Read idege ỊMATIYU 22 Bible Online

ỊMATIYU 22 - idege bible

ỊMATIYU 22

¹IJisọsị myịmyị juwa kpa oja ọkpịta mẹ ang jẹ angịnyị yẹkẹẹ,

²“Am ka chụ ịpyị-adịrahụ nya epwoohe kaka me oja ọlẹ: Adịrahụ ọhẹ họ ang oriri nya ahụ oyeye nya ọnyị ọlẹng nyamwụ ọhẹ.

³Ụka ká ayịdẹpwa ọwẹ nwụla ang myị́ ang wuu nọ kpá, ọ du anchẹ nyamwụ ịhyẹ ẹrụ kaka be ẹkọ wụrụ angịlẹ wuu kọ wụrụ ẹpwa chajị nya ọjịra-jịra nya ang oriri nya ahụ oyeye nya ọnyị nyamwụ ọọwa. Ma, angịịwa wuu pwa yẹkẹẹ, ịwa nyị́ ka wẹ ka.

⁴Ụka ọọwa, adịrahụ ọwẹ myịmyị du anchẹ nyamwụ ịkịla ẹrụ yẹkẹẹ, ‘Anụ kele kanụ byi angga nyam ịwẹ wuu yẹkẹẹ, am nyị yẹkẹẹ, am nyị nwụ ịna bala ịmwụ i-ju eyo ịnyịịla-ịnyịịla, họ ang oriri nyaa bala ọnwụla ang myị́ ang wuu nọ gbaa kpá lẹlẹ, nyị kẹwẹ warị wẹ ọjịra-jịra mẹ!’

⁵Ma, angga nya ayịdẹpwa ọwẹ wuu hu ẹla ọọwa hukee. Ọọwa lẹ, ịwa wuu a rụ ka ẹga ọ-baa ba lẹlẹ. Angịhyẹ nyaa rụ ka ẹrụ nyaa. Angị ịkịla nyaa rụ ka ihi lee ẹga nya ụkụrwọ nyaa ọkịla la datị-datị.

⁶Ọọwa lẹ, angịkịla nyaa ihihi a gba mịla anchẹ nya ayịdẹpwa ọwẹ lẹ, ị mịla nya ịlẹhị-ịlẹhị, chị oyoyi jwaa gbee kị dọmwụ nwụ anchẹ nya ịịwa kẹhị-kẹhị lẹlẹ.

⁷Ịnyị, adịrahụ ọwẹ a wụ ẹjẹ nya ịlẹhị-ịlẹhị lẹ, ọ du ịsọja ịdẹwụ nyamwụ kele kaka nwụ angị inyibyi ịwẹ kị nwụ anchẹ nyamwụ lẹlẹ. Ọọwa lẹ, ịsọja ịịwa a kele kaka jụ ẹga myị́ ẹga nya epweji nya angịwẹ wuu ila gbanggbang lẹlẹ.

⁸Ịnyị, adịrahụ ọwẹ a be ẹkọ wụrụ anchẹ nyamwụ ihihi lẹ, ọ byaa yẹkẹẹ, ‘O ri nya ịlẹhị, ịnọ m nwụla ang oriri nya ahụ oyeye nya ọnyị ọlẹng nyam ọlẹ nọ kpá yẹẹyẹẹ lẹ, ma, angịlẹ kam wụrụ ẹpwa wẹ lẹ, ịwa ayịdang á chịla nyọka ya ẹta nyaa chị ọjịra-jịra ọlẹ kpong-kpong kaka.

⁹Lẹ anụ anchẹ nyam, anụ wuleji kanụ jẹ tụ opeje-opeje da, kanụ byi ọng myị́ ọng ọlẹ kanụ yẹ ụ-ụwa yẹkẹẹ, am adịrahụ nyị jam wụrwaa ịwa wuu ẹpwa warị wẹ ẹpwụ nya ọjịra-jịra nya ang oriri nya ahụ oyeye nya ọnyị nyam lẹ.’

