Read idege ỊMATIYU 18 Bible Online

ỊMATIYU 18 - idege bible

ỊMATIYU 18

¹Ụka ọọwa, angịjụgbẹyị nya iJisọsị kele ka ẹga nyamwụ kaka byoo yẹkẹẹ, “Ayịbahị ee, o-owo a tị́ ka ri ọngọ ọtụka gụgụ wuu ụ-ụwa ị-ịpyị-adịrahụ nya epwoohe?”

²Ịnyị lẹ, iJisọsị a be ẹkọ wụrụ ọnyị onjwo ochiche ọhẹ kaka godayị rịrị ị-ịlahị nyaa lẹlẹ.

³Ọọwa lẹ, iJisọsị a byaa yẹkẹẹ, “Nya ịlẹhị-ịlẹhị, m byinu yẹkẹẹ, ó-ri kaanụ ayịdang á yẹda a-abwẹla kaka ri angị la dụmwọ lala anyị anjwo ichiche ka aalẹ, ánụ ka jẹ́-ẹ jụ ka ẹpwụ nya ịpyị Adịrahụ nya epwoohe myị́ kaka!

⁴Anụ wo mẹ, ọngọlẹ kọ ka ri ọngọ ọtụka ọgụgụ wuu ị-ịpyị Adịrahụ nya epwoohe a ri ọngọlẹ kọ ka kpa ịlọmwụ weji lala ọnyị onjwo ochiche ọlẹ lẹlẹ.

⁵Ọng myị́ ọng ọlẹ kọ ka kpa ẹnyị nyam ye ọnyị onjwo ochiche ọhẹ-lọhẹ ọlịịlẹ la okpunyi lẹ aalẹ, am ayịdang a wẹ ká ọngọọwa, wẹẹ pẹ ẹpwa lẹlẹ.”

⁶iJisọsị myịmyị byaa yẹkẹẹ, “Ma, ọng myị́ ọng ọlẹ kọ ka họ ká anjwo ichiche ọhẹ-lọhẹ ịlẹ kị wẹẹ kpa ọkịlẹtụ nyaa wuu myị lam, ka wu ori nya ọhọbịrị ọhọhọ tụbwọ aalẹ, ọ ka hiigu ha ọngọọwa gụ, kọ ri kị hu ẹjwọọma ọtụka-ọtụka, da ori da ọngọọwa o-omyi, hwọọ ju ka ẹpwụ nya okpori-kpori nya ihu ọtụka-ọtụka jurum, kọ ka byi-enyi ụ-ụwa pyịyọọ.

⁷Anụ alodehe, anụ gogo wẹ! Chajị nya eri owuwu ịlẹ kị mwụ ịnụ rịrị gbenu wẹ ẹ-ẹga myị́ ẹga wuu. Chajị ụma nya ang ịlẹ kị kaa kpa angịnyị ehe kaka wu ori lẹ, ị́ ka dayi la ọwẹwẹ chịnụ ọgụ kaka. Ma, ọngọlẹ kọọwa ayịdang ri ọngọ ju ọmwụ nya eri owuwu ọlịnyị ha angịkịla wẹẹ, ọ ri enyi gu obyi lẹ!”

⁸“Chajị nya ọọwa lẹ, ó-ri ụbwọ nyang lee ẹta nyang, kọ wẹẹ ka kpang kaka wu ori lẹ aalẹ, aa chọọ daarụ hi ịlọng mẹ. Chajị, ọ ka hiigu hang gụ, nyọka ri ọlẹkwata lee olekubwọ ká ka jụ ka ẹpwụ nya ọhịhị ọ myịmyị-ka, gụ ọ-ka ri ọngọ la abwọ imimiiye lee ata imimiiye kị tị ka hung ju ka ẹpwụ nya ila o-gbe oyi myị́ oyi pyịyọọ.

⁹Ọ́ tị ri ugbẹhị nyang ahụ ayịdang kọ tị wẹẹ ka du ká ka wu ori lẹ aalẹ, a gba ugbẹhị ọọwa daarụ hi ịlọng mẹ. Chajị, ọ ka hiigu hang gụ, nyọka jụ ka ẹpwụ nya ọhịhị ọmyịmyị-ka la ugbẹhị ookpokpo, gụ ọ-ka ri ọngọ la egbahị imiiye kị tị ka hung ju ka ẹpwụ nya ila nya obwila pyịyọọ.”

