Read idege ỊMATIYU 24 Bible Online

ỊMATIYU 24 - idege bible

ỊMATIYU 24

¹Ụka ká iJisọsị kpehe bwu ube ịgọgọ ọtụka nya Ohe Oluhye nya ala iJuu kọ juwa jẹ rụ, angịjụgbẹyị nyamwụ juwa mẹ ube ịgọgọ ọtụka ọọwa bala ebe ịkịla ịlẹ kị dagaga jwoo wuu jẹ iJisọsị lẹ, ị byoo yẹkẹẹ, “Yẹ jaabwọ ká ẹpwang ịwẹ hiigu wẹẹ!”

²IJisọsị wẹ byaa yẹkẹẹ, “Ee, anụ tị́ wẹẹ yẹ ang ịwẹ wuu lẹ. Ma, m tị jam byinu yẹkẹẹ, ụka juwa warị ká ẹjwọ ọhẹ-lọhẹ ọlẹ kị kpa me ebe ịwẹ wuu, á ka hi nụwa u-uhye nya ọkịla kpong-kpong kaka. Chajị, ị ka tụrụ ẹpwang ịwẹ wuu ju eji gbanggbang ị-ịlahị.”

³Ịnyị, ụka ká iJisọsị kele kaka hụhụ u-uhye nya Ọgbọdọ Olivu, angịjụgbẹyị nyamwụ bọọ kele kaka tọọ ịtọ ọhẹ ị-ịbaa-ịbaa yẹkẹẹ, “Ọngọlahị, chuchuu ya jehi wẹẹ. Ụka oyina kpangga, ang ịlẹ wuu a tị́ ka họ jịra? Ịịyẹ a tị́ ka ri ang o-ju ẹjẹẹ ọlẹ kahị ka kpa jẹ́ ụka nya ọwẹwẹ nyang bala ụka ọlẹ kọ myịmyị nya odehe ọlẹ ka pwụ eji?”

⁴IJisọsị wẹ byaa yẹkẹẹ, “Anụ kpahị ju ịlọnụ ọgwọgụ, chajị ká ọngọngọhẹ a hụnụ ahị koo!

⁵Chajị ụka juwa warị ị-ịlahị, ká iru nya angịhyẹ lụmẹ-lụmẹ ka warị la ẹnyị nyam kaka byi angịnyị ehe yẹkẹẹ, ịwa ayịdang kpakpakpa nyaa ri ịKịrayịsị ọọwa lẹlẹ. Ọọwa lẹ, ị ka hụ Iru nya angịnyị lụmẹ-lụmẹ ahị ịnyịlẹhị lẹlẹ.

⁶Anụ ka juwa kpa ụrụ nyanụ wo anụ nya ẹwụ ọdada ọlẹ kọ junu chwẹẹ. Anụ tị ka wo oja nya ẹwụ ọdada ọlẹga ọlụrụ la datị-datị ịnyịnyị. Ma, anụ wo mẹ! Anụ tị juwa gu ugbodu ene lụka ọlịnyị kpong-kpong ka. Ọ ri nya ịlẹhị, ang ịlịịwẹ wuu ka ji pyii lẹ. Ma, ụka nya ọ myịmyị nya odehe ọlẹ ayịdang kpangga á tị ka pwụ eji lụka ọọwa lẹka.

⁷Chajị alepwoja ọhẹ ka wuleji juwa dẹwụ tụ alepwoja ọkịla pyịpyị. Alịpyị adịrahụ ọhẹ ka wuleji kaka tụ alịpyị adịrahụ ọkịla pyịpyị ịnyịnyị. Imyi nya uhi ọtụka-ọtụka ka nwụ ju ka ẹga la datị-datị. [Ẹdụrụ nya ịdọlọ-dọlọ ka jụ angịnyị ehe ju ka ẹga la datị-datị.] Ọpyị ọ-hụ́ jigi-jigi ka ji ẹ-ẹga la datị-datị ịnyịnyị.

⁸Ma, ịngịịwẹ wuu a tị ka ri ọmwụ ọdada nya ang ọjụjụ wẹẹ lẹ. Chajị, ị ka lala ụka ọlẹ ká ang nya ọnyị ọmama kaa yi ọnyang ọlẹnyị iwe lụka ọlẹ kọ juwa ka ma ọnyị.”

