Read idege ỊSẸKARAYA 7 Bible Online

ỊSẸKARAYA 7 - idege bible

ỊSẸKARAYA 7

¹Ẹnẹhẹ ẹ-ẹpwụ nya ọya ohikichu ọlẹ kị wụrụ iKisilẹvụ nya ẹka ohene nyọlẹ ká ịDarịyọsị ri adịrahụ ọtụka, Amkpaa dum ẹrụ ọkịla ọhẹ. Ẹnụtụrụ ohene nya ọya ọọwa kpangga ọ dum ẹrụ ọọwa lẹ.

²Ala ịBẹtẹlụ lẹẹ du ịCharẹsẹẹ bala iRegemẹlẹkị bala alẹng ịkịla nyaa kele ka Ube nya Amkpaa Agụgụ kaka bịlọọ kọ ka wahị kụrwaa.

³Angịwẹ ka tọ angịkiliya ilube nya Amkpaa Agụgụ bala alọmwụ wo yẹkẹẹ, “Ahị tị́ ka kịnyaa juwa bida bala ọ-hụ limyi lọya ọharụ chajị nyọlẹ kị ta Ube nya Amkpaa ayịreji jaabwọ kahị lẹẹ họ gbalẹ-gbalẹ gbee daalẹ lee anyị ahị tị́ ka họ-ọ̀?”

⁴Ẹrụ ọlẹ ká Amkpaa Agụgụ dum kpangga à lẹẹ lẹ.

⁵Ọ byim yẹkẹẹ, “Aa byi alịnyanụ bala angịkiliya mẹ, ọlẹ kịị hụ limyi bala ọ-bida lọya ọharụ bala ọharwiye ẹ-ẹpwụ nya ẹka iwo irwiye ịlẹ kị kam kẹkpẹ lẹ, ọhọhọ nyaa ọọwa-á ri ọ-chị ihi jum koo. Ị họ ọọwa ha ịlaa ịnyị.

⁶Ụka kanụ-ụ̀ la ọhụhụ ịlẹ ịnọ kanụ ka kpa chị ihi jum, anụ juwa mịla ang ri bala ọ-mịla ere nwa chajị nya ẹpwụ ọ-ka wuwu nya ịlọnụ kem.”

⁷Ẹlẹwẹ-ẹlẹwẹ Amkpaa-à du alọmwụ ilene kaka ya ụka ká iJerusalẹm pyẹ pyọ́ọ̀ọ̀, ká angịnyị nọ ẹpwa myị ụwa kpọrịkọọ tụ epweji ịdagaga jwọọ bala ọpyị oledii bala ọpwọpwọ nya ọpyị ilikiti ọlọmwẹnụ-obyi lẹ.

⁸Ụka ọkịla, Amkpaa ya ẹla ta ịSẹkaraya yẹkẹẹ,

⁹“Aa byi angịnyị nyam kanụ chị eje ọkpakpa, juwa họ ọnahị bala ọ-yẹ ahyẹẹrwẹrwa ẹ-ẹga nya awụlẹ mẹ.

¹⁰Ānụ tụ ihu-egu lee anyị-egu lee angga lee alẹbyahị ịlẹ kị juwa ị-ịnyanụ pyịpyị koo. Ānụ me irya nyọka họ ang onyobyi ẹ-ẹga nya awụlẹ ka ịnyịnyị.

¹¹“Angịnyị nyam-ḿ tị myị ju ihi nya ẹla nyam ka. Ị ya arụ kpụ ịla.

¹²Ọkịlẹtụ nyaa-á che nẹẹ kpong-kpong ka lẹ, ị́ myị ke ụrụ la ọmẹjẹ ịlẹ kam ya du alọmwụ ịlụka onyogo warị waa ka. Ịnyị à du kám̀ Amkpaa Agụgụ wụ ẹjẹ ọtụka-ọtụka taa lẹ.

¹³“Jaabwọ kị myị ke ụrụ wo ẹla ọlẹ kam ya taa ka lẹ, ịnyịnyị-ịnyịnyị m̄ wẹ abwọ ọlẹ kị rị ham ka lẹ.

¹⁴M̀ nyaa epepe pwụụpwụụpwụụ lala igbachịwụ kaka ri angga ọ-ọpyị nya alụma ịkịla. Ọọwa, ọpyị ọnyịịla nyaa ọlẹ à dam̀ kpụ̀ egwawụ-egwawụ wuu la ọngọngọhẹ ọ-kụ am kụ kaka lẹlẹ.”