Read idege ỊMALAKAYỊ 2 Bible Online

ỊMALAKAYỊ 2 - idege bible

ỊMALAKAYỊ 2

¹Amkpaa Agụgụ byi angịkiliya ịnyịnyị yẹkẹẹ, “Ehile ọlẹ kpangga ri ịnyanụ kanụ ka kpa.

²Anụ ka jum ihi ẹ-ẹpwụ nya ang myị ang ọlẹ kanụ wẹẹ họ pyii. Ó-ri kanụ myị hiri egbeju kpẹẹ ham ka aalẹ, m ka ya ọnụ deeji hanụ. M ka gọlọ ju ang ịlẹ ká angịnyị wẹẹ kpa ka ganụ nya obe ojiji nya ụkụrwọ olube nyam ọhọhọ ịnyịnyị. Anụ yẹ mẹ, m dọmwu gọlọ jwaa kpaa ene-ene lẹ, chajị ánụ myị kpa ọkịlẹtụ nyanụ wuu lẹpwụ-lẹpwụ ju ihi nya ehile nyam ka.

³M ka yẹ anyị ịtụma nyanụ akama ọọ-la ọhọhọ nyanụ. M ka ya ịmyị nya iyo ịwẹ kanụ-ụ ya kila iya ham wẹ wụụnụ a-ahị. Ọọwa, m ka pwanụ rwarụ bala o-kunu rụ hi ẹga nya ịlọm jaabwọ kị-ị go ajeyi chị ọ-ọtẹwụ lẹlẹ.

⁴Ụka ọọwa, anụ ka jẹ kam ayịdang a danụ ehile ọlẹ. M tị danụ ehile ọle chajị ká ọngọngọhẹ-ẹ́ ka bịrị iro ọlẹ kam nwa ta angịkiliya anyị ịtụma nya iLivayị ka.

⁵M nwa iro taa loyi nyaa. M myị ọnụ haa kị ka hịhị ẹ-ẹpwụ nya okpunyi. M tị ya okpunyi haa ịnyịlẹhị chajị kị ka jum ihi. Ị jum ihi bala o-ju uhi nyam kpẹẹkpẹẹ.

⁶Ị mẹ ẹla nya ịlẹhị jẹ angịnyị nyam. Í ya ẹla onyobyi ọhẹ-lọhẹ bwu ọnụ nyaa ka. Ị myị ẹrụ ham lihi ojuju, juwa họ ang ọlẹ kọ chịla. Ọ́ ba ọọwa ka, ị họ ká angịnyị lụmẹ-lụmẹ hu abwọ la ang onyobyi ọhọhọ.

⁷“Ọ chịla ká angịkiliya a ka mẹ ẹla nya ịlẹhị chajị nyam am Ohe Oluhye jẹ angịnyị. Ẹga nyaa angịnyị à tí ka kaka jẹ ẹla ọlẹ kọ pwoku irya nyam bwu, chajị ịwa a ri angị myị ẹrụ ham am Amkpaa Agụgụ lẹ.

⁸“Ma, anụ angịkiliya iloyi ọlẹ lẹ, anụ pẹhi ụgbẹyị opwoku deeji kpá chochocho lẹ. Ang ọmẹjẹ nyanụ kpa iru nya angịnyị kaka hụ ahị. Anụ bịrị iro ọlẹ kam Amkpaa Agụgụ nwa tanụ anụ angịkiliya anyị nya iLivayị ịnyịnyị lẹ.

⁹Lẹẹlẹ, am ayịdang tịtị ka họ kanụ ka la ẹpẹpẹ a-ahị nya ala Isirẹlụ wuu lẹ. Í ka junu ihi kaka, chajị anụ lịlọnụ á myị họ ẹla ọlẹ kọ ri irya nyam ka. Anụ kaa jẹ oye-oye ẹ-ẹpwụ nya eje ọchịchị nyanụ.”

¹⁰Ahị wuu tị́ la adịda ookpokpo. Ohe Oluhye ookpokpo a tị họhị wuu lawụlẹ lẹ. Ee lẹ, ịyẹ tị́ du kahị tịtị-ị họ ọnụ ọmyịmyị nyahị jịra ẹ-ẹga nya awụlẹ ka-a? Ịyẹ tị́ du kahị bịrị iro ọlẹ ká Ohe Oluhye nwa ta adahị igogo anyị mẹ?

