Read idege ỊSẸKARAYA 9 Bible Online

ỊSẸKARAYA 9 - idege bible

ỊSẸKARAYA 9

¹Ọlẹ ri ẹrụ ọlẹ ká Amkpaa du. Amkpaa cheje nya akama kọ ka ya yẹ ala ịHadịrakị, tu epweji nya ịDamasịkọsị. Aalimwawụ nya Isirẹlụ kem à ri nya Amkpaa ka, egbeju-ẹpwa nya ọpyị nya Asiriya ri nyamwụ ịnyịnyị.

²Akama juwa hanụ anụ ala ịHamatị kanụ kụ ba ọpyị ịHadịrakị ba ịnyịnyị. Anụ ala ịTaya bala ịSayịdọn ee, ịnọ anụ jẹ ang kpẹ́ẹ̀, ánụ tị ka be myị ka.

³Alepweji nya ịTaya me egwalọ ịnyịịngịrị dagaga ju ịlaa, ị ju okpoko onyoowuru ụjị ha ịlaa lala ugburuja, eji yẹ ịrị-ịrị lokpoko ịgọm nyaa lala ịnyaa ka kpa chị ịpẹ.

⁴Amkpaa tị ka naa ang-ụdụ nyaa wuu kpa rụ, ya ọngịrị nyaa wuu byi-enyi. Epweji nya ịTaya ọwẹ ka rụ ila kpụ agbụ.

⁵Ala Achịkelọn ka yẹ ẹlẹwẹ, ị ka ju uhi. Ala ịGasa ka ju uhi hụ́ kpákpakpaakpa, ahị ọdahile nya ala Ẹkịrọn ka ri ododu. Ị ka nwụ Adịrahụ nya ala ịGasa, Achịkelọn ka kpụ egwawụ-egwawụ.

⁶Angịnyị ịlẹ ká ịnaa bala adaa anyị bwam-bwale kaka nọ ẹpwa Achịdọdụ. M̀ ka da ọbọọchẹ ohihi nya ala iFilisitiya chị ọpyị.

⁷Ala iFilisitiya-á ka ri iyo lịwọ-lịwọ kaka, ị́ ka ri ang i-ju ibyi kaka. Angị hi lọhịhị lẹpwụ nyaa ka ri angịnyị nyam am Ohe Oluhye. Ị ka lala imwawụ nya iJuda. Ala iFilisitiya i-bwu epweji nya Ẹkịrọn ka yẹ ri angịnyị nyam jaabwọ ká ala iJebusi họ.

⁸Am Ohe Oluhye tị ka gbe Ẹpwa nyam, kam ka ke aluji i-be angịnyị ẹpwa hyoo. Anụ tị́ jẹ lẹ, m̀ jam kụ keee yẹ jaabwọ ká angịnyị nyam yẹ akama kaka ba lẹ. Ḿ ka myị oluji ọhẹ ka bwu ọpyị ọkịla warị kaka tụ angịnyị nyam pyịpyị kaka.

⁹Anụ ala ịSayọn ee, anụ chị ọkẹkẹnị, kanụ ma chị ọgwọgụ. Anụ chị ụkwa nya ọkụrụ-kụrụ mẹ, anụ ala iJerusalẹm! Anụ yẹ lalẹẹ mẹ, adịrahụ nyanụ wẹẹ wẹ ẹga nyanụ! Ọ kụrụ ma kụrụ lẹ. Ọ tị la dụmwọọ, wẹẹ kụ obyiyó warị— ụ́gba nya obyiyó amamadiroko ọ wẹẹ kụ lẹ.

¹⁰Amkpaa yẹkẹẹ, “M̀ ka kpa ang ịrụnyẹ ị-kpa dẹwụ rụ hi Isirẹlụ[6] m̀ ka kpa anyịrẹ ị-kpa dẹwụ rụ hi iJerusalẹm. Ị ka mwụ eda ị-kpa dẹwụ nyaa eku, adịrahụ nyanụ ọọwa ka kpa okpunyi wẹ alụma datị-datị wuu. Ọ ka ri adịrahụ gu onwu gu ọba, bwu Ihu iYufuretisi lalaala kaka pwụ ọbaba nya odehe.”

¹¹Amkpaa yẹkẹẹ, Anụ tị́ kpịtịya nya iro ọlẹ kam nwa tanụ, ịwọ nya iyo ikiliya ri ang-ẹjẹẹ nya iro ọọwa. Ajị nya ọọwa lẹ, m̀ ka gba angịnyị nyanụ ịlẹ kị wu ju agba ụ-ụjẹ okpori-kpori ọlẹ ká enyi-í ji ka kpehe.

¹²Anụ alagba, ahị ọdahile jam hanụ lẹ, anụ nyà wẹ ẹga ọkpịbaa nyanụ mẹ. M̀ juwa do ahị ọwawa kụrụụnụ ugbabwọ imiiye mwụ aba ba akama ịlẹ wuu kanụ yẹ.

¹³M̀ ka kpa ala iJuda dẹwụ lala uda nyam, M̀ ka hu ala Isirẹlụ lala ịcha nyam. M̀ ka hu alẹng nya ala ịSayọn lala oge nya ẹwụ kpaa dẹwụ ta alẹwụ nya ala iGirisi.

¹⁴Amkpaa ka wẹ uhye-ọgba nya angịnyị nyamwụ, ịcha ịlẹ kọ ka da ka chị agaga lala apya ọchịchị. Ọngọlahị Amkpaa ka chị ẹkụrwẹ. Ọ ka chị ẹwụ tụ igbachịwụ oledii da jahị da aluji.

¹⁵Amkpaa Agụgụ ka kpẹhị rịrị angịnyị nyamwụ, ị ka kụrụ aluji nyaa ịlẹ kịị da lá ka chẹẹchẹẹ. Ị ka chị ụkwa dọ̀ọ̀ọ̀ ọ-ọgbẹwụ lala angị yẹ ere. Ị ka chị aluji nyaa ịwọ gbee, ká ịwọ nyaa ka dọ̀bá jaabwọ ká ịwọ nya iyo okiliya ọlẹja kaa dọ̀bá kị yọ́ọ̄ hụrụ ịkịka nya ogidi.

¹⁶Ẹnụtụrụ ọọwa, Amkpaa Ohe Oluhye ka chị angịnyị nyamwụ da jaabwọ ká ọngọgbikpịlọ kaa chẹwụ ke ịkpịlọ nyamwụ. Angịnyị nyamwụ ka hụ́ myịrị-myịrị ọ-ọpyị nyamwụ jaabwọ ká ajwọ ịlịnya ịlẹ kịị ku okpo-adịrahụ kaa hụ́.

¹⁷Kááyi! Anyị ọpyị ọwẹ à tị́ ka kẹhị bala ọ-la ẹbyẹbyị kaka ba kpáà wẹ̄ẹ̀! Ikolobya bala ịyẹẹnọ ịlụwa ka nwà chawụ pwụtụ-pwụtụ, chajị ị ka ye ang ri bala o-ye ere nwa bwu ẹpwụ nya ang-ẹrụ ịlụwa.