Read idege ỊMATIYU 14 Bible Online

ỊMATIYU 14 - idege bible

ỊMATIYU 14

¹Ụka ọọwa, iHerọdụ ịgọvụnọ nya ala ịGalili wo ohi oruru nya iJisọsị ịKịrayịsị.

²Ịnyị, ọ wụrụ alukido nyamwụ kaka jịra lẹ, ọ byaa yẹkẹẹ, “ỊJọn ọngọ hụ enyi Ohe wuleji bwula igu lẹ, ịnyị a du kọ wẹẹ họ ụkụrwọ ẹbyẹbyị ịtụka ịwẹ kọọ wẹẹ họ myị́ lẹ.”

³IHerọdụ ya ịnyị, chajị iHerọdụ ọwẹ kpangga a wu ịJọn ọngọ hụ enyi Ohe chị ori, hwọọ ju ka ube nya agba lẹ. IHerọdụ yẹ ịJọn akama ịnyị, chajị nyọka kpụ iHerodiyasị ịpyọ. IHerodiyasị ọọwa ri ahụ nya iFilipu ọnyịnịna ọlẹng nya iHerọdụ ene ká iHerọdụ nu iFilipu ọnyịnamwụ ọwẹ, iHerodiyasị ahụ nyamwụ ye la ijẹẹhị.

⁴Ụka ọọwa, ịJọn ọngọ hụ enyi Ohe ọwẹ kaa kele kaka ya ang onyobyi nya iHerọdụ ọwẹ dodehe jọọ yẹkẹẹ, “IHerọdụ ee, ọlẹ ká kele kaka nu iFilipu, ọnyịnang ọlẹng ahụ nyamwụ ye wẹ la ijẹẹhị lẹ, ehile á myị ọnụ nya ọọwa kpong-kpong ka!”

⁵Ụka ọọwa, iHerọdụ ịnọ juwa tịtọ kọ ka nwụ ịJọn ọngọ hụ enyi Ohe ọwẹ daarụ. Ma, ọ tị juhi nya ala iJuu. Chajị ịwa wuu hu ịJọn lala ọlọmwụ nya Ohe Oluhye nya ịlẹhị-ịlẹhị.

⁶Ụka ọhẹ, iHerọdụ họ ang oriri ọtụka-ọtụka, wụrụ aligu nyamwụ kaka chị ọkẹkẹnị ọ-kpa kpịtịya nya ẹnụtụrụ ọmama nyamwụ. Ịnyị, ọnyị ọnyang nya iHerodiyasị, ahụmwụ ọwẹ a juwa chewo hiigu-hiigu ụ-ụwa ị-ịlahị nya angga ịịwa lẹ, ọ kpụ iHerọdụ ịpyọ lụmẹ-lụmẹ lẹlẹ.

⁷Ịnyị lẹ, iHerọdụ a myị ọnụ ha ọnyị ọnyang ọwẹ, la iro ọnwanwa yẹkẹẹ, ang myị́ ang ọlẹ kịị nyị họ́ọ kịị nyị́ bịlẹ ọwa aalẹ, ọwa nyị ka hu ang ọọwa da ọnyị ọnyang ọwẹ ewo ịnyịlẹhị lẹlẹ.

⁸Ụka ọọwa, ọnyị ọnyang ọwẹ byi iHerọdụ, jaabwọ ká iHerodiyasị ịnamwụ mẹjọọ, yẹkẹẹ, “Am tịtọ ká ka chị ịJọn ọngọ hụ enyi Ohe egbeju ju ọ-ọkpịla kpa wam wẹ ẹgẹlẹ lẹẹlẹẹ.”

⁹Ụka ọọwa, ọbịlẹ-bịlẹ ọwẹ tọ iHerọdụ olujwo lụmẹ. Ma, bwula iro ọlẹ kọ nwa ha ọnyị ọnyang ọwẹ wuu ene-ene i-ijata nya angga ilihi-ihi nyamwụ ịwẹ wuu lẹ, iHerọdụ a da angịnyị nyamwụ ehile yẹkẹẹ, anụ nyị kele kaka họ jaabwọ ká ọnyị ọwẹ nyị bịlẹ wẹ mẹ lẹlẹ.

¹⁰Ịnyị, ọngọlẹ ká iHerọdụ du ẹrụ, a kele ka ube nya agba kaka chị ịJọn ọngọ hụ enyi Ohe egbeju, kpa kịlọọ ịnyịlẹhị lẹlẹ.

¹¹Ụka kị hu egbeju nya ịJọn ọọwa ha ọnyị ọnyang ọọwa ẹ-ẹpwụ nya ọkpịla lẹ, ọ ye kpa kịla iHerodiyasị ịnamwụ lẹlẹ.

¹²Ịnyị lẹ, angịjụgbẹyị nya ịJọn ọngọ hụ enyi Ohe a kele kaka hu ogu nyamwụ kpa rụ kaka ju eji lẹ, ị kele kaka ya je iJisọsị jaabwọ ká ẹla ọọwa la lẹlẹ.

