Read idege ỊMATIYU 16 Bible Online

ỊMATIYU 16 - idege bible

ỊMATIYU 16

¹Ụka ọọwa, ala ịFarịsii bala ala ịSadusii ịhyẹ kele ka ẹga nya iJisọsị, juwa tịtọ kị ka kpa ẹla pịlahị nyamwụ. Ọọwa lẹ, ị juwa tịtọ nya ang o-ju ẹjẹẹ nya ụkụrwọ ẹbyẹbyị o-bwu epwoohe bwu ẹga nyamwụ lẹlẹ.

²Ma, iJisọsị wẹ byaa yẹkẹẹ, “Anụ ayịdang kpangga a tị́ ri angịlẹ kanụ kaa chẹhị yẹ egbamwụ lụka nya ẹnụ obyibyi chịng, anụ kaa ya je angịkịla yẹkẹẹ, ahị ọpyẹpyẹ olijuju nyị ka ri ahị ọpyẹpyẹ ọnyịịla, chajị ahị nyị ka pyẹ dụwa gbooloo lụmẹ. Chajị egbamwụ nyị chakpa gọmịla lụmẹ!

³Ụka kanụ tị chẹhị yẹ, egbamwụ lụka nya ụtụrụ chịng, anụ kaa byi angịkịla yẹkẹẹ, enyi nyị juwa ka do ahyaahị lẹ. Chajị ohe nyị chakpa nyi enyi ịnyịmịla chị owu lụmẹ. Ee lẹ, ịnọ kanụ kiji wẹẹ jẹ́ etu nya ang o-ju ẹjẹẹ oluhye nya egbamwụ kaa ya je angịkịla lẹ. Ịịyẹ a tị́ du kanụ tị ka ri angị jẹ́ etu nya ang o-ju ẹjẹẹ o-bwu ẹga nya Ohe Oluhye, ọlụka ọlẹ kpụ, anụ́-ụ ya dodehe je angịkịla chajị nya ang ọlẹ kọ juwa ka họ ijuju ịnyịnyị kaka mẹ.”

⁴IJisọsị myịmyị yẹkẹẹ, “Aloyi onyobyi ịlala anụ, ri angị jẹkpẹ da Ohe Oluhye, bwula ọchịla o-hu ọkịlẹtụ ha-ka, lala ọnyang ahụ ọ-kaa họ ụya ba ọrụmwụ, a kaa tịtọ nya ang o-ju ẹjẹẹ nya ụkụrwọ ẹbyẹbyị pyii lẹ. Ma, ánụ tị ka ye kpong-kpong ka. Aalẹ, kẹnẹ-kẹnẹ, ang o-ju ẹjẹẹ nya ụkụrwọ ẹbyẹbyị ọlẹga nya iJona ụbwọọmwụ mẹ ịnyị!” Ịnyị, iJisọsị a rụ hyaa ụ-ụwa ka ẹga ọkịla lẹlẹ.

⁵Ụka ọlẹ ká angịjụgbẹyị nya iJisọsị juwa ka jẹ kpoye nya ihu ọkịlọlọ ọọwa kele koye ọlaanyị lẹ, ị deeri hi ịkaa ọkpakpa.

⁶Ụka ọọwa, iJisọsị byi angịjụgbẹyị nyamwụ yẹkẹẹ, “Anụ kpahị ju ịlọnụ ọgwọgụ, kanụ juwa cheji ba ịjọnwa ọ-kpa ịkaa mịrị nya ala ịFarịsii bala ala ịSadusii ịwẹ mẹ.”

⁷Ụka ọọwa, angịjụgbẹyị nya iJisọsị juwa kpa ẹla ọọwa ma ya ta awụlẹ yẹkẹẹ, “Ọlẹ kahị deeri hi ịkaa ọkpakpa, a du ká Ayịbahị wẹẹ ya ẹlẹwẹ tahị lẹ.”

⁸Ụka ká iJisọsị ayịdang jẹ́ ẹla ọlẹ ká angịjụgbẹyị nyamwụ juwa kpa ya ta awụlẹ lẹ, ọ byaa yẹkẹẹ, “Ịịyẹ a tị́ du kanụ juwa kpa ẹla nya ịkaa ọkpakpa ka, ọwẹ ya ta awụlẹ ịnyị? Ọmyịmyị ochiche ọlanyị, anụ tị́ la ịnyị?

⁹Ọ ri anụ la ọ-jẹ́ myịmyị lẹka pyịyọọ dọọ lẹẹlẹẹ? Lee, anụ tị́ kpịtịya kaka? Ụka ọlẹ kam gu abẹ nya ịkaa ịrụ ene ha angịnyị angị ụnọ ịrụ gbẹgbịlẹ ri lẹ, edo ịmanyị, anụ tị́ go apwụ ihihi nya ịkaa ịịwa myị?

