Read idege ỊMATIYU 15 Bible Online

ỊMATIYU 15 - idege bible

ỊMATIYU 15

¹Ụka ọọwa, ala ịFarịsii bala ịtịcha ị-mẹ ehile nya iMosisi jẹ bwu iJerusalẹm kele ka ẹga nya iJisọsị kaka tọọ ịtọ ọhẹ yẹkẹẹ,

²“Ịịyẹ a tị́ du ká angịjụgbẹyị nyang kaa bịrị ehile nya ọhọhọ nya adahị igogo anyị du kị kaa myị-ị kpa enyi nyi ịlọ hụ abwọ nyaa ene kị kaa ri ang oriri kpong-kpong ka ịnyị?”

³Ọọwa lẹ, iJisọsị a tịtị kpa ịtọ ọtọtọ wẹ byaa yẹkẹẹ, “Ịịyẹ a tị́ du kaanụ ayịdang juwa bịrị ehile nya Ohe Oluhye bwula ọ-ba ọmẹjẹ nyanụ anụ jẹ kem ịnyịnyị?

⁴Chajị Ohe Oluhye da ehile yẹkẹẹ, ‘Anụ ju ihi nya adanụ bala ịnanụ. Ọng myị́ ọng ọlẹ kọ ka juwa yẹhị da adamwụ lee ịnamwụ bwee, juwa ya achala taa aalẹ, ị ka nwụ ọngọọwa daarụ pyii.’

⁵Ma, anụ tị mwọọgịlẹ juwa mẹjẹ angịnyị ya, ó-ri ká ọngịnyị nyị́ la ang la juwa, nyọka kpa da ịnamwụ lee adamwụ ụbwọ myị́, kọ ri ká ọngọọwa nyị́ byi adamwụ anyị yẹkẹẹ, ‘Ang nyam ọlẹ, ịnọ, kam lẹẹ ka ya hang lẹ, m jam ka hwọọ ha Ohe Oluhye lẹ,’

⁶aalẹ, nyị́ baba ha ọngọọwa nyọka kpahị ju adamwụ u-uhye nya ang ọọwa kpong-kpong kaka. Bwula agbayị ịlịịwẹ wuu, anụ kpa tụụbwọ hi, ihi nya ẹla nya Ohe Oluhye ojuju deeji, mwọọgịlẹ juwa ba ọmẹjẹ nya ụbwọ nya ịlọnụ kem jẹ dachichi lẹ.

⁷Anụ ri alahị imiiye. Ẹla ọlẹ ká Ayịsaya yẹ ọmwụ nyamwụ u-uhye nyanụ lẹẹ ugbeene lẹ, ẹla ọọwa ri nya ịlẹhị!”

⁸“ ‘Angịlẹ jam kpa ẹlẹlẹ nyaa kem ụbwọọmwụ jum am Ohe Oluhye ihi. Ma, ọkịlẹtụ nyaa ịwa ayịdang tị ji lụrụ pyiipyii him.

⁹Abwọ ọrịrị bala ịgba ọgbagba ham Am Ohe Oluhye nyaa, á ju apyobwuna ọhẹ-lọhẹ kpong-kpong ka. Chajị ịwa ayịdang juwa mẹ ehile nya angịnyị ehe kem jẹ ku ọmwakpa nya ehile nyam am Ohe Oluhye.’ ”

¹⁰Ụka ọọwa, iJisọsị be ẹkọ wụrụ iru nya angịnyị ịlụwa, byaa yẹkẹẹ, “Anụ ke ụrụ lam pịlẹẹ wuu, kanụ wo ẹla ọlẹ myịmyị mẹ.

¹¹Aang ọlẹ kọ bwu ọnụ nya ọngịnyị ka ẹpwụ a kaa kpịla ịgọgọ ọlala nya ọngịnyị ehe ahị ị-ịlahị nya Ohe Oluhye ka! Ma, ang onyobyi ọlẹ kọ kaa bwu ọnụ nya ọngịnyị ehe kpehe a kaa bịrị ịgọgọ ọlala nyamwụ ị-ịlahị nya Ohe Oluhye lẹ.”