¹³Ụka ká iJisọsị wo oja chajị nya igu ogbugbu nya ịJọn ọngọ hụ enyi Ohe, ọ ju ụmwụ nya enyi kpoye nya ihu kele koye ọlaanyị kaka hụhụ ẹ-ẹga ochinyee ụbwọọmwụ-ụbwọọmwụ. Ụka ká angịnyị wo oja nya ẹga ọlẹ ká iJisọsị ji, iru nya angịnyị juwa bwu epweji la datị-datị ba iJisọsị kele la ẹpẹtẹ.

¹⁴Ụka ká iJisọsị gba kpehe bwu ẹpwụ nya ụmwụ nya enyi ọọwa kọ yẹ iru nya angịnyị ịịwa ụ-ụwa lụmẹ-lụmẹ, olegu nya ahyẹẹrwẹrwa jụ ka ẹpwụ nyamwụ. Ọọwa lẹ, ọ juwa họ alẹdụrụ ịlẹpwụ nyaa uda nya ẹdụrụ nyaa la datị-datị wuu lẹlẹ.

¹⁵Ụka ká obyi hi ẹnụmwụ ọọwa, angịjụgbẹyị nya iJisọsị kele ka ẹga nyamwụ kaka byoo yẹkẹẹ, “Ayịbahị, obyi juwa hi lụmẹ lẹ, ẹgẹlẹ tị ri ugbileji. Chajị nya ọọwa lẹ, byi iru nya angịnyị ịwẹ wuu kị rụ kele ka epweji ịdagaga ju ịwẹ chajị kị ka ra ang oriri ha ịlaa ụ-ụwa mẹ!”

¹⁶IJisọsị wẹ byaa yẹkẹẹ, “Ịịyẹ a tị́ du kam ka kwaa rụ? Anụ ayịdang bẹ? Anụ ya ang oriri haa kị ri mẹ!”

¹⁷Ụka ọọwa, angịjụgbẹyị nya iJisọsị wẹ byoo yẹkẹẹ, “Ayịbahị, abẹ nya ịkaa ịrụ bala iyenyi imiiye kẹnẹ-kẹnẹ, ahị la jam lẹ!”

¹⁸Ụka ọọwa, iJisọsị wẹ byaa yẹkẹẹ, “Anụ kpa ịkaa ịrụ ịịwa bala iyenyi imiiye ịịwa wam wẹẹ.”

¹⁹Ụka ọọwa, iJisọsị byi iru nya angịnyị ịwẹ wuu yẹkẹẹ, “Anụ nyị hụhụ bẹẹbẹẹ u-uhye nya amẹ ịwẹ mẹ.” Ọọwa lẹ, ọ hu abẹ nya ịkaa ịrụ ịwẹ bala iyenyi imiiye ịịwa lẹ, ọ hu ẹhị nyamwụ hwaa rịrị ka epwoohe lẹ, ọ ji Ohe Oluhye obe ẹ-ẹpwụ nya abwọ ọrịrị lẹ, ọ gu ịkaa ịịwa ene lẹ, ọ gaa ha angịjụgbẹyị nyamwụ lẹlẹ. Ịnyị, angịjụgbẹyị nyamwụ ịwẹ a tịtị ye kpa kele kịla Iru nya angịnyị ịwẹ wuu lẹlẹ.

²⁰Ụka ká iru nya angịịwa wuu ri ang oriri ọọwa wu ẹpwụ lẹ, angịjụgbẹyị nya iJisọsị a go apwụ nya ịkaa bala iyenyi ihihi ịịwa myị edo iwo kụrụ imiiye lẹlẹ.

²¹Iru ojuju nya alẹng ịgbahị ịlẹpwụ nya iru nya angịnyị ịịwa la angịnyị angị ụnọ ịrụ gbẹgbịlẹ. Ma, ị́ tị wa anyang bala anyị anjwo ichiche ju laa kpong-kpong ka.

²²Ọọwa lẹ, iJisọsị a byi angịjụgbẹyị nyamwụ yẹkẹẹ, nyị ju ụmwụ nya enyi kpoye nya ihu kele koye ọlaanyị mẹ lẹlẹ. Ụka ọọwa, iJisọsị byi iru nya angịnyị ịịwa, nyị rụ ka ẹpwa mẹ.

²³Ụka ká iJisọsị da angịwẹ ọkpahị kpá, kị rụ wuu lẹ, iJisọsị ayịdang a rụ kele ka uhye nya ọgbọdọ ọhẹ ụbwọọmwụ-ụbwọọmwụ kaka raabwọ ha Ohe Oluhye lẹlẹ. Ụka ká obyi hi ẹnụ ọọwa lẹ, iJisọsị juwa ọ-ọgbọdọ ọọwa ụbwọọmwụ pwụ ụka ọọwa wẹẹ.