¹⁰IJisọsị myịmyị byaa yẹkẹẹ, “Anụ kpahị ju ịlọnụ ọgwọgụ, kanụ juwa yẹhị da angịnyị nya Ohe Oluhye ị-lala anjwo ichiche ịwẹ bwee koo. Chajị m jam ya jenu yẹkẹẹ, ụ-ụwa e-epwoohe lẹ, alegu-ẹrụ nya Ohe Oluhye ịlẹ kị kaa kpẹhị rịrị ọngọngọọng lẹpwụ nya angịwẹ wuu kaa kele kaka godayị rịrị i-ijata nya Ohe Oluhye Adam ụka myị́ ụka wuu. [

¹¹Chajị am Ọnyị nya ọngịnyị ehe ọlẹ warị wẹ odehe ọlẹ chajị kam ka chị angịlẹ wuu kị hwahị byibyi kele ka ugbileji nya ọhọbịrị ọhọhọ wuu da. Kam ka kpaa nya tịrẹkpẹ chị Ohe Oluhye ọgụ.]

¹²Ịịyẹ a tị́ ri irya nyanụ, anụ ayịdang u-uhye nya ẹla ọlẹ? Ó-ri ká ọngọgbikpịlọ á la ịkpịlọ ohu ká ookpokpo lẹpwarịrị nyaa á kpa ịlọmwụ hwahị gbee kọ gwọọ byi. Anụ ya ká ọlẹng ọọwa á ka tụụbwọ hi ịkpịlọ iwo ihikichu kụrụ ihikichu ihihi ụ-ụwa u-uhye nya ịgbọdọ, ọwa ayịdang ka rụ kele kaka pịlahị nya ọkpịlọ obyibyi ookpokpo ọọwa gbee kọ ka yọọ ka?

¹³Ụka ká ọngọwẹ á yẹ ọkpịlọ obyibyi nyamwụ ọọwa kpá, nya ịlẹhị-ịlẹhị, m byinu yẹkẹẹ, ọwa ayịdang ka juwa chị ọkẹkẹnị ọtụka-ọtụka o-oluhye nya ọkpịlọ ookpokpo ọọwa gụ, ịkpịlọ ihihi iwo ihikichu kụrụ ihikichu ịlẹ kị kpa ịlaa hwahị kaka byi kpong-kpong ka lẹ ka!

¹⁴Ịnyịnyị-ịnyịnyị, ọ la ẹ-ẹga nya Adanụ ọlẹ kọ juwa e-epwoohe lẹ. Chajị ó ri irya nyamwụ ọwa ayịdang ká ọngọngọhẹ lẹpwarịrị nya angịnyị nya Ohe Oluhye ị-lala anjwo ichiche ịwẹ ka ta ayịreji kpong-kpong ka ịnyịnyị.”

¹⁵IJisọsị myịmyị byaa yẹkẹẹ, “Ó-ri ká ọnyadang ẹ-ẹpwụ nya ịchọọchị ọhẹ-lọhẹ á họ ang onyobyi bang aalẹ, aa kele ka ẹga nya ọngọọwa kaka ya abyị ọlala lee ọhọbịrị ọhọhọ nyamwụ ọọwa jọọ. Aa ya ẹla ọọwa ẹ-ẹpwarịrị nyanụ anụ angị imiiye kem. Ó-ri ká ọngọọwa á ke ụrụ la ụbwọ ogbile ụ-ụrụ nyang ọọwa lẹ aalẹ, ahụ a ri ọngọ kpa ọnyadang ọọwa tịrẹkpẹ nya chị Ohe Oluhye ọgụ bwu ụgbẹyị onyobyi nyamwụ wẹ lẹlẹ.

¹⁶Ó-ri ká ọngọọwa á myị ke ụrụ la oyaya nyang ọọwa ka aalẹ, aa kele kaka kpa ọngọ ookpokpo, lee angị imiiye ba ịlọng ká myịmyị tịrẹkpẹ kele ka ẹga nya ọnyadang ọọwa ká angịwẹ a wo ẹla ọọwa tanụ mẹ. Chajị ibeenu oriri nya angị imiiye lee angị ịta a ri ịnya ịlẹhị jaabwọ kị da ẹ-ẹpwụ nya Ụpwụ Ịgọgọ ene-ene lẹ.

¹⁷Ó-ri ká ọngọwẹ á myịmyị wo ụbwọ ogbile ụ-ụrụ, nya angịlẹ ká kpa ba ịlọng kele ka ẹga nyamwụ wẹ kaka myịmyị lẹ aalẹ, aa kele kaka ya je aluche nya ọjịra-jịra nya ịchọọchị wuu mẹ. Ó-ri ká ọngọọwa á tị myịmyị myị ke ụrụ la oyaya nya ala ịchọọchị wuu u-uhye nya ẹla ọọwa kaka lẹ aalẹ, anụ alọjịra-jịra nya ịchọọchị a gba ọngọọwa ugu deeji, kanụ hu ọngọọwa lala ala iJentayịlị angị jẹ́ Ohe Oluhye kpong-kpong ka bala angị nyẹ angịnyị ẹpwa ịwẹ mẹ.”

