Read idege ỊMALAKAYỊ 1 Bible Online

ỊMALAKAYỊ 1 - idege bible

ỊMALAKAYỊ 1

¹Ọlẹ ri ẹrụ ọnyẹẹnyẹẹ ọlẹ ká Amkpaa du ịMalakayị tọ ala Isirẹlụ angịnyị nyamwụ.

²Amkpaa byinu anụ angịnyị nyamwụ yẹkẹẹ, “Anụ hám ụka wuu.” Anụ tị tọọ wo yẹkẹẹ, “Ụgbẹyị ọlẹ ká mẹjẹ ya ahị háng ịnyịlẹhị a tị́ lee?” Amkpaa jam wẹẹnụ yẹkẹẹ, “Aanyịnịna i-bwu igbeene ookpokpo iJekọbụ bala Ịsọ a ri ka-á? Tị yẹ mẹ, m̀ chụ iJekọbụ bala anyị ịtụma nyamwụ nyọka ri angịnyị nyam.

³M̀ tị nyẹẹkpẹ da Ịsọ bala anyị ịtụma nyamwụ. M̀ yẹ ikiti ọlẹ kị nọ ẹpwa la egwawụ-egwawụ. M̀ pẹhi ọpyị nyamwụ wuu da nya ẹga ọ-ga ri nya iyo ịlẹpwamẹ ịnyịnyị lẹ.”

⁴Ó-riri ká ala Ẹdọm, anyị ịtụma nya Ịsọ-ọ́ me irya yẹkẹẹ, “Ịnọ, ị ta epweji nyahị ayịreji. Ahị tị ka wulọọ eji myịmyị lẹ,” aalẹ, Amkpaa Agụgụ tịtị yẹkẹẹ, “Ị̄ ma epweji nyaa nwụ́ kpa abwọ nwụ mẹ. M tị ka tụrwaa beji kpalị-kpalị myịmyị. Alụma ịkịla ka wụrwaa alọpyị onyobyi. Ị ka yaa lala alụma ọlẹ ká Amkpaa ka wụ ẹjẹ ta gbe oyi myị oyi.”

⁵Anụ ala Isirẹlụ ka kpẹhị nya ịlọnụ yẹ ẹlẹwẹ. Ọọwa, anụ ka yẹkẹẹ, “Ụmụmẹ nya ọngịrị nya Amkpaa á ba ám Isirẹlụ kem ka. Ọ jẹ kpoye nya ọpyị nya Isirẹlụ.”

⁶Amkpaa Agụgụ yẹkẹẹ, “Ọnyị kaa ju adamwụ ihi. Ọnchẹ tị kaa ya ihi ba ayịbamwụ ịnyịnyị. Ee lẹ, am a tị ri adanụ lẹ. Ihi ọlẹ kanụ ya jum a tị́ lee mẹ? Am a ri ayịbanụ lẹ. Ihi ọlẹ kanụ ya bam a tị́ lee mẹ? Anụ angịkịla iya kpakpakpa a wẹẹ hu ẹpẹpẹ jum lẹ. Anụ tị mwọọgịlẹ juwa tọ wo yẹkẹẹ, ‘Anyị ahị tị́ ya ẹpẹpẹ jung kpong-kpong?’

⁷Anụ wẹẹ ya ẹpẹpẹ jum bwula ọ-kpa iyo ịlẹ ká ehe họ kaka kịla iya ogidi nyam. Anụ tị jahị kpata juwa tọ wo yẹkẹẹ, ‘Ányị ahị tị́ kpa ihi ju ịgọgọ ọlala nyang ka-a?’ Anụ wo mẹ! Anụ pẹhi ihi ọọwa deeji bwula ọlẹ kanụ wẹẹ ya ogidi nyam nyị́ chịla ọ-kpa ihi ju ka.

⁸Anụ kaa kpa iyo ilidu kaka kịla iya ham! Ọ pwoku-u? Anụ kaa kpa iyo ị-chị okuku bala ịlẹ kị jụ ẹdụrụ kaka kịla iya ham! Ọ pwoku-u? Anụ kpa ụma nya iyo ọlịnyị ọhẹ kaka ga ha adịrahụ nyanụ yẹ wẹẹ. Ọ ka myọọ lẹhị-ị? Ọ ka mị-ị họ ang ọlẹ kanụ bịlọọ hanụ-ụ?”

⁹Anụ angịkịla iya, anụ bịlẹ Ohe Oluhye kọ yẹhị ahyẹẹrwẹrwa wẹ mẹ-ẹ. Ọ́ ka mị-ị wẹ abwọ ọrịrị nyanụ ka. Abyị nya ọọwa tị ri ịnyanụ.

¹⁰Amkpaa Agụgụ yẹkẹẹ, “Ọ dọmwụ ka hám ó-ri ká ọngọhẹ nyanụ á ka tụ ịnang i-bwu ka Ube Ịgọgọ nyam ku. Ịnọ, ọọwa ka họ ká ọngọngọhẹ nyanụ anụ angịkịla iya ka jẹ-ẹ jụ kele ka tụ ila o-ju apyobwuna-ka ju u-uhye nya ogidi nyam kaka.

¹¹Bwu ọbaba nya odehe ọhẹ lalaala ka ju ka ọkịla, angịnyị kaa jum ihi. Ị kaa kịla iyanya ịtangare bala iya ipwoku ịkịla ham. Alụma myị ụma wuu kaa jum ihi.

¹²Anụ angịkịla iya tị lẹ, anụ jum ẹpẹ, chajị anụ ya ogidi nyam nyị́ kpụ ịngịngịhyẹ kaka. Ang ị-kpụ ịngịngịhyẹ-ka anụ kaa ya kịla iya ham lẹ.

¹³Anụ juwa kpa ya yẹkẹẹ, ‘Iya ịkịlaakịla ịlẹ chị aga lẹ pyii!’ Ọọwa, anụ juwa hum tẹbẹlẹ lẹlẹ. Iyo ịlẹ kanụ wu yoyi lee ịlẹ kị chị okuku lee ọ-jụ ẹdụrụ anụ kaa kpa ka kịla iya ham lẹ. Anụ me irya kám ka myị-ị ye ụma nya ang ikịla iya ịlịnyị-ị?

¹⁴Inyiribyi ka ri nya ọngọlẹ kọ myị ọnụ nya iyo ọlahịchịng opwoku ọlẹ kọ la ẹ-ẹpwa nyamwụ ham, kọ tị mwọọgịlẹ kaka hu iyo ọlẹ ká ehe họ kpa ka kịla iya ham. Adịrahụ ọtụka am Amkpaa Agụgụ a ri lẹ. Alụma myị ụma nya odehe ọlẹ wuu ju uhi nyam.”