Read idege ỊMATIYU 23 Bible Online

ỊMATIYU 23 - idege bible

ỊMATIYU 23

¹Ụka ọọwa, iJisọsị byi iru nya angịnyị bala angịjụgbẹyị nyamwụ yẹkẹẹ,

²“Anụ wo mẹ! Ịtịcha ị-mẹ ehile nya iMosisi jẹ bala ala ịFarịsii ịwẹ wuu a ri angịlẹ kị ya ọngịrị ha yẹkẹẹ, nyị hụhụ o-okoji ahụrụ nya iMosisi kịị nyị juwa wa ehile nya Ohe Oluhye wuu dodehe, juwa bwuru etu nyaa ya jenu mẹ lẹ.

³Chajị nya ọọwa lẹ, anụ́-ụ juwa ba ang myị́ ang ọlẹ kị juwa mẹjẹẹnụ bwu ẹpwụ nya ehile ọọwa jẹ jịra hiigu-hiigu mẹ! Ma, anụ tị gbịla abwẹla onyobyi ọhọhọ nyaa kpong-kpong koo. Chajị jaabwọ kịịwa ayịdang wẹẹ kpa ọnụ nya ịlaa mẹjẹẹnụ kaka ba lẹ, ịwa ayịdang á myị kaa ba ala ịịwa jẹ ẹ-ẹpwụ nya abwẹla ọhọhọ nyaa kpong-kpong ka.

⁴Chajị ịwa ayịdang juwa ju olo olilo ọtụka nya ehile ọkpakpa chụ angịkịla kpẹng e-egbeju. Ma, ịwa ayịdang á tị nwụlanọ nyọka yụbwọ nya ịlaa rị olo ọlịnyị bịlẹ lee ọ-ka hu ụma nya olo ọlịnyị chụ ịlaa e-egbeju kpong-kpong ka.

⁵Ịwa ayịdang kaa họ ang myị́ ang nyaa wuu chajị ká ẹhị nya angịnyị angịkịla ka yaa kem. Ịnyị a du kịịwa ayịdang kaa hu ịnaaba ọ-pwọọ ọlẹ kị da egbe nya ẹla nya Ohe Oluhye ba, ya ba ịlaa u-uhye nya itochi bala u-ugburubwọ nyaa ịnyịnyịịnyị lẹ. Ịnyị a du kịịwa ayịdang kaa mwụ egbono ịlụgbọọnụ nya ịwụrụ nyaa ludiyo kaka kpoye nya oyi ịnyịnyị lẹ.

⁶Ịwa ayịdang kaa tịtọ nyọka hụhụ i-iwe ahụrụ olihi-ihi wuu ọlẹpwụ nya ọjịra-jịra nya ang oriri ọtụka. Ị kaa tịtọ nya iwe-ahụrụ oluhye ọgụgụ u-ube ọnyị myị ọnyị ọ-mẹ ẹla nya Ohe Oluhye jẹ nya ala iJuu ọlẹ kị jụ ka.

⁷Ị kaa tịtọ ká ọng myị́ ọng ka juwa da ọnụ chaa lala angị ịtụka ojiya nya ihi. Ị kaa tịtọ ká angịnyị ka juwa wụrwaa yẹkẹẹ, ‘Ayịbahị ịtịcha, Ayịbahị ịtịcha’ ịnyịnyịịnyị.”

⁸“Anụ wo mẹ! Anụ wụrụ awụlẹ ịtịcha, ịtịcha ka, chajị anụ wuu ri anyadịda nya awụlẹ. Ịtịcha ookpokpo kem, Ohe Oluhye a tị chụ hanụ ụbwọọmwụ ịnyịnyị lẹ. [Ọngọọwa a ri ịKịrayịsị lẹ.]

⁹Anụ wụrụ ọngọngọhẹ ám odehe ọlẹ Adada, Adada ka ịnyịnyị, chajị adịda ookpokpo ọlẹ kọ juwa e-epwoohe kem, anụ la lẹ.

¹⁰Anụ myị ká ọngọngọhẹ a wụrụụnụ Ayịbaba, Ayịbaba ka, chajị ayịbaba ookpokpo anụ la lẹ. Ọngọọwa a ri ịKịrayịsị lẹ.