¹⁰Ụka ọlẹ kam tị gu ịkaa irwiye ene ha angịnyị angị ụnọ ine ri lẹ, edo ịmanyị, anụ tọ go ihihi nyaa myị ịnyịnyị?

¹¹Ee lẹ, ọ tị́ lanyị kanụ wo ẹlẹwẹ kam ya myịmyị kaka, gbee kanụ juwa hwọọ lala o-ri yẹkẹẹ, ẹla chajị nya ịkaa oriri ọlam-ọlam, am nyaa ya lẹ mẹ? Aalẹ, m jam byinu yẹkẹẹ, anụ kpa ahị ju ịlọnụ ọgwọgụ ẹ-ẹga nya ịjọnwa ọmịrị mịrị nya ala ịFarịsii bala ala ịSadusii mẹ.”

¹²Ịnyị lẹ, angịjụgbẹyị nya iJisọsị a jẹ́ etu nya ẹla oyaya nya iJisọsị ọwẹ yẹkẹẹ, ẹẹlachajị nya ịjọnwa ọ-kpa họ ịkaa ọlam-ọlam, iJisọsị nyaa ya ka. Ma, ang ọmẹjẹ onyobyi nya ala ịFarịsii bala ala ịSadusii ịlẹ kịị nyị wẹẹ mẹjẹ angịnyị, ká ang onyobyi nyaa ọọwa nyị wẹẹ chị kịla aluche nya angịkịla wuu juwa hwaa ahị, jaabwọ ká ịjọnwa kaa kpa ịkaa wuu mịrị, iJisọsị nyaa wẹẹ gbile ịwa ụbwọ ụ-ụrụ u-uhye nyamwụ lẹ.

¹³Ụka ọọwa, iJisọsị bala angịjụgbẹyị nyamwụ juwa rụ kele koye nya ọpyị ọhẹ ọlẹ kọ ju iSisarịya-Filipayị chwẹẹ. Ọọwa lẹ, ọ tọ angịjụgbẹyị nyamwụ wo yẹkẹẹ, “Oowo, angịnyị ehe, a tị́ ya, am Ọnyị nya ọngịnyị ehe ọlẹ nyị ri kpong-kpong?”

¹⁴Angịjụgbẹyị nyamwụ wẹ byoo yẹkẹẹ, “Ayịbahị, angịhyẹ juwa yẹkẹẹ, ahụ nyị ri ịJọn ọngọ hụ enyi Ohe. Angị ịkịla yẹkẹẹ, ahụ nyaa ri Ịlayịja lẹ. Angị ịwụlẹ tị yẹkẹẹ, ahụ nyaa ri iJeremaya lẹ. Angị ịwụlẹ myịmyị yẹkẹẹ, ahụ nyị ri ọngọhẹ lẹpwụ nya alọmwụ inyogo nya Ohe Oluhye.”

¹⁵IJisọsị myịmyị taa wo yẹkẹẹ, “Lẹ, anụ ayịdang tị bẹ? Oowo, anụ tị́ ya, am nyị ri lẹẹ mẹ?”

¹⁶ỊSayịmọn iPita wẹ byoo yẹkẹẹ, “Ayịbahị, ahụ kpakpakpa a ri ịKịrayịsị Ọnyẹwẹ nya Ohe Oluhye ọlẹ kọ juwa hịhị lẹ.”

¹⁷IJisọsị wẹ byoo yẹkẹẹ, “Ahị ọwawa ka juwa hang, ahụ ịSayịmọn ọnyị nya iJona ọwẹ, chajị ị-ịwọ lee ugbinyịrọ nyang a bwuru ẹla ọlẹ ya jeng wẹ kpong-kpong ka. Ma, Adam ọlẹ kọ kụ epwoohe ayịdang ịnyị.

¹⁸Wo mẹ, ahụ a ri iPita ọlẹ ká etu nyamwụ ri ẹjwọ lẹ. U-uhye nya ẹjwọ ọọwa, m tị ka nwụ́ ịchọọchị nyam hụrụ lẹlẹ. Ọngịrị nya igu bala iworu á ka kụrụ ịchọọchị ọọwa myị́ kpong-kpong kaka.

¹⁹IPita, ahụ, m ka hu ẹlẹlẹ nya ịgbọgọlọ nya ịpyị Adịrahụ nya epwoohe ju ụ-ụbwọ lẹlẹ. Ang myị́ ang ọlẹ ká chị ori ám odehe ọlẹ aalẹ, ị ka chị ang ọọwa ori e-epwoohe ịnyịnyị lẹ. Ang myị́ ang ọlẹ ká tị yi ori ám odehe ọlẹ aalẹ, ị ka yi ang ọọwa ori e-epwoohe ịnyịnyị lẹ.”