¹⁰Ịnyị lẹ, anchẹ ịịwa a rụ kele, juwa tụ opeje-opeje da ịnyịnyịịnyị lẹlẹ. Ị kpa iru nya angịnyị lụmẹ-lụmẹ jaabwọ kị ye kaka ba, kele kaka myị ube ọhụhụ nya ang oriri nya ahụ oyeye ọọwa kpọng kpọng. Angịnyị ịnyịịla juwa ẹ-ẹpwụ nyaa. Angịnyị ịtịpyọ tị juwa ẹ-ẹpwụ nyaa ịnyịnyị. Chajị ẹkọ obebe nya adịrahụ ọọwa á juwa ha alogu ookpokpo kem ka.”

¹¹“Ụka ọọwa, adịrahụ ọwẹ kele kaka wụla angga ịlọhụhụ ọọwa yẹ. Ọ chẹhị kaka yẹ ọnyị ọlẹng ọhẹ ẹ-ẹpwarịrị nyaa kọ kụrụ awụrụ ụma nyọlẹ kị kaa kụrụ ka ẹpwụ nya ọjịra-jịra nya ahụ onyeewe oyeye ọlịnyị ka.

¹²Ọọwa lẹ, adịrahụ ọwẹ a tọ ọlẹng ọọwa ịtọ yẹkẹẹ, ‘Ẹnwa ọlẹng, anyị, a tị́ du ka warị wẹ ẹpwụ nya ọhụhụ ọlẹ, ká tị kụrụ awụrụ nya ọjịra-jịra nya ahụ oyeye ọlẹ ene ka?’ Ma, ọnyị ọlẹng ọọwa hu adịrahụ ọwẹ ujiji kpini-kpini.

¹³Ọọwa lẹ, adịrahụ ọwẹ a byi angịnyị nyamwụ yẹkẹẹ, ‘Anụ kẹwẹ, kanụ wu ọlẹng ọwẹ, kanụ chọọ ori a-abwọ bala ata nyamwụ, kanụ hwoo da ju kele ka ẹpwụ nya ukpowu olodehe ọlaanyị mẹ. Ẹgẹwẹ, ọwa ayịdang a ka juwa jida bala o-juwa wangịrị nyamwụ pyịyọọ lẹlẹ.’ ”

¹⁴IJisọsị kpa ẹla ọlẹ tụ ẹla ọọwa ku yẹkẹẹ, “O ri nya ịlẹhị, ẹkọ obebe juwa wụrụ aluche wuu ẹpwa lẹ! Ma, angị ịmanyị-ịmanyị kem, ị tị chụ, chajị nya ọ-myị ẹkọ ọọwa pwoku lẹ.”

¹⁵Ụka ọọwa, ala ịFarịsii wuu kele kaka kọ ju awụlẹ yẹẹyẹẹ jaabwọ kịịwa ayịdang ka bwu kpa ịtọ ọtọtọ kịla iJisọsị ata.

¹⁶Ịnyị lẹ, ala ịFarịsii ịwẹ a du angịjụgbẹyị nyaa ịhyẹ ẹrụ bala ala iJuu ịkịla aanaa ịhyẹ ịlẹ kị ri angị ji ẹkpẹ nya adịrahụ iHerọdụ kele ka ẹga nya iJisọsị lẹlẹ. Ụka kị pwụ ẹga nya iJisọsị, ị byoo yẹkẹẹ, “Ayịbahị ịtịcha, ahị jẹ́ yẹkẹẹ, ahụ ayịdang kpakpakpa lẹ, ọngịnyị nya ẹla nya ịlẹhị a ri lẹ. A kaa kpa ẹla nya ịlẹhị nyang ọọwa mẹ ang jẹ angịkịla jaabwọ kị ka bwu jẹdịyẹ ba ụgbẹyị nya abwẹla ọnyịịla ọhọhọ nya Ohe Oluhye jẹ nya ịlẹhị. Á kaa juhi-ahị nya ọngịnyị ehe ọhẹ-lọhẹ kpong-kpong ka. Chajị, á kaa me irya ju iwe-ahụrụ nya ọngịnyị ehe kpa ya ẹla tọọ kpong-kpong ka.

