Read idege ỊMATIYU 11 Bible Online

ỊMATIYU 11 - idege bible

ỊMATIYU 11

¹Ụka ká iJisọsị gbile angịjụgbẹyị nyamwụ angị iwo kụrụ imiiye ịịwẹ ụbwọ ụrụ kpá lẹ, ọ rụ kele juwa mẹ ang jẹ bala o-juwa ya ẹla nya Ohe Oluhye ju alepweji ịlẹga ọọwa lẹlẹ.

²Ịnyị, ụka ká ịJọn ọngọ hụ enyi Ohe wo oja nya ụkụrwọ ẹbyẹbyị ọlẹ ká ịKịrayịsị juwa họ pwụ ube nya agba lẹ, ọ du angịjụgbẹyị nyamwụ angị imiiye ẹrụ kele ka ẹga nya ịKịrayịsị lẹlẹ.

³Ụka kị pwụ ụwa, ị byi iJisọsị yẹkẹẹ, “Ayịbahị ee, ahụ kpakpakpa a ri ọngọọwa ọlẹ kahị jam ya ẹhị rịrị gbe, ká Ohe Oluhye ka du ẹrụ warị lẹ? Lee, ọngọkịla ọhẹ tị́?”

⁴Ụka ọọwa, iJisọsị byi alẹrụ nya ịJọn ịịwa yẹkẹẹ, “Anụ kele kanụ ya je ịJọn ụma nya ang ịlẹ wuu kanụ wẹẹ wo bala ọ-wẹẹ kpẹhị nyanụ yẹ mẹ.

⁵Anụ tị́ wẹẹ yẹ lẹ: Alidu jẹ́ juwa yọyị. Ikuku tị wẹẹ jẹdịyẹ. Alekpo tị wẹẹ la cheri-cheri, angị kpụ ịla tị jẹ́ wẹẹ wo ẹla, egu tị jẹ́ wẹẹ wuleji juwa hịhị myịmyị lẹ. Angịlẹ kị ri ikpehika, tị wẹẹ wo ẹrụ ọnyịịla nya ọchịda ọlẹ kị wẹẹ ya jaa lẹ.”

⁶IJisọsị myịmyị yẹkẹẹ, “Ahị ọwawa ọtụka ka juwa ha ọng myị́ ọng ọlẹ kọ ka la ọkịlẹtụ ujujwo jahị dam, ka juwa da ịwẹẹ ju ẹla nyam kpong-kpong ka.”

⁷Ụka ọlẹ ká angịjụgbẹyị nya ịJọn ịwẹ juwa jẹ rụ, iJisọsị dọmwụ nya ẹla oyaya rụ́ ịJọn ọngọ hụ enyi Ohe ọwẹ, juwa byi iru nya angịnyị ịlụwa yẹkẹẹ, “Anụ ya jem wẹẹ, ụka ọlẹ kanụ wo oja nya ịJọn ọngọ hụ enyi Ohe ẹ-ẹpwamẹ u-ugbileji kanụ juwa bọọ kele lẹ, ịịyẹ anụ tị́ yẹ ụ-ụwa? Amẹ ịlẹ ká igbachịwụ juwa kpa che genggeng ịnyị-ị́?”

⁸“Ee lẹ, o-owo, anụ tị́, tị tị yẹ ụ-ụwa mẹ? Ọngọlẹ kọ kụrụ awụrụ ọnyịịla-ọnyịịla, anụ yẹ ụ-ụwa lẹ? Anụ wo mẹ! Angịlẹ kịị kụrụ ịwụrụ ịnyịịla ịlịịwẹ lẹ, ẹ-ẹpwa nya adịrahụ, ị kaa ji lẹ!

⁹Lẹ, ụma nya ọngịnyị ọlanyị, anụ tị́ kele ka yẹ ụ-ụwa mẹ? Ọlọmwụ nya Ohe Oluhye ịnyị? Ee, ọlọmwụ nya Ohe Oluhye ịnyịlẹhị ịnyị! Ma, m jam byinu yẹkẹẹ, ọngọọwa ayịdang dọmwụ lụmẹ gụ ọlọmwụ nya Ohe Oluhye wẹẹ?

¹⁰Chajị ịJọn ọwẹ kpangga, Ohe Oluhye a ya ẹla dodehe u-uhye nyamwụ lẹẹ, ụ-Ụpwụ Ịgọgọ lẹ. Ohe Oluhye yẹkẹẹ, ‘Yẹ mẹ! Am Ohe Oluhye juwa ka du ọlẹrụ nyam ọhẹ ẹrụ ji ịlahị nyang kaka nwụla iwe-ahụrụ nọ gbeng lẹ.’ ”

¹¹IJisọsị myịmyị byaa yẹkẹẹ, “Nya ịlẹhị-ịlẹhị, m byinu yẹkẹẹ, ẹ-ẹpwụ nya angịnyị ehe ịlẹ wuu kị ma bwu ẹpwụ nya ọnyang kpehe lẹ, ọngọngọhẹ á juwa, kọ ka la ehe lala ịJọn ọngọ hụ enyi Ohe kaka. Ma, ọngọlẹ kọ ka ri ọngọ ochiche kpá gụ wuu ị-ịpyị nya Adịrahụ nya epwoohe tị ka lụmẹ gụ ịJọn ọngọ hụ enyi Ohe ọwẹ ẹ-ẹpwụ nya iwe ahụrụ.