²⁰Ịnyị, iJisọsị a da angịjụgbẹyị nyamwụ ehile yẹkẹẹ, “Anụ ya je ọngọngọhẹ yẹkẹẹ, am ayịdang nyaa ri ịKịrayịsị ọọwa lẹlẹ koo.”

²¹Bwu ụka ọwẹ kpangga, iJisọsị a dọmwụ nya o-juwa ya ẹla chajị nya igu ogbugbu nyamwụ je angịjụgbẹyị nyamwụ gede-gede ịnyịnyịịnyị lẹlẹ. Ọọwa lẹ, ọ byaa yẹkẹẹ, “Anụ wo mẹ! M jam rụ kele ka iJerusalẹm pyii lẹ. Ụ-ụwa, ịgabwọ nya ala iJuu bala alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ a ka yẹm akama pyii lẹ. Ị ka nwụm. Ma, m tị ka wuleji bwula igu, juwa hịhị la ẹnụtụrụ ọhata.”

²²IPita a tụ ba iJisọsị lẹ, ọ juwa yalibyi la iJisọsị byoo yẹkẹẹ, “Ọngọlahị, oyina tị́ kpụ ẹla nya igu ogbugbu oyaya ịịwẹ kpong-kpong? Ohe Oluhye a pwapwa. Igu ọhẹ-lọhẹ á ka nwụng koo.”

²³Ụka ọọwa, iJisọsị jahị kpata da iPita, ọ byoo yẹkẹẹ, “IPita, ahụ Ohe Onyobyi ọwẹ, kam kẹkpẹ nyam pyii! Ahụ ayịdang ri ọngọ chịm ochuchuu lẹ. Chajị i-irya ọlẹ kọ bwu ẹpwụtụbwọ nya Ohe Oluhye a wẹ ká kpa ya ẹlẹwẹ kpong-kpong ka. Ma, irya nya angịnyị ehe, ịlam-ịlam kem ịnyị.”

²⁴Ọọwa lẹ, iJisọsị a ya ẹla je angịjụgbẹyị nyamwụ yẹkẹẹ, “Ọng myị́ ọng ọlẹ kọ juwa tịtọ kọ ka bam jẹ nya ịlẹhị-ịlẹhị lẹ aalẹ, ọngọọwa a pwa ịlọmwụ rwarụ, kọ juwa hu agurube nya akama ọyẹyẹ tam chụ ịlọmwụ e-egbeju kọọwa ayịdang a kẹwẹ kaka bam jẹ mẹ.

²⁵Chajị ọng myị́ ọng ọlẹ kọ juwa tịtọ nyọka chị ọhịhị nya ịlọmwụ dodehe ọlẹ aalẹ, ọhịhị nyamwụ ka gwọọ byi pyịyọọ. Ma, ọng myị́ ọng ọlẹ kọ tị ka tụụbwọ hi ọhịhị nyamwụ ga ha igu chajị nya ẹnyị nyam aalẹ, ọhịhị nya ọngọọwa á ka gwọọ byi kpá ẹnẹnẹhẹ kaka.

²⁶Chajị, ịịyẹ a tị́ ka ri apyobwuna ha ọngịnyị ehe tụtụm wẹẹ? Ko ri ká ọngọọwa ụbwọọmwụ kem á go ang myị́ ang ilodehe ọlẹ wuu la, ká ugbodu okpukpuru nyamwụ ọwa ayịdang á tị gwọọ byi? Anụ wo mẹ! Ịngịngịhyẹ á ji ọlẹ ká ọngịnyị ehe ka jẹ́-ẹ hu kpa kaka nyẹ ugbodu okpukpuru nyamwụ kpong-kpong kaka.

²⁷Chajị, am Ọnyị nya ọngịnyị ehe ọlẹ ayịdang, juwa ka mwẹẹkpẹ warị la ogbo nya Ohe Oluhye Adam bala alegu ẹrụ, nyọka warị kaka nwụ ọng myị́ ọng uri nya abwẹla ịlẹ wuu, ká ọngọngọọng jam họ odehe ọlẹ lẹ!

²⁸Nya ịlẹhị-ịlẹhị, m byinu yẹkẹẹ, angịhyẹ jam ẹ-ẹgẹlẹ lẹẹlẹẹ, kịịwa ayịdang á ka ya ẹhị gu igu kpong-kpong ene kị dọmwụ ka yẹ Ọnyị nya ọngịnyị ehe ọlẹ ụka kọ ka warị la ịpyị adịrahụ nyamwụ kaka hụhụ lala adịrahụ kaka.”