Read idege ỊMATIYU 13 Bible Online

ỊMATIYU 13 - idege bible

ỊMATIYU 13

¹La ẹnụtụrụ ọọwa-ọọwa, iJisọsị rụ hi ẹpwa ọwẹ kele ka ịkịka nya Ihu ọkịlọlọ ọtụka ọhẹ kaka hụhụ ụ-ụwa juwa mẹ ang jẹ angịnyị.

²Ụka ọọwa, iru nya angịnyị lụmẹ-lụmẹ kele kaka jịra ọ-ọnụụka nya ihu ọọwa, chajị nyọka wo ẹla nyamwụ. Angịịwa ju iru lụmẹ gbee ká iJisọsị ayịdang rụ kaka hụhụ ẹ-ẹpwụ nya ụmwụ nya enyi. Ọọwa lẹ, iru nya angịnyị ịịwa a godayị rịrị ọ-ọnụụka nya ihu lẹlẹ.

³Ọọwa lẹ, iJisọsị a juwa kpa oja ọkpịta mẹ ang lụmẹ-lụmẹ jaa ụ-ụwa lẹlẹ. Ụka ọọwa, ọ yẹkẹẹ, “Ụka ọhẹ juwa ká ọlẹrụ ọhẹ kpa ajẹ ịhyẹ kaka hụ ẹ-ẹrụ nyamwụ.

⁴Ụka ká ọlẹng ọwẹ juwa hụ ajẹ nyamwụ ịịwa ẹ-ẹrụ ịnyịnyịịnyị, ịhyẹ hụrụ chụwa ọ-ọnụ nya ụgbẹyị. Ịchịnụ kele kaka gwaa ri.

⁵Ajẹ ịkịla hụrụ chị ka uhye nya ẹjwọ. Jaabwọ ká ọpyị ọlụwa á lụmẹ gbuu ka lẹ, ị bwu kpehe ahyaahị. Ma, í ye ẹgẹgẹhẹ da ụtẹ ka kpori-kpori ka.

⁶Ịnyị a du, ụka ká ẹnụ gba kpehe, kọ juwa chaa nya ịlẹhị-ịlẹhị lẹ, apwụ nyaa a yẹpiloo gbee kị gbu gbanggbang wuu lẹlẹ. Chajị ụtẹ nyaa á la gogo gbuu, ka waa kpa myị́ kpong-kpong kaka.

⁷Ajẹ ịkịla hụrụ chị ka ẹpwụ nya ejwo. Ụka kị bwu kpehe, ejwo ịịwa taa pyịpyị lẹ, ị́ nwụ́ egbe ka.

⁸Ma, ajẹ ịkịla ịhyẹ hụrụ chị ka ọpyị ọnyịịla. Ajẹ ịịwa nwa gbee kị nwụ́ ju iru hiigu-hiigu. Ịhyẹ nyaa nwụ́ egbe chịba ịlaa lala ugbabwọ ohu ịkịla nyaa nwụ́ egbe chịba ịlaa lala ugbabwọ iwo ịrwọnyẹ. Ịkịla nyaa myịmyị nwụ́ egbe chịba ịlaa lala ugbabwọ iwo ịta ịnyịnyị.”

⁹IJisọsị kpa ẹla ọlẹ tụ etu ọọwa ku yẹkẹẹ, “Ọngọlẹ kọ ju ụrụ ọ-kpa wo ẹla lẹ aalẹ, ọngọọwa a wo etu nya ẹla ọlẹ mẹ!”

¹⁰Ịnyị lẹ, angịjụgbẹyị nya iJisọsị a kele ka ẹga nyamwụ kaka tọọ wo yẹkẹẹ, “Ịịyẹ a tị́ du ká kaa kpa oja ọkpịta la datị-datị kem mẹ ang jẹ angịnyị ịnyị?”

¹¹Ụka ọọwa, iJisọsị wẹ byaa yẹkẹẹ, “Ẹ-ẹga nyanụ lẹ, Ohe Oluhye ya ọ-jẹ́ myịmyị hanụ, chajị kanụ ka jẹ́ ang okpori-kpori ọkpịbaa nya ịpyị-adịrahụ nya epwoohe lẹ. Ma, ọ-jẹ́ myịmyị ọlịnyị á tị juwa ha igbodiya ịwẹ kpong-kpong ka.

¹²Chajị ọng myị́ ọng ọlẹ kọ la ang juwa ene lẹ aalẹ, ọngọọwa, ị ka myịmyị-ị̀ ya ang ọkịla ha dọọ u-uhye gbee kọ ka la mwụ aba ba lẹlẹ. Ma, ọng myị́ ọng ọlẹ kọ tị la ang juwa gbuu ene kaka lẹ aalẹ, ị ka nọọ ang ochiche ọlẹ kọọwa ayịdang la ene-ene pyii lẹ.

¹³Ang odudu kam kaa kpa oja ọkpịta kem ya ẹla ta angịwẹ ịnyị a lẹẹ lẹlẹ: ịwa ayịdang á yọyị la ọyẹyẹ, ị́ kaa jẹ́ ịngịngịhyẹ ogu datị ka. Ị́ tị wo ẹla la owowo, ị́ kaa wo ju ka ụrụ nyaa lee ọ-la ọ-jẹ́ myịmyị u-uhye nya ẹla ọọwa kpong-kpong ka ịnyịnyị.

¹⁴Chajị u-uhye nya angịwẹ kpangga, ọmwụ ọyẹyẹ nya Ayịsaya onyogo a họ jịra lẹ. Chajị Ayịsaya yẹkẹẹ,” “ ‘Anụ ka wo la owowo, ma anụ́ tị ka la ọ-jẹ́ myịmyị u-uhye nya ẹla ọọwa kpá kaka. Anụ tị yẹ la ọyẹyẹ, anụ́ tị ka jẹ́ ang ọọwa ogu datị kpá kaka ịnyịnyị.

¹⁵Chajị ọkịlẹtụ nyanụ tiri kpini-kpini lẹ. Anụ mwụ ang ku ịlọnụ a-arụ bala ọ-ya ang chị ịlọnụ a-ahị chajị kanụ ka jẹ́-ẹ yọyị kaka lee ọ-jẹ́ wo ẹla kaka. Lee, ọ-ka jẹ́-ẹ la ọ-jẹ́ myịmyị ẹ-ẹpwụ ọkịlẹtụ nyanụ kaka ịnyịnyị. Anụ họ ịnyị chajị kanụ ka myị-ị tịrẹkpẹ warị wẹ ẹga nyam Am Ohe Oluhye, kaka ye uda ọhọhọ kaka.’ ”

¹⁶Ụka ọọwa, iJisọsị ya ẹla ta angịjụgbẹyị nyamwụ yẹkẹẹ, “Anụ lẹ, ahị ọwawa ri ịnyanụ lẹ. Chajị anụ ju ẹhị ọ-kpa yọyị myịmyị, anụ tị ju ụrụ o-wo ẹla myịmyị ịnyịnyị lẹ.

¹⁷Nya ịlẹhị-ịlẹhị, m byinu yẹkẹẹ, iru nya alọmwụ nya Ohe Oluhye inyogo bala angị ịgọgọ inyogo lụmẹ-lụmẹ juwa, ọlẹ kịịwa ayịdang mama nyọka kpẹhị nya ịlaa yẹ ang ịlẹ kaanụ ayịdang wẹẹ yẹ alẹ. Ma, ọ́ tị chịkpẹẹ haa kpụ, ị yaa myị́ kaka. Ịnọ, ịwa ayịdang juwa teleko nyọka wo, ang ịlẹ kaanụ ayịdang wẹẹ wo alẹ ịnyịnyị. Ma, ọ́ tị chịkpẹẹ haa kpụ i-wo myị́ kaka.”

¹⁸IJisọsị myịmyị byaa yẹkẹẹ, “Chajị nya ọọwa lẹ, anụ ke ụrụ la etu nya oja nya ọngọ hụ ajẹ mẹ.

¹⁹Ajẹ ịlẹ kị chụwa ọ-ọnụ nya ụgbẹyị ku ọmwakpa nya angịlẹ kị wo ẹla nya Ohe Oluhye chajị nya ịpyị-adịrahụ nya epwoohe kpá kị tị kaa jẹ́ etu nyamwụ kpong-kpong ka. Ọọwa lẹ, Ohe Onyobyi a kaa kele kaka nu angịwẹ ẹla nya Ohe Oluhye ọọwa bwu ẹpwụ ọkịlẹtụ nyaa lẹlẹ.

²⁰Ajẹ ịkịla ịlẹ kị hụrụ chị ka uhye nya ẹjwọ ku ọmwakpa nya angịlẹ kị wo ẹla nya Ohe Oluhye lẹ, kị kaa ye ẹla ọọwa gbaaa la ọkẹkẹnị ahyaahị.

²¹Ma, jaabwọ kịịwa ayịdang á tị myị ya iwe da ha ẹla ọọwa kpụ, ọ da ụtẹ weji ẹ-ẹpwụ ọkịlẹtụ nyaa gogo ka lẹ, ị́ kaa godayị rịrị tata myị́ ka. Ahyaahị ká akama lee ọtụpyịpyị á warị chaa ọgụ, chajị nya ẹla ọọwa ọlẹ kị wo lẹ, ị kaa mileji pwụrẹrẹ lẹlẹ.

²²Ajẹ ịlẹ kị hụrụ chị ka ẹpwụ nya ejwo ku ọmwakpa nya angịlẹ kị wo ẹla nya Ohe Oluhye kpá, ká olo nya imahị nya ọhịhị ọlẹ bala ọháha ọlala u-uhye nya ụdụ nya odehe ọlẹ á tụ ẹla ọọwa pyịpyị gbee lẹ, ịwa ayịdang á kaa nwụ́ ugbe ọnyịịla ọhẹ-lọhẹ ha Ohe Oluhye kpong-kpong kaka.

²³Ajẹ ịlẹ kị hụrụ chị ka ọpyị ọnyịịla ku ọmwakpa nya angịlẹ kị wo ẹla nya Ohe Oluhye lẹ, kị kaa la ọ-jẹ́ myịmyị u-uhye nyamwụ, juwa kpa ẹla ọọwa họ ụkụrwọ ịnyịnyị. Angịhyẹ nyaa juwa nwụ́ ugbe ha Ohe Oluhye chịba ịlaa mwụ aba ba lala ụka ohu. Angị ịkịla nyaa juwa nwụ́ egbe mwụ aba ba ịlaa ụka iwo ịrwọnyẹ. Angị ịkịla nyaa juwa nwụ́ egbe ha Ohe Oluhye chịba ịlaa mwụ aba ba ụka iwo ịta ịnyịnyị.”

²⁴IJisọsị jaa oja ọkpịta ọkịla yẹkẹẹ, “Ịpyị-adịrahụ nya epwoohe lala oja ọlẹ: Ọlẹng ọhẹ bwuru eji wuu lẹ, ọ kpa ajẹ ịnyịịla-ịnyịịla nya ịngịhyẹ ịlẹ kị lala ịrayịsị kaka tọ ụ-ụwa lẹlẹ.

²⁵Ụka ká angịnyị ka ube kaka nune la odu kpá, oluji ọhẹ kele kaka ya ịyịịwọ tọ ẹ-ẹpwụ nya ịrayịsị nya ọlẹrụ ọwẹ ịnyịnyị.

²⁶Ụka ká ịrayịsị nya ọngọwẹ nwa juwa da egbeju-ehe lẹ, ịyịịwọ ịịwa a tịtị chị ịlaa ehe ịnyịnyị lẹlẹ.

²⁷Ụka ọọwa, anchẹ nya ayịdọlẹrụ ọọwa kele kaka byoo yẹkẹẹ, ‘Ayịbahị, ajẹ nya ịrayịsị kem a tị́ wu lalẹẹ ẹ-ẹrụ? Ee lẹ, ale ịyịịwọ a tị́ bwu kele?’

²⁸Ayịdọlẹrụ ọwẹ wẹ byaa yẹkẹẹ, ‘Oluji nyam a kele kaka ya ịyịịwọ ịwẹ tọ wẹ ẹ-ẹrụ nyam lẹ.’ Ụka ọọwa, anchẹ ịwẹ tọọ wo yẹkẹẹ, ‘Ee lẹ, ahị kele kaka hu ịyịịwọ ịịwa hụrụ hi ịrayịsị nyang mẹ?’

²⁹Ayịdọlẹrụ wẹ byaa yẹkẹẹ, ‘Ehe. Anụ kele ka. Ó-ri ịnyị ka aalẹ, ụka kanụ ka họ ụkọ ọọwa, anụ ka hu ịrayịsị nyam hụrụ ịnyịnyị taa kpịlọ.

³⁰Anụ ba hi ịrayịsị bala ịyịịwọ ịwẹ kị juwa nwa la awụlẹ gbee pwụ ụka nya ịrayịsị ọchịchị ene mẹ. Ụka ọọwa, m ka byi angị ka chị ịrayịsị nyam, kị ka kele kaka du ịyịịwọ ịwẹ, kị ka kpa ori chị ịyịịwọ ịịwa ẹbwọ, kị ka jwaa ila hụrụ mẹ. Kanụ chị ịrayịsị nyam kpa nya kaka ju ogu ham mẹ oo!’ ”

³¹IJisọsị myịmyị jaa oja ọkpịta ọkịla yẹkẹẹ, “Ịpyị-adịrahụ nya epwoohe lala ẹjẹ nya okoji ọlẹ kị wụrụ ịmọsịtadị ọlẹ ká ọlẹng ọhẹ kpa kaka tọ ẹ-ẹrụ nya apwụ iriri nyamwụ.

³²Ọ ri nya ịlẹhị, ẹjẹ nya ịmọsịtadị ọwẹ a byẹhị kpá gụ ajẹ ịkịla wuu lẹlẹ. Ma, ụka kọ tị bwu kpehe kpá, ọ kaa nwa kaka ri okoji ọlẹ kọ ri ọtụka gụ ekeji ịkịla ịlẹrụ nya apwụ iriri ọọwa wuu, gbee kọ kaa ri ọmwụ nya okoji ọlẹ ká ịchịnụ iluhye-ọgba kaa kele kaka nọ awụ nyaa u-uhye nya abwọ nyamwụ.”

³³IJisọsị myịmyị jaa oja ọkpịta ọkịla yẹkẹẹ, “Ịpyị Adịrahụ nya epwoohe lala ịjọnwa ọlẹ kịị kpa họ ịkaa. Ọlẹ ká ọnyang ọhẹ kele kaka hu awụtọọ nya ọrụ nya ambakpa ọlẹ kị kaa kpa họ ịkaa, kọ hu ịjọnwa ọọwa dala ọrụ nya ambakpa ọọwa yaa jula awụlẹ gbee kọ mịrị kaka ri ọtụka-ọtụka.”

³⁴Ija ịkpịta, iJisọsị a kpa mẹ ịngịịwẹ wuu jẹ iru nya angịnyị ịlẹ kị jịra ẹ-ẹga nyamwụ lẹ. IJisọsị á mẹ ịngịngịhyẹ jaa, ọlẹ kọ kpa oja ojaja da etu nyamwụ wụlẹ ya jaa ka lẹ ka.

³⁵Ang ọmẹjẹ nya iJisọsị ọọwa, ri ọ-họ jịra nya ẹla ọlẹ ká ọlọmwụ nya Ohe Oluhye ọhẹ ya lẹẹ ẹgẹlẹ rụ́ ịKịrayịsị yẹkẹẹ, “Am ka kpa iru nya ija ịkpịta mẹ ang jẹ. Am ka mẹ ang okpori-kpori ọlẹ kọ kpịbaa hi alodehe wuu bwu ọmwụ ọdada nya odehe ọlẹ pyịyọọ daalẹ, jẹ angịnyị ehe ụka ọọwa ịnyịnyị.”

³⁶Ụka ká iJisọsị rụ bwu ẹpwụ nya angịnyị ịịwa, ọ kele ka ẹpwang ọhẹ. Angịjụgbẹyị nyamwụ bọọ kele ka ụwa kaka byoo yẹkẹẹ, “Ọngọlahị, chuchuu bwuru etu nya oja nya ịrayịsị bala ịyịịwọ ọwẹ ya jehi chẹẹ mẹ!”

³⁷Ụka ọọwa, iJisọsị wẹ byaa yẹkẹẹ, “Anụ wo mẹ! Ọnyị ọlẹng ọlẹ kọ kpa ajẹ ịnyịịla ịwẹ kaka tọ ẹ-ẹrụ, a ri am Ọnyị nya ọngịnyị ehe ọlẹ ayịdang lẹ.

³⁸Ẹrụ ọọwa ọlẹ kọ ya ajẹ ịwẹ tọ, a ri odehe ọlẹ lẹ. Ajẹ ịnyịịla ịwẹ a tị ri angịlẹ kị ri angịnyị nya ịpyị nya Adịrahụ nya epwoohe ọọwa lẹ. Ịyịịwọ ịlẹ kị bwu kpehe ẹ-ẹrụ ọọwa, a ri angịlẹ kị ri angịnyị nya Ohe Onyobyi ám odehe ọlẹ lẹ.

³⁹Oluji ọlẹ kọ kpa ịyịịwọ ịịwa kaka tọ ẹ-ẹrụ, a ri Ohe Onyobyi ayịdang lẹ. Ang nya ẹrụ ohuhu, a ri ụka nya ọmyịmyị nya odehe ọlẹ lẹ. Angịlẹ kị tị kele ka ẹrụ kaka hu ang nya ẹrụ ọọwa, a ri alegu-ẹrụ nya Ohe Oluhye lẹ.

⁴⁰Jaabwọ ká angịwẹ kele kaka du ịyịịwọ ịịwa guru, kị jwaa ila hụrụ wẹẹ, ịnyịnyị, ọ ka la ẹ-ẹga nya angịnyị nya Ohe Onyobyi ịịwa lụka nya ọmyịmyị nya odehe ọlẹ ịnyịnyị lẹlẹ.

⁴¹Ụka ọọwa, am Ọnyị nya ọngịnyị ehe ọlẹ ka du alegu-ẹrụ nyam ẹrụ kaka ku angịlẹ wuu kị kaa họ ang onyobyi bala angịlẹ wuu kị kaa họ ká angịnyị ehe aanaa kaa wu ori nya ọhọbịrị ọhọhọ kpehe hi ịpyị adịrahụ nyam.

⁴²Ọọwa lẹ, ị ka go angị inyibyi ịịwa wuu ju ka ẹpwụ nya ila nya utiyo ọtụka olobwila ẹga ọlẹ kị ka juwa jida bala ọ-ka juwa ka wangịrị pyịyọọ lẹlẹ.

⁴³Ma ụka ọọwa, alabwẹla ọnyịịla, angịnyị nya Ohe Oluhye lẹ, ị ka juwa hụ́ tang tang lala ahịgboo nya ẹnụ ọchịchị ụ-ụwa ị-ịpyị nya Adịrahụ nya Ohe Oluhye Adaa. Ọng myị́ ọng ọlẹ kọ ju ụrụ ọ-kpa wo ẹla lẹ aalẹ, ọngọọwa a wo etu nya ẹlẹwẹ mẹ!”

⁴⁴IJisọsị myịmyị yẹkẹẹ, “Ịpyị-adịrahụ nya epwoohe lala ụdụ ọlẹ kọ kpịbaa ẹ-ẹpwụ nya ẹrụ ọhẹ. Ọlẹ ká ọlẹng ọhẹ kele kaka ye ụdụ ọlẹpwụ ẹrụ ọọwa, kọ myịmyị tụ ọpyị kụrụ ụdụ ọọwa kpịrẹ-kpịrẹ. Ọọwa lẹ, ọ rụ kele ka ẹpwa kaka go ang myị́ ang nyamwụ ịlẹ kọ la wuu ra lẹ, ọ kpa okpoko ọọwa kele kaka ra ẹrụ ọọwa lẹlẹ.”

⁴⁵IJisọsị myịmyị yẹkẹẹ, “Ịpyị-adịrahụ nya epwoohe lala ọlọhị ọlẹ kọ juwa tịtọ nyọka ra ogbe ịlẹ kị há ụhị lụmẹ kaka kpoye.

⁴⁶Ụka ká ọlẹng ọdọhị ọọwa jẹ gbee kọ yẹ ogbe ọnyịịla-ọnyịịla ọhẹ ọlẹ kọ la ịnya lụmẹ-lụmẹ, ọ kele kaka go ang myị́ ang nyamwụ ọlẹ kọ la wuu ra, kpa okpoko ọọwa kaka ra ogbe ọọwa.”

⁴⁷IJisọsị myịmyị yẹkẹẹ, “Iwe ahụrụ nya ịpyị-adịrahụ nya epwoohe lala ụgbọwụ o-wu iyenyi ọlẹ ká angị durwe enyi kpa kele kaka da ẹ-ẹpwụ nya ihu ọkịlọlọ ọhẹ. Ụgbọwụ ọọwa wu ụma nya iyenyi la datị-datị ẹ-ẹpwụ nyamwụ.

⁴⁸Ụka ká ụgbọwụ ọọwa wu iyenyi myọọ pwẹẹpwẹẹ lẹ, alurwe enyi ịịwa a gbilọọ kpehe kaka dụwa ọ-ọnụụka juwa yile iyenyi ịlam-ịlam ịlẹpwụ nyamwụ wuu ju ang lẹ, ị go iyenyi ịháha-ka ịlẹpwụ nyamwụ wuu kpa kaka chịịrụ pyịyọọ lẹlẹ.

⁴⁹Ịnyịnyị-ịnyịnyị, ọ ka la lụka nya ọmyịmyị nya odehe ọlẹ lẹlẹ. Ị ka du alegu-ẹrụ nya Ohe Oluhye kele kaka gba angịlẹ wuu kị ri angịnyị inyibyi kpehe chaa ebwo datị hi alabwẹla ọnyịịla nya Ohe Oluhye.

⁵⁰Ị ka go angịnyị inyibyi ịịwa wuu kpa kele kaka ju ka ẹpwụ nya ila nya utiyo ọtụka olobwila wurum ẹga ọlẹ kịịwa ayịdang ka juwa chị eko bala ọ-ka juwa wangịrị ụ-ụwa pyịyọọ.”

⁵¹IJisọsị tọ angịjụgbẹyị nyamwụ ịtọ byaa yẹkẹẹ, “Anụ wo etu nya ala ịlẹ kam ya jenu wẹ kpong-kpong?” Ị wẹ byoo yẹkẹẹ, “Ee, ahị wo, Ọngọlahị.”

⁵²IJisọsị myịmyị wẹ byaa yẹkẹẹ, “Ọdawụlẹ nya ẹla ọlẹ ri yẹkẹẹ, ọng myị́ ọng ọlẹ kọ ri ịtịcha ọ-mẹ ehile nya iMosisi jẹ ene kọọ yẹ kaka ri ọngọjụgbẹyị nya ịpyị Adịrahụ nya epwoohe ọlẹ lẹ aalẹ, ọngọọwa ka lala ayịdẹpwa ọlẹ kọ kpụ ụdụ nya ang-abwọ inyogo bala inyeewe lụmẹ-lụmẹ, ọlẹ kọ kaa kele ka chụ ang-abwọ inyogo bala inyeewe ịịwa kpehe bwu ẹpwụ nya ụdụ nyamwụ jaabwọ kọ họ́ọ.”

⁵³Ụka ká iJisọsị kpa oja ọkpịta mẹ ang jẹ kpá wuu lẹ, ọ rụ bwu ụwa lẹlẹ.

⁵⁴IJisọsị rụ bwu ẹga ọọwa kele ka epweji nya ịlọmwụ. Ọ kele juwa mẹ ang jẹ angịnyị u-ube ọ-mẹ ẹla nya Ohe Oluhye jẹ nya ala iJuu ọlụwa. Ụka ká ang ọmẹjẹ nyamwụ ọọwa laa ahịbwuu lụmẹ lẹ, ị juwa tọ awụlẹ ịtọ wo yẹkẹẹ, “Ale, ọnyị ọlẹ a tị́ kpa ẹla ọjẹ́jẹ nyamwụ bala ụkụrwọ ịlẹbyẹbyị ịlẹ kọ wẹẹ họ ịịwẹ wuu bwu?

⁵⁵Ọọnyị nya okebenta ọlẹ à lẹẹ kaka-á? Ịịnamwụ à ri iMeri ka-á? Ọọnyị ọlẹ ká anyịnamwụ alẹng ịkịla ri iJemsi bala iJosẹfụ bala ịSayịmọn bala iJudasị a lẹẹ kaka-á?

⁵⁶Ọọnyị ọlẹ ká anyịnamwụ anyang anyị jam e-epweji ọlẹ tahị ịnyịnyị a lẹẹ kaka? Ee lẹ, ale, ọnyị ọlẹ a tị́ kpa ang ịjẹ́jẹ nyamwụ ịwẹ wuu bwu tịtị mẹ?”

⁵⁷Ịnyị lẹ, abwọ a chị́ alụwa pyẹpyẹ la ọ-myị la iJisọsị lẹlẹ. Ọọwa lẹ, iJisọsị a byaa yẹkẹẹ, “Ọlọmwụ nya Ohe Oluhye kaa la ihi lụmẹ ẹ-ẹga myị́ ẹga. Kẹnẹ-kẹnẹ, alepweji nya ịlọmwụ ọwa bala alọdọdẹpwa nyamwụ mịlẹ-mịlẹ, a kaa jwọọ ẹpẹ ụbwọọmwụ lẹlẹ.”

⁵⁸IJisọsị á họ ụkụrwọ ẹbyẹbyị ju iru ị-ịNasareti ka, chajị nya ọmyịmyị ọlala ka lụmẹ nya alụwa.