²⁴Ma, ụka ọwẹ kpangga lẹ, angịjụgbẹyị nya iJisọsị jẹ lụrụ ẹ-ẹpwụ nya ihu lẹ. Ụka ọọwa, igbachịwụ ọtụka juwa kpa enyi gu ụmwụ nyaa gbaagbaagbaa nya ịlẹhị-ịlẹhị chajị igbachịwụ ọtụka ọọwa juwa da tụ ụmwụ nyaa pyịpyị lụmẹ kaka kpoye.

²⁵Ụka kọ nọ gbee pwụ ụka ọhẹ ẹ-ẹpwarịrị nya oje ịta nya odu bala oje ịrwọnyẹ nya ụtụrụ lẹ, iJisọsị a juwa jẹdịyẹ u-uhye nya ugbenyi kele ka ẹga nya angịjụgbẹyị nyamwụ lẹlẹ.

²⁶Ụka ká angịjụgbẹyị nya iJisọsị chẹhị kaka yọọ, kọ juwa jẹdịyẹ u-uhye nya ugbenyi ọọwa lẹ, ọ laa uhihi lụmẹ. I juwa byi awụlẹ yẹkẹẹ, “Anụ ya ká ebyabwọ a lalẹẹ ka?” Ọọwa lẹ, ị juwa chị eko nya ịlẹhị-ịlẹhị ọọ-la uhi ojuju lẹlẹ.

²⁷Ịnyị, iJisọsị a ya ẹla taa ahyaahị byaa yẹkẹẹ, “Anụ la ẹjẹ ọkpụ́kpụ mẹ. Am a lẹẹ lẹ. Anụ juhi kaka!”

²⁸Ụka ọọwa, iPita ya ẹla dodehe byi iJisọsị yẹkẹẹ, “Ọngọlahị, ó-ri ahụ ayịdang kaa wẹ ịnyịlẹhị lẹ aalẹ, a dam ehile, byim yẹkẹẹ, am nyị jẹdịyẹ u-uhye nya ugbenyi ọwẹ kaka tọng mẹ.”

²⁹IJisọsị wẹ byoo yẹkẹẹ, “IPita, kẹwẹ mẹ ẹnwa.” Ọọwa lẹ, iPita a juwa jẹdịyẹ u-uhye nya ugbenyi kele ka ẹga nya iJisọsị ịnyịlẹhị lẹlẹ.

³⁰Ma, ụka ká iPita chẹhị kele kaka yẹ igbachịwụ ọtụka o-gu ihu gbaagbaagbaa ọwẹ lẹ, uhi ojuju a jụ ka ẹpwụ nyamwụ lẹ, ọ juwa dọmwụ nya ọkpụkpụ keji ẹ-ẹpwụ nya enyi ọọwa lẹlẹ. Ọọwa lẹ, iPita a chị eko gboo yẹkẹẹ, “Ọngọlam, chuchuu, chịm da mẹ.”

³¹Ịnyị, iJisọsị a nịra ụbwọ nyamwụ kpaa ahyaahị kele kaka chị iPita lẹ, ọ gbọọ kpehe hi ẹpwụ nya enyi lẹlẹ. Ọọwa lẹ, ọ byi iPita yẹkẹẹ, “O! Ahụ ọngọ la ọmyịmyị ochiche, ịịyẹ a tị́ du ká juwa da ịwẹẹ ẹ-ẹpwụ ọkịlẹtụ nyang ịnyị ene?”

³²Ụka ká iJisọsị bala iPita angị imimiiye ju ka ẹpwụ nya ụmwụ nya enyi ọwẹ bwaa lẹ, igbachịwụ ọtụka ọọwa a kpụ ba kem lẹlẹ.

³³Ụka ọọwa, angịjụgbẹyị nya iJisọsị ịlẹ kị juwa ẹ-ẹpwụ nya ụmwụ nya enyi ọọwa juwa gbịgba ha iJisọsị, juwa yẹkẹẹ, “Ọngọlahị, ahụ kpakpakpa a ri Ọnyị nya Ohe Oluhye ịnyịlẹhị lẹ.”

³⁴Ịnyị, ụka ká iJisọsị pwụ ọnụụka oloye ọlaanyị nya ihu ọtụka ọọwa lẹ, ị wu ụmwụ nya enyi nyaa godayị i-iGenesareti lẹlẹ.

³⁵Ụka ká alụwa jẹ́ iJisọsị ogu datị lẹ, ị du ẹrụ kele ka epweji la datị-datị ịlẹ kị kụ dagaga ju iGenesareti lẹlẹ. Ịnyị, ị kpa iru nya alẹdụrụ la datị-datị bwu epweji ịịwa wuu warị wẹ ẹga nya iJisọsị lẹlẹ.

³⁶Ọọwa lẹ, ị juwa bịlẹ iJisọsị yẹkẹẹ, ahụ nyị chuchuu, kaahụ nyị myị ká alẹdụrụ ịwẹ nyị yụbwọ nyaa gu ụgbọọnụ nya awụrụ nyang chẹẹ mẹ. Ọọwa lẹ, alẹdụrụ ịlẹ wuu kị yụbwọ nyaa gu awụrụ nya iJisọsị ụ-ụwa, a la gogo ịnyịlẹhị lẹlẹ.