¹⁷Lẹ, ya irya nyang ahụ ayịdang ụ-uhye nya ịtọ nyahị ọlẹ jehi wẹẹ. Ọ tị́ chịla ị-ịlahị nya ehile nyahị, ahị ala iJuu wuu, kahị ka juwa nyẹ ẹpwa ha iSisa adịrahụ ọgbahị nya ala iRom ịlẹ kahị ji ekpeleji nyaa, lee? Ọ́ tị́ chịla kahị ka họ ịnyị ka?”

¹⁸Ma, iJisọsị ayịdang tị jẹ́ ijẹẹhị ọlẹpwụ nyaa wuu ene-ene lẹ. Ọọwa lẹ, ọ wẹ byaa yẹkẹẹ, “Anụ alahị imiiye, ịịyẹ a tị́ du kanụ juwa tịtọ nyọka kịlam ata ịnyị kpong-kpong ene?

¹⁹Ọ hiigu, anụ kpa okpoko ọlẹ kaanụ ayịdang kaa kpa nyẹ ẹpwa ọọwa warị wam wẹẹ.” Ọọwa lẹ, ị kpa ugbe nya okpoko ọọwa ookpokpo kịla iJisọsị lẹlẹ.

²⁰Ịnyị, iJisọsị a taa ịtọ yẹkẹẹ, “Anụ ya jem wẹẹ. Ihwoto nya owo bala ẹnyị nya owo a tị́-ị wẹ u-uhye nya ugbe nya okpoko ọlẹ kpong-kpong ene?”

²¹Angịwẹ wẹ byi iJisọsị yẹkẹẹ, “Ụrụrụ bala ẹnyị nya adịrahụ iSisa ịnyị.” Ịnyị, iJisọsị a wẹ byaa yẹkẹẹ, “O hiigu. Ó-ri ịnyị aalẹ, anụ hu ang nya iSisa ha iSisa, kanụ hu ang nya Ohe Oluhye ha Ohe Oluhye ịnyịnyị tịtị mẹ!”

²²Ụka kị wo ọwẹwẹ nya iJisọsị ọọwa, ọ laa ịwa wuu ahịbwuu ọtụka-ọtụka. Ọọwa lẹ, ịwa ayịdang a yegiri rụ bwu ụwa hi iJisọsị lẹlẹ.

²³La ẹnụtụrụ ọọwa-ọọwa, angịhyẹ ịlẹ kị wụrụ ala ịSadusii kele ka ẹga nya iJisọsị kaka tọọ ịtọ ọhẹ. Ala ịSadusii ịwẹ a ri angịlẹ kịịwa ayịdang á myị yẹkẹẹ, ịngịngịhyẹ nyị ri owuleji bwula igu nya ọngịnyị ehe lụka ohyẹẹkpẹ kpong-kpong kaka lẹlẹ.

²⁴Ala ịSadusii ịịwa byi iJisọsị yẹkẹẹ, “Ayịbahị ịtịcha, yẹ ẹla ọlẹ tahị wẹẹ. iMosisi da ẹ-ẹpwụ nya ehile nyamwụ yẹkẹẹ, ‘Ó-ri ká ọrụ-ahụ ọnyị myị ọnyị á gbu hi ahụ nyamwụ, kọ ri kị ma ọnyị ọhẹ-lọhẹ ene ka aalẹ, ọnyịnịna ọlẹng nya ogu ọlịpyị ọọwa, a kele kaka chị ahụ-ogu ọọwa ida ye pyii, chajị kọ ka ma ọnyị ha ogu oleji ọọwa mẹ.’

²⁵Adịda ọhẹ tị jam ọ-ọpyị nyahị ọlẹ kọ ma anyị alẹng irwiye, ịlẹ kị kụ am la awụlẹ tahị. Ọnyị ọgbahị nya ọngọwẹ ye ahụ. Ma, ọ tị chị ukpo gbu hi ahụ ọọwa, lụka ọlẹ kị ma ọnyị ọhẹ-lọhẹ ene ka. Ọnyịnamwụ ọlẹng ọlẹ kị ma hilọọ chị ahụ-ogu ọọwa ida ye.

