Read idege ỊMATIYU 10 Bible Online

ỊMATIYU 10 - idege bible

ỊMATIYU 10

¹Ụka ọọwa, iJisọsị be ẹkọ wụrụ angịjụgbẹyị nyamwụ angị iwo kụrụ imiiye kaka jịra i-ijata nyamwụ lẹ, ọ ya ọngịrị ọlẹ kị ka kpa ku alegu inyibyi dodehe bala ọ-kpa họ angịnyị uda nya ẹdụrụ myị́ ẹdụrụ nya ịnyịrọ bala ịnya olegu haa lẹlẹ.

²Ẹnyị nya angị myị ẹrụ ọnyịịla nya iJisọsị ịKịrayịsị angị iwo kụrụ imiiye ịịwa alẹẹ lẹ: Ọngọ họhẹ ri ịSayịmọn ọlẹ ká ẹnyị nyamwụ ọkịla ri iPita, Andụrụ ọlẹ kọ ri ọnyịnịna nya iPita ọwẹ, iJemsi bala ịJọn ọnyịnamwụ ịlẹ kị ri anyị nya iSebidi.

³IFilipu, ịBatọlomyu, ịTọmasị, ịMatiyu ọlẹ kọ ri ọngọ nyẹ angịnyị ẹpwa, iJemsi ọnyị nya Alufiyọsị, iTadiyọs,

⁴ịSayịmọn ọlẹ kọ ri ọngọ kaa yẹ ẹrwa nya ụpwọma nyamwụ lụmẹ bala iJudasị Isikarọtụ ọlẹ kọ ri ọngọ pịrị iJisọsị ha.

⁵IJisọsị du alẹrụ nyamwụ angị iwo kụrụ imiiye ịwẹ ẹrụ kpehe. Ọ daa ehile yẹkẹẹ, “Anụ wẹẹ ka kele lẹ, anụ ka ọpyị nya ala iJentayịlị ịwẹ ọhẹ-lọhẹ kpong-kpong ka. Lee, epweji nya ala ịSameriya ọhẹ-lọhẹ ka ịnyịnyị.

⁶Ma, anụ tụtụ kele ka epweji nya ala Isirẹlụ ịlẹ kị ri angị hwahị ị-ịlahị nya Ohe Oluhye lala ịkpịlọ ịlẹ kị byibyi.

⁷Ụka kanụ pwụ ụwa, anụ ya ẹla nya Ohe Oluhye jaa yẹkẹẹ, ‘Anụ yẹ irya da mẹ! Chajị ụka nya ịpyị nya Adịrahụ nya epwoohe nyị ju chwẹẹ lụmẹ lẹ.’ ”

⁸IJisọsị myịmyị byaa yẹkẹẹ, “Anụ kele kanụ họ alẹdụrụ bala alekpo wuu uda, kanụ wule egu eji, kanụ ku alegu inyibyi dodehe ịnyịnyị mẹ. Anụ ye ọnahị nya Ohe Oluhye ododu lẹ, anụ́-ụ họ angịnyị ehe uda ododu ịnyịnyị la uri oyeye kaka mẹ.

⁹Anụ kpa okpoko onyoowuru lee okpoko ịgọm lee ubeje ọhẹ-lọhẹ ẹ-ẹpwụ nya ang nyanụ kpong-kpong ka ịnyịnyị.

¹⁰Anụ kpa ịbang ọ-ya ang oriri ju ba ịlọnụ kanyị ka ịnyịnyị. Anụ kpa ịwụrụ ịkịla, lee egbatẹ ịkịla dala ịlịnyịrọ nyanụ ka. Anụ kpa ọgọdọ o-cheji nyanụ ba ịlọnụ ka ịnyịnyị. Chajị ọ-ọngọlẹ kị diro kaka wu ẹrụ ayịdang a kaa kpa ịlọmwụ la ang oriri ẹ-ẹrụ ọọwa ka.”

¹¹IJisọsị myịmyị byaa yẹkẹẹ, “Ụka kanụ pwụ epweji myị́ epweji ọtụka, lee ochiche lẹ, anụ́-ụ tịtọ nya ẹpwa nya ọngọlẹ kọ ka ri ọngịnyị ọnyịịla ụ-ụwa, kanụ ju ụga ẹ-ẹpwa nya ọngọọwa gbee pwụ ụka ọlẹ kanụ ka rụ hi ụwa mẹ.

¹²Ahyaahị kanụ pwụ ẹpwa nya ọng myị́ ọng, anụ́-ụ jene wahị nya okpunyi nya Ohe Oluhye kụrụ alụwa.