¹¹Ọngọlẹ kọọwa ayịdang ka ri ọngọ ọtụka ọ-gụụnụ anụ angịkịla wuu ka juwa myịnụ anụ angịkịla ẹrụ lala ọwa nyaa ri ọnchẹ nyanụ wuu pyii lẹ.

¹²Chajị ọng myị́ ọng ọlẹ kọ kpa ịlọmwụ ka uhye, ị ka kpa ọngọọwa weji. Ma, ọng myị́ ọng ọlẹ kọ tị kpa ịlọmwụ keji, ị ka kpa ọngọọwa ka iwe-ahụrụ oluhye ịnyịnyị.”

¹³IJisọsị byaa yẹkẹẹ, “Anụ ịtịcha ị-mẹ ehile nya iMosisi jẹ bala ala ịFarịsii, anụ alahị imiiye ịwẹ, anụ ri enyi gu obyi lẹ! Chajị anụ ayịdang kpangga a ri angị tụ ụgbẹyị ọ-jụ bwu ka ịpyị Adịrahụ nya epwoohe ku, yẹ angịnyị angịkịla dada lẹ. Anụ ayịdang, á juwa ka jụ kele ka ịpyị Adịrahụ nya epwoohe ọọwa kaka. Ánụ́ tụtụm myịmyị myị ha angịkịla ịlẹ kịịwa ayịdang juwa maga kị ka jụ kele ka ịnyịnyị!” [

¹⁴IJisọsị myịmyị byaa yẹkẹẹ, “Anụ ịtịcha ị-mẹ ehile nya iMosisi jẹ bala ala ịFarịsii, anụ alahị imiiye ịwẹ, anụ ri enyi gu obyi lẹ! Chajị anụ juwa kpa iwe-ahụrụ ọtụka nyanụ juwa họ angịlẹ kị ri ahụ-ogu ri kịrọrọ, juwa nu ịhụ-egu ịịwa ebe nyaa ịlẹ kị nwụ́ la lijẹẹhị ịnyịnyị. Ụka kanụ họ ịnyị kpá wuu lẹ, anụ kaa tịtọ kanụ ka ya abwọ ke angịnyị a-ahị bwula abwọ ịrịrị inyediyo nyanụ ha Ohe Oluhye lẹlẹ. Akama ọyẹyẹ ọtụka-ọtụka ọlẹ kọ juwa godayị gbenu u-uhye nya ang inyibyi ịhọhọ nyanụ ịwẹ ka lụmẹ kaka kpoye gụ ịnya angịkịla wuu lụka ohyẹẹkpẹ lẹ!”]

¹⁵“Anụ ịtịcha ị-mẹ ehile nya iMosisi jẹ bala ala ịFarịsii, anụ alahị imiiye ịwẹ, anụ ri enyi gu obyi lẹ! Chajị anụ ayịdang kaa jẹdịyẹ kpoye nya Ihu ịtụka-ịtụka kele ka ụpwọma ịkịla la datị-datị chajị kanụ ka gbile ugbodu okpukpuru ookpokpo ba ịlọnụ. Ụka kanụ kpa ọngọọwa nya wẹ ụgbẹyị nyanụ kpá, anụ tị mwọọgịlẹ kaa hụ ọngọọwa ahị ju kele ka ụgbẹyị nya obwila gbee ka eje nya obwila ọkaka kaa wu ọngọọwa mwụ aba ba ịnya ịlọnụ anụ lala ugbabwọ imiiye chiriri dachichi.”

¹⁶“Anụ angị kpa angịkịla ụgbẹyị nya ahị ọhụhụ lala alidu ịwẹ, anụ ri enyi gu obyi lẹ! Chajị anụ ayịdang juwa kaa mẹjẹ angịnyị yẹkẹẹ, nyị́ ri ká ọngịnyị nyị́ kpa ẹnyị nya ube ịgọgọ ọtụka nya Ohe Oluhye nya ala iJuu nwa iro aalẹ, ehile nya iro ọnwanwa ọọwa ọbịrị bịrị, nyị́ ri ẹlẹlẹhẹ kpong-kpong ka. Ma, ụka ká ọngịnyị nyị́ tị kpa okpoko ịgọm ọlẹpwụ nya ube ịgọgọ ọtụka nya Ohe Oluhye ọọwa, nwa iro ene lẹ aalẹ, ehile nya iro ọnwanwa ọọwa nyị ka godayị pyịyọọ pyii lẹ.