¹⁸IJisọsị myịmyị byaa yẹkẹẹ, “Nya ịlẹhị-ịlẹhị, m jam byinu yẹkẹẹ, ang myị́ ang ọlẹ kaanụ ayịdang á ka chị ori bawụlẹ ám ẹ-ẹpwụ nya odehe ọlẹ aalẹ, Ohe Oluhye tịtị ka chị ang ọọwa ori bawụlẹ e-epwoohe ịnyịnyị lẹ. Ang myị́ ang ọlẹ kanụ tị ka yi ori hi awụlẹ, ám ẹ-ẹpwụ nya odehe ọlẹ lẹ aalẹ, Ohe Oluhye tịtị ka yi ang ọọwa ori hi awụlẹ e-epwoohe ịnyịnyị lẹ.”

¹⁹IJisọsị byaa yẹkẹẹ, “M myịmyị jam byinu yẹkẹẹ, ang myị́ ang ọlẹ ká angịnyị angị imiiye lẹpwarịrị nyanụ ka myị ju awụlẹ ẹ-ẹpwụ nyamwụ, kị ka bịlẹ Ohe Oluhye u-uhye nyamwụ aalẹ, Adam ọlẹ kọ juwa e-epwoohe ka họ ang ọọwa haa pyii lẹ.

²⁰Chajị ẹga myị́ ẹga ká angịnyị angị imiiye lee angị ịta á jịra la ẹnyị nyam lẹ aalẹ, am ayịdang tịtị juwa ẹ-ẹpwarịrị nyaa ịnyịnyị lẹ.”

²¹Ụka ọọwa, iPita kele kaka tọ iJisọsị ịtọ ọhẹ yẹkẹẹ, “Ọngọlahị, ó-ri ká ọnyadam ọhẹ á juwa họ ang onyobyi bam, ụka ịmanyị, ọ tị́ chịla kam ka hịnyọhi họọ kaka ba? Ugbabwọ irwiye chiriri ịnyị?”

²²IJisọsị wẹ byi iPita yẹkẹẹ, “Eheehe! Ḿ bying yẹkẹẹ, ugbabwọ irwiye kem ka. Ma, ugbabwọ irwiye ụka iwo irwiye gbẹgbịlẹ ịnyị!”

²³IJisọsị myịmyị yẹkẹẹ, “Chajị ịpyị-adịrahụ nya epwoohe lala oja ọlẹ: Adịrahụ ọhẹ juwa kọ me obyi ẹnụtụrụ ọhẹ yẹkẹẹ, ọwa nyị ka wụrụ anchẹ nya ọọwa wuu kaka tụguru, kọọwa nyị ka kụ ang achụ haa chajị nya eri ịlẹ kịị nyị kpa ọwa lẹ.

²⁴Ahyaahị ká adịrahụ ọwẹ dọmwụ nya ang ọ-kụ achụ ọọwa lẹ, ị kpa ọnchẹ ọhẹ kele ka ẹga nyamwụ lẹlẹ. Ọnchẹ ọọwa kpa adịrahụ ọwẹ uri nya ụnọ iwo nya okpoko chiriiri lẹlẹ.

²⁵Ma, jaabwọ ká ọnchẹ ọwẹ ayịdang, á ye okpoko juwa ka nwa ọ-nwụ uri ọwẹ wuu myị́ kpong-kpong kaka lẹ, adịrahụ ayịbamwụ ọwẹ a da angịnyị nyamwụ ehile yẹkẹẹ, anụ nyị kele kaka wu ọnchẹ ọwẹ ayịdang kaka ra nya ọnyọhị bala ahụ nyamwụ tụ anyị nyamwụ wuu, kaanụ nyị go ang myị́ ang nyamwụ ịkịla wuu ra ịnyịnyị. Kaanụ nyị kpa okpoko ọọwa warị kaka nwụ ọwa uri nya ọọwa mẹ.

²⁶Ịnyị lẹ, ọnchẹ nyamwụ ọọwa, a hị nọnọ ị-ịpyị juwa gbịgba họọ, juwa bịlẹ byoo yẹkẹẹ, ‘Ayịbahị, chuchuu ju ugbodu chẹẹ ká dam ọhụ pịlẹ, gbee pwụ ụka ọlẹ kam ka nwụng eri ịwẹ wuu mẹ, adam!’