²⁶Ma, ọnyị oheeye ọọwa gbu lụka ọlẹ kọ ma ọnyị ọhẹ-lọhẹ ene ka ịnyịnyị. Ọnyị ọhata chị ahụ-ogu ọọwa ida ye. Ma, ọnyị ọhata myịmyị gbu, lụka ọlẹ kọ ma ọnyị ọhẹ-lọhẹ ene ka ịnyịnyị. Ọọwa lẹ, igu a nwụ anyịnịna alẹng irwiye ịwẹ hi tọ awụlẹ erike-erike la ọngọngọhẹ nyaa ọ-ma ọnyị ọhẹ-lọhẹ deeji ene kaka wuu lẹlẹ.

²⁷Ịnyị, igu a nwụ ahụ-ogu ọwẹ ayịdang ịnyịnyị lụka ohyẹẹkpẹ ẹkpẹ lẹlẹ.

²⁸Lẹ, ịtọ nyahị ri yẹkẹẹ, o-owo kpangga, lẹpwarịrị nyaa ịwa wuu a tị́ ka ri ọrụ-ahụ ọlam-ọlam lẹẹ la ẹnụtụrụ nya owuleji bwula igu nya angị gbugbu lụka ohyẹẹkpẹ mẹ? Chajị anyịnịna alẹng angị irwiye ịwẹ wuu ye ọnyang ọwẹ hi tọ awụlẹ erike-erike wuu jịra lẹ.”

²⁹IJisọsị wẹ byaa yẹkẹẹ, “Anụ ayịdang a la irya ọkpakpakpa chajị nya Ohe Oluhye ka. Chajị ánụ jẹ́ etu nya ang ịlẹ kị da ụ-Ụpwụ Ịgọgọ yẹẹyẹẹ kpong-kpong ka. Lee, ánụ jẹ́ jaabwọ ká ọngịrị ọtụka nya Ohe Oluhye kaa bwu họ ụkụrwọ kpong-kpong ka ịnyịnyị.

³⁰Chajị ụka ká angịnyị ka wuleji bwula igu lụka ohyẹẹkpẹ lẹ, ahụ oyeye lee ọrụ ọrwọrwọ ọhẹ-lọhẹ á ka juwa e-epwoohe kpong-kpong ka. Chajị, ọhịhị nya angịnyị ehe ka lala ịnya alegu-ẹrụ nya Ohe Oluhye ụka ọọwa lẹ.”

³¹IJisọsị myịmyị byaa yẹkẹẹ, “Ẹla chajị nya owuleji bwula igu lẹ, ọ ri ánụ wa ẹla ọlẹ ká Ohe Oluhye ayịdang ya tanụ ụ-Ụpwụ Ịgọgọ ẹnẹnẹhẹ kpong-kpong lẹka? Ohe Oluhye tị́ yẹkẹẹ,

³²‘Am ayịdang a ri Ohe Oluhye nya Ebiraham lẹ. Am a ri Ohe Oluhye nya Ayịsiki lẹ. Am a ri Ohe Oluhye nya iJekọbụ ịnyịnyị lẹ.’ Lẹ ọọwa ri yẹkẹẹ, Ohe Oluhye ayịdang á ri Ohe Oluhye nya egu ịlịpyị ka. Ma, Ohe Oluhye nya angịlẹ kị la ọhịhị ọ-pyịyọọ nya Ohe Oluhye ịnyị.”

³³Ụka ká iru nya angịnyị ịlẹ kị juwa ta iJisọsị wo ang ọmẹjẹ nyamwụ ọọwa lẹ, ọ laa ịwa wuu ahịbwuu ọtụka-ọtụka lẹlẹ.

³⁴Ụka ká ala ịFarịsii wo yẹkẹẹ, iJisọsị nyị tụ ọnụ nya ala ịSadusii ịwẹ ku bwula ịtọ ọwẹwẹ nyamwụ lẹ, ala ịFarịsii ịịwa a kele kaka tụguru, me obyi lẹ, ị kele ka ẹga nya iJisọsị lẹlẹ.

