Read idege ỊMATIYU 19 Bible Online

ỊMATIYU 19 - idege bible

ỊMATIYU 19

¹Ịnyị, ụka ká iJisọsị ya ẹlẹwẹ kpá lẹ, ọ rụ bwu ịGalili kele ka ọpyị nya iJudiya o-oye ọlaanyị nya Ihu ịJọdan lẹlẹ.

²Ụka ọọwa, iru nya angịnyị lụmẹ-lụmẹ ba iJisọsị kele. Ọọwa lẹ, ọ họ angịlẹ wuu ká ẹdụrụ jụ ẹ-ẹpwarịrị nyaa uda nya ẹdụrụ nyaa ụ-ụwa lẹlẹ.

³Ụka ọọwa, ala ịFarịsii ịhyẹ juwa tịtọ kị ka kpa ẹla yẹ iJisọsị dada chajị kị ka jẹ́-ẹ ya eje wọọ. Ọọwa lẹ, ị kele kaka tọọ ịtọ ọhẹ yẹkẹẹ, “Ayịbahị, ehile nyahị myị ọnụ ha ọrụ-ahụ ọhẹ-lọhẹ yẹkẹẹ, ang myị́ ang ọlẹ ká ahụ nyamwụ nyị họ tịpyọ lẹ, nyị pwọọ mẹ?”

⁴Ụka ọọwa, iJisọsị wẹ byaa yẹkẹẹ, “Ó-ri ánụ wa ẹla ọlẹ bwu ẹpwụ Ụpwụ Ịgọgọ ẹnẹhẹ lẹka? Ụpwụ Ịgọgọ tị́ yẹkẹẹ, ‘Bwu ọmwụ ọdada, Ohe Oluhye họ ọlẹng ookpokpo bala ọnyang ookpokpo chajị kị ka ri ahụ bala ọrụ.’

⁵Ụpwụ Ịgọgọ myịmyị yẹkẹẹ, ‘Chajị nyọlẹ a du ká ọlẹng ọnyị myị ọnyị ka tụụbwọ hi adamwụ bala ịnamwụ kaka ye ahụ nya ụbwọ nya ịlọmwụ, kọọwa bala ahụ nyamwụ angị imimiiye ịịwa ka yẹ ri ọngọ ookpokpo lẹlẹ.’

⁶Lẹ, ahụ bala ọrụ ọọwa á ri angịnyị angị imiiye kaka. Ma, ọngọ ookpokpo, ị ri ugbẹnyị lẹlẹ. Chajị nya ọọwa lẹ, ang myị́ ang ọlẹ ká Ohe Oluhye ayịdang á ya chị ori bawụlẹ ene lẹ aalẹ, ọngọngọhẹ a yi ang ọọwa ori hi awụlẹ kaka.”

⁷Ala ịFarịsii ịwẹ myịmyị tọ iJisọsị ịtọ yẹkẹẹ, “Ee lẹ, ịịyẹ a tị́ du ká iMosisi wụ ọnụ hahị e-ehile nyamwụ yẹkẹẹ, ụka ká ọrụ-ahụ nyị́ da ụpwụ ọ-pwa ahụ nyamwụ pwa, ha ahụ ọọwa kpá lẹ aalẹ, ọrụ-ahụ ọọwa nyị ka la ọngịrị pwa ahụ ọọwa myị́ lẹ tịtị mẹ?”

⁸IJisọsị wẹ byaa yẹkẹẹ, “Aalẹ, iMosisi myị ọnụ hanụ yẹkẹẹ, anụ nyị da ụpwụ ọ-pwa ahụ nyanụ mẹ, chajị nya ọkịlẹtụ ọnyọọngịrị lụmẹ nyanụ anụ ayịdang ịnyị a du lẹ. Ma ịnyị, ịnọ, ọ la kpangga bwu ọmwụ ọdada ụka ọlẹ ká Ohe Oluhye họ odehe ọlẹ ka.

⁹Ma, am kpakpakpa jam byinu yẹkẹẹ, ọrụ-ahụ ọnyị myị ọnyị ọlẹ kọ ka pwa ahụ nyamwụ, kọ ri ká ahụ nyamwụ ọọwa ayịdang á ri ọngọ juwa họ akpara ene ka aalẹ, ó-ri ká ọlẹng ọọwa á tụụbwọ hyọọ kele kaka ye ọnyang ọkịla lẹ aalẹ, ụya a wẹ ká ọrụ-ahụ ọọwa họ ụka ọọwa lẹlẹ. [Ọlẹng ọkịla ọnyị myị ọnyị ọlẹ kọ tịtị ye ahụ ọwẹ kị pwa lẹ aalẹ, ọlụya, ọlẹng ọwẹ a ri ịnyịnyị lẹ.]”