¹³Ó-ri ká alẹpwa ọọwa, á yenu ka ẹpwa nyaa la okpunyi aalẹ, ahị ọwawa nya okpunyi ọlẹ kanụ wa kụrwaa, ka hi juwa taa pyịyọọ. Ma, ọ́ tị ri kị tị myị yenu la okpunyi kaka lẹ aalẹ, okpunyi nyanụ ọọwa ka baanụ rụ, lụka kanụ ka rụ bwu ụwa ịnyịnyị lẹ.

¹⁴Ma, ẹga myị́ ẹga wuu kanụ ka, ká alụwa á myị yenu ka ẹpwa nyaa ka lee ọ-myị wo ẹla oyaya nyanụ ka aalẹ, anụ́-ụ wụ abwọ ligo, wụ abwọ lịcha chị alụwa, bwula, ọ-wụ ọrụ nya ọpyị ọlẹpẹtẹ nyanụ cheeji ụ-ụwa ene kanụ ka rụ mẹ.

¹⁵Nya ịlẹhị-ịlẹhị, m byinu yẹkẹẹ, ụma nya akama ọtụka ọlẹ ká Ohe Oluhye yẹ ala ịSọdọm bala ala iGomora ugbeene lẹ, ọ ka ri ọmọnụma ị-ịlahị nya, ang ọlẹ kọ ka họ alepweji ọwẹ la ẹnụtụrụ nya eje ọtụka nya Ohe Oluhye wẹẹ.”

¹⁶IJisọsị myịmyị byi angịjụgbẹyị nyamwụ yẹkẹẹ, “Anụ yẹ mẹ, m juwa duunu ẹrụ kpehe lala ịkpịlọ ịlẹpwarịrị nya iru nya ijwo. Chajị nya ọọwa lẹ, anụ́-ụ juwa kpa ẹla ọjẹ́jẹ gbe ịlọnụ yẹẹyẹẹ lala ilo, kanụ juwa la dụmwọ lala enewulo ịnyịnyị mẹ.

¹⁷Anụ kpahị ju ịlọnụ ọgwọgụ mẹ. Chajị angịhyẹ juwa ka warị kaka wunu, juwa kpanụ kele ka ịkọtụ nya eje. Ị ka waanụ egbiji ụ-ụwa e-ebe ị-mẹ ẹla nya Ohe Oluhye jẹ nya ala iJuu ịnyịnyị.

¹⁸Ị ka wụrụụnụ eje kele ka ijata nya ala ịgọvụnọ nya ọpyị bala ịdịrịhụ nya ọpyị nyanụ wuu ịnyịnyị, chajị nyọlẹ kanụ myị lam. Ụ-ụwa, anụ ayịdang ka ri ibeenu nyam ị-ịlahị nya alegbeju ịịwa bala ala iJentayịlị angị jẹ́ Ohe Oluhye-ka ịwẹ.

¹⁹Ụka kị kpanụ kele kịlahị nyaa, kị juwa lanụ eje ọọwa, anụ juwa chị uko jaabwọ kanụ ka wẹ lụka ọọwa ka. Lee, ọ-chị uko jaabwọ kanụ ka bwu wẹ ẹla ụ-ụwa ka. Chajị Ohe Oluhye ayịdang ka hu egbe nya ala ịlẹ kanụ ka ya junu ọ-ọnụ lụka ọọwa la ịlọmwụ.

²⁰Chajị aanụ ayịdang a ka juwa ya ẹla ọọwa la ịlọnụ ka. Ma, Olegu nya Ohe Oluhye Adanụ a ka juwa kpanụ ya ẹla ọọwa lụka ọọwa lẹlẹ.”

²¹IJisọsị myịmyị byaa yẹkẹẹ, “Ụka juwa warị ká anyị nya ọnyang ookpokpo bwu ẹpwụ ka juwa pịrị awụlẹ ha ju ka ẹpwụtụbwọ nya igu. Ụka ọọwa, adịda ka pịrị ọnyị nyamwụ ha ka ẹpwụ nya igu ịnyịnyị. Anyị ayịdang ka wuleji juwa tụ ịnịna bala adịda nyaa pyịpyị gbee kị ka pịrị angị maa ma ha ju ka ẹpwụtụbwọ nya igu ịnyịnyị.

²²Ụka ọọwa, anụ ka wụ angịnyị myị́ angịnyị wuu ẹjẹ chajị nya ẹnyị nyam ọlẹ kanụ myị la. Ma, ọng myị́ ọng ọlẹ kọ ka kpa ugbodu ojuju nyamwụ pwụ ọbaba aalẹ, ọngọọwa ka wu ọchịda nyamwụ ọyị.

