu lẹ! Ọlẹẹlẹẹ tị lẹ, anụ yegiri kanụ be nyà bwu oye nya ẹtẹ mẹ!

⁷Anụ angị ji ọpyị nya ịBabịlọn wuu, anụ-ụ̀ be rụ bwu ụwa nyà wẹ iJerusalẹm mẹ.

⁸Anụ tị́ jẹ lẹ, ọngọngọhẹ kọ họnụ ịngịngịhyẹ aalẹ, ọngọọwa yụbwọ gum ọ-ọnyẹhị lẹ.” Ẹla ọlẹ ká Amkpaa Agụgụ ya ụka kọ dum ẹrụ ẹ-ẹpwụ nya ụmụmẹ nyamwụ tọ alẹpwụma ịlẹ wuu kị wụnụ ang wụ̀ kpa rụ à wẹ lẹ.

⁹Anụ tị́ jẹ lẹ, Amkpaa lịlọmwụ ka dẹwụ taa. Angị ri anyịhị ịlẹpwa nyaa ẹnẹhẹ lẹ, ka waa ang wụ̀ kpa rụ ịnyịnyị. Ụka kọ lịnyị lẹ, ọng myị ọng wuu à ka jẹ ya Amkpaa Agụgụ nyaa dum ẹrụ ịnyịlẹhị lẹ lẹlẹ.

¹⁰Ọọwa, Amkpaa-à yẹkẹẹ, “Anụ da iwuru kanụ chị ọkẹkẹnị mẹ, anụ ala iJerusalẹm! Anụ tị́ jẹ lẹ, m̀ wẹẹ wẹ kaka nọ ẹpwa ẹpwarịrị nyanụ lẹ!”

¹¹Ụka ọọwa, alepwoja lụmẹ-lụmẹ ka wẹ ẹga nya Amkpaa chajị kị ka ri angịnyị nyamwụ. Ọ ka nọ ẹpwa ẹpwarịrị nyanụ. Ọọwa, anụ ka jẹ ká Amkpaa Agụgụ à dum ẹrụ tọnụ ịnyịlẹhị lẹlẹ.

¹²Ụka ọọwa, iJuda ka ri nya Amkpaa lụbwọ-lẹta ọ-ọpyị nyamwụ. Ọ ka chụ iJerusalẹm nya epweji ọlẹ kọ họọ gụ wuu.

¹³Angịnyị wuu, anụ ba kem ịlahị nya Amkpaa mẹ. Amkpaa wẹẹ wuleji kpehe bwu ẹpwa nyamwụ ẹga kọ kụ lẹ.