¹⁷Anụ aluchi ịlẹ kaanụ ayịdang kpụ idu nya olegu, anụ ya jem wẹẹ. Ube ịgọgọ nya Ohe Oluhye ọtụka ọwẹ kọ kaa họ ká okpoko ịgọm ọlụwa ka la ịgọgọ bala okpoko ịgọm ọọwa ayịdang lẹ, oyina a tị́ baba gụ lee o-ri ọgbahị?

¹⁸Anụ myịmyị kaa mẹjẹ angịnyị yẹkẹẹ, ọng myị́ ọng ọlẹ kịị nyị́ kpa ẹnyị nya ogidi ọkịla iya ịgọgọ nya Ohe Oluhye nwa iro kịị nyị́ bịrị iro ọọwa bịrị aalẹ, ọọwa nyị́ ri ẹlẹlẹhẹ kpong-kpong ka. Ma, ọng myị́ ọng kịị nyị́ tị kpa ọhaha ọlẹ kịị nyị kaa kpa kaka nụwa u-uhye nya ogidi olube ịgọgọ ọọwa nwa iro ene lẹ aalẹ, iro ọnwanwa ọọwa nyị ka godayị pyịyọọ pyii lẹ.

¹⁹Anụ aluchi ikpidu nya olegu, anụ ya jem wẹẹ. Ogidi ọkịla iya nya Ohe Oluhye olube ịgọgọ ọwẹ kọ kaa họ ká ọhaha oluhye nyamwụ kaa la ịgọgọ bala ọhaha ọọwa ayịdang lẹ, oyina a tị́ baba gụ lee o-ri ọgbahị?

²⁰Ụka ká ọngịnyị á kpa ẹnyị nya ogidi ọkịla iya nya Ohe Oluhye olube ịgọgọ nya Ohe Oluhye nwa iro ene lẹ aalẹ, ọ nwa iro ọọwa wọnụ nya ang myị́ ang ọlẹ kọ juwa u-uhye nya ogidi ọkịla iya olube ịgọgọ ọọwa ju ịnyịnyị lẹ.

²¹Ụka myị́ ụka, ká ọngịnyị á tị kpa ẹnyị nya ube ịgọgọ ọtụka nya Ohe Oluhye ọọwa nwa iro ene ịnyịnyị lẹ aalẹ, ẹnyị nya Ohe Oluhye ayịdang ọlẹ ká ijata ojiji nyamwụ juwa ẹ-ẹpwụ nya ube ọọwa, a wẹ ká ọngọọwa wẹẹ kpa nwa iro ọọwa ịnyịnyị lẹlẹ.

²²Ụka myị́ ụka ká ọngịnyị á tị kpa ẹnyị nya epwoohe nwa iro ene lẹ aalẹ, ẹchị Adịrahụ nya Ohe Oluhye bala Ohe Oluhye ayịdang Ọngọ hụhụ ụ-ụwa kpangga a wẹ ká ọngọọwa wẹẹ kpa nwa iro ọọwa ịnyịnyị lẹlẹ.”

²³IJisọsị myịmyị byaa yẹkẹẹ, “Anụ ịtịcha ị-mẹ ehile nya iMosisi jẹ bala ala ịFarịsii, anụ alahị imiiye ịwẹ, anụ ri enyi gu obyi lẹ! Chajị anụ ayịdang juwa nwụ ang ookpokpo bwu ẹpwụ nya ang ebwo iwo chiriri ha Ohe Oluhye kpẹẹkpẹẹ, tụ apwụ ị-kpa kpụ́ ọhọ ịlẹ kị wụrụ ‘iminti,’ bala ‘idiili’ bala ‘ikumin.’ Ma, anụ tị juwa yẹhị da ang ịlẹ kị baba ọgụgụ ẹ-ẹpwụ nya ọmẹjẹ nya ehile nya Ohe Oluhye wuu bwee. Ịngịwẹ a lẹẹ lẹ: Eje nya abwẹla ọnyịịla ọlala bala olegu nya ahyẹẹrwẹrwa ọlala ẹ-ẹga nya angịnyị ehe aananụ bala ọmyịmyị ọlala nya ịlẹhị-ịlẹhị ẹ-ẹga nya Ohe Oluhye ọlẹ. Ọ chịla kanụ ka juwa họ ebwo nya ang ịta ịwẹ bala ịkịla ịlẹ wuu kanụ wẹẹ kpa họ ene-ene ịnyịnyị pyii lẹ.

