Read idege ỊSẸKARAYA 8 Bible Online

ỊSẸKARAYA 8 - idege bible

ỊSẸKARAYA 8

¹Ụka ọhẹ, Amkpaa Agụgụ myịmyị dum ẹrụ ọkịla ya.

²Epweji nya iJerusalẹm nyị họọwa lụmẹ. Ọ ya ọwa nyị la ọháha ẹ-ẹga nyamwụ nya ịlẹhị-ịlẹhị gbee kọọwa nyị juwa wụ ẹjẹ ta aluji nyaa.

³Amkpaa ya ọwa nyị ka nyà tịrẹkpẹ wẹ iJerusalẹm epweji nyọwa kọọwa nyị ka kụ ụwa. Ụka ọọwa angịnyị nyị ka wụrụ iJerusalẹm epweji ọkpẹẹkpẹẹ nyọwa, nyị tị ka wụrụ ikiti nya Amkpaa Agụgụ Ọgbọdọ Ọlịgọgọ.

⁴Amkpaa Agụgụ ya ịnyịnyị ya ụka ọọwa, alẹng bala anyang ịlẹ kịị nyị chị okwirichi kụnyẹ̀-kụ̀nyẹ nyị ka kpa ọgọdọ chị eji jẹ kaka hụhụ ojiya nya epweji.

⁵Ọ ya ụka ọọwa, anjwo alẹng bala anyang nyị ka myị ụwa kpọrịkọọ juwa kọ ayịlọ.

⁶Amkpaa Agụgụ ya ẹlẹwẹ nyị ka lanụ anụ angị hi nyà bwu agba lala ang olujwo, ma nyị́ tị ri ang ọ-chị ọwa ọha ka.

⁷Amkpaa Agụgụ ya ọwa nyị ka chị angịnyị nyọwa da bwu ịpyị ịlọmwẹnụ-ụtụrụ bala ịlọmwẹnụ-obyi ẹga kịị nyị nyaa epepe ju ka.

⁸Ọ ya ọwa nyị ka kpaa nyà wẹ kaka kụ iJerusalẹm. Ọọwa, nyaa ka ri angịnyị nyọwa lẹ, ọwa nyaa tịtị ka ri Ohe Oluhye nyaa juwa kpẹhị rịraa kpẹẹkpẹẹ bala lụgbẹyị nya ang ọ-họ kpakpa ẹ-ẹga nyaa lẹlẹ.

⁹Amkpaa Agụgụ ya ịnyịnyị yẹkẹẹ, “Ọkịlẹtụ ā kpụnụ enyi ka, kanụ họ ụkụrwọ ọwẹ cheju mẹ. Anụ tị́ wo ẹla ọlẹ ká alọmwụ ya jenu ụka kị ya itiwe nya ẹpwa nyam ọlẹ yeji.

¹⁰Ene kịị dọmwụ nya Ube nya Amkpaa omeme, ọngọngọhẹ-ẹ́ẹ̀ diro ọngịnyị lee iyo oleji kaka họ ụkụrwọ nya okpoko myị ka. Ọngọngọhẹ-ẹ́ẹ̀ họ ụkụrwọ nyamwụ lokpunyi myị ka ọọ-la ajị nya aluji. M̀ tụ angịnyị wuu ahị ju awụlẹ.

¹¹Ọlẹẹlẹẹ tị lẹ, ḿ ka yẹnụ anụ angịlẹ hi lọhịhị wẹ akama jaabwọ kam họnụ lụka ọkẹkpẹ kaka.

¹²“Anụ ka wu ang-ẹrụ nyanụ lokpunyi. Alakọnụ nyaa ka nwụ egbe nyọ́ọ̀nyọ́ọ̀nyọ́ọ̀. Ọpyị nyanụ ka há ang. Enyi ka do ọgwọgụ. Ang ịwẹ wuu ri ahị ịlẹ kam ka wa kụrụ angịlẹ kị lọhịhị lẹpwụ nyanụ.