¹²Ụka ọọwa, angịjụgbẹyị nya iJisọsị kele kaka byoo yẹkẹẹ, “Ayịbahị, a jẹ́ kpong-kpong wẹẹ yẹkẹẹ, ẹla nya ọọwa ọwẹ, kọọwa nyị ya lẹ, nyị chị ala ịFarịsii ịwẹ ẹpwụ lụmẹ kaka kpoye?”

¹³IJisọsị wẹ byaa yẹkẹẹ, “Ugbe nya okoji ọnyị myị ọnyị ọlẹ ká Adam Olepwoohe ayịdang á hu kaka tọ la ịlọmwụ ene kaka lẹ aalẹ, ọ́ ka dayi la ohuhu daarụ mwụhyẹ kaka.

¹⁴Lẹ, anụ ba hi ala ịFarịsii ịwẹ chịng odu mẹ. Ịwa ayịdang kpụ idu nya olegu. Ma, ị tị juwa kpa alidu ịkịla ụgbẹyị. Ụka myị́ ụka ká alidu á juwa kpa alidu ịkịla aanaa ụgbẹyị lẹ aalẹ, ẹpwụ nya ụjẹ-ọpyị, ịwa wuu a kaa ju ka wurum lẹlẹ.”

¹⁵Ụka ọọwa, iPita ya ẹla dodehe yẹkẹẹ, “Ayịbahị, bwuru etu nya ẹlẹwẹ ká ya wẹ, jehi chẹẹ mẹ!”

¹⁶Ụka ọọwa, iJisọsị wẹ byaa yẹkẹẹ, “O ri anụ tụtụm myịmyị wo ẹlẹwẹ myịmyị ka pyịyọọ daalẹ, lala angị ịkịla ịnyịnyị kpịlọ?

¹⁷Ọ ri anụ jẹ́ wẹ yẹkẹẹ, ang oriri ọlẹ kaahị angịnyị ehe nyị kaa ri lẹ, ang oriri ọọwa nyị kaa chịpwụrụ bwu ẹpwụ nya igbeene nyahị gbee kaahị nyị kaa gbọọ daarụ bwu ẹpwụ nyahị ka?

¹⁸Ma, ang onyobyi ọlẹ kọ kaa da emyo bwu ẹpwụ ọkịlẹtụ gba kpehe bwu ọnụ nya ọngịnyị ehe a ri ang ọlẹ kọ kaa chị ịgọgọ ọlala nya ọngịnyị ehe ịrị ị-ịlahị nya Ohe Oluhye lẹ.

¹⁹Chajị ẹpwụ ọkịlẹtụ nya ọngịnyị ehe kpangga, ang inyibyi ịhọhọ ịlịịlẹ wuu a kaa da emyo bwu kpehe lẹ. Irya inyibyi imeme, angịnyị ehe ịnwụnwụ, ẹla-ahụ ọdada, ụya ọhọhọ wuu, oyi oyiyi, ibeenu ọnọọkịla oriri ba ọngọkịla bala ẹla onyobyi oyaya rụ́ ọngịnyị ọkịla ịnyịnyị.

²⁰Ang inyibyi ịhọhọ ị-lala ịlịịwẹ wuu, a ri ang ọlẹ kọ kaa chị ịgọgọ ọlala nya ọngịnyị ehe ịrị ị-ịlahị nya Ohe Oluhye lẹ. Ma, enyi ịlọ onyinyi hụ abwọ nyang ene ká kaa ri ang oriri ka, á kaa chị ịgọgọ ọlala nya ọngịnyị ehe ọhẹ-lọhẹ ịrị ị-ịlahị nya Ohe Oluhye jaabwọ ká ala ịFarịsii ịwẹ wẹẹ mẹjẹẹnụ kpong-kpong ka!”

²¹IJisọsị rụ bwu ẹgẹwẹ kele koye nya ọpyị nya ịTaya bala ịSayịdọn.

