Read idege ỊMATIYU 25 Bible Online

ỊMATIYU 25 - idege bible

ỊMATIYU 25

¹IJisọsị myịmyị byaa yẹkẹẹ, “La ẹnụtụrụ ohyẹẹkpẹ ọọwa, ang chajị nya ịpyị Adịrahụ nya epwoohe ka lala etu nya oja ọlẹ. Ẹnụtụrụ ookpokpo ọhẹ juwa ká anjwo ịyẹẹnọ angị iwo chiriri ịhyẹ go itinika nyaa lẹ, ị rụ kele kaka kụ ọlọyị gbe ọrụ-ahụ onyeewe ọhẹ lẹlẹ.

²Angị ịrụ lẹpwarịrị nyaa ri aluchi: Angị ịrụ ihihi ri angị jẹ́ ẹla.

³Angịlẹ kị ri aluchi go itinika nyaa lẹ, ị́ myị kpa ida nya otinika ọhẹ-lọhẹ gbe ịlaa ẹkpẹ ka.

⁴Ma, angịlẹ kị ri angị jẹ́ ẹla lẹ, ị chị́ ida nya otinika myị ekpem nyaa kpa gbe ịlaa ẹkpẹ kele ịnyịnyị.

⁵Ụka ká ọrụ-ahụ onyeewe ọọwa tata lụmẹ kọ warị hyaa kaka lẹ, anjwo ịyẹẹnọ ịwẹ a juwa rụ́ une gbee kị nune taa lẹlẹ.”

⁶“Ịnyị, lụka nya epwodu jijiji, ká ọrụ-ahụ onyeewe ọọwa juwa pwụ eji lẹ, angịhyẹ a juwa da iwuru jujuju yẹkẹẹ, ‘Ọrụ-ahụ onyeewe pwụ eji lẹ, anụ wuleji kanụ kaka tọọ ụ-ụgbẹyị mẹ oo!’

⁷Ọọwa lẹ, anjwo ịyẹẹnọ angị iwo chiriri ịwẹ a chị ahi-une lẹ, ị chị ila ju itinika nyaa lẹlẹ.

⁸Ịyẹẹnọ aluchi angị ịrụ ịwẹ byi angị jẹ́ ẹla yẹkẹẹ, ‘Anụ chuchuu kanụ gu ida nya otinika nyanụ hahị chẹẹ mẹ! Chajị ila nya itinika nyahị jam họ myịnẹ-myịnẹ lẹ!’

⁹Ma, ịyẹẹnọ angị jẹ́ ẹla angị ịrụ ịwẹ wẹ byi aluchi yẹkẹẹ, ‘Eheehe! Ọ́ ka chịkpẹẹ ịnyị ka, ẹnwa anyị. Chajị ida nyahị á jam ka nwahị ahị bala anụ wuu la awụlẹ myị́ ka. Ọkọkọ nya ọọwa lẹ, anụ tụtụ kele kaka ra ida nya otinika ha ịlọnụ bwu ube nya ihi mẹ.’

¹⁰Ụka ká anjwo ịyẹẹnọ aluchi angị ịrụ ịwẹ rụ kele kaka ra ida nya otinika nyaa lẹ, ọrụ-ahụ onyeewe ọọwa a pwụ eji ịnyịlẹhị lẹlẹ. Ịnyị lẹ, anjwo ịyẹẹnọ ị-jẹ́ ẹla angị ịrụ ịlẹ kịịwa ayịdang nwụlanọ gbe ọrụ-ahụ onyeewe, a bọọ rụ kele ka ẹpwụ nya ọjịra-jịra nya ang oriri nya ahụ oyeye ọọwa lẹ, ayịdẹpwa a tụ ụgbẹyị ku yaa dada lẹlẹ.”

¹¹“Ụka kọ nụwa chẹẹ lẹ, anjwo ịyẹẹnọ aluchi angị ịrụ ịwẹ a pwụ eji lẹlẹ. I juwa yụbwọ kpụ ụgbẹyị nya ube kwọkwọkwọ, juwa yẹkẹẹ, ‘Ọngọlahị! Ọngọlahị! Chuchuu wụrụ ụgbẹyị hahị kahị jụ wẹ ẹpwang chẹẹ mẹ!’

¹²Ma, ọwẹwẹ nya ọrụ-ahụ onyeewe ọọwa ri yẹkẹẹ, ‘Nya ịlẹhị-ịlẹhị, m byinu yẹkẹẹ, am jẹẹnụ kpong-kpong ka.’ ”

¹³Ịnyị, iJisọsị a tụ ẹla ọọwa ku yẹkẹẹ, “Chajị nya ọọwa lẹ, anụ juwa gbeji giri-giri mẹ. Chajị ánụ jẹ́ ẹnụtụrụ lee awa ọlẹ kaam Ọnyị nya ọngịnyị ehe ọlẹ ka mwẹẹkpẹ warị kpangga datị ka.”

¹⁴IJisọsị myịmyị byaa yẹkẹẹ, “Ọwarị wẹ nyam am Ọnyị nya ọngịnyị ehe ọlẹnụtụrụ ohyẹẹkpẹ ọọwa ka lala oja ọlẹ: Ọlẹng ọhẹ juwa, ọlẹ kọ juwa tịtọ kọ ka kanyị ka ẹga ọlụrụ. Ọọwa lẹ, ọ wụrụ anchẹ ịlẹpwa nyamwụ lẹ, ọ hu ang-abwọ ịlẹpwa nyamwụ jwaa ụ-ụbwọ lẹlẹ.

¹⁵Ọ hu ang lala ụnọ nya okpoko ịrụ ha ọnchẹ ọhẹ. Ọ hu ụnọ imiiye ha ọnchẹ ọkịla. Ọọwa lẹ, ọ hu ụnọ ookpokpo ha ọnchẹ ọhata lẹlẹ. Ụka kọ chị okpoko nyamwụ ọwẹ ebwo ha ọnchẹ ọnyọnyọọnyị jaabwọ ká ọngịrị nyamwụ la kaka ba ịịwẹ wuu lẹ, ọ yegiri rụ kele kanyị nyamwụ ọọwa lẹlẹ.

¹⁶Ịnyị lẹ, ọnchẹ ọlẹ kọ ye ụnọ nya okpoko ịrụ, a kpa ịnyamwụ da ọhị gbee kọ ye apyobwuna lala ụnọ nya okpoko ịrụ ọkịla myịmyị lẹlẹ.

¹⁷Ọngọlẹ kọ ye ụnọ imiiye kpa ịnyamwụ da ọhị ịnyịnyị-ịnyịnyị gbee kọ ye apyobwuna lala ụnọ imiiye ọọnamwụ ịnyịnyị.

¹⁸Ma, ọnchẹ ọhata ọlẹ kọ ye ụnọ ookpokpo lẹ, ọ rụ kele kaka chị ụjẹ lẹ, ọ hu okpoko nya ayịbamwụ ọọwa kpịbaa ụ-ụwa kpịrẹ-kpịrẹ lẹlẹ.”

¹⁹“Ụka kọ nụwa lụka ọtata lẹ, ayịbaba nya anchẹ ịwẹ a nya bwu anyị ọlