Read idege ỊMATIYU 12 Bible Online

ỊMATIYU 12 - idege bible

ỊMATIYU 12

¹Ụka kọ nọ chẹẹ, iJisọsị bala angịjụgbẹyị nyamwụ juwa chịpwụrụ bwu ẹpwụ ẹrụ nya ang nya alubekee ị-lala ịrayịsị. Ẹnụtụrụ ọọwa ri Ẹnụtụrụ Ọhịnyọ Lụkụrwọ nya ala iJuu. Jaabwọ ká imyi juwa nwụ angịjụgbẹyị nya iJisọsị lụmẹ lẹ, ị kele kaka ya abwọ pwọ egbeju nya ịrayịsị iwiiti ịwẹ pwọọ lẹ, ị juwa daa abwọ, ri lụmẹ-lụmẹ lẹlẹ.

²Ụka ká ala ịFarịsii yẹ angịjụgbẹyị nya iJisọsị, ị byi iJisọsị yẹkẹẹ, “Ayịbahị ịtịcha, a yẹ jaabwọ ká angịjụgbẹyị nyang wẹẹ bịrị ehile nya Ẹnụtụrụ Ọhịnyọ Lụkụrwọ nyahị lẹ?”

³Ụka ọọwa, iJisọsị wẹ byaa yẹkẹẹ, “O ri anụ ayịdang á wa bwu ẹpwụ nya Ụpwụ Ịgọgọ ẹnẹnẹhẹ chajị nya ọhọhọ nya iDevidi bala angịnyị nyamwụ ụka ọlẹ ká imyi juwa nwaa kpong-kpong lẹka?

⁴Chajị, ụka ọọwa lẹ, iDevidi kele ka ube ịgọgọ nya Ohe Oluhye kaka hu ịkaa ọlẹ kị ya ha ọhaha ha Ohe Oluhye ri bala angịnyị nyamwụ? Ma, ịnọ, ehile nya Ohe Oluhye á tị myị ọnụ ha iDevidi ayịdang lee angịnyị nyamwụ nyọka họ ịnyị kpong-kpong ka. Kẹnẹ-kẹnẹ, angịkiliya nya Ohe Oluhye ụbwaa kem a kaa ri ịkaa ọlịnyị lẹlẹ.

⁵Lee ánụ tị́ wa ẹnẹnẹhẹ bwu ẹpwụ nya ụpwụ nya ehile nya iMosisi jaabwọ ká angịkiliya ilube ịgọgọ nya Ohe Oluhye nya ala iJuu kaa kpoye nya ehile nya Ẹnụtụrụ Ọhịnyọ Lụkụrwọ bwula ọ-kịla iya ẹnụ ọọwa ka-à?

⁶Ó-ri kanụ jẹ́ ka, tụbwọ aalẹ, ọngọlẹ kọọwa ayịdang lụmẹ gụ ube ịgọgọ ọtụka nya Ohe Oluhye, a wẹẹ ya ẹla tanụ lẹ.

⁷Ma, ó-ri kanụ jẹ́ etu nya ang ọlẹ ká Ụpwụ Ịgọgọ ya lẹẹ ẹ-ẹgẹlẹ lẹ, ịnọ, ánụ tụtụm ka juwa ya eje wu angịlẹ kị họ ẹlẹlẹhẹ ọkpụhị-ka ịịwẹ kpong-kpong kaka. Ẹla ọlụpwụ Ịgọgọ ọọwa a lẹẹ lẹ: Olegu nya ahyẹẹrwẹrwa baba ẹ-ẹga nyam Am Ohe Oluhye gụ iya ọkịlaakịla.

⁸Am Ọnyị nya ọngịnyị ehe ọlẹ kpakpakpa a ri Ayịbaba nya Ẹnụtụrụ Ọhịnyọ Lụkụrwọ ayịdang kpangga ịnyịnyị lẹ.”

⁹Ụka ká iJisọsị rụ bwu ẹgẹwẹ, ọ kele ka ube ọ-mẹ ẹla nya Ohe Oluhye jẹ nya ala iJuu.

¹⁰Ụka ọọwa, ọlẹng ọhẹ juwa ọlẹ ká ụbwọ nyamwụ ọhẹ gbu ba. Alẹng ịhyẹ juwa ụ-ụwa ịlẹ kị juwa tịtọ nyọka ya eje wu iJisọsị la ijẹẹhị. Ị tọ iJisọsị ịtọ yẹkẹẹ, “O ri ang opwoku ẹ-ẹga nya ehile nyahị ahị ala iJuu nyọka họ angịnyị ehe uda la Ẹnụtụrụ Ọhịnyọ Lụkụrwọ nyahị?”

¹¹Ụka ọọwa, iJisọsị wẹ byaa yẹkẹẹ, “Anụ ya ká ọkpịlọ nya ọngọngọhẹ lẹpwụ nyanụ-ụ́ chabwọ kpụ ụjẹ Ẹnụtụrụ Ọhịnyọ Lụkụrwọ, ká ọngọọwa á ka yụbwọ chọọ, gbọọ kpehe ka-á?

¹²Ọ ka gbọọ kpehe-ēè! Ọhịhị nya ọngịnyị ehe tị baba mwụ aba ba ịnya ọkpịlọ wẹẹ! Ọọwa lẹ, anụ tị́ wẹẹ ya anyị mẹ? Ehile myị ọnụ ju ụbwọ ọ-da ọngịnyị ehe da Ẹnụtụrụ Ọhịnyọ Lụkụrwọ.”

¹³Ịnyị lẹ, iJisọsị a byi ọngọlẹ ká ụbwọ nyamwụ gbu ba ọwẹ yẹkẹẹ, “Nịra ụbwọ ọtịpyọ nyang ọwẹ kpaa lẹẹlẹẹ mẹ, ẹnwa!” Ọọwa lẹ, ọlẹng ọwẹ a nịra ụbwọ ọtịpyọ nyamwụ ọọwa kpaa lẹ, ọ la gogo yẹẹyẹẹ hiigu-hiigu lala ụbwọ ọkịla ịnyịnyị lẹlẹ.

¹⁴Ọọwa lẹ, ala ịFarịsii a rụ bwu ụwa kele kaka me obyi jaabwọ kị ka bwu nwụ iJisọsị lẹlẹ.

¹⁵Ụka ká iJisọsị ayịdang jẹ́ ang chajị nya obyi omeme nya ala ịFarịsii ọọwa lẹ, ọ rụ ka ẹga ọkịla lẹlẹ. Iru nya angịnyị lụmẹ-lụmẹ ba iJisọsị kele ka ẹga ọọwa. Ịnyị lẹ, ọ juwa họ angịlẹ wuu ká ẹdụrụ jụ uda ụ-ụwa lẹlẹ.

¹⁶IJisọsị da angịlẹ wuu kọ haa uda ụ-ụwa ehile yẹkẹẹ, “Anụ kpa ẹla nya uda ọhọhọ nyam ya je angịnyị tụ ẹga myị́ ẹga da kpong-kpong koo.”

¹⁷Ẹlẹwẹ ká iJisọsị họ wẹ ẹ-ẹgẹwẹ mẹjẹ ọ-họ jịra nya ẹla ọlẹ ká Ohe Oluhye kpa Ayịsaya ya ọmwụ nyamwụ ene-ene yẹkẹẹ,

¹⁸“Ọngọlẹ ri ọnchẹ nyam ọlẹ kaam ayịdang chụchụ. Ọwa kpakpakpa a ri ọnyị ọnchẹ olikẹjẹ nyam lẹ. Ẹla myị́ ẹla nyamwụ wuu hám lụmẹ kaka kpoye. Am ya Olegu Ịgọgọ nyam họọ. Ọwa ayịdang juwa ka kele kaka mẹ eje ọlala ọchịla-chịla nyam. Am Ohe Oluhye jẹ alepwoja myị́ epwoja nya ala iJentayịlị wuu.

¹⁹Ma, ọwa ayịdang á ka juwa da ịwẹẹ ta angịnyị ka. Lee, o-juwa kpa ịlọmwụ chị ogu ka. Ọngọngọhẹ á tị ka juwa wo omyi nyamwụ gbogbogbo tụ opeje-opeje da kpong-kpong ka.

