Read idege ỊSẸKARAYA 6 Bible Online

ỊSẸKARAYA 6 - idege bible

ỊSẸKARAYA 6

¹M̀ myịmyị yọyị a-arụrụ ụka ọkịla. Ugbẹnyị lẹ, m̀ yẹ ang ịrụnyẹ ịlẹ ká anyịrẹ kaa gbile ine. Ang ịrụnyẹ ịịwa kpehe juwa yahị da warị bwu apewa nya ịgbọdọ imiiye iloje-oje ọnyọmịla.

²Anyịrẹ ịnyịmịla juwa gbile ang ọrụnyẹ nya ọgbanyẹ. Anyịrẹ inyibiri juwa gbile ang ọrụnyẹ oheeye.

³Anyịrẹ inyiiwuru juwa gbile ang ọrụnyẹ ọhata. Anyịrẹ ị-chị ị̀jwịjwọ juwa gbile ang ọrụnyẹ ohene.

⁴Ụka ọọwa, m̀ tọ olegu-ẹrụ ọọwa wo yẹkẹẹ, “Ayịbahị ee, ịyẹ tị́ ri etu nya ang ịrụnyẹ ịlẹ-ẹ̀?”

⁵Ọọwa, ọ wẹm yẹkẹẹ, “Alegu ine[2] iluhye-ọgba à wẹ lẹ. Ị kaa myị ẹrụ ha Ayịbaba nya odehe ọlẹ wuu. Ẹga nyamwụ ị wẹẹ kpehe bwu kaka họ ụkụrwọ nyamwụ lẹ.

⁶Ang ọrụnyẹ ọlẹ ká anyịrẹ inyibiri wẹẹ gbile juwa jẹ ka ọpyị nya ịBabịloniya ẹ-ẹtẹ. Ọlẹ ká anyịrẹ inyiiwuru wẹẹ gbile juwa jẹ ka oye nya ọmwẹnụ-obyi. Ọlẹ ká anyịrẹ ị-chị ị̀jwịjwọ wẹẹ gbile tị juwa jẹ ka ọpyị oledii.”

⁷Ụka ká anyịrẹ ị-chị ị̀jwịjwọ ịwẹ kpehe, ọ chaa kpákpá nyọka ga wụla odehe wuu yẹ. Ọọwa, olegu-ẹrụ ọọwa à byaa yẹkẹẹ, “Ọ̄yā, anụ ga wụla odehe yẹ mẹ ooo! Ọọwa, ị ga wụla odehe yẹ lẹlẹ.”

⁸Ọọwa, olegu-ẹrụ ọọwa-à tị chị ẹkọ wụrụm byim yẹkẹẹ, “Yẹ mẹ, anyịrẹ ịlẹ kị ka kele ka ẹtẹ ka ọpyị nya ịBabịloniya lẹ, ị họ agbama ọlẹ ká Amkpaa ju kpụba lẹ.”

⁹Ụka ọkịla, Amkpaa dum ẹrụ ọkịla byim yẹkẹẹ, ỊSẹkarịya ee,

¹⁰iHeludayị bala iTobiya bala iJedaya anyị ịlẹ kị nyà bwu ịBabịlọn ẹga kị waa kpa ka agba juwa ka kpa ang-ahị nya okpoko onyoowuru bala okpoko ịgọm warị. Aa ye, ká kele ka ẹpwa nya iJosaya ọnyị nya ịSẹfaniya ahyaahị mẹ.

¹¹Aa ya okpoko onyoowuru bala okpoko ịgọm ịlẹ kị ya ha-à wẹ họ okpo, ká ya kụrụ iJochuwa olegbeju okiliya ọnyị nya iJehosadakị e-egbeju mẹ.

¹²Á họ ịnyị lẹ, à byọọ mẹ, Amkpaa Agụgụ ya ọngọlẹ ká ẹnyị nyamwụ ri Obwubwu juwa ka bwu kpehe bwu ẹga kọ ji. Ọwa-à ka ma Ube nya Amkpaa nwụ́ lẹ.

¹³Ọwa-à ka mọọ nwụ lẹ. Ọ ka la ihi opwoku adịrahụ. Ọ ka ri Adịrahụ nya angịnyị nyamwụ. Ọwa-ọwa-à ka ri ọngọkiliya ẹ-ẹchị-adịrahụ nyamwụ lẹ[3]. Ị ka họ ụkụrwọ yẹ ju lawụlẹ lokpunyi.

¹⁴Ị ka ya okpo-adịrahụ ọọwa nọ u-Ube nya Amkpaa nya ang ọ-kpa kpịtịya ha ịHẹladayị[4] bala iTobija bala iJedaya bala iJosaya[5].

¹⁵Ụka ọọwa, angịlẹ kị kụ ẹga ọlụrụ ka warị kaka yụbwọ ju Ube nya Amkpaa ọ-ma nwụ́. Ọọwa, anụ ka jẹ ká Amkpaa Agụgụ à dum ẹrụ tọnụ ịnyịlẹhị lẹlẹ. Ọ ka lịnyị ó-ri kanụ ju ihi nya Amkpaa Ohe Oluhye nyanụ kpẹẹkpẹẹ.