²³Ụka kị juwa tụụnụ pyịpyị lụmẹ-lụmẹ e-epweji ọhẹ lẹ aalẹ, anụ́-ụ rụ bwu ụwa kele ka epweji ọkịla mẹ. Nya ịlẹhị-ịlẹhị, m byinu yẹkẹẹ, ene kanụ ka jẹ ịnyịnyịịnyị gbee kanụ ka chị epweji myị́ epweji nya ala Isirẹlụ ọlẹ ọnụ wuu kpá lẹ aalẹ, Ọnyị nya ọngịnyị ehe ọlẹ ayịdang ka mwẹẹkpẹ warị myịmyị ụka ọọwa lẹ.”

²⁴IJisọsị myịmyị byaa yẹkẹẹ, “Onjwo olube ụpwụ ọhẹ-lọhẹ á kaa gụ ịtịcha nyamwụ ka lee ọnchẹ ọhẹ-lọhẹ, ọ-kaa gụ ayịbaba nyamwụ ka ịnyịnyị.

²⁵Chajị nya ọọwa lẹ, ụka myị́ ụka ká ọnchẹ lee onjwo olube ụpwụ ọnyị myị ọnyị á nwa kaka wu ayịbaba nyamwụ ọyị lẹ aalẹ, iwe-ahụrụ ọọwa kem a nwọọ mẹ. Lẹ, ó-ri ká angịnyị a byẹjẹ juwa wụrụ ayịbaba nyanụ ayịdang yẹkẹẹ, ịBẹlisibọbụ, olegbeju ọgbahị nya alegu inyibyi myị́ lẹ aalẹ, ẹnyị onyobyi ọkịla oyina, a tị́ tụtụm myịmyị ka jẹ́-ẹ chaa chị ọ-ọnụ la ọ-wụrụụnụ anụ anchẹ wẹẹ?”

²⁶IJisọsị myịmyị byaa yẹkẹẹ, “Ma, jaabwọ myị́ abwọ kọ la, anụ juhi nya angịnyị ehe ka. Chajị ịngịngịhyẹ á juwa ọlẹ ká ọngịnyị ehe á chị ang ke ene lẹ, kọ ka jẹ́-ẹ chị ehe kaka lẹ ka. Lee, ang myị́ ang ọlẹ kị tụ kpụ ịbaa ene lẹ, kọ ka jẹ́-ẹ chị ehe a-ahịgboo kaka lẹ ka ịnyịnyị.

²⁷Ẹla ọlẹ kam wẹẹ ya jenu ẹ-ẹpwụ nya ukpowu wẹẹ, anụ́-ụ kpa ẹla ọọwa kele kaka ya je angịnyị ehe ẹ-ẹpwụ nya ahịgboo mẹ. Ẹla ọlẹ kam tị wẹẹ chayị nyamwụ junu ụrụ wẹẹ, anụ́-ụ kpa ẹla ọọwa kele kaka da ọna u-uhye nya achịnawụ ya je angịnyị ịnyịnyị mẹ.

²⁸Anụ juhi nya angịnyị ehe ịlẹ kọ ri kị nwụ ugbinyịrọ nyanụ kem lẹ, kị ka jụ ugbodu okpukpuru nyanụ nwụ myị́ ka lẹ ka. Ma, ọkọkọ nya ọọwa lẹ, Ohe Oluhye ọlẹ kọ ka ta ugbinyịrọ nyanụ bala ugbodu okpukpuru ayịreji ụ-ụwa o-obwila myị́ kem, anụ ka juhi nyamwụ lẹ.

²⁹Anụ tị́ yẹ ịchịnụ ịlẹ kị wụrụ egwe ká angịnyị kaa ra imiiye nyaa ra ịkọbọ ookpokpo wẹ lẹ! Ma, ọhẹ-lọhẹ lẹpwụ nyaa á tị kaa chabwọ bwu uhye kaka gbu myị́ ẹ-ẹkpẹ nya Ohe Oluhye ọjẹ́jẹ ene ka lẹ ka.

³⁰Ẹ-ẹga nyanụ anụ lẹ, Ohe Oluhye dọmwụ jẹ́ ịnọmba nya uke-inyi olegbeju nyanụ wuu jịra ene-ene lẹ.

³¹Chajị nya ọọwa lẹ, anụ juhi kpong-kpong kaka. Chajị, anụ ayịdang kpụ ịnya ọtụka ị-ịlahị nya Ohe Oluhye lụmẹ gụ iru nya egwe.”