²²Ụka ọọwa, ọnyang ọla iKenan ọhẹ ọlẹ kọ kụ ụwa o-oye nya epweji ịwẹ kele ka ẹga nya iJisọsị kaka bịlẹ byoo yẹkẹẹ, “Ọngọlahị, ahụ ọnyị nya iDevidi, chuchuu yẹm ahyẹẹrwẹrwa, ká họ ọnyị ọnyang nyam, ọlẹ ká olegu onyobyi wu uda ham chẹẹ mẹ! Ọ juwa kpọọ yẹ akama lụmẹ kaka kpoye.”

²³Ma ụka ọọwa, iJisọsị hu ọnyang ọwẹ ujiji, ó ya abwaabwọhẹ tọọ kpong-kpong ka. Ịnyị, angịjụgbẹyị nya iJisọsị a kele ka ẹga nyamwụ kaka bịlẹ byoo yẹkẹẹ, “Ayịbahị, chuchuu ku ọnyang ọwẹ kọ wẹẹ dịrẹhị ịnyịnyịịnyị, la ọmọnyọ nyamwụ ọwẹ rụ hi ẹgẹwẹ mẹ pyii!”

²⁴Ọọwa lẹ, iJisọsị a wẹ byaa yẹkẹẹ, “Ala Isirẹlụ ịlẹ kị hwahị ị-ịlahị nya Ohe Oluhye lala ịkpịlọ ịlẹ kị byibyi kem, ị dum ẹrụ warị kaka pịlahị lẹ.”

²⁵Ịnyị, ọnyang ọwẹ a kele kaka hị nọnọ i-ijata nya iJisọsị lẹ. Ọ myịmyị bịlẹ iJisọsị yẹkẹẹ, “Ọngọlahị, chuchuu dam ụbwọ mẹ, adam.”

²⁶IJisọsị wẹ byoo yẹkẹẹ, “Ọnyang, wo mẹ! Ó hiigu kị ka hu ang oriri ọlam-ọlam nya anyị anjwo ha ebwu ri kpong-kpong ka.”

²⁷Ụka ọọwa, ọnyang ọwẹ wẹ byi iJisọsị yẹkẹẹ, “Ọngọlahị, á me ọnụ ka. Ẹla nya ịlẹhị a wẹ ká ya lẹ. Ma, ebwu tị kaa yile apwụ nya ang oriri ịlẹ kị chabwọ bwu uhye nya itebwuru nya ayịbaba ri myị́, ịnyịnyị, ịnọ tị!”

²⁸IJisọsị a wẹ byi ọnyang ọwẹ yẹkẹẹ, “A chakpa la ọmyịmyị ọtụka lụmẹ. Jaabwọ kaahụ ayịdang bịlẹ lẹ, m họ jịra hang ịnyị lẹ.” Ụka ọwẹ ká iJisọsị ya ẹlẹwẹ kpangga, ọnyị ọnyang nya ọnyang ọwẹ a la ịnyịrọ gogo ịnyịlẹhị lẹlẹ.

²⁹Ụka ọọwa, iJisọsị rụ bwu ẹgẹwẹ, juwa tụ ọnụụka nya ihu ọkịlọlọ nya ala ịGalili da lẹ, ọ kele kaka hụhụ u-uhye nya ọgbọdọ ọhẹ lẹlẹ.

³⁰Ụka ọọwa, iru nya angịnyị lụmẹ-lụmẹ kele ka ẹga nya iJisọsị. Ị kpa alẹdụrụ la datị-datị ka ẹga nyamwụ. Ikuku, alidu, angị ku ịnụ bala angịlẹ ká une nya ịnyịrọ nyaa gbu ba wuu bala alẹdụrụ ịkịla la datị-datị wuu, ị kpaa kele ka ijata nya iJisọsị lẹ, ọ haa ịwa wuu uda lẹlẹ.