⁹“Ụka ọọwa, ị ka wunu kpa kele kịlahị nya alegbeju nya ọpyị. Ụ-ụwa, ị ka yẹnụ akama bala ọ-nwụ angịhyẹ nyanụ ịnyịnyị. Anụ ka wụ alepwoja myị́ epwoja wuu ẹjẹ, chajị nyọlẹ kanụ myị la ẹnyị nyam.

¹⁰Ụka ọọwa, abwọ ka chị iru nya angịnyị lụmẹ-lụmẹ pyẹpyẹ ẹ-ẹpwụ nya ẹla nya Ohe Oluhye ọhọhọ. Angịhyẹ lẹpwarịrị nya angị myị lam ka juwa pịrị awụlẹ ha. Ị ka juwa wụ awụlẹ ẹjẹ lụmẹ-lụmẹ ịnyịnyị.

¹¹Iru nya alọmwụ ịnịịkịla lụmẹ-lụmẹ ka ji. Ị ka juwa hụ angịnyị lụmẹ-lụmẹ ahị ụka ọọwa ịnyịnyị.

¹²Ụka ọọwa, ọhọbịrị ọhọhọ ka bene kpanggbaa lụmẹ gbee, ká ọháha ọlala ọlẹpwụ nya angịnyị ẹ-ẹga nya awụlẹ ka mwọọgịlẹ nyiri dẹyị-dẹyị lala oriri.

¹³Ma, ọng myị́ ọng ọlẹ kọ ka kpa ugbodu ojuju nyamwụ pwụ ọbaba lẹ aalẹ, ọngọọwa a ka wu ọchịda nya Ohe Oluhye ọyị lụka ohyẹẹkpẹ lẹlẹ.

¹⁴Ị ka kpa ẹrụ ọnyịịla chajị nya ịpyị-adịrahụ nya Ohe Oluhye ọlẹ kaka ya pyẹ ẹ-ẹga myị́ ẹga nya odehe ọlẹ wuu. Chajị kọ ka ri ang nya ibeenu ha alepwoja myị́ epwoja wuu ene ká ọmyịmyị nya odehe ọlẹ ka pwụ eji.”

¹⁵IJisọsị myịmyị byaa yẹkẹẹ, “Ụka ọọwa, anụ chẹhị kaka yẹ ukpeku ọ-chị ịgọgọ ọlala ịrị ị-ịlahị nya Ohe Oluhye ọlẹ ká iDanẹlụ ya ẹla rụ́, kọ ka họ jịra ẹnụ ọọwa ịnyịlẹhị, ọlẹ kọ ka kpa epepe onyinyi gbanggbang warị wẹ iJerusalẹm. Ọngọlẹ kọ wa ẹla ọlẹ lẹ aalẹ, ọngọọwa a wo etu nyamwụ myịmyị mẹ!

¹⁶Ụka ọọwa, angịlẹ wuu kị juwa i-iJudiya a rụnyẹ rụ kaka kpịbaa ẹ-ẹpwụ nya ịgbọdọ mẹ.

¹⁷Ụka ọọwa, ọng myị́ ọng ọlẹ kọ juwa u-uhye nya achịnawụ nya ube nyamwụ, a tụtụm myịmyị hireji bwu ụwa, juwa maga nyọka jụ kele ka ẹpwang nyamwụ kaka hu ịngịngịhyẹ bwu ụwa ene kaka.

¹⁸Lee, ọngọlẹ kọ juwa ẹ-ẹrụ nyamwụ aalẹ, ọ tụtụm myịmyị tịrẹkpẹ ka ẹpwa, kaka hu awụrụ ọlam-ọlam nyamwụ ọhẹ-lọhẹ ene kaka ịnyịnyị.

¹⁹Ụka ọọwa, akama ọtụka-ọtụka ka juwa ha anyang ịlẹnyị wuu bala anyang ị-kpa ẹmẹ ha anyị nyẹ, chajị ịwa ayịdang á ka rụnyẹ hyaahyaa myị́ ka.

²⁰Anụ́-ụ raabwọ bịlẹ Ohe Oluhye chajị kọ họ ká ụka ọọwa a ri ụka nya alogo ọtụka-ọtụka ọlẹ kị wụrụ ‘iwinta’ ka. Lee, ẹnụtụrụ ọọwa ọ-ka ri Ẹnụtụrụ Ọhịnyọ Lụkụrwọ nya ala iJuu ka ịnyịnyị mẹ.

²¹Chajị akama ọlẹnụtụrụ ọọwa ka ri akama ọtụka okpelego lụmẹ kaka kpoye, ọlẹ ká akama ọtụka ọlịnyị á ji ẹnẹnẹhẹ lẹka bwu ọmwụ ọdada nya odehe ọlẹ wuu. Akama ọtụka ọlịnyị ọkịla á tị ka ji gu ọwẹ kaka ịnyịnyị.

