Read idege ỊMATIYU 17 Bible Online

ỊMATIYU 17 - idege bible

ỊMATIYU 17

¹Ụka kọ nọ gbee ká ẹnụtụrụ ịrwọnyẹ chịpwụrụ kam kpá, iJisọsị be ẹkọ wụrụ iPita. Ọ be ẹkọ wụrụ iJemsi bala ịJọn ịlẹ kị ri anyịnịna ịnyịnyị lẹ, ọ kpaa ba ịlọmwụ kele ka uhye nya ọgbọdọ ọtụka ọhẹ ụbwaa-ụbwaa lẹlẹ.

²Ụka ọọwa lẹ, iJisọsị a yẹda abwụma ọkịla wuu myị́ ịnyịrọ ịnyịrọ ụ-ụwa i-ijata nya angịjụgbẹyị nyamwụ ịwẹ lẹlẹ. Ọọwa lẹ, ahị nya iJisọsị a juwa hụ́ myịrị-myịrị lala ẹnụ ọchịchị ụ-ụwa lẹlẹ. Ụka ọọwa, awụrụ ọlịnyịrọ nyamwụ yẹda, pwowuru keri-keri lala ahịgboo onyoowuru ọtụka-ọtụka ịnyịnyị.

³Ịnyị lẹ, angịjụgbẹyị angị ịta ịwẹ a chẹhị kaka yẹ iMosisi bala Ịlayịja kị hi ehe gẹgịlẹgẹ ụ-ụwa juwa ya ẹla ta iJisọsị lẹlẹ.

⁴Ọọwa lẹ, iPita a byi iJisọsị yẹkẹẹ, “Ọngọlahị, ọ ri ang ọnyịịla lụmẹ, chajị nyọlẹ kahị lẹẹ ẹgẹlẹ lẹẹlẹẹ. Ó-ri kaahụ ayịdang á ka myị, ịnọ, m nwụ́ adaa ịlịgọgọ ịta ịhyẹ ẹ-ẹgẹlẹ mẹ! Ụdaa ọhẹ á ri nyang lẹ, ká ọkịla á ri ịnya iMosisi lẹ, ká ụdaa ọhata a ri ịnya Ịlayịja ịnyịnyị mẹ.”

⁵Ụka ká iPita juwa kpa ẹla ọọwa ya wẹẹ lẹ, egbamwụ nya ahịgboo ọtụka-ọtụka ọhẹ a chị kụrwaa ịwa wuu ụ-ụwa lẹlẹ. Ụka ọọwa, omyi ọhẹ juwa ya ẹla bwu ẹpwụ nya egbamwụ ọọwa dodehe yẹkẹẹ, “Ọngọlẹ a ri Ọnyẹwẹ olikẹjẹ nyam ọlẹ kọ hám lụmẹ lẹ. Ẹla myị́ ẹla nyamwụ wuu hám lụmẹ kaka kpoye. Lẹ anụ angịnyị ehe, anụ́-ụ wo omyi nyamwụ mẹ.”

⁶Ụka ká angịjụgbẹyị angị ịta ịwẹ wo omyi nya ẹlẹwẹ, ọ laa uhi-uhi lụmẹ kaka kpoye. Ọọwa lẹ, ị hị da keji, dahị nyaa kụrụ eji birikiti lẹlẹ.

⁷Ịnyị, iJisọsị ayịdang a kele ka ẹga nyaa kaka yụbwọ nyamwụ gwaa lẹ, ọ byaa yẹkẹẹ, “Anụ wuleji mẹ. Anụ juhi kaka.”

⁸Ụka ká angịjụgbẹyị nya iJisọsị ịwẹ wuleji kpá, kị pyẹ ahị nyaa maa lẹ, ị́ yẹ ọngọngọhẹ ọkịla ụ-ụwa dala iJisọsị ụbwọọmwụ kaka.

⁹Ịnyị, ụka kị juwa hireji bwu uhye nya ọgbọdọ ọọwa lẹ, iJisọsị a byi angịjụgbẹyị nyamwụ ịwẹ yẹkẹẹ, “Anụ wo mẹ! Anụ ya ẹlẹlẹhẹ je ọngọngọhẹ u-uhye nya ang ọlẹ kanụ yẹ wẹ a-arụrụ alẹ kpong-kpong ka, gbee pwụ ụka kaam Ọnyị nya ọngịnyị ehe ọlẹ ka gbu, wuleji bwula igu kpá wuu ene.”

