Read idege ỊSẸKARAYA 3 Bible Online

ỊSẸKARAYA 3 - idege bible

ỊSẸKARAYA 3

¹Ụka ọkịla kam yọyị a-arụrụ myịmyị, Amkpaa mẹ iJochuwa olegbeju okiliya jẹm kọ godayị rịrị ị-ịlahị nya olegu-ẹrụ nya Amkpaa. Ohe Onyobyi godayị u-upwuriri nya iJochuwa juwa chị ẹla datị-datị bọọ.

²Ọọwa, Amkpaa-à byi Ohe Onyobyi yẹkẹẹ, “Ohe Onyobyi ee, wo mẹ, am Amkpaa pwà ala ị-chịba nyang ịwẹ deeji! Am Amkpaa ọlẹ kam chụ iJerusalẹm à wẹẹ yalibyi lang lẹ. Ọlẹng ọlẹ tị lẹ, ị gbọọ kpehe lala okoji ọlẹ kị chịpwụra hi ẹpwụ nya ila.”

³IJochuwa kụrụ ịwụrụ ịchịrị-chịrị ụka kọ godayị ị-ịlahị nya olegu-ẹrụ.

⁴Ọọwa, olegu-ẹrụ ọọwa-à byi angịlẹ kị godayị ẹ-ẹga nyamwụ ya nyị pwọ ịwụrụ ịchịrị-chịrị ịwẹ hyọọ mẹ lẹlẹ. Ụka kị họ ịnyị lẹ, ọ byi iJochuwa yẹkẹẹ, “Yẹ mẹ, m̀ hụ ang ịtịpyọ ịlẹ ká họ hụrụ hing lẹ! M̀ tị jam ya ịwụrụ inyewe hang ká ka kụrụ lẹ.”

⁵Ọọwa, am à yẹkẹẹ, “Ị ya apwụ ọkụrụ egbeju nya ọngọkiliya ocheri-cheri kụrwọọ ịnyịnyị mẹ-ẹ̀.” Ọọwa, ị ya kụrwọọ lẹ, ị ya ịwụrụ icheri-cheri kụrwọọ i-ijata nya olegu-ẹrụ nya Amkpaa lẹlẹ.

⁶Ọọwa, olegu-ẹrụ nya Amkpaa-à byi iJochuwa yẹkẹẹ,

⁷Amkpaa Agụgụ ya ó-ri kaahụ nyị ba ehile nyọwa jẹ bala ọ-họ ụkụrwọ ịlẹ kọọwa nyị ya jung ụ-ụbwọ kpẹẹkpẹẹ aalẹ, ahụ nyị ka kịnyaa juwa ri olegbeju ọkpẹhị rịrị Ube nyọwa tụ ọdọda ọdagaga jwọọ. Ọ ya ịnyịnyị ya ọwa nyị ka ya iwe hang kaahụ nyị ka ya ẹla tọwa ụka ọnyị myị ọnyị jaabwọ kọọwa nyị ya ẹga da ha alegu-ẹrụ ịlẹga nyọwa ịwẹ.

⁸Wo mẹ, iJochuwa olegbeju okiliya bala anụ angịkiliya aanamwụ ịkịla. Anụ ri ang-ẹjẹẹ nya ang ịnyịịla ịlẹ kị juwa ka họ ị-ịlahị. Ọ nọ chẹẹ, m̀ juwa ka kpa ọnchẹ nyam ọlẹ kị wụrụ Obwubwu warị.

⁹À tị́ jẹ lẹ, m̀ ya ẹjwọ ọnyịịla ọhẹ nọ i-ijata nya iJochuwa wẹ. Ẹjwọ ookpokpo ịnyị, ọ tị́ ju ụpata[1] irwiye. M̀ ka da ụpwụ u-uhye nya ẹjwọ ọọwa. M̀ ka yịlẹ ang onyobyi ọhọhọ nya alọpyị ọlẹ hụrụ ẹ-ẹpwụ nya ẹnụtụrụ ookpokpo.

¹⁰Ụka ká ẹnụtụrụ ọọwa-á pwụ eji, anụ ka juwa ẹ-ẹpwụ nya okpunyi. Ọng myị ọng nyanụ ka wu ịlọmwụ abwọ myị kpụ anụ ka wụrụ awụlẹ kaka mwụ ịnyọ ụ-ụrụrụ nya alakọnụ bala ikiledu nyanụ lẹ.