²⁴Anụ alidu angị juwa kpa angịkịla ụgbẹyị nya ahị ọhụhụ ịwẹ! Anụ kaa gba ọjị daarụ hi ere nyanụ ene kanụ ka nwa, chajị ọ lanụ ịhịịhya. Ma, anụ tị juwa wọ iyo ogu nya ụnyịrẹ-ịkamẹlụ ọmama kpụ́ ri. Ịnyị a du kanụ wẹẹ yẹhị da ehile ịbaba bwee, mwọọgịlẹ juwa hu ochiche-ochiche kem họ lẹ.”

²⁵“Anụ ịtịcha ị-mẹ ehile nya iMosisi jẹ bala ala ịFarịsii, anụ alahị imiiye ịwẹ, anụ ri enyi gu obyi lẹ! Chajị anụ kaa hụ́ ẹkpẹ nya ukoku nyanụ bala ẹja o-ju ang ri nyanụ cheri-cheri. Ma, ẹpwụ nyaa tị myị la ang-abwọ ibyi ịlẹ kanụ go la agbụrụ bala ẹhị ọ-chị nyanya nyanụ wẹ kpọrịkọọ!

²⁶Anụ ala ịFarịsii, ịlẹ kanụ kpụ idu nya olegu, anụ jene-jene hụ́ ẹpwụ nya ukoku [bala ẹja nyanụ] nyanụ cheri-cheri mẹ. Aalẹ, ị ka la cheri-cheri bwu ẹpwụ-ẹpwụ ju wẹ odehe ịnyịnyị lẹ.”

²⁷“Anụ ịtịcha ị-mẹ ehile nya iMosisi jẹ bala ala ịFarịsii, anụ alahị imiiye ịwẹ, anụ ri enyi gu obyi lẹ! Anụ lala iworu ịlẹ kị kaa kpụ ang onyoowuru kụrwaa, du ká odehe nyaa kaa há ụhị ẹ-ẹhị hiigu-hiigu. Ma, ẹpwụ nyaa tị myị la ekpinegu nya egu nya angịnyị ehe bala ang ịchịrị ịkịla la datị-datị.

²⁸Ịnyịnyị, anụ wẹẹ kpa ọhịhị nyanụ ọlịlahị nya aluche kẹm-kẹm, chajị ká ọng myị́ ọng ka me yẹkẹẹ, anụ nyị ri alabwẹla ọnyịịla lẹ. Ma, ọkịlẹtụ nyanụ tị myị la ụgbaa nya alahị imiiye bala ọhọbịrị ọhọhọ wẹ kpọrịkọọ.”

²⁹IJisọsị myịmyị byaa yẹkẹẹ, “Anụ ịtịcha ị-mẹ ehile nya iMosisi jẹ bala ala ịFarịsii, anụ alahị imiiye ịwẹ, anụ ri enyi gu obyi lẹ! Anụ juwa kpụ ang kụrụ iworu nya alọmwụ inyogo nya Ohe Oluhye yẹẹyẹẹ, juwa kpa ihi ju iworu nya alabwẹla ọnyịịla nya Ohe Oluhye ịlẹ ká adanụ anyị nwụ ịnyịnyị.

³⁰Ọọwa lẹ, anụ mwọọgịlẹ juwa yẹkẹẹ, ‘Ó-ri kaahị ayịdang á juwa hịhị lụka nya alọmwụ inyogo ịwẹ, ịnọ, áhị́ ka myị-ị nwaa jaabwọ ká adahị anyị họ kpong-kpong ka.’

³¹Ọlẹ kọ mẹjẹ yẹkẹẹ, anụ ayịdang juwa ri ibeenu tụ ịlọnụ pyịpyị yẹkẹẹ, ịwa nyaa ri anyị nya angịlẹ kịị nyị nwụ alọmwụ inyogo nya Ohe Oluhye ịịwa ịnyịlẹhị lẹlẹ.