²⁰Ọwa ayịdang ri ọngọ kpẹhị chịng lụmẹ. Ọ́ ka myị-ị mwụ ọkpịlọ ọdẹwụ-dẹwụ nyamwụ ẹta ka. Ọwa ayịdang á tị ka myị-ị mịrị ila ọmyịnẹ-myịnẹ ọhẹ-lọhẹ kpong-kpong ka ịnyịnyị, gbee pwụ ụka ọlẹ kọ ka họ ká ọkụrụ-kụrụ nya abwẹla ọnyịịla nya Ohe Oluhye ka chị ehe gede-gede.

²¹Ẹ-ẹpwụtụbwọ nyamwụ kpangga, ẹhị ọrịrịị rịrị nya ala iJentayịlị wuu a ka ji ịnyịnyị lẹlẹ.”

²²Ụka ọọwa, ọnyị ọlẹng ọhẹ juwa ọlẹ ká olegu onyobyi juwa wu, du kọ ri ọngọ kpidu bala ọngọ ku ọnụ. Ịnyị lẹ, angịhyẹ a kpọọ ka ẹga nya iJisọsị lẹ, iJisọsị a họọ uda lẹ, ọngọọwa a jẹ́ juwa ya ẹla bala ọ-jẹ́ yọyị ịnyịnyị lẹlẹ.

²³Ụka ká iru nya angịnyị yọọ, ọ laa ahịbwuu lụmẹ. Angịhyẹ nyaa juwa yẹkẹẹ, “Anụ ya ká ọnyị nya iDevidi ọlẹ kahị lẹẹ ya ẹhị rịrị gbe a lẹẹ lẹ ka?”

²⁴Ụka ká ala ịFarịsii wo ịtọ ọtọtọ nyaa ọọwa lẹ, ala ịFarịsii ịịwa a wẹ byaa la ẹlẹlẹ ọwọọwọọ nyaa yẹkẹẹ, “Chaaa! IBilisibọlụ olegbeju ọgbahị nya alegu inyibyi wuu, a tị ya ọngịrị ọlẹ ká iJisọsị wẹẹ kpa ku alegu inyibyi ịwẹ wuu dodehe họọ ịnyị.”

²⁵Ụka ká iJisọsị ayịdang jẹ́ irya ọọwa ọlẹ kị juwa kpa mẹ, ọ wẹ byi ala ịFarịsii ịịwa yẹkẹẹ, “Anụ wo mẹ! Ịpyị-adịrahụ ọnyị myị ọnyị ọlẹ kọ chị ịlọmwụ ebwo, juwa tụ ịlọmwụ pyịpyị lẹ aalẹ, ọ ka ta ịlọmwụ ayịreji gbanggbang myị́ pyịyọọ. Epweji myị́ epweji lee ọdọdẹpwa ọnyị myị ọnyị ọlẹ ká alụwa á chị ịlaa ebwo, juwa tụ ịlaa pyịpyị ịnyịnyị lẹ aalẹ, ị́ ka godayị myị́ kpong-kpong kaka ịnyịnyị.

²⁶Ee lẹ, ó-ri ká Ohe Onyobyi ayịdang á ka kụ ụwa juwa chị ịlọmwụ ebwo, juwa ku Ohe Onyobyi ọọnamwụ ọkịla dodehe lẹ, anyanyị, anụ tị́ me irya ká ịpyị-adịrahụ nya Ohe Onyobyi tị tị ka jẹ́-ẹ godayị rịrị myị́ wẹẹ?

²⁷Ọ hiigu, ó-ri kanụ yẹkẹẹ, ọngịrị nya iBilisibọlụ, am nyaa lẹẹ kpa ku alegu inyibyi ịlẹ wuu dodehe lẹ aalẹ, anụ ya jem mẹ! Ọngịrị nya owo, anyị nyanụ anụ ayịdang a tị́ wẹẹ kpa ku alegu inyibyi dodehe ịnyịnyị lẹẹ mẹ? Anụ wo mẹ! Anyị nyanụ ịịwa a ka ya eje nya ẹla ọọwa wunu lẹlẹ.

²⁸Ma, ọ́ tị ri ọngịrị nya Olegu nya Ohe Oluhye, kam lẹẹ kpa ku alegu inyibyi ịwẹ wuu dodehe ịnyịlẹhị lẹ aalẹ, ọọwa mẹjẹ yẹkẹẹ, ọngịrị nya ịpyị Adịrahụ nya Ohe Oluhye a tị tị pwụụnụ eji wẹ lẹẹlẹẹ lẹlẹ.”

²⁹“Ang o-ju ẹjẹẹ nya ọọwa a lẹẹ lẹlẹ. Ọlẹng ọhẹ-lọhẹ á juwa ọlẹ kọ ka jẹ́-ẹ kele kaka be oluji ọlẹ kọ la ogogo ẹpwa, go ang-abwọ nya oluji ọọwa kpa rụ la agbụrụ myị́ kaka. Kẹnẹ-kẹnẹ, ó-ri ká ọlẹga ọọwa á wu ayịdẹpwa ọọwa nọnọ, chọọ ori kpá ene lẹ, ọ ka jẹ́-ẹ go ang-abwọ ịịwa kpa rụ myị́ wụlẹlẹ lẹlẹ.

³⁰Ọng myị́ ọng ọlẹ kọ myị ju ẹla nyam kaka lẹ aalẹ, ọngọ tụm pyịpyị, ọngọọwa a ri lẹlẹ. Ọng myị́ ọng ọlẹ kọ tị juwa tụ ịkpịlọ nyam guru tam kaka lẹ aalẹ, ọngọ nyi ịkpịlọ nyam ịịwa epepe hi awụlẹ, ọngọọwa a ri ịnyịnyị lẹlẹ.”

³¹IJisọsị myịmyị yẹkẹẹ, “Chajị nya ọọwa lẹ, m byinu yẹkẹẹ, ọhọbịrị myị́ ọhọbịrị lee ẹla o-ya pyị ọnyị myị ọnyị, ká ọngịnyị ehe á họ lee oyaya aalẹ, Ohe Oluhye ka hịnyọhi ha ọngọọwa myị́. Ma, ọng myị́ ọng ọlẹ kọ tị ya ẹla pyị Olegu Ịgọgọ nya Ohe Oluhye lẹ aalẹ, ị́ ka jẹ́-ẹ hịnyọhi ha ọngọọwa kpá ẹnẹnẹhẹ kaka.

³²Ọng myị́ ọng ọlẹ kọ ya ẹla pyịm am Ọnyị nya ọngịnyị ehe aalẹ, Ohe Oluhye ka hịnyọhi ha ọngọọwa myị́. Ma, ọng myị́ ọng ọlẹ kọ tị ya ẹla pyị Olegu Ịgọgọ nya Ohe Oluhye ene lẹ aalẹ, Ohe Oluhye á ka hịnyọhi ha ọngọọwa kpá ẹnẹnẹhẹ kaka. Ó-ri ẹpwụ nya odehe ọlẹ riri lee odehe o-gbe oyi myị́ oyi, ị́ ka jẹ́-ẹ hịnyọhi họọ kpong-kpong kaka.”

³³IJisọsị myịmyị byaa yẹkẹẹ, “Okoji myị́ okoji ọlẹ kanụ yẹ ugbe ọnyịịla u-uhye nyamwụ lẹ aalẹ, anụ́-ụ wụrụ okoji ọọwa, okoji ọnyịịla mẹ. Okoji myị́ okoji ọnyị ọlẹ kanụ tị yẹ ugbe ọtịpyọ u-uhye nyamwụ lẹ aalẹ, anụ́-ụ wụrwọọ, okoji ọtịpyọ ịnyịnyị mẹ. Chajị ugbe oluhye nya okoji, a kaa ya ụma nya okoji ọlẹ kọ ri je ọngịnyị ehe lẹ.

³⁴Ee lẹ, kaanụ ayịdang tịpyọ ọ-ọkịlẹtụ nyanụ lala ilo ọlẹ kị wụrụ ọgbịjị lẹ, anyanyị, ẹla ọnyịịla a tị́ ka jẹ́-ẹ bwu ọnụ nyanụ kpehe myị́-ị? Chajị ang ọlẹ kọ myị ẹpwụ ọkịlẹtụ nya ọngịnyị ehe pwẹẹpwẹẹ, a kaa chị́ hụrụ bwu ẹpwụ ọnụ nya ọngọọwa kpehe lẹ.

³⁵Ọngọlẹ kọọwa ayịdang á kpụdụ nya abwẹla ọnyịịla ẹ-ẹpwụ nya ọkịlẹtụ nyamwụ lẹ aalẹ, ang ọnyịịla kem, ọlabwẹla ọnyịịla ọọwa a kaa họ pyịyọọ lẹlẹ. Ma, ọngọlẹ ká abwẹla onyobyi ọhọhọ á myị ẹpwụ nya ọkịlẹtụ nyamwụ kpọrịkọọ lẹ aalẹ, ang onyobyi kem, ọngọ onyobyi ọọwa a kaa họ pyịyọọ ịnyịnyị lẹlẹ.”

³⁶IJisọsị myịmyị byaa yẹkẹẹ, “Anụ wo mẹ! Ẹla myị́ ẹla ohideeji ọnyị myị ọnyị, ká ọng myị́ ọng á ya lẹ aalẹ, ọngọọwa ayịdang á ka dayi la ọ-kpa ọnụ nya ịlọmwụ wẹ ịtọ ị-ịlahị nya Ohe Oluhye u-uhye nya ẹla ọọwa la ẹnụtụrụ nya eje ohyẹẹkpẹ kaka.

³⁷Chajị ẹla ọlọnụ nya ọng myị́ ọng, ị ka kpa ya eje wu ọngọọwa lee ọ-kpa ya eje rụ ọngọọwa la ẹnụtụrụ nya eje ohyẹẹkpẹ lẹlẹ.”

³⁸Ọọwa lẹ, angịhyẹ lẹpwụ nya ịtịcha ị-mẹ ehile nya iMosisi jẹ bala ala ịFarịsii ịhyẹ a kele ka ẹga nya iJisọsị kaka byoo yẹkẹẹ, “Ayịbahị ịtịcha, ahị warị wẹ ẹga nyang ká ka họ ang o-ju ẹjẹẹ ọhẹ hahị kahị ka yẹ.”

³⁹“Aloyi onyobyi ị-lala anụ, kanụ ri angị jẹkpẹ da Ohe Oluhye, bwula ọchịla o-hu ọkịlẹtụ ha-ka, lala ọnyang ahụ ọ-kaa họ ụya ba ọrụmwụ, a kaa tịtọ nya ang o-ju ẹjẹẹ nya ụkụrwọ ẹbyẹbyị pyii lẹ. Ma, ánụ tị ka ye kpong-kpong ka. Aalẹ, kẹnẹ-kẹnẹ, ang o-ju ẹjẹẹ nya ụkụrwọ ẹbyẹbyị ọlẹga nya iJona ọlọmwụ onyogo ụbwọọmwụ mẹ ịnyị!

⁴⁰Chajị jaabwọ ká iJona hyehe ẹ-ẹpwụ nya ọgbọm-gbọm la ahị ọpyẹpyẹ ịta bala odu ịta wẹẹ. Ịnyịnyị, am Ọnyị nya ọngịnyị ehe ọlẹ a ka hyehe ụ-ụwa ẹ-ẹpwụ nya ugbẹjẹ nya ịpyị lala ụtụrụ ịta bala odu ịta lẹlẹ.

⁴¹Ma, ẹnụtụrụ nya eje ohyẹẹkpẹ, ala iNineve ka wuleji la eje tụ aloyi ọlẹ pyịpyị u-uhye nya irya ọ-myị yẹda-ka nya aloyi ọlẹ. Ala iNinive ka ya eje ọọwa waa ịnyịnyị. Chajị ala iNineve ayịdang yẹ irya da lụka ọlẹ kị wo ẹla Ohe oyaya nya iJona. Ma, am ọngọ gụ iJona gụ tị jam ya ẹla je aloyi ọlẹ timajẹ lẹ.