¹⁰Ọọwa lẹ, angịjụgbẹyị nyamwụ ịwẹ a tọ iJisọsị wo yẹkẹẹ, “Ee lẹ, ịịyẹ a tị́ du ká ịtịcha ị-mẹ ehile nya iMosisi jẹ juwa yẹkẹẹ, Ịlayịja nyị tịtị ka warị myịmyị jene nya ịKịrayịsị ọọwa ọlẹ ká Ohe Oluhye nyị ka du warị?”

¹¹IJisọsị wẹ byaa yẹkẹẹ, “Ee, ịnyịlẹhị ịnyị! Ịlayịja juwa ka jene-jene warị kaka nwụla ang wuu nọ ene nya ụka.

¹²Ma, m jam byinu yẹkẹẹ, Ịlayịja ayịdang dọmwụ warị jam ene-ene lẹ. Ma, jaabwọ ká ala iJuu á tị jẹ́ Ịlayịja ọọwa ogu datị ka lẹ, ị juwa họọ ang onyobyi jaabwọ kọ háa. Ịnyịnyị-ịnyịnyị, ị tị ka yẹm am Ọnyị nya ọngịnyị ehe ọlẹ akama lẹlẹ.”

¹³Ịnyị lẹ, angịjụgbẹyị nyamwụ a jẹ́ myịmyị yẹkẹẹ, ịJọn ọngọ hụ enyi Ohe, iJisọsị nyaa wẹ ya ẹla rụ́ lẹlẹ.

¹⁴Ụka ọọwa, iJisọsị bala angịjụgbẹyị nyamwụ bajẹ tịrẹkpẹ kele ka ẹga nya iru nya angịnyị ịwẹ. Ọlẹng ọhẹ kele kaka ya arụụ nyamwụ kụ eji i-ijata nya iJisọsị.

¹⁵Ọ byi iJisọsị yẹkẹẹ, “Ọngọlahị, chuchuu yẹ ọnyị ọlẹng ochiche nyam ọlẹ ahyẹẹrwẹrwa, ká họọ uda ham chẹẹ mẹ! Ọ kpoyi! Ụka kọ ka wẹ lọọ lẹ, ọ kaa kpọọ rị ebilo, juwa du biri-biri ị-ịpyị. Ọ kaa hwọọ kpụ ẹpwụ nya ila wurum lee hwọọ ju ka ẹpwụ nya enyi ịnyịnyị.

¹⁶Ịnọ, m dọmwụ kpọọ warị wẹ ẹga nya angịjụgbẹyị nyang kpa ugwọhẹ lẹ! Ma, ịwa ayịdang á tị jwọọ họ uda myị́ kpong-kpong kaka.”

¹⁷Ụka ọọwa, iJisọsị ya ẹla dodehe yẹkẹẹ, “Anụ alichẹnẹ ịla ọmyịmyị-ka, la ọmyịmyị-ka bala ọ-pyị ẹla nya ịlẹhị anyoko ịwẹ lee! Anụ tị́ tịtọ kam ka hụ tanụ tata kaka ba anyị, ene kanụ ka la ọmyịmyị mẹ? Anyanyị, anụ tị́ tịtọ kam ka juwa ju ugbodu tanụ tata kaka ba, ene kanụ ka la ọmyịmyị mẹ?” Ọọwa lẹ, ọ byi adịda ọ-ma ọnyị ọwẹ yẹkẹẹ, “Kpa ọnyị nyang warị wẹ ẹga nyam mẹ, ẹnwa!”

¹⁸Ọọwa lẹ, iJisọsị a da olegu onyobyi ọlẹpwụ nya ọnyị ọọwa ehile la ịkata ịkata lẹlẹ. Ịnyị lẹ, olegu onyobyi ọọwa a gba kpehe hyọọ lẹ, ọnyị ọwẹ a la gogo iijata-ijata lẹlẹ.

¹⁹Ịnyị lẹ, angịjụgbẹyị nya iJisọsị a tọ iJisọsị ịtọ ị-ịbaa-ịbaa yẹkẹẹ, “Ayịbahị, ịịyẹ a tị́ du kahị ku olegu onyobyi ọwẹ dodehe myị́ ka ịnyị?”