³²Lẹ, anụ kam, kanụ kaka myị́ ụkụrwọ onyobyi ọlẹ ká adanụ igogo anyị dọmwụ myị́ họ kpẹẹ mẹ!

³³Anụ angị tịpyọ ọ-ọkịlẹtụ lala ịgbịjị inyibyi ị-lala adanụ igogo anyị ịwẹ. Anyanyị, anụ tị́ me irya yẹkẹẹ, ịwa nyị ka jẹ́-ẹ be hi ẹpwụ nya eje owuwu nya obwila myị́ lụka ohyẹẹkpẹ mẹ!

³⁴Chajị nya ọọwa lẹ, m jam byinu yẹkẹẹ, am ayịdang juwa ka du angịhyẹ ẹrụ warị wẹ ẹga nyanụ ị-ịlahị. Angịịwa a lẹẹ lẹ: Alọmwụ i-ya ẹla nya Ohe Oluhye dodehe bala angị la ẹla ọjẹ́jẹ nya Ohe Oluhye bala angị mẹ ẹla nya Ohe Oluhye jẹ angịnyị. Ụka ọọwa, anụ ka nwụ angịhyẹ nyaa. Anụ ka gu angịkịla nyaa iloo ba okoji. Anụ ka wa angịkịla nyaa egbiji e-ebe ị-mẹ ẹla nya Ohe Oluhye jẹ ịlẹga la datị-datị. Anụ ka juwa ku angịkịla nyaa la ụnyẹ tụ epweji-epweji da ịnyịnyịịnyị.

³⁵Ịnyị, akama ọyẹyẹ u-uhye nya ịwọ nya alabwẹla ọnyịịla ịlẹ wuu kanụ nwụ odehe ọlẹ wuu, a ka ji uhye egbeju nyanụ lẹlẹ. Bwu ụka nya igu nya Ebẹlụ ọlẹ kọ họ ịngịhyẹ onyobyi ka, gbee ju ụka ọlẹ kanụ nwụ ịSẹkaraya, ọnyị nya ịBarakaya ọlẹ ká adanụ anyị nwụ ụ-ụwa apewa nya ugulọ nya ube ịgọgọ ọtụka nya Ohe Oluhye nya ala iJuu bala ogidi ọkịla iya nyamwụ.

³⁶Nya ịlẹhị-ịlẹhị, m byinu yẹkẹẹ, akama oyeye u-uhye nya ang inyibyi ọhọhọ ịwẹ wuu ka warị wẹ uhye egbeju nyanụ anụ aloyi nya ichẹnẹ ọlẹ pyii lẹ.”

³⁷Ụka ọọwa, iJisọsị yẹkẹẹ, “Oo! IJerusalẹm, iJerusalẹm. Ahụ ọngọlẹ ká angịnyị nyang kaa nwụ alọmwụ nya Ohe Oluhye ịlẹ kị warị wẹ ẹga nyang bala ọ-kaa da ajwọ nwụ angịlẹ ká Ohe Oluhye du ẹrụ tọng ịnyịnyị. Ahyu! Ang amalẹ kaka, kaam ayịdang jam maga nyọka tụ anyị nyang jwẹjẹ jaabwọ ká ịnịna nya ụnụ kaa tụ anyị nyamwụ ju ka ẹpwụ achwọ nyamwụ. Ma, ánụ tị myị wo lam kaka.

³⁸Anụ yẹ mẹ! M jam ji ẹkpẹ nyam danụ nya ang o-ju ẹjẹẹ yẹkẹẹ, epweji nyanụ ka dụwa e-eji luhwo-luhwo bala ọ-ka ta ayịreji gbanggbang lẹ.

³⁹Chajị, m jam byinu yẹkẹẹ, ánụ ka ya ugbẹhị nyanụ gum gụ ọlẹ kaka, gbee pwụ ụka ọlẹ kaanụ ayịdang ka kpa ọnụ nya ịlọnụ ya dodehe yẹkẹẹ, ‘Ká Ohe Oluhye a wahị kụrụng ahụ, ọngọlẹ ká wẹẹ warị la ẹnyị nya Ọngọlahị Ohe Oluhye.’ ”