³¹Aliru nya angịnyị ịịwa chẹhị kaka yẹ jaabwọ ká iJisọsị họ angịwẹ uda. Ị yẹ ká angị ku ịnụ ịlẹpwụ nyaa juwa ya ẹla, ká angịlẹ ká une nya ịnyịrọ nyaa gbu ba juwa la ịnyịrọ ogogo, ká ikuku juwa jẹdịyẹ, ká alidu jẹ́ juwa yọyị ịnyịnyị wuu lẹ, ịwa wuu a juwa gwogbo ha Ohe Oluhye nya ala Isirẹlụ chajị nya ọọwa lẹlẹ.

³²Ụka ọọwa, iJisọsị be ẹkọ wụrụ angịjụgbẹyị nyamwụ kele ka ẹga nyamwụ lẹ, ọ byaa yẹkẹẹ, “Anụ wo mẹ! Aliru nya angịnyị ịwẹ lam ahyẹẹrwẹrwa lụmẹ kaka kpoye, chajị alẹ a ri ẹnụtụrụ ọhata kị wẹẹ bam jẹ ịnyịnyịịnyị lẹlẹ. Ma, ang oriri ọhẹ-lọhẹ á tị ji haa, ị ka ri ka. Lẹ, ọ́ hám kam ka byaa yẹkẹẹ, ị rụ ka ẹpwa nyaa limyi-limyi mẹ ka. Chajị, ó-ri kam họ ịnyị, ọhẹka, angịhyẹ nyaa ka kpụ ịbwọ ụ-ụgbẹyị.”

³³Angịjụgbẹyị nyamwụ wẹ byoo yẹkẹẹ, “Ayịbahị lẹ, ale, a tị́ me irya, kahị ka ye ang oriri ra, u-ugbileji ọlẹ kpụ, kọ ka nwa iru nya angịnyị ịwẹ wuu myị́ mẹ?”

³⁴Ụka ọọwa, iJisọsị myịmyị taa wo yẹkẹẹ, “Abẹ nya ịkaa ịmanyị, anụ tị́ la juwa ene?” Angịjụgbẹyị nyamwụ wẹ byoo yẹkẹẹ, “Abẹ nya ịkaa irwiye bala iyenyi ịmanyị-ịmanyị kem a lẹẹ lẹ, Ayịbahị.”

³⁵Ịnyị, iJisọsị a byi iru nya angịnyị ịịwa yẹkẹẹ, nyị hụhụ ị-ịpyị bẹẹbẹẹ mẹ.

³⁶Ọọwa lẹ, iJisọsị a go abẹ nya ịkaa irwiye ịịwa bala iyenyi ịwẹ lẹ, ọ ji Ohe Oluhye obe la abwọ ọrịrị lẹ, ọ gu abẹ nya ịkaa ịịwa bala iyenyi ịwẹ ene lẹ, ọ gaa ha angịjụgbẹyị nyamwụ lẹlẹ. Ọọwa lẹ, angịjụgbẹyị nyamwụ a ye kpa kịla iru nya angịnyị ịwẹ wuu lẹlẹ.

³⁷Ụka ká iru nya angịwẹ wuu ri ịkaa ọọwa bala iyenyi ịịwa wu ẹpwụ kpọng-kpọng lẹ, angịjụgbẹyị nya iJisọsị a kele kaka go apwụ nya ịkaa bala iyenyi ihihi ịwẹ myị edo irwiye lẹlẹ.

³⁸Iru ojuju nya alẹng ịlẹpwụ nya angịịwa wuu la angịnyị, lala angị ụnọ ine, ụka ọlẹ kị wa anyang lee anyị anjwo ichiche ịlẹpwụ nyaa ju laa kpong-kpong ka.

³⁹Ịnyị lẹ, iJisọsị a tụụbwọ hi iru nya angịnyị ịwẹ wuu rụ ka ẹpwa nya ịlaa lẹlẹ, ọọwa lẹ, ọ ju ụmwụ nya enyi kpoye nya Ihu ọkịlọlọ ọwẹ kele koye nya ọpyị ọlẹ kị wụrụ ịMagadan lẹlẹ.