²⁷Ịnyị, bwula ahyẹẹrwẹrwa nya adịrahụ ọwẹ lẹ, ọwa ayịdang a hịnyọhi ọnchẹ nyamwụ ọọwa lẹ, ọ tụụbwọ hi eri ịwẹ wuu ga ha ọnchẹ ọọwa, byoo nyị rụ la okpunyi mẹ, lẹlẹ.

²⁸Ma, ụka ká ọnchẹ ọọwa ọlẹ ká ayịbamwụ hịnyọhi wẹ, gba kpehe kpa, ọ chẹhị kaka yẹ ọnchẹ ọọnamwụ ọkịla ọhẹ ọlẹ kọ kpọọ ọwa ayịdang uri nya okpoko ịmanyị-ịmanyị. Ọ kele kaka yụbwọ dụrwọọ ụ-ụkpụrọkọ, juwa jwọọ achwiimyi gogoogo, juwa byoo yẹkẹẹ, ‘Gba okpoko nyam ọlẹ ká kpam uri nyamwụ ham pyii alẹ mẹ!’

²⁹Ụka ọọwa, ọnchẹ oheeye ọọwa hị nọnọ ị-ịpyị i-ijata nya ọnchẹ nya ọgbanyẹ ọwẹ juwa bịlẹ byoo yẹkẹẹ, ‘Chuchuu ju ugbodu chẹẹ, ká dam ọhụ pịlẹ, gbee pwụ ụka ọlẹ kam ka nwụng uri nyang ọwẹ wuu mẹ, adam.’

³⁰Ma, ọnchẹ nya ọgbanyẹ ọọwa pwa nyi egbeju kile-kile yẹkẹẹ, ọwa nyị́ ka tụụbwọ hing kaka. Ọọwa lẹ, ọ kpa ọnchẹ oheeye ọwẹ kele kaka ju agba pwụ ụka ọlẹ ká ọnchẹ ọwẹ ka nwọọ uri nyamwụ wuu kpá ene kọ ka kpehe bwu agba lẹlẹ.

³¹Ụka ká anchẹ ịkịla nya adịrahụ ọwẹ yẹ ụma nya ang ọlẹ ká ọnchẹ nya ọgbanyẹ ọọwa họ ẹ-ẹga nya ọnchẹ oheeye ọọnamwụ ọwẹ lẹ, ẹla ọọwa chaa ịwa wuu ẹpwụ lụmẹ kaka kpoye. Ọọwa lẹ, ị kele kaka ya je ayịbaba nyaa jaabwọ ká ọnchẹ nya ọgbanyẹ ọọwa họ wuu kaka ba lẹlẹ.

³²Ụka ọọwa, adịrahụ ayịbaa ọwẹ be ẹkọ wụrụ ọnchẹ nya ọgbanyẹ ọọwa kele ka ẹga nyamwụ lẹ, ọ byoo yẹkẹẹ, ‘Ahụ ọnchẹ onyobyi, aahụ ayịdang kpangga, a ri ọngọlẹ kam hịnyọhi ha, tụụbwọ hi iru nya ikpoko ịlẹ ká kpam eri nyaa wuu ga ha lẹẹ ẹnụmwụ, chajị nyọlẹ ká bịlẹm ka?

³³Ee lẹ, ịịyẹ a tị́ du kaahụ ayịdang á yẹ ọnchẹ ọọnang ọkịla ahyẹẹrwẹrwa jaabwọ kam yẹng ahyẹẹrwẹrwa ẹnụmwụ kaka lẹẹ mẹ?’

³⁴Ịnyị lẹ, adịrahụ ọọwa a juwa wụ ẹjẹ ọtụka-ọtụka nya ịlẹhị-ịlẹhị lẹlẹ. Ọ byi angịlẹ kị kaa yẹ angịnyị akama u-ube nya agba yẹkẹẹ, anụ nyị wu ọnchẹ ọwẹ kpa rụ kele kaka ju agba kaanụ nyị juwa yọọ akama ịnyịnyịịnyị ụ-ụwa gbee pwụ ụka ọlẹ kịị nyị ka nwụ ọwa eri nya ọọwa ịwẹ wuu ene kaanụ nyị ka gbọọ kpehe mẹ!”

³⁵Ịnyị lẹ, iJisọsị a byaa ịwa wuu yẹkẹẹ, “Anụ wo mẹ! Ịnyịnyị-ịnyịnyị, Adam ọlẹ kọ juwa epwoohe a ka họ ẹ-ẹga nyanụ lẹlẹ. Ko ri ká ọng myị́ ọng lẹpwarịrị nyanụ á juwa kpa ọkịlẹtụ ọgbagbịla hịnyọhi angịnyị angịkịla aananụ ịlẹ kị juwa họ ang onyobyi baanụ kaka lẹlẹ.”