¹²Bwu ụka nya ọwẹwẹ nya ịJọn ọngọ hụ enyi Ohe pyịyọọ gbee daalẹ, aluji jam kpa agbụrụ-agbụrụ tụ ang chajị nya ịpyị nya Adịrahụ nya epwoohe pyịpyị. Ma, angịlẹ kịịwa ayịdang tịtị byẹjẹ ọ-ọkịlẹtụ juwa kpa ọngịrị-ọngịrị ye iwe-ahụrụ nya ịpyị-adịrahụ nya epwoohe ọọwa ha ịlaa.

¹³Chajị alọmwụ inyogo nya Ohe Oluhye wuu bala ehile nya iMosisi yẹ ọmwụ rụ́ ịpyị-adịrahụ nya epwoohe gbee pwụ ụka ọlẹ ká ịJọn ayịdang warị ịnyịnyị.

¹⁴Ó-ri kanụ ka myị-ị myị jum aalẹ, ịJọn ọngọ hụ enyi Ohe a ri Ịlayịja ọlẹ ká alọmwụ nya Ohe Oluhye ya ẹla rụ́ yẹkẹẹ, nyị ka warị lụka ohyẹẹkpẹ lẹ.

¹⁵Lẹ, ọng myị́ ọng ọlẹ kọ ju ụrụ o-wo ẹla lẹ aalẹ, ọ wo ẹla ọlẹ kam ya jenu wẹ mẹ!”

¹⁶Ụka ọọwa, iJisọsị myịmyị ya ẹla yẹkẹẹ, “Ịịyẹ m tị́ ka chụ angịnyị iloyi ọlẹ kaka me kpá lẹẹ mẹ? M ka chwaa kaka pwoku ayịlọ ọkọkọ nya anjwo ichiche ịlịịlẹ lẹ: Ịwa ayịdang lala anyị anjwo ichiche ịlẹ kị kele ka ojiya nya ayịlọ, chajị nya ayịlọ odudu, kị tị mwọọgịlẹ juwa rwarụ ta awụlẹ yẹkẹẹ,

¹⁷‘Ịịyẹ a tị́ du kahị jam du ayịlọ kanụ myị chewo ka? Ịịyẹ a tị́ du kahị jam chị eko kaanụ angịkịla á myị jida tahị ka?’

¹⁸Ịnyịnyị-ịnyịnyị, aloyi ọlẹ a jam rwarụ ta ịJọn ọngọ hụ enyi Ohe lẹ. Chajị ụka ká ịJọn warị, kọ juwa nọ la imyi ha Ohe Oluhye ịnyịnyịịnyị, kọ myị nwa ere kpong-kpong ka lẹ, aloyi ọlẹ jam ya ẹla rụ́ ịJọn yẹkẹẹ, nyị chaaa! Olegu onyobyi nyaa tị wẹẹ kpa họ ịJọn ịnyị!

¹⁹Ma, ụka kaam Ọnyị nya ọngịnyị ehe tị warị, jam ri ang oriri bala ọ-nwa ang ọnwanwa, ị tị jam yẹkẹẹ, nyị chaaa! Ọngọ tụ ang-ang da juwa ri ang oriri bala ọ-nwa ang ọnwanwa kem, am Ọnyị nya ọngịnyị ehe ọlẹ nyaa tị riri! Oligu nya angị nyẹ angịnyị ẹpwa bala alọhọbịrị i-hi deeji kem, am nyaa tị ri ịnyịnyị! Ma, ọng myị́ ọng ọlẹ kọ la ẹla ọjẹ́jẹ nya Ohe Oluhye ẹ-ẹpwụ nyamwụ lẹ aalẹ, ẹga myị́ ẹga wuu ká ọngọọwa á yẹ ẹla ịlẹhị nya Ohe Oluhye, ọ ka jọ́ọ datị pyii.”

²⁰Ụka ọọwa, iJisọsị dọmwụ nya alibyi oyaya la alepweji la datị-datị ịlẹ kọ họ ụkụrwọ ẹbyẹbyị ịtụka-ịtụka ụ-ụwa gụ ẹga ọkịla wuu, chajị nyọlẹ ká alụwa á myị yẹ irya da bwu ẹpwụ nya ịhọbịrị nyaa kpong-kpong ka.

²¹Ụka ọọwa, iJisọsị byaa yẹkẹẹ, “Anụ alepweji nya iKorasịn bala anụ ala ịBẹtịsayịda ị-yẹ irya da ka ịwẹ, anụ ri enyi gu obyi lẹ! Chajị iru nya ụkụrwọ ẹbyẹbyị ịtụka ịlẹ kam họ e-epweji nyanụ wuu lẹ, ó-ri ụma nya ụkụrwọ ẹbyẹbyị ịlịnyị kị họ e-epweji nya ala ịTaya bala ala ịSayịdọn lẹ, ịnọ, ịwa ayịdang ka kụrụ ịwụrụ nya owuru ọkpakpa, juwa go agbụ wụ ịlaa nya ọmẹjẹ irya ọyẹda chajị nya ịhọbịrị ịhọhọ nyaa lụka ọọwa lẹ.