¹¹Ala iJuda bịrị ọnụ ọlẹ kị myị ha Ohe Oluhye lẹ. Ị họ ang onyobyi i-iJerusalẹm. I-iJerusalẹm kem ka, ọ-ọpyị nya Isirẹlụ wuu lẹpwụ-lẹpwụ ị họ ang onyobyi lẹ. Ube ịgọgọ ọlẹ ká irya nya Amkpaa ji, ala iJuda chọọ irị. Ị kele ka ye anyang ị-jẹ́ Ohe-ka nya ịhụ nyaa.

¹²Amkpaa a ku angị họ ụma nya ang ọlịịwẹ wuu hi ẹpwụ nya ụma nya ala Isirẹlụ mẹ. Ịwa bala anyị ịtụma nyaa á ka jẹ-ẹ kpa ịngịngịhyẹ kaka kịla iya ha Amkpaa Agụgụ ẹnẹnẹhẹ kaka.

¹³Ang onyobyi ọkịla ọlẹ kanụ-ụ̀ họ à lẹẹ lẹ. Anụ họ ká ogidi nya Amkpaa ri egbejida-egbejida wuu. Anụ jida gbokiri, anụ bida nya ịlẹhị-ịlẹhị, chajị ọ́ myị-ị ye iya ịlẹ kanụ-ụ kịla họọ kaka.

¹⁴Ọọwa, anụ tọ wo yẹkẹẹ, “Ịyẹ tị́ du ká Amkpaa myị ye iya ọkịlaakịla nyahị kaka-a?” Ang odudu ri ọ yẹ jaabwọ kanụ bịrị ọnụ ọlẹ kanụ myị ha ahụ ọlẹ kanụ ye gbalẹ-gbalẹ. A godayị nwa iro tọọ ị-ịlahị nya Ohe Oluhye nya ọọwa ọ-ka ri ahụ nyang. Ọngọdụbwọ nyang ahụ ọọwa a ri lẹ. Ma, a tị bịrị iro nyang ọọwa bwula ọ-họ ọnụ ọmyịmyị nyang jịra ka.

¹⁵Ohe Oluhye a họ kaahụ bala ọwa la ookpokpo u-ugbinyịrọ bala olegu lẹ. Ọhịhị nyanụ ri nyamwụ. Ịyẹ tị́ du ká Ohe Oluhye họ ịnyị? Ọ họ ịnyị chajị ká anyị ịlẹ kanụ ka ma ka ri angịnyị nyamwụ. Lẹẹlẹ, anụ-ụ kpẹhị chịng ká ọngọngọhẹ nyanụ a nyẹẹkpẹ da ahụ nyamwụ bwula ọ-bịrị ọnụ ọlẹ kọ myị họọ koo.

¹⁶Amkpaa Ohe Oluhye nya ala Isirẹlụ yẹkẹẹ, “Awụlẹ ọpwapwa nya ahụ bala ọrụ wụm ẹjẹ. Ọ ri ang ọ-wụm ẹjẹ nya ọngọhẹ lẹpwụ nyanụ ọ-ka họ ang ọtipyọ ọlịịwẹ ẹ-ẹga nya ahụ nyamwụ. Lẹẹlẹ, anụ-ụ kpẹhị chịng ká ọngọngọhẹ lẹpwụ nyanụ a bịrị ọnụ ọlẹ kọ myị koo.”

¹⁷Ala iyaya nyanụ chị Amkpaa aga kpá pwẹẹpwẹẹ lẹ. Ma, anụ tị juwa tọ wo yẹkẹẹ, “Ẹla iyaya nyahị oyina a tị́ chọọ aga ịnyị-ị?” Anụ nwọọ la ala iyaya bwula ọlẹ kanụ wẹẹ yẹkẹẹ, “Angị họ ang inyibyi wuu chịla ị-ịlahị nya Amkpaa. Ẹla nyaa dọmwụ kpọọ ịpyọ. Ó-ri ịnyị kaka lẹ aalẹ, Ohe Oluhye ọngọ jẹ oye-oye-ka tị́ tị tị ji ale mẹ?”