²⁰IJisọsị wẹ byaa yẹkẹẹ, “Ọmyịmyị ọlala ka lụmẹ nyanụ a du lẹ. Nya ịlẹhị-ịlẹhị, m byinu yẹkẹẹ, ó-ri ká ọmyịmyị ọlẹpwụ nyanụ á lala ẹjẹ nya okoji ọlẹ kị wụrụ ịmọsịtadị la myị́ lẹ aalẹ, anụ ka la ọngịrị byi ọgbọdọ ọtụka-ọtụka ọlẹ kanụ wẹẹ yẹ, yẹkẹẹ, ‘Ahụ ọgbọdọ ọwẹ, mwụ rụ bwu ẹgẹlẹ, ká kpa ịlọng kele ka ẹga ọlaanyị mẹ!’ aalẹ, ọgbọdọ ọọwa ka mwụ rụ kele ịnyịlẹhị lẹ. Aalẹ, ịngịngịhyẹ wuu á ka chịnụ ọha la ọhọhọ kaka. [

²¹Ma, jaabwọ kọ la ri yẹkẹẹ, ụma nya ụkụrwọ ẹbyẹbyị ọ-lala ọlịịlẹ, á ka chịkpẹẹ myị́ kaka, kẹnẹ-kẹnẹ, bwula ọ-hụ limyi ha Ohe Oluhye bala abwọ ọrịrị ha Ohe Oluhye ụbwọọmwụ mẹ ịnyị!]”

²²Ụka ká iJisọsị bala angịjụgbẹyị nyamwụ juwa la awụlẹ, ị-ịGalili, ọ ya ẹla taa, byaa yẹkẹẹ, “Ị tụbwọọ juwa ka pịrịm am Ọnyị nya ọngịnyị ehe ha ka ẹpwụtụbwọ nya angị inyibyi lẹ.

²³Angịịwa ka nwụm. Ị ka jum eji. Ma, m tị ka wuleji bwula igu, la ẹnụtụrụ ọhata, juwa hịhị myịmyị.” Ụka ká angịjụgbẹyị nya iJisọsị wo ẹla chajị nya igu ogbugbu nyamwụ ọọwa lẹ, ọ taa olujwo lụmẹ.

²⁴Ụka ká iJisọsị bala angịjụgbẹyị nyamwụ kele ka epweji nya ịKapẹnawụm, angị nyẹ angịnyị ẹpwa nya ube ịgọgọ ọtụka nya Ohe Oluhye ịhyẹ ịlụwa kele ka ẹga nya iPita kaka tọọ ịtọ yẹkẹẹ, “IPita, ayịbaba nyanụ kaa myị-ị nyẹ ẹpwa kpong-kpong wẹẹ?”

²⁵IPita wẹ byaa yẹkẹẹ, “Ee, Ọngọlahị kaa nyẹ ẹpwa!” Ịnyị lẹ, ụka ká iPita jụ ka ẹpwang lẹ, iJisọsị a jene-jene tọ iPita wo yẹkẹẹ, “ỊSayịmọn ee! Ya irya nyang jem wẹẹ. Ịdịrịhụ nya odehe ịlẹ kị kaa nyẹ alekpeleji nyaa ẹpwa ọlam-ọlam bala ẹpwa ọnyẹnyẹ oluhye nya ang ọrara lẹ, ị kaa tịtọ nya ẹpwa ọnyẹnyẹ ọlịnyị ọhẹ-lọhẹ kele ka ẹpwụtụbwọ nya anyị nya ịlaa ịwa ayịdang kpịlọ lee bwu ẹpwụtụbwọ nya angịkịla wuu kem tị?”

²⁶IPita wẹ byoo yẹkẹẹ, “Ayịbahị, angịkịla wuu ụbwaa kem ịnyị.” IJisọsị wẹ myịmyị yẹkẹẹ, ọọwa ri yẹkẹẹ, “Ọ́ tịtị chịla ká angịlẹ wuu kị ri anyị nya ịdịrịhụ ịịwa ayịdang ka nyẹ ẹpwa ọlịnyị kpong-kpong kaka!”

²⁷IJisọsị myịmyị yẹkẹẹ, “Ma, jaabwọ kọ la ri yẹkẹẹ, ahị ayịdang lẹ, áhị́ tịtọ kahị ka hu ẹpẹpẹ ju ehile nya ẹpwa ọnyẹnyẹ ọọwa bwula ọ-pwa ẹpwa nyahị ahị ọnyẹnyẹ kpong-kpong ka. Lẹ iPita, wuleji ká hu ang kele ka ẹpwụ nya ihu ọkịlọlọ ọlaanyị, ká da ọkụja ụ-ụwa mẹ. Iyenyi ọnyị myị ọnyị ká ọkụja nyang ọwẹ á wu nya ọgbanyẹ-ọgbanyẹ lẹ aalẹ, a gba iyenyi ọọwa kpehe mẹ. A ka ye okpoko gba bwu ẹpwụ ọnụ nya iyenyi ọọwa ọlẹ kọ ka nwa ẹpwa ọnyẹnyẹ nyam am ayịdang bala ahụ lẹ. Aa hu okpoko ọọwa kpa kele kaka nyẹ ẹpwa ọọwa hahị mẹ.”