²²Ó-ri ajị nyọlẹ ká Ohe Oluhye ayịdang wẹẹ ka chị ụtụrụ ọọwa eku kpikpiri ka ịnọ, ọngịnyị ehe ọhẹ-lọhẹ á ka hi chịda ụka ọọwa kpong-kpong myị́ kaka. Ma, ọ-chajị nya angịnyị nya Ohe Oluhye ịlam-ịlam ịlẹ kọọwa ayịdang chụchụ ene-ene ha ịlọmwụ, a du ká Ohe Oluhye wẹẹ ka chị ụka ọọwa eku hi kpikpiri lẹlẹ.”

²³“Ụka ọọwa, ọng myị́ ọng ọlẹ kọ ka warị kaka byinu yẹkẹẹ, ịKịrayịsị nyị lalẹẹ ẹ-ẹga ọlaanyị lee ịKịrayịsị, nyị lẹẹ ẹ-ẹgẹlẹ aalẹ, anụ myị ju ọngọọwa kpong-kpong ka.

²⁴Chajị ụka ọọwa, iru nya ala ịKịrayịsị abala bala alọmwụ ịnịịkịla lụmẹ-lụmẹ ka ji. Angịịwa ka juwa họ iru nya ang i-ju ẹjẹẹ bala ụkụrwọ ẹbyẹbyị lụmẹ la datị-datị chajị nyọka hụ angịnyị ehe ahị. Ị dọmwụ ka maga nyọka hụ angịnyị nya Ohe Oluhye ịlam-ịlam ịlẹ kọ chụchụ ha ịlọmwụ ahị kpịlọ ịnyịnyị, ó-ri kọ ka chịkpẹẹ ịnọ.

²⁵Anụ yẹ mẹ! M wẹẹ ya jenu nọ u-uhye gbe ụka ọlẹ ká ịngịịwẹ wuu ka họ jịra lẹ.”

²⁶“Chajị nya ọọwa lẹ, ó-ri ká angịịwa á warị kaka byinu yẹkẹẹ, ‘Anụ wo mẹ! ỊKịrayịsị ọọwa lalẹẹ u-ugbileji ẹga ọlaanyị,’ aalẹ, anụ baa kele koo! Lee, ó-ri kị ka byinu yẹkẹẹ, ‘ỊKịrayịsị ọọwa lẹẹ ẹ-ẹpwụ nya ube ẹ-ẹgẹlẹ,’ aalẹ, anụ myị jwaa kpong-kpong ka ịnyịnyị.

²⁷Chajị jaabwọ ká apya á chị ọ-ọmwẹnụ-ụtụrụ kị kaa jẹ́-ẹ yọọ pwụ ẹga myị́ ẹga wuu ju ka ọmwẹnụ-obyi wẹẹ, ịnyịnyị-ịnyịnyị, ọwẹwẹ nyam am Ọnyị nya ọngịnyị ehe ọlẹ ayịdang a ka la gede-gede lẹnụtụrụ ọọwa lẹlẹ.

²⁸Chajị jaabwọ ká ọngọngọhẹ á kaa ya je epwu ịchịnụ ẹ-ẹga ká ogu nya iyo gbu nọ ene kị kaa kele kaka dagaga jwoo ka wẹẹ, ịnyịnyị, ọ ka la ha angịnyị ehe ẹnụ ọọwa lẹlẹ.”

²⁹IJisọsị myịmyị byaa yẹkẹẹ, “Ahyaahị ká ụka nya akama ọtụka ọwẹ á chịpwụrụ kpá bwaaa, ẹnụ oluhye-ọgba ọwẹ ka chị owu kpịlẹẹ. Ọya oluhye-ọgba ọwẹ á ka hụ́ lẹnụtụrụ ọọwa kaka ịnyịnyị. Ịdịchụ iluhye-ọgba wuu ka chabwọ bwu uhye kaka mileji. Ụka ọọwa, ịngịrị myị́ ịngịrị iluhye-ọgba nya epwoohe wuu ka hụ́ jigi-jigi nya ịlẹhị-ịlẹhị ịnyịnyị.