³²IJisọsị myịmyị byaa yẹkẹẹ, “Ọng myị́ ọng ọlẹ kọ ka juwa yam dodehe lala Ọngọchịda nyamwụ aalẹ, am ayịdang tịtị ka ya ọngọọwa dodehe ị-ịlahị nya Ohe Oluhye Adam olepwoohe lala ọngọ bam jẹ ịnyịnyị.

³³Ma, ọng myị́ ọng ọlẹ kọ tị ka pwam am ịKịrayịsị rwarụ yẹkẹẹ, ọwa nyị ri ọngịnyị nyam kpong-kpong ka aalẹ, am ayịdang tịtị ka pwa ọngọọwa rwarụ ị-ịlahị nya Adam olepwoohe ịnyịnyị.”

³⁴IJisọsị myịmyị byaa yẹkẹẹ, “Anụ me irya yẹkẹẹ, okpunyi kem, am nyaa kpa warị wẹ odehe ọlẹ lẹẹ ka! Ḿ kpa okpunyi kem warị ka! Ma, ẹwụ nya o-wo lawụlẹ-ka, ọlọdọdẹpwa ịnyị!

³⁵Chajị ọ-warị wẹ nyam ọlẹ ka họ, ká anyị alẹng ka ri alẹla nya adaa anyị, ká anyị anyang ka ri alẹla nya ịnaa anyị bala ịhụ ọ-ka ri alẹla nya ịnaa ẹpwa ịnyịnyị.

³⁶Ọọwa ri yẹkẹẹ, alọdọdẹpwa ookpokpo ka yẹ ri aluji nya awụlẹ ụ-ụwa-ụwa lẹ.”

³⁷“Ma, ọng myị́ ọng ọlẹ ká adamwụ lee ịnamwụ á họ́ọ lụmẹ gụm am ịKịrayịsị aalẹ, ọngọọwa á chịla o-ri ọngọjụgbẹyị nyam ka. Lee, ọng myị́ ọng ọlẹ ká ọnyị ọlẹng lee ọnyị ọnyang nyamwụ á họ́ọ gụm ịnyịnyị aalẹ, ọngọọwa á chịla o-ri ọngọjụgbẹyị nyam ka ịnyịnyị.

³⁸Ọng myị́ ọng ọlẹ kọ juwa hu agurube nya akama ọyẹyẹ tam nyamwụ chụ egbeju juwa bam jẹ ka aalẹ, ọngọọwa á chịla o-ri ọngọjụgbẹyị nyam ka.

³⁹Ọng myị́ ọng ọlẹ kọ juwa maga nyọka chị ọhịhị nyamwụ da ẹ-ẹpwụ nya odehe ọlẹ aalẹ, ọhịhị nya ọngọọwa ka gwọọ byi. Ma, ọng myị́ ọng ọlẹ kọ tị tụụbwọ hi ọhịhị nyamwụ ga ha igu chajị nya ẹnyị nyam aalẹ, ọngọọwa ka la ọhịhị nyamwụ ọọwa pyịyọọ lẹ.”

⁴⁰“Ọng myị́ ọng ọlẹ kọ kpa ọkịlẹtụ ookpokpo juwa yenu la okpunyi lẹ aalẹ, am ayịdang kpangga, ọngọọwa a wẹẹ ye ịnyịnyị lẹlẹ. Aalẹ, Ohe Oluhye Adam ọlẹ kọ dum ẹrụ warị, ọngọọwa a tịtị wẹẹ pẹ ẹpwa ịnyịnyị lẹlẹ.

⁴¹Ọng myị́ ọng ọlẹ kọ ye ọlọmwụ o-ya ẹla nya Ohe Oluhye dodehe la okpunyi, chajị nya ọngọọwa o-ri ọlọmwụ nya Ohe Oluhye aalẹ, ọlọnahị ọọwa ka ye uri nya alọmwụ i-ya ẹla nya Ohe Oluhye taa lụka ohyẹẹkpẹ. Ọng myị́ ọng ọlẹ kọ ye ọlabwẹla ọnyịịla nya Ohe Oluhye la okpunyi, chajị nya ọngọọwa o-ri ọlabwẹla ọnyịịla aalẹ, ọlọnahị ọọwa ka ye uri nya alabwẹla ọnyịịla taa lụka ohyẹẹkpẹ ịnyịnyị.

⁴²Ọng myị́ ọng ọlẹ kọ ka chị́ ukoku nya enyi ookpokpo ọlam-ọlam ọlẹ ha ọngọngọhẹ lẹpwụ nya angịjụgbẹyị nyam nwa chajị nyori ọngịnyị nyam aalẹ, m jam byinu nya ịlẹhị-ịlẹhị yẹkẹẹ, uri nya ọngọọwa, á ka chị deeji kpong-kpong kaka.”