²²Chajị nya ọọwa lẹ, anụ jẹ́ myịmyị mẹ. Akama nya ala ịTaya bala ala ịSayịdọn ịwẹ ka ri ọmọnụma u-uhye nya akama ọtụka ọlẹ ká Ohe Oluhye ka yẹnụ, la ẹnụtụrụ nya eje ohyẹẹkpẹ nyamwụ wẹẹ!

²³Anụ ala ịKapẹnawụm ị-yẹ irya da ka ịwẹ, kanụ wẹẹ kpa ịlọnụ ka uhye lala ịnyaa ka ya ẹtẹ kịla egbamwụ alẹ wẹẹ, Ohe Oluhye ka kpanụ weji bwu ụwa, kaka ju ka ẹpwụ nya obwila wurum lụka ohyẹẹkpẹ kpáá, anụ yẹ! Chajị, ó-ri ká ụkụrwọ ẹbyẹbyị ịtụka ịlẹ kam họ wẹẹ e-epweji nyanụ, á họ e-epweji nya ala ịSọdọm ẹnụmwụ lẹ, ịnọ, epweji nyaa ịwa ayịdang ka hi juwa pyịyọọ daalẹ ọlẹ wẹẹ, ịnọ, ị́ ka tọọ ayịreji kaka.

²⁴Chajị nya ọọwa lẹ, anụ́-ụ jẹ́ myịmyị mẹ. Akama nya ala ịSọdọm ka ri ọmọnụma u-uhye nya akama ọlẹ ká Ohe Oluhye ka yẹnụ la ẹnụtụrụ nya eje ohyẹẹkpẹ nyamwụ ịnyịnyị.”

²⁵Ụka ọọwa, iJisọsị pyẹ ọnụ nyamwụ maa, juwa raabwọ ha Ohe Oluhye yẹkẹẹ, “Ahụ Ohe Oluhye Adada, Ọngọ họ epwoohe bala odehe, m jing obe chajị nyọlẹ ká họ ká etu nya ụkụrwọ ẹbyẹbyị ịlẹ kpịbaa hi angịlẹ kị ri angị jẹ́ ẹla bala angị jẹ́ ang lụmẹ nya odehe ọlẹ. Ma, ká tị chị etu nyaa ehe mẹjẹ angịlẹ kị tị jẹ́ ang gbuu ka lẹ.

²⁶Ee Adada, A họ ịnyị, chajị ịnyị kpangga a ri irya ọnahị nyang ene-ene lẹ.”

²⁷IJisọsị myịmyị yẹkẹẹ, “Am ayịdang a ri ọngọlẹ ká Ohe Oluhye Adam tụụbwọ hi ang myị́ ang wuu ju ụ-ụbwọ lẹlẹ. Chajị ọngọngọhẹ á juwa, ọlẹ kọ jẹ́ Ọnyẹwẹ nya Ohe Oluhye yẹẹyẹẹ ka. Kẹnẹ-kẹnẹ, Ohe Oluhye Adịda ayịdang mẹ ịnyị. Ọngọngọhẹ ọkịla á tị juwa kọ jẹ́ Ohe Oluhye Adịda ọọwa yẹẹyẹẹ kaka. Kẹnẹ-kẹnẹ, Ọnyẹwẹ nya Adịda ayịdang ụbwọọmwụ kem bala angịlẹ wuu ká Ọnyẹwẹ ọọwa a chụ, kọ mẹ Adịda ọọwa jaa ịnyịnyị lẹ mẹ ịnyị.”

²⁸Ụka ọọwa, iJisọsị yẹkẹẹ, “Anụ kẹwẹ wẹ ẹga nyam, anụ angịlẹ wuu kanụ wẹẹ kpa ịlọnụ da ru la ụkụrwọ nya olo nya ọkịlẹtụ ọkpakpa bala ayiiji ọbwọbwọ, m ka ya ọmwịịnyọ ha ugbodu okpukpuru nyanụ.

²⁹Anụ kẹwẹ kaam bala anụ a hu ogbilo nya ụgbẹyị nya ọhịhị nyam ọlẹ da o-omyi la awụlẹ mẹ. Kanụ ba abwẹla ọhọhọ nyam jẹ mẹ. Chajị am ayịdang ri ọngọ wụlẹlẹ bala ọ-la dụmwọ ẹ-ẹpwụ nya olegu lụmẹ. Aalẹ, anụ ka ye ọmwịịnyọ ha ugbodu okpukpuru nyanụ lẹ.

³⁰Ogbilo nyam ọọwa ọlẹ kam ka ya danụ o-omyi lẹ, ọ chịkpẹẹ lụmẹ. Olo nyam am ọlẹ kam ka ya chụụnụ e-egbeju lẹ, ọ tị la hukee hukee lụmẹ ịnyịnyị.”