³⁰Ụka ọọwa, ang o-ju ẹjẹẹ nya ọwẹwẹ nyam am Ọnyị nya ọngịnyị ehe ọlẹ a ka hi ehe u-uhye nya egbamwụ lẹlẹ. Ụka ọọwa, alụma myị́ ụma nya odehe ọlẹ wuu ka juwa bida. Ịwa ayịdang wuu ka juwa kpẹhị nya ịlaa yẹ Ọnyị nya ọngịnyị ehe ọlẹ ayịdang, lụka ọlẹ kọ ka hi ehe u-uhye nya egbamwụ la ọngịrị bala ẹbyẹbyị ọtụka-ọtụka nyamwụ.

³¹Ụka ọọwa, ọwa ayịdang ka du alegu-ẹrụ nyamwụ ẹrụ la opyike ọtụka-ọtụka kele ka ịkịka ine nya odehe ọlẹ wuu. Ị ka kele kaka be ẹkọ wụrụ angịnyị nya Ohe Oluhye ịlam-ịlam ịlẹ wuu ká Ohe Oluhye ayịdang chụchụ ha ịlọmwụ kaka jịra bwu ẹga myị́ ẹga nya odehe ọlẹ wuu.”

³²IJisọsị myịmyị byaa yẹkẹẹ, “Anụ jẹ́ ang bwu ẹga nya ọhịhị nya okoji ifigi mẹ. Ụka myị́ ụka kanụ yẹ ká abwọ nya okoji ifigi á juwa ju apwụ inyeewe jweejwee lẹ aalẹ, anụ jẹ́ mẹ: Ụka nya inehe juwa ju chwẹẹ lẹ!

³³Ịnyịnyị-ịnyịnyị, ọ ka la ẹ-ẹga nya ang i-ju ẹjẹẹ ịwẹ kam ya jenu wẹ wuu lẹlẹ. Ụka myị́ ụka kanụ juwa yaa lẹ, aalẹ anụ jẹ́ mẹ, am Ọnyị nya ọngịnyị ehe ọlẹ ayịdang godayị rịrị ọ-ọnụ ogirigba, juwa ka jụ warị wẹ odehe lẹ!

³⁴Nya ịlẹhị-ịlẹhị, m byinu yẹkẹẹ, aloyi ọlụka ọlẹ á ka chịpwụrụ kpá, ene ká ang ịwẹ wuu ka họ jịra kaka.

³⁵Uhye-ọgba nya epwoohe bala odehe ọlẹ ka chịpwụrụ myị́, ma, ẹla ọlọnụ nyam am ayịdang á tị ka chịpwụrụ kpá ẹnẹnẹhẹ kaka.”

³⁶IJisọsị myịmyị byaa yẹkẹẹ, “Ma, ọngọngọhẹ á juwa ọlẹ kọ jẹ́ ẹnụtụrụ lee awa ọọwa kpangga, ọlẹ ká Ọnyị nya ọngịnyị ehe ka warị ka. Alegu ẹrụ nya Ohe Oluhye ilepwoohe á dọmwụ jẹ́ ka, tụ Ọnyẹwẹ nya Ohe Oluhye ayịdang ịnyịnyị. Kẹnẹ-kẹnẹ, Ohe Oluhye Adịda ụbwọọmwụ kem a jẹ́ lẹlẹ.

³⁷Ọwẹwẹ nya Ọnyị nya ọngịnyị ehe ọlẹ ayịdang ọlụka ọọwa ka lala ang ọlẹ kọ họ lụka nya odehe nya iNuwa onyogo.

³⁸Chajị ene ká ukpenyi ọtụka ọọwa ka do ta odehe ọlụka nyaa ayịreji lẹ, angịnyị juwa ri ang oriri bala o-juwa nwa ang ọnwanwa jaabwọ kọ háa. I juwa ye ịhụ. I juwa go anyị anyang nyaa da ọrụ ịnyịnyịịnyị, gbee pwụ ụka ọlẹ ká iNuwa jụ ka ẹpwụ nya ụgbọ nya enyi nyamwụ.

³⁹Ụka ọọwa lẹ, ịwa ayịdang á dọmwụ jẹ́ ang ọlẹ kọ juwa ka họ ka, gbee pwụ ụka ọlẹ ká ukpenyi ọtụka ọọwa do mịlaa. Ịnyịnyị, ọ ka la ẹ-ẹga nya alodehe ọlẹ lụka ọlẹ kaam Ọnyị nya ọngịnyị ehe ọlẹ ayịdang ka mwẹẹkpẹ warị wẹ odehe ọlẹ lẹlẹ.

