Read idege ỊSẸKARAYA 5 Bible Online

ỊSẸKARAYA 5 - idege bible

ỊSẸKARAYA 5

¹Ụka kam hu ẹhị hwaa myịmyị, m̀ yẹ ụpwụ ọhẹ ọlẹ kị waba lala ọba kọ juwa hụ̀ u-uhye-ọhụ.

²Olegu-ẹrụ ọọwa tọm wo yẹkẹẹ, “Ịịyẹ ā tị́ yẹ?” Ọọwa, m̄ wọọ ya ma ụpwụ ọwaba lala ọba m̄ yẹ kọ wẹẹ hụ̀ lẹ. M̀ byọọ ma udiyo nya ụpwụ ọọwa la apatẹ iwo ịta, ẹpwụ ojuju nyamwụ tị la apatẹ iwo kụrụ ịrụ.

³Ọọwa, ọ byim yẹkẹẹ, “Ọlọ ọlẹ kị ya ọnụ nyamwụ deeji ha alọpyị ọlẹ wuu à wẹ lẹlẹ. Ị da ba ụpwụ ọwẹ ẹ-ẹkpẹ ọhẹ ya ọngọngọhẹ ọlẹ kịị nyị́ yi oyi aalẹ, nyị ka ta ọngọọwa ayịreji hi ọpyị ọlẹ. Ẹla ọlẹkpẹ ọkịla nyamwụ ya ọng myị ọng ọlẹ kịị nyị nwà iro ọnọọkịla aalẹ, nyị ka tọọ ayịreji hi ọpyị ọlẹ ịnyịnyị.

⁴Amkpaa Agụgụ ya ọwa nyị juwa ya ụpwụ nya ọlọ ọwẹ du ka ẹpwa nya ọng myị ọlẹ kịị nyị ri oloyi lee ọngọ kaa nwa iro ọnọọkịla. Ụpwụ ọwẹ nyị́ ka tụ hi ụwa ka gbee kịị nyị ka ta ẹpwa ọọwa tụ alụwa wuu ayịreji gbanggbang.”

⁵Ụka ọọwa, olegu-ẹrụ ọlẹ kọ ya ẹla tam lẹẹ à wẹ myịmyị lẹ, ọ byim yẹkẹẹ, “Chẹhị ka yẹ ang ọkịla-à wẹ wẹ́ẹ̀.”

⁶Ọọwa, m̄ tọọ wo yẹkẹẹ, “Ịịyẹ à tị́ị̀ wẹ ene-è?” Ọ wẹm ya nyị udo ịnyị. Ọ ya udo ọwẹ nyị ku ọmwakpa nya ang onyobyi ọhọhọ nya alọpyị ọlẹ wuu.

⁷Ị họ ọnụ oloje-oje kụrụ udo ọọwa. Ụka kị nwụla ọnụ nyamwụ ọwẹ, m̀ yẹ ká ọnyang ọhẹ hụhụ ẹ-ẹpwụ nyamwụ.

⁸Ọọwa, olegu-ẹrụ ọwẹ à yẹkẹẹ, “Ọnyang ọlẹ ku ọmwakpa nya imajẹ ọlala.” Ọọwa, ọ gwọọ gbaá ju ka ẹpwụ nya udo ọwẹ lẹ, ọ ya ọnụ nyamwụ kụrwọọ tịrẹkpẹ birikiti lẹlẹ.

⁹Ụka kam hu ẹhị hwaa, m̀ yẹ anyang imiiye ịhyẹ kị ju achwọ lala ọgbangkịrọ. Ị juwa hụ jahị dam lọhụ ọlachwọ nyaa juwa da lọngịrị pwúkù-pwúkù. Ahyaahị lẹ, ị kpooo ludo ọọwa lẹ, ị hụ̀ rụ lọọlọọ lẹlẹ.

¹⁰Ọọwa, m̄ tọ olegu-ẹrụ ọwẹ wo yẹkẹẹ, “Ale ị tị́ lalẹẹ kpa udo ọwẹ rụ ka-āà?”

¹¹Ọ wẹm yẹkẹẹ, “Ị juwa kpa ka ọpyị nya ịBabịlọn kị ka nwụ́ ẹpwa họọ ụ-ụwa. Ụka kị nwụ́ ẹpwa ọọwa kpá lẹ, ị ka ya udo ọwẹ rịrị ụ-ụwa lẹlẹ.”