Read idege ỊMATIYU 20 Bible Online

ỊMATIYU 20 - idege bible

ỊMATIYU 20

¹Ụka ọọwa, iJisọsị myịmyị byi angịnyị nyamwụ yẹkẹẹ, “Ang chajị nya ịpyị Adịrahụ nya epwoohe lala oja ọlẹ: Ọ lala ọhọhọ nya ayịdọlẹrụ ọhẹ ọlẹ kọ chahị la ụtụrụ gbegbegbe kele kaka pịlahị nya angị kaa họ ụkụrwọ ẹ-ẹrụ ha angịnyị nya okpoko chajị kọ ka diraa ụkụrwọ.

²Ụka kọ yaa, ọ kpaa kele ka ẹrụ nyamwụ. Ọ myị ọnụ nyọka nwaa uri jaabwọ ká uri nya ahị ọpyẹpyẹ nya alụkụrwọ ịlẹrụ ọlịnyị kaa la.

³Ayịdọlẹrụ ọọwa myịmyị kele ka ihi lala ụka nya oje ihikichu nya ụtụrụ. Ọ yẹ alẹng ịhyẹ kị godayị rịrị chịng ụ-ụwa. Í juwa họ ịngịngịhyẹ kpong-kpong ka.

⁴Ịnyị, ọ byi alẹng ịịwa yẹkẹẹ, ‘Ẹnwa anyị, anụ kẹwẹ kam kpanụ kaka họ ụkụrwọ ẹ-ẹpwụ ẹrụ nya alakọnụ nyam, kam ka nwụnụ uri yẹẹyẹẹ mẹ!’

⁵Ịnyị, alẹng ịịwa a bọọ kele ka ẹrụ kaka họ ụkụrwọ jaabwọ kọ byaa lẹlẹ. Ọlẹng ayịdọlẹrụ ọwẹ myịmyị kele kaka diro angịkịla kpa kele ka ẹrụ nyamwụ lala ụka nya oje iwo kụrụ imiiye nya ẹnụ. Ọ myịmyị diro angịkịla kpa kele ka ẹrụ ọọwa lala ụka nya oje ịta nya obyi ịnyịnyị.

⁶Ụka kọ hi pyịnyẹng ká oje ịrụ nya obyi ka họ lẹ, ọlẹng ọwẹ a myịmyị mwẹẹkpẹ kele ka ihi lẹlẹ. Ọ yẹ alẹng ịhyẹ kị godayị rịrị chịng ụ-ụwa. Ọọwa lẹ, ọ taa ịtọ yẹkẹẹ, ‘Ẹnwa anyị, ịịyẹ a tị́ du, kanụ jam bịrị ẹnụtụrụ nya alẹ ọlẹ ododu, juwa godayị chịng họ ịngịngịhyẹ kpong-kpong kaka mẹ?’

⁷Alẹng ịịwa wẹ byoo yẹkẹẹ, ‘Áhị́ ye ọngọngọhẹ diroohi ụkụrwọ nya okpoko kaka, ịnyị a du lẹ.’ Ọọwa lẹ, ayịdọlẹrụ ọwẹ a wẹ byaa yẹkẹẹ, ‘Ó-ri ịnyị lẹ aalẹ, anụ kẹwẹ kam kpanụ kaka họ ụkụrwọ ẹ-ẹpwụ nya ẹrụ nya alakọnụ nyam mẹ. [M ka nwụnụ uri yẹẹyẹẹ.]’ Ọọwa lẹ, alẹng ịịwa a bọọ rụ ka ẹrụ ọọwa lẹlẹ.”

⁸“Ụka ká obyi hi ẹnụ ọọwa, ayịdọlẹrụ ọọwa a be ẹkọ wụrụ olegbeju ọgbahị nya angị họ ụkụrwọ ẹ-ẹrụ nyamwụ. Ọọwa lẹ, ọ byoo yẹkẹẹ, ‘Be ẹkọ wụrụ angị họ ụkụrwọ nya okpoko ịlẹrụ nyahị warị ka nwaa uri mẹ. Aa dọmwụ nya uri ọnwụnwụ ọọwa bwu ẹga nya angịlẹ kahị diro wẹ warị ku ẹkpẹ-ẹkpẹ wuu kele kịlahị ịnyịnyịịnyị gbee, kọ ka hi pwụ angịlẹ kahị diro jene-jene wuu mẹ.’