⁴⁰Ụka ọọwa, alẹng angị imiiye ka juwa ẹ-ẹrụ juwa họ ang. Ị ka hu ọngọhẹ nyaa kpa rụ hi ọngọkịla ụ-ụwa.

⁴¹Anyang angị imiiye ka kụ ụwa i-igo, juwa go ang la awụlẹ. Ị ka hu ọngọhẹ nyaa kpa rụ hi ọngọkịla ụ-ụwa ịnyịnyị.

⁴²Chajị nya ọọwa lẹ, anụ juwa gbeji giri-giri mẹ! Chajị, anụ ayịdang á jẹ́ ẹnụtụrụ ọọwa ọlẹ ká Ọngọlanụ ka warị kpangga ka.

⁴³Ọwẹwẹ nyam ọọwa ka bwunu agaga jaabwọ ká oloyi kaa bwu ayịdẹpwa agaga. Anụ ayịdang tị jẹ́ yẹkẹẹ, ó-ri ká ayịdẹpwa á jẹ́ ụka ọlẹ ká oloyi ka kpa warị lẹ, ịnọ, ọ ka juwa kụ ụwa lahị giri-giri lẹ. Ịnọ, ọwa ayịdang á ka myị ha oloyi ọọwa kpụ ọ-ka jụ kele ka ube nyamwụ kaka go ịngịngịhyẹ yoyi kpa rụ myị́ kpong-kpong kaka.

⁴⁴Chajị nya ọọwa lẹ, ọ chịla kaanụ ayịdang ka juwa nwụla ịlọnụ nọ giri-giri, chajị ụka ọlẹ kanụ me irya kpong-kpong ka, Ọnyị nya ọngịnyị ehe a ka tịrẹkpẹ warị lẹlẹ.”

⁴⁵IJisọsị myịmyị byaa yẹkẹẹ, “Oowo lẹpwarịrị nyanụ á tị́ ka ri ọnchẹ ọ-chịla o-hu ọkịlẹtụ ha bala ọngọ jẹ́ ẹla lẹẹ mẹ? Ọnchẹ ọlịnyị, ayịbamwụ a ka hu olegbeju nya anchẹ ịkịla wuu lẹ. Chajị ká ọnchẹ ọọwa ka ri ọngọ hu ang oriri ha anchẹ ịkịla ịịwa ri lụka ọchịla-chịla lẹlẹ.

⁴⁶Ahị ọwawa ọtụka ka juwa ha ọnchẹ ọọwa lụmẹ, ó-ri ká ayịbamwụ á ka nya tịrẹkpẹ kele kaka yọọ ẹ-ẹpwụ nya ụkụrwọ ọnyịịla ọlọdọdẹpwa ọọwa ọhọhọ.

⁴⁷Nya ịlẹhị-ịlẹhị, m byinu yẹkẹẹ, ọnchẹ ọọwa kpangga ayịbamwụ a ka hu kọ ka ri olegbeju nya ang myị́ ang nya ayịbamwụ ọọwa wuu lẹlẹ.

⁴⁸Ma, ọ́ tị ri ká ọnchẹ nyamwụ ọọwa á ri ọnchẹ ọtịpyọ, ọ ka byi ịlọmwụ yẹkẹẹ, ayịbam ọhẹ á juwa ka mwẹẹkpẹ warị ahyaahị lẹka. Ọ ka bịrị ụka lụmẹ wẹẹ.

⁴⁹Ọọwa lẹ, ọnchẹ ọọwa a ka juwa mịla anchẹ ịkịla nyi nya ịlẹhị-ịlẹhị jaabwọ kọ họ́ọ lẹlẹ. Ọ ka juwa ri ang oriri bala o-juwa nwa ere nya ịlẹhị-ịlẹhị ta angịlẹ kị kaa nwa ere, juwa kaa ya ere ịnyịnyị lẹlẹ.

⁵⁰Ma, lụka ọ-mwaa, la ẹnụtụrụ ọlẹ ká ọnchẹ ọwẹ á ka kpahị ju ka bala ụka nya awa ọlẹ kọ ka jẹ́ kpong-kpong ka, ayịbaba nya ọnchẹ ọọwa a ka nya lẹlẹ.

⁵¹Ọọwa lẹ, ayịbaba nya ọnchẹ ọwẹ a ka yẹ ọnchẹ ọwẹ akama, chọọ ebwo ju ka ẹpwụ nya angịlẹ kị ri alahị imiiye lẹlẹ. Ụ-ụwa, ọ ka hụ juwa chị eko onyobyi bala o-juwa wangịrị pyịyọọ lẹlẹ.”