¹⁰Ụka ọọwa, angịjụgbẹyị nya iJisọsị byoo yẹkẹẹ, “Ọngọlahị, ó-ri ịwẹ kọ ka la, ẹ-ẹga nya ahụ bala ọrụ lẹ aalẹ, ọ tị tị chịla ká ọlẹng ka ye ahụ kaka.”

¹¹IJisọsị wẹ byaa yẹkẹẹ, “Ẹla ọmẹjẹ u-uhye nya ahụ oyeye ọwẹ á juwa ha ọng myị́ ọng wuu ka, kẹnẹ-kẹnẹ angịlẹ ká Ohe Oluhye á ya ọngịrị nya ọọwa haa ene lẹ a ka kpa ehile ọọwa myị́ ịnyị lẹlẹ.

¹²Chajị angịhyẹ juwa kịịwa ayịdang á kaa ri ọlẹng-ka bwu ẹpwụ-ẹpwụ nya ịnaa. Angị ịkịla juwa ịlẹ kị ri ọlẹng-ka bwula ọlẹ ká angịnyị ehe rwaa ụgba lala ebwu. Angị ịkịla tị juwa kịịwa ayịdang á myị ye ahụ ka, lala ịwa nyaa ri ọlẹng-ka, chajị nya ịpyị Adịrahụ nya epwoohe. Chajị nya ọọwa lẹ, ọng myị́ ọng ọlẹ ká Ohe Oluhye á ya ọngịrị ọlịnyị họọ lẹ aalẹ, ọngọọwa a ye ọngịrị ọọwa bwu ẹga nya Ohe Oluhye mẹ!”

¹³Ụka ọọwa, angịhyẹ kpa anyị anjwo ichiche ịhyẹ kele ka ẹga nya iJisọsị chajị kọ ka yụbwọ nyamwụ nịraa, raabwọ jwaa. Ma, angịjụgbẹyị nya iJisọsị yalibyi la angịịwa.

¹⁴Ịnyị, iJisọsị a byi angịjụgbẹyị nyamwụ yẹkẹẹ, “Anụ ba hi anjwo ichiche kị warị wẹ ẹga nyam mẹ! Anụ kwaa iwe ka. Chajị ịpyị Adịrahụ nya epwoohe ri ịnya angịlẹ kị ju ọkịlẹtụ ọgbagbịla lala ịnya anyị anjwo ichiche ịlịịlẹ.”

¹⁵Ọọwa lẹ, iJisọsị a yụbwọ nyamwụ nịrọ anyị anjwo ichiche ịịwa lẹ, ọ raabwọ jwaa wuu lẹ, ọ rụ hi ẹga ọọwa lẹlẹ.

¹⁶Ụka ọhẹ, onjwo okolobya ọhẹ kele ka ẹga nya iJisọsị. Ọ byoo yẹkẹẹ, “Ayịbahị ịtịcha [ọnyịịla], ụma nya ang ọnyịịla ọlanyị, m tị́ ka họ ene kam ka la ọhịhị ọmyịmyị-ka?”

¹⁷IJisọsị wẹ byoo yẹkẹẹ, “Ịịyẹ a tị́ du ká juwa tọm ịtọ u-uhye nya ang ọnyịịla ọhọhọ? [Ká juwa wụrụm ‘Ọngọ ọnyịịla’?] Ọngọngọhẹ á ri ọngịnyị ọnyịịla kpong-kpong ka, kẹnẹ-kẹnẹ, Ohe Oluhye ayịdang ụbwọọmwụ mẹ ịnyị! Ó-ri ka juwa tịtọ ká ka jụ ka ẹpwụ nya ọhịhị ọmyịmyị-ka aalẹ, a kpa ehile nya Ohe Oluhye jịra mẹ.”

¹⁸Ọlẹng ọọwa wẹ byi iJisọsị yẹkẹẹ, “Ụma nya ehile ịlanyị, m tị́ ka kpa ene?” IJisọsị wẹ byoo yẹkẹẹ, “A nwụ ọngịnyị ka. A họ ụya lee ọ-da ẹla ahụ nya ọngịnyị ka. A yi oyi ka. A ri ibeenu ọnọọkịla ka.

¹⁹Ju ihi nya adang bala ịnang. Ọngịnyị ọọnang a hán̄g nya ịlẹhị-ịlẹhị lala ịlọng mẹ.”

²⁰Ọlẹng ọwẹ myịmyị wẹ byi iJisọsị yẹkẹẹ, “Ehile ịwẹ ká ya wuu lẹ, ị ri ang ịlẹ kaam ayịdang kaa họhọ ene-ene lẹ. Ee lẹ, ịịyẹ a tị́ myịmyị hi ham kam ka họ mẹ?”