⁹Angịlẹ ká ayịdọlẹrụ ọwẹ diro la ụka nya oje ịrụ lẹ, ọ nwaa uri chị ọnụ jaabwọ kị kaa nwụ uri nya alụkụrwọ ẹ-ẹpwụ nya ahị ọpyẹpyẹ lẹpwụ-lẹpwụ.

¹⁰Ụka kọ nwụ alụkụrwọ ịịwa uri gbee kọ hi pwụ angịlẹ kị diro nya ọgbanyẹ-ọgbanyẹ wuu lẹ, angịịwa ayịdang me irya yẹkẹẹ, ayịdọlẹrụ ọwẹ nyị ka nwụ ịwa uri gụ angị ịkịla wuu. Ma, ayịdọlẹrụ ọọwa á tị myị nwaa uri kpoye nya uri ọlẹ kị kaa nwụ angị họ ụkụrwọ ọlịnyị ẹ-ẹpwụ nya ahị ọpyẹpyẹ ka.

¹¹Ụka ká angịịwa ịlẹ kị diro nya ọgbanyẹ-ọgbanyẹ ye uri nyaa kpá bwaaa lẹ, ị juwa mwọ ala ya ba ayịdọlẹrụ ọwẹ nya ịlẹhị-ịlẹhị lẹlẹ.

¹²Alẹng ịịwa juwa mwọ ala ya yẹkẹẹ, ‘Anụ yẹ wẹẹ, angịlẹ kị diro lụka o-ku ẹkpẹ-ẹkpẹ lẹ, ụkụrwọ nya awa ookpokpo kẹnẹ-kẹnẹ kem, ị họ lẹ. Ahị angịlẹ kahị tị họ ụkụrwọ la ụtụrụ-ụtụrụ dụwa ẹ-ẹnụ gbee ká obyi hi, ị tị mwọọgịlẹ nwụhị bala angịwẹ uri mememe.’ ”

¹³“Ụka ọọwa, ayịdọlẹrụ ọwẹ be ẹkọ wụrụ ọngọhẹ lẹpwụ nya angịwẹ byoo yẹkẹẹ, ‘Ẹnwa oligu nyam, ḿ họng ri kpong-kpong ka. Chajị ịnya nya uri nya ụkụrwọ nya ahị ọpyẹpyẹ ookpokpo kem, am bala ahụ a ya gu awụlẹ lẹ.

¹⁴Chajị nya ọọwa lẹ, oligu nyam, ye okpoko nyang wẹ ká rụ ka ẹpwa mẹ. Chajị am ayịdang tịtọ kam ka nwụ ọngọlẹ kam diro wẹ ku ẹkpẹ-ẹkpẹ wuu, uri nya ahị ọpyẹpyẹ nya alẹ jaabwọ kam nwụng ịnyịnyị lẹ!

¹⁵A ya kam la ọngịrị ka kpa okpoko nyam họ ang ọlẹ kọ bam ka? Ẹla ọlẹ kị yẹkẹẹ, ọ-há ayịdang nyaa ri lẹ, a tị myị ju ka lee ọnahị ọhọhọ nyam ọlẹ kam họ wẹ, a tị́ wẹẹ lang ijiiji?’ ”

¹⁶Ịnyị, iJisọsị a ya ẹla otuku byaa yẹkẹẹ, “Ịịwẹ, angịlẹ kị ri angị ku ẹkpẹ, a ka mwọọgịlẹ yẹ ri angị jene lẹ, angịlẹ kị tị ri angị jene a ka dachichi yẹ ri angị ku ẹkpẹ lẹlẹ. [Chajị ẹkọ obebe lẹ, ọ wụrụ aluche lẹ. Ma, angị ịmanyị-ịmanyị lẹpwụ nya angị myị ẹkọ ọọwa, ị tị chụ lẹ.]”