³⁵Ịnyị, ọngọhẹ ẹ-ẹpwarịrị nyaa, kọọwa ayịdang ri oboogo ẹ-ẹpwụ nya ehile ọjẹ́jẹ lụmẹ a juwa tịtọ kọ ka kpa ịtọ ọtọtọ kịla iJisọsị ata lẹ, ọ byi iJisọsị yẹkẹẹ,

³⁶“Ayịbahị ịtịcha, ya jem wẹẹ. Ehile oyina kpangga lẹpwụ nya ehile nya Ohe Oluhye a tị́ ri ehile ọgụgụ wuu?”

³⁷IJisọsị wẹ byoo yẹkẹẹ, “Ọngọlahị Ohe Oluhye nyang ka háng nya ịlẹhị-ịlẹhị bwu ẹpwụ nya ọkịlẹtụ nyang wuu, bwu ẹpwụ nya ugbodu okpukpuru nyang wuu bala o-bwu ẹpwụ nya irya omeme nyang wuu ịnyịnyị.

³⁸Ehile ọwẹ kpangga a ri ehile ọ-kụ ịlahị wuu bala ehile ọlẹ kọ baba kpá gụ ehile nya Ohe Oluhye ịkịla wuu lẹlẹ.

³⁹Ehile oheeye ọọnamwụ ọlẹ kọ ba ọwẹ ba ẹ-ẹpwụ nya ịlahị ojiji a lẹẹ ịnyịnyị lẹ. Ọngịnyị ehe ọọnang ka háng nya ịlẹhị-ịlẹhị lala ịlọng.

⁴⁰Anụ wo mẹ! Ehile nya Ohe Oluhye imiiye ịwẹ kpangga a ri ọtachị ọnyọọngịrị ọlẹ kọ wu ehile nya iMosisi wuu kpa gogo bala ang myị́ ang ịlẹ wuu ká alọmwụ nya Ohe Oluhye inyogo mẹjẹ lẹlẹ.”

⁴¹Ụka ká ala ịFarịsii ịwẹ tụguru ụ-ụwa, iJisọsị taa ịtọ ọhẹ yẹkẹẹ,

⁴²“Anụ ya jem wẹẹ. Ịịyẹ a tị́ ri irya nyanụ u-uhye nya ịKịrayịsị ọlẹ ká Ohe Oluhye du warị? Ọnyị nya owo ịKịrayịsị ọọwa a tị́ ri?” Ị wẹ byi iJisọsị yẹkẹẹ, “Ọnyị nya iDevidi, ịKịrayịsị ọọwa a ri lẹ!”

⁴³IJisọsị myịmyị taa wo yẹkẹẹ, “O hiigu. Ó-ri ká ịKịrayịsị ayịdang á ri ọnyị nya iDevidi ịnyịlẹhị lẹ, ịịyẹ a tị́ tị tị du ká iDevidi ya ẹla bwula ọngịrị nya Olegu nya Ohe Oluhye juwa wụrụ ịKịrayịsị ọọwa ‘Ọngọlahị’ mẹ? IDevidi ọọwa a tị ya lẹẹ yẹkẹẹ,”

⁴⁴“ ‘Ọngọlahị Ohe Oluhye byi Ọngọlam yẹkẹẹ, kẹwẹ kaka hụhụ lẹẹ, u-upwuriri nyam ẹgẹlẹ, gbee pwụ ụka ọlẹ kaam ayịdang ka họ ká ka kụrụ aluji nyang wuu chẹẹchẹẹ, juwa kpa ẹta nyang rịraa e-egbeju mẹ.’

⁴⁵“Ee lẹ, ó-ri iDevidi kọ ri adịda nya ịKịrayịsị ọọwa ịnyịlẹhị lẹ, ịịyẹ a tị́ tị tị du ká iDevidi ọọwa wụrụ ịKịrayịsị ẹgẹwẹ wẹ yẹkẹẹ, ‘Ọngọlam?’ ”

⁴⁶Ụka ọọwa, ọngọngọhẹ lẹpwarịrị nyaa ịwa wuu á wẹ iJisọsị ẹlẹlẹhẹ bwu ọnụ myị́ kpong-kpong ka. O-bwu ẹnụtụrụ ọọwa kịlahị lẹ, ọngọngọhẹ nyaa á tị myịmyị tọ iJisọsị ịtọ ọhẹ-lọhẹ ku ẹkpẹ nya ọọwa kaka ịnyịnyị.