²¹IJisọsị wẹ byoo yẹkẹẹ, “O hiigu. Ó-ri ká tịtọ ká ka la kpẹẹkpẹẹ chọnụ ịnyịlẹhị lẹ aalẹ, a rụ kele kaka go ang myị́ ang nyang ịlẹ ká la wuu ra, ká hu okpoko nyamwụ ga ha ikpehika mẹ. Aalẹ, ụdụ nyang ka juwa e-epwoohe lẹ. Ká kẹwẹ ká bam jẹ mẹ.”

²²Ụka ká ọlẹng ọwẹ wo ẹlẹwẹ ká iJisọsị ya tọọ ịnyị lẹ, ọ juwa yegiri rụ la ayiiji ọtụka-ọtụka lẹlẹ. Chajị ọwa ayịdang kpụ ụdụ lụmẹ kaka kpoye.

²³Ịnyị, iJisọsị a byi angịjụgbẹyị nyamwụ yẹkẹẹ, “Nya ịlẹhị-ịlẹhị, m byinu yẹkẹẹ, ọ ka ri ang olujwo ọtụka-ọtụka ha angịlẹ kị kpụ ụdụ, nyọka jẹ́-ẹ jụ kele ka ịpyị-adịrahụ nya epwoohe.

²⁴M myịmyị jam byinu yẹkẹẹ, ọ dọmwụ ka chịkpẹẹ ha ụnyịrẹ-ịkamẹlụ nyọka jụ kpoye bwu iwa nya ọgang, gụ alụdụ ọ-ka jụ kele ka ịpyị Adịrahụ nya Ohe Oluhye.”

²⁵Ụka ká angịjụgbẹyị nyamwụ wo ẹla ọọwa, ọ laa ahịbwuu lụmẹ kaka kpoye. Ịnyị, ị juwa tịtọ yẹkẹẹ, “Ó-ri ịnyị lẹ, o-owo a tị́ tị tị ka chịda myị́ mẹ?”

²⁶Ma, iJisọsị ayịdang mwụụrụ yẹ angịjụgbẹyị nyamwụ chịng lẹ, ọ wẹ byaa yẹkẹẹ, “Ẹ-ẹga nya angịnyị ehe lẹ, ọ ri ang olujwo. Ma, ẹ-ẹga nya Ohe Oluhye lẹ, ang myị́ ang wuu tị ri ang ọchịkpẹẹ họọ.”

²⁷Ịnyị, iPita a wẹ byoo yẹkẹẹ, “Ọngọlahị, yẹ wẹẹ! Ahị ayịdang tụụbwọ hi ang myị́ ang nyahị wuu, ahị bang jẹ lẹ. Ee lẹ, ịịyẹ ahị tị́ ka la ku ọmwakpa nyaa lẹẹ mẹ?”

²⁸Ọọwa, iJisọsị a wẹ byaa yẹkẹẹ, “Nya ịlẹhị-ịlẹhị, m byinu yẹkẹẹ, anụ angịlẹ wuu kanụ wẹẹ bam jẹ alẹ lẹ, ụka nya odehe onyeewe ọlẹ kọ juwa warị, kaam Ọnyị nya ọngịnyị ehe ka warị kaka hụhụ u-uhye nya ẹchị adịrahụ nyam la ogbo nyam, anụ angị iwo kụrụ imiiye ịwẹ tịtị ka hụhụ ẹ-ẹchị adịrahụ iwo kụrụ imiiye tam, juwa la imwawụ iwo kụrụ imiiye nya ala Isirẹlụ eje ụka ọọwa ịnyịnyị.

²⁹Ọng myị́ ọng ọlẹ kọ tị tụụbwọ hi ebe ịlẹ kọ la wuu lee anyịnịna alẹng lee anyịnịna anyang lee adamwụ lee ịnamwụ, [lee, ahụ nyamwụ,] lee, anyị nyamwụ, lee ịpyị ị-kpa họ ang nyamwụ wuu, kọ ka tụụbwọ hi ịngịịwẹ wuu chajị nya ẹnyị nyam lẹ aalẹ, ọngọọwa ayịdang ka ye ang ịkịla mwụ aba ba ugbabwọ ohu chiriri. Ọngọọwa ka myịmyị la ọhịhị ọmyịmyị-ka la ụka ohyẹẹkpẹ.

³⁰Ma, iru nya angịhyẹ ịlẹ kị jene ka dachichi yẹ kaka ri angị ku ẹkpẹ. Iru nya angịlẹ kị tị ri angị ku ẹkpẹ ka mwọọgịlẹ yẹ kaka ri angị jene ịnyịnyị.”