¹³Anụ ala iJuda bala ala Isirẹlụ ee, ogbalẹ-gbalẹ lẹ alẹpwụma ịkịla kaa kpa akama ọyẹyẹ nyanụ gọlọ ju awụlẹ bwula o-byi awụlẹ yẹkẹẹ, ‘Akama ịlẹ ká ala iJuda bala ala Isirẹlụ yẹ ā yẹ kụrụụnụ.’ Anụ tị yẹ mẹ, m̀ ka chịnụ da lẹ, angịkịla à ka kpa ahị ịlẹ kam ka wa kụrụụnụ wahị kụrụ awụlẹ yẹkẹẹ, ‘Anụ ka pyẹ̀ẹẹ lala ala iJuda bala ala iJerusalẹm.’ Lẹẹlẹ ānụ chị uko lee ọ-myị ká ọkịlẹtụ ā kpụnụ enyi kaka.”

¹⁴Amkpaa Agụgụ yẹkẹẹ, “Anụ tị́ jẹ lẹ, ụka ká adanụ igogo anyị họ ẹla wụm ẹjẹ, m̀ chị eje nyọka yaa akama. M̀ tị yaa akama ọọwa ịnyịlẹhị.

¹⁵Ọlẹẹlẹẹ tị lẹ, m̀ chị eje nyọka wahị kụrụ ala iJerusalẹm bala ala iJuda lẹ.

¹⁶Ang ịlẹ kanụ ka họ ri anụ-ụ́ụ̀ ya ẹla nya ịlẹhị je awụlẹ, kanụ chị eje ịlẹ kị la kpakpa e-ebe ileje nyanụ chajị ká okpunyi ka ji.

¹⁷Ānụ me irya onyobyi jahị da ọngịnyị ehe ọọnanụ ka. Ānụ tị họ ibeenụ ọnọọkịla ka ịnyịnyị. Ang ịwẹ wuu wụm am Amkpaa ẹjẹ.”

¹⁸Amkpaa Agụgụ du ịSẹkaraya ẹrụ ọkịla yẹkẹẹ,

¹⁹“Ọ-hụ limyi ịlẹ kanụ kaa la ẹ-ẹpwụ nya ọya ohene bala ọharụ bala ọharwiye bala okiriwo ene-ene cheju lẹ. Ị ka yẹ ka ri ọhụhụ ị-kpa ya ụya bala ọ-chị ọkẹkẹnị ha angịnyị nya ala iJuda. Chajị nya ọọwa lẹ, ẹla nya ịlẹhị ọyaya bala okpunyi ọhọhọ ā haanụ.”

²⁰Amkpaa Agụgụ yẹkẹẹ, Ị-ịlahị alepwụma lụmẹ-lụmẹ bala angị kụ epweji ịtụka datị-datị ka wẹ iJerusalẹm.

²¹Ụka ọọwa, angị bwu epweji ọhẹ ka byi alepweji ọkịla yẹkẹẹ, Anụ kẹwẹ kahị kaka raabwọ ha Amkpaa Agụgụ kọ ka dahị ụbwọ mẹ. Ahị lẹ, ahị juwa kele.

²²Iru nya alẹpwụma datị-datị tụ angị bwu ẹpwụma ịlọngịrị lụmẹ-lụmẹ ka wẹ iJerusalẹm kaka raabwọ ha Amkpaa Agụgụ kọ ka wahị kụrwaa.

²³Ụka ọọwa, angịnyị angị iwo ịlẹ kị bwu ẹpwụma bala epwoja ịkịla ka wẹ kaka yụbwọ chị ọla iJuu ookpokpo kirikpa ka juwa byọọ yẹkẹẹ, Āhị ju ogu tang chẹẹ mẹ-ẹ̀, chajị ahị wo ya Ohe Oluhye juwa tanụ.