¹⁷Ịnyị, ụka ká iJisọsị bala angịjụgbẹyị nyamwụ juwa bajẹ jahị da koye oluhye kele ka epweji nya iJerusalẹm lẹ, ọ wụrụ angịjụgbẹyị nyamwụ kele ka ọka nya ụgbẹyị ụbwaa-ụbwaa, juwa ya ẹla taa ụ-ụwa lẹlẹ.

¹⁸Ọ byaa yẹkẹẹ, “Anụ wo mẹ! Ahị jam hu ang koye oluhye kele ka iJerusalẹm lẹ! Ụ-ụwa, ị ka pịrịm am Ọnyị nya ọngịnyị ehe ọlẹ ha alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ. Ị ka ya eje nya igu wum.

¹⁹Ọọwa lẹ, ị ka tụụbwọ him ju ala iJentayịlị ụ-ụbwọ lẹ, ị ka juwa kpam họ, ka juwa wam egbiji. Ị ka gum iloo ba okoji ụ-ụwa. Ma, m tị ka wuleji bwula igu ẹnụtụrụ ọhata, juwa hịhị myịmyị.”

²⁰Ịnyị, ịnịna nya anyị nya iSebidi a kele ka ẹga nya iJisọsị bala anyị alẹng nyamwụ imiiye lẹ, ọ hiri kpẹẹ, juwa gbịgba ha iJisọsị, juwa tịtọ nya ọbịlẹ ịngịhyẹ bwu ẹpwụtụbwọ nyamwụ lẹlẹ.

²¹IJisọsị tọọ wo yẹkẹẹ, “Ọnyang, ịịyẹ a tị́ tịtọ kam ka họ hang?” Ọnyang ọwẹ wẹ byoo yẹkẹẹ, “Ọngọlahị, am tịtọ ká ka myị ọnụ ha anyị nyam imiiye ịlẹ, ká ọngọhẹ nyaa ka hụhụ u-upwuriri nyang, ká ọngọkịla ka hụ ụ-ụpụpịla nyang tang ụ-ụwa ị-ịpyị adịrahụ nyang.”

²²IJisọsị wẹ byaa yẹkẹẹ, “Anụ ya kaanụ ayịdang jẹ́ ụma nya ang ọlẹ kanụ wẹẹ bịlẹm kpong-kpong? Anụ ya jem wẹẹ. Ụma nya ukoku ọ-nwa enyi nya akama ọyẹyẹ nyam, anụ tị́ ka kpa ka ọnụ tam myị́ wẹ, lee? [Ụma nya ịlọ onyinyi ọlẹ kịị wẹẹ ka nyi hụm bwula akama ọyẹyẹ nyam, anụ tị́ ka kụ ụwa gbe myị́ wẹ?]” Ịnyị, ị wẹ byoo yẹkẹẹ, “Ee, ahị ka haa wuu myị́, Ayịbahị!”

²³Ịnyị, iJisọsị a wẹ byaa yẹkẹẹ, “O hiigu. Ó-riri kanụ ka kpa ukoku nya akama ọyẹyẹ nyam ọọwa ka ọnụ myị́ tam ta, [lee, ọ-ka kụ ụwa gbe ụma nya ịlọ onyinyi nya akama ọyẹyẹ nyam ọọwa ọlẹ kị ka nyi hụm myị́ ịnyịlẹhị,] aalẹ, ebwo nyọka ya ẹga da hanụ, kanụ ka hụ tam u-upwuriri nyam lee ụ-ụpụpịla nyam lẹ, ọọwa á juwa ẹ-ẹpwụtụbwọ nyam kpong-kpong ka! Ma, iwe-ahụrụ ọlịnyị juwa godayị gbe angịlẹ ká Adam ayịdang nwụla iwe-ahụrụ ọọwa nọ gbe ene-ene.”

²⁴Ụka ká angịjụgbẹyị nya iJisọsị angị iwo chiriri ihihi wo ẹla ọọwa lẹ, ị juwa wụ ẹjẹ ta anyịnịna alẹng angị imiiye ịwẹ lẹlẹ.