⁴²Adịrahụ ọnyang ọlẹ kọ bwu oye nya edii kele ka ẹga nya iSolomọn ugbeene lẹ, ọ ka wuleji la eje tụ aloyi ọlẹ pyịpyị la ẹnụtụrụ nya eje ohyẹẹkpẹ. Chajị adịrahụ ọnyang ọọwa bwu ẹga ọlụrụ nya ịlẹhị-ịlẹhị kele kaka wo ẹla ọjẹ́jẹ nya iSolomọn. Ma, am ọngọ gụ iSolomọn ọọwa tị jam ya ẹla je aloyi ọlẹ lẹ. Ma, ánụ tị myị ke ụrụ kaka.”

⁴³IJisọsị myịmyị yẹkẹẹ, “Anụ wo mẹ! Ụka ká olegu onyobyi á gba kpehe hi ẹpwụ nya ọngịnyị ehe kpá, olegu onyobyi ọọwa kaa rụ, juwa ga tụ ẹga myị́ ẹga nya ugbileji ọ-chị ọhụ kịra-kịra da, juwa tịtọ nya ẹga ọmwịịnyọ. Ụka kọ ye ẹga ọmwịịnyọ ọhẹ-lọhẹ kaka lẹ,

⁴⁴olegu onyobyi ọọwa a kaa yẹkẹẹ, ‘Eheehe! Am ka rụ tịrẹkpẹ kele ka ẹpwa nyam onyogo ọlẹ kam gba kpehe hi lẹ!’ Ụka ọọwa, ọ kaa tịrẹkpẹ kele ka ẹpwụ nya ọngọọwa ka ẹpwa onyogo nyamwụ. Ọ kaa yẹ ẹpwa ọọwa dụwa luhwo luhwo, kị tọọ cheri-cheri bala ọnwụla ang myị́ ang wuu nọ yẹẹyẹẹ ụ-ụwa.

⁴⁵Ịnyị, olegu onyobyi ọọwa a kaa rụ tịrẹkpẹ kpehe kaka kpa alegu inyibyi irwiye ịkịla ịlẹ kị tịpyọ gụ ịlọmwụ mwẹẹkpẹ kele kaka kụ ẹpwụ nya ọngọlẹ kọ gba kpehe bwu ẹpwụ nyamwụ wẹ ene-ene lẹlẹ. Ọọwa lẹ, iwe-ahụrụ ohyẹẹkpẹ-ẹkpẹ nya ọngọọwa a kaa tịpyọ gụ ọlụka nya ọgbanyẹ nyamwụ lẹlẹ. Ịwẹ-ịịwẹ, iwe-ahụrụ nya angị inyibyi iloyi ọlẹ wuu a ka la ịnyịnyị lẹlẹ.”

⁴⁶Ụka ká iJisọsị juwa kpa ẹla ọọwa ọ-ọnụ ya wẹẹ, ịnamwụ bala anyịnamwụ alẹng kele kaka godayị rịrị odehe, juwa tịtọ kị ka ya ẹla tọọ.

⁴⁷Ụka ọọwa, ọngọhẹ kele kaka byi iJisọsị yẹkẹẹ, “Ayịbahị, ịnang bala anyịnang alẹng godayị rịrị lalẹẹ odehe, juwa tịtọ kị ka ya ẹla tang.”

⁴⁸IJisọsị wẹ byoo yẹkẹẹ, “Oowo a tị́ ri ịnam ene? Oowo a tị́ ri anyadam ịịwa ene?”

⁴⁹Ọọwa lẹ, iJisọsị a me ụchụ kele ka ẹga nya angịjụgbẹyị nyamwụ lẹ, ọ yẹkẹẹ, “Anụ yaa lẹ? Angịwẹ a ri ịnam bala anyadam lẹlẹ.

⁵⁰Anụ wo mẹ! Ọng myị́ ọng ọlẹ kọ họ irya nya Adam ọlẹ kọ juwa e-epwoohe lẹ aalẹ, ọngọọwa a ri ọnyịnam, ọlẹng bala ọnyang lee ịnam ịnyịnyị lẹlẹ.”