Read idege ỊSẸKARAYA 4 Bible Online

ỊSẸKARAYA 4 - idege bible

ỊSẸKARAYA 4

¹Ụka ọhẹ, olegu-ẹrụ ọlẹ kọ lẹẹ kpa ẹla ya tam tịrẹkpẹ wẹ ẹga nyam myịmyị. Ọ hụ́m jigi-jigi lala am nyaa juwa kpa une nọ.

²Ọ tọm wo yẹkẹẹ, “Ịyẹ á tị́ wẹẹ yẹ?” M̀ wọọ yẹkẹẹ, “M̀ yẹ ang ọ-ya itinika rịrị ọlẹ kị kpa okpoko ịgọm họ la itinika irwiye u-uhye nyamwụ. Ọnyọọnyị nya itinika ịwẹ la ẹga ọ-ya ila ju irwiye ịlẹ kị juwa wuru kewu-kewu-kewu. Ẹja nya ida rịrị u-uhye nya ang ọ-ya itinika rịrị ọwẹ ịnyịnyị.

³M̀ yẹ ekeji nya olivu imiiye. Ọhẹ rịrị ịkịka ọhẹ nya ẹja, ọkịla rịrị ịkịka nyamwụ okịla.”

⁴Ọọwa, m̄ tọ olegu-ẹrụ ọwẹ wo yẹkẹẹ, “Ayịbahị ee, etu nya ang ịlẹ kam yẹ-ẹ̀ wẹ tị́ ri anyị-ị̀?”

⁵Ọọwa, ọ yọọ lịtọ tọm yẹkẹẹ, “Ọọwa ri á jẹ ka-á?” Ọọwa, m̄ wọọ yẹkẹẹ, “Ḿ jẹ koo, ayịbahị.”

⁶Ọọwa, ọ byim ya ẹrụ ọlẹ ká Amkpaa nyị tịtọ kam nyị ka ya je iSerubabẹlụ nyị ri yẹkẹẹ, ISerubabẹlụ ee, ọ-ọngịrị nya ẹwụ ọ-ka da myị lee ịnya igbabwọ nya ịlọng à du ká ka kịlahị ka, ma bwula olegu nyam am Amkpaa ịnyị.

⁷Ang ilujwo ị-ịlahị nyang-ńg lụmẹ la kuuu lala ọgbọdọ wẹwẹ wẹẹ, ị́ ka ri ịngịngịhyẹ ẹ-ẹga nyang ka. Ị ka tịrị bwụjẹ-bwujẹ ju eji. Ụka ká ma Ụbe nya Amkpaa nwụ́ kpá, chọọ àchụ, angịnyị wuu ka da iwuru juwa yẹkẹẹ, Ang à há lẹẹ-ẹ́! Ohe Oluhye ā wahị kụrwọọ mẹ!

⁸Amkpaa dum ẹrụ ọkịla yẹkẹẹ,

⁹“ISerubabẹlụ à dọmwụ uji nya Ube nyam Amkpaa lẹ. Ọwa-ọwa-à tị ka chọọ eju ịnyịnyị lẹ. Ụka ọọwa, angịnyị à ka jẹ kam à dung ẹrụ taa lẹ lẹlẹ.

¹⁰“Angịlẹ wuu ká ọmwụ ọdada nya ụkụrwọ ọlẹ laa ẹpẹpẹ chajị nya ọ-la pyịnyẹng nyamwụ ka yẹ jaabwọ ká iSerubabẹlụ juwa me ube ọwẹ kịlahị. Ọọwa, ị ka chị ọkẹkẹnị lẹlẹ. “Itinika irwiye ịlaanyị tị lẹ, ịwa-à ku ọmwakpa nya egbahị irwiye nya Amkpaa ịlẹ kọ kaa kpa wụla odehe yẹ dọgịlẹ ju wuu lẹ.”

¹¹Ọọwa, m̄ tọọ wo yẹkẹẹ, “Ekeji nya olivu imiiye ịwẹ ka ọhẹ rịrị ka upwuriri bala ụpụpịla nya ang ọ-ya itinika rịrị bẹẹ̀? Ị tị́ ku ọmwakpa nya ịyẹ?

¹²Ịyẹ etu nya ábwọ imiiye nya olivu ịlẹ kịị nyà ida tụ́ ọwẹ nya okpoko ịgọm imiiye da kpehe à tị́ ri?”

¹³Ọọwa, ọ yọọ lịtọ tọm yẹkẹẹ, “Ọọwa ri á jẹ ka-á?” Ọọwa, m̄ wọọ yẹkẹẹ, “Ḿ jẹ koo, ayịbahị.”

¹⁴Ọọwa, ọ byim ya ábwọ imiiye nya olivu ịịwa nyị ku ọmwakpa nya alegbeju imiiye ịlẹ ká Ohe Oluhye chụ nyọka myị ẹrụ họọ ọwa Ayịbaba nya odehe wuu lẹlẹ.