²⁵Ịnyị lẹ, iJisọsị a tụ angịjụgbẹyị nyamwụ wuu guru lẹ, ọ byaa yẹkẹẹ, “Anụ tị́ jẹ́ yẹkẹẹ, angịlẹ kị ri ịdịrịhụ nya ala iJentayịlị angị jẹ́ Ohe Oluhye-ka lẹ, ị kaa kpa alekpeleji nyaa la ụbwọ ọnyọọngịrị lụmẹ kaka kpoye. Angịlẹ kị ri alegbeju ilukido nya ịdịrịhụ nyaa kaa da angịlẹ kị ji ekpeleji nyaa ehile ọnyọọngịrị jaabwọ kọ háa.

²⁶Ma, ẹ-ẹga nyanụ anụ lẹ, ọ́ chịla kọ ka la ịnyị koo! Ọkọkọ nya ọọwa lẹ, ọngọlẹ kọọwa ayịdang á tịtọ kọ ka ri ọngọ ọtụka ẹ-ẹpwụ nyanụ wuu lẹ aalẹ, ọngọọwa a juwa myịnụ ẹrụ lala ọnchẹ nyanụ, anụ angị ihihi wuu mẹ.

²⁷Ọng myị́ ọng ọlẹ kọ juwa tị tịtọ kọọwa ayịdang a ka ri olegbeju ọ-kụ ịlahị nyanụ, anụ angịkịla wuu lẹ aalẹ, ọngọọwa ka nwụlanọ nyọka juwa myị ẹrụ hanụ lala ọwa ayịdang nyaa dọmwụ ri ọnyọhị nyanụ wuu,

²⁸jaabwọ kaam Ọnyị nya ọngịnyị ehe warị wẹ odehe ọlẹ kaka họ pyii lẹ. Chajị ḿ warị nya ọngọ ọtụka, kị ka myị ẹrụ ham ka. Ma, m warị kaka myị ẹrụ ha angịnyị ehe lala ọnchẹ nyaa, gbee kam lẹẹ ka hu ọhịhị nyam kịla iya wọnụ nyaa ịwa wuu ju. Chajị ká iru nya angịnyị ka jẹ́-ẹ bwula ọọwa la ọchịda nya Ohe Oluhye.”

²⁹Ịnyị, ụka ká iJisọsị bala angịjụgbẹyị nyamwụ juwa rụ bwu epweji nya iJeriko lẹ, iru nya angịnyị lụmẹ-lụmẹ a juwa ba iJisọsị jẹ lẹlẹ.

³⁰Ọọwa lẹ, alidu imiiye ịhyẹ ịlẹ kị hụhụ ụ-ụgbẹyị ọọwa a wo oja yẹkẹẹ, iJisọsị nyị juwa chịpwụrụ kam lẹ, ị juwa ya ẹla la omyi ogboo yẹkẹẹ, “Ayịbahị, ahụ ọnyị nya iDevidi, chuchuu yẹhị ahyẹẹrwẹrwa chẹẹ mẹ!”

³¹Ụka ọọwa, iru nya angịnyị ịịwa juwa yalibyi la alidu ịwẹ, juwa kpaa ịkata yẹkẹẹ, “Anụ ba la ọmọnyọ pyii!” Ma, alidu ịịwa juwa chị eko la omyi ogboo gụ olene-ene yẹkẹẹ, “Ọngọlahị, ahụ Ọnyị nya iDevidi, chuchuu yẹhị ahyẹẹrwẹrwa chẹẹ mẹ!”

³²Ịnyị, iJisọsị ayịdang a godayị rịrị ụ-ụwa lẹ, ọ be ẹkọ wụrụ alidu ịịwa ka ẹga nyamwụ lẹ, ọ taa ịtọ wo yẹkẹẹ, “Ịịyẹ anụ tị́ juwa tịtọ kam ka họ hanụ?”

³³Alidu ịwẹ wẹ byoo yẹkẹẹ, “Ayịbahị, ahị tịtọ ká ka họhị uda nya idu ọkpụkpụ nyahị!”

³⁴Ịnyị lẹ, alidu ịwẹ a la iJisọsị ahyẹẹrwẹrwa lụmẹ lẹ, ọ kele kaka yụbwọ nyamwụ gwaa egbahị nyaa lẹlẹ. Ọọwa lẹ, ị jẹ́ juwa yọyị iijata-ijata lẹ, ị juwa ba iJisọsị jẹ lẹlẹ.