Read idege ỊMALAKAYỊ 3 Bible Online

ỊMALAKAYỊ 3 - idege bible

ỊMALAKAYỊ 3

¹Amkpaa wẹ yẹkẹẹ, “Anụ wo mẹ, m wẹẹ du ọngọ myị ẹrụ nyam ẹrụ ji ịlahị nyam nyọka nwụla ẹga nọ gbem lẹ. Ụka ọọwa, Amkpaa ọlẹ kanụ wẹẹ tịtọ ka pwụ eji lụka ọmwaaa wẹ Ube Ịgọgọ nyamwụ. Ọngọmyẹrụ nyam ọlẹ kanụ wẹẹ ya ẹhị rịrị gbe ka wẹ ịnyịnyị kaka ya ẹla nya iro ọlẹ kam nwa tanụ dodehe gbadaa.”

²Ma, oowo tị́ ka lọngịrị godayị kpọọ myị ẹnụ kọ ka pwụ eji-ì? Oowo tị́ ka da ọhụ rwẹẹ myị ẹnụ kọ ka hi ehe gẹgịlẹ-ẹ̀? Ọwa ayịdang ka lala ụcha ọ-kpa hụ́ ang. Ọ ka lala ila ọlụdụwa.

³Ụka kọ wẹ, ọ ka hụhụ juwa leje jaabwọ ká ọngọlẹ kọọ hụ́ okpoko onyowuru bala ọ-hyọọ hya kaa hụhụ. Jaabwọ ká ọngọ hya ụwa kaa hya okpoko ịgọm bala okpoko onyoowuru, ịnyịnyị-ịnyịnyị ọngọmyẹrụ nya Amkpaa ọọwa a ka hụ́ angịkiliya lẹ. Ọọwa, ị ka kịla iya ịlẹ kị pwoku ha Amkpaa lẹlẹ.

⁴Ụka ọọwa, iya ịlẹ ká ala iJuda bala ala iJerusalẹm ka kịla họọ wuu ka chịla jaabwọ kọọ la lụka onyogo.

⁵Amkpaa Agụgụ yẹkẹẹ, “Ụka ọọwa, m ka wẹ kam ka lanụ eje. Ahyaahị m ka bwuru ang onyobyi ọhọhọ nya alụhwa bala alụya dodehe. M ka bwuru ang onyobyi ọhọhọ nya angị kaa họ ibeenu ọnọọkịla bala angị kaa họ alụkụrwọ ilekpeleji nyaa ri dodehe. M ka bwuru ang onyobyi ọhọhọ nya angịlẹ wuu kịị tụ ịhụ-egu bala anyị-egu bala angga pyịpyị dodehe. M ka bwuru ang onyobyi ọhọhọ nya angịlẹ wuu kị myị-ị ju ihi nyam ka dodehe.

⁶“Am kpakpakpa à ri Amkpaa lẹ. Ḿm̀ yẹda ka. Lẹẹlẹ, anụ anyị ịtụma nya iJekọbụ-ụ́ ta ayịreji wuu lẹka.

⁷Jaabwọ ká adanụ igogo anyị-ị́ kpa ehile nyam ka loyi nyaa, ịnyịnyị-ịnyịnyị anụ nyẹẹkpẹ da ehile nyam wẹ lẹ. Anụ jahị kpata kanụ nya kaka bam jẹ, mẹ. Aalẹ, m̀ tịtị ka nyà tịrẹkpẹ chịnụ ọgụ. Anụ tịị tọ wo yẹkẹẹ, ‘Ụgbẹyị ọlanyị ahị tí ka nya tịrẹkpẹ kaka bang jẹ-ẹ?’

⁸“Bà kam tọnụ wo wẹẹ. Kpakpakpa lẹẹ, ọ pwoku ká ọngịnyị ehe ka họ Oluhye ri-í? Anụ tị wẹẹ họm am Ohe Oluhye ri. “Ọọwa, anụ mwụ ọgilẹ juwa tọ wo yẹkẹẹ, ‘Anyị ahị tị́ họng ri-i?’ “Anụ họm ri chajị ánụ myị hu ebwo ookpoko ẹ-ẹpwụ nya iwo ham jaabwọ kọ chịla ka. Ánụ-ụ̀ kpa ọhaha ịkịla wam yẹẹyẹẹ ka ịnyịnyị.

⁹M gọlọ junu anụ ala Isirẹlụ wuu lẹ. Chajị ọng myị ọng nyanụ wuu wẹẹ họm am Ohe Oluhye ri.

¹⁰M jam byinu yẹkẹẹ, anụ hu ebwo ookpokpo ẹ-ẹpwụ nya iwo ọnyị myị ọnyị nya ang ịle kanụ la wuu kpa wẹ Ube Ịgọgọ nyam, chajị ká ang oriri ka juwa yẹẹyẹẹ. Anụ mam am Ohe Oluhye yẹ bwula ọ-họ jaabwọ kam byinu wẹ mẹ. M tị ka do iru nya ahị ọwawa kụrụụnụ lala enyi.

¹¹Ḿ ka myị ịyịrị ka nẹ ang-ẹrụ nyanụ ka. Ịmwụ nya alakọnụ nyanụ ka tọ eju ịnyịịla nyọọnyọọnyọọ.

¹²Ụka ọọwa, alụma ịkịla wuu ka wụrụụnụ angịlẹ ká Ohe Oluhye wahị kụrụ. Ọpyị nyanụ ka ri ẹga nya ọkẹkẹnị?

¹³“Am Amkpaa byinu anụ angịnyị nyam ya anụ hu ọnụ dam lụmẹ. Anụ tị juwa tọ wo yẹkẹẹ, ‘Ẹla-ịyẹ ahị tị́ ya bang?’

¹⁴“Anụ tị́ yẹkẹẹ, ‘Ó ju apyobwuna nyọka myị ẹrụ ha Ohe Oluhye ka. Ịịyẹ ọ tị́ kpụ hahị nyọlẹ kahị họ ang ọlẹ kọ ya ahị nyị họ lee ọ-ka ẹga nya Amkpaa nya ụbwẹwu kaka jida jwọọ chajị nya ịhọbịrị nyahị ọ-tọhị olujwo kpongkpong?

¹⁵Jaabwọ kahị yẹ wẹ lẹ, angị hi ọbọọchẹ Ohe Oluhye a wẹẹ wahị kụrụ lẹ. Alabwẹla onyobyi tị wẹẹ hyo rụ lẹ. Ị da Ohe Oluhye ịwẹẹ bwula ang onyobyi ọhọhọ, ọ tị yaa chịng.’ ”

¹⁶Ọọwa lẹ, angịlẹ kị ju uhi nya Amkpaa-à ya ẹla ta awụlẹ lẹlẹ. Amkpaa ke ụrụ. Ọ wo ẹla ọlẹ kị ya. Ọọwa, ị da ẹnyị nya angịlẹ kị juhi bala o-ju ihi nya Amkpaa ju ụ-ụpwụ nụwa ẹ-ẹga nyamwụ lẹlẹ.

¹⁷Ọọwa, Amkpaa Agụgụ a yẹkẹẹ, “Ẹnụ kam ka wẹ kaka họ ang ọlẹ kam ya deeji wẹ ene-ene, angịwẹ wuu ka ri angịnyị nyam. M ka hwaa nya angịnyị nya ụbwọ nya ịlọm. M ka yaa ahyẹẹrwẹwa jaabwọ ká adịda kaa yẹ ahyẹẹrwẹrwa nya ọnyị nyamwụ ọlẹ kọọ myị ẹrụ họọ kpẹẹkpẹẹ.

¹⁸Ụka ọọwa, anụ ka yẹ ọdatị nya ang ọlẹ kọ ka họ ta alabwẹla ọnyịịla ịlẹ kịị myị ẹrụ ham bala ang ọlẹ kọ ka họ ta alabwẹla onyobyi ịlẹ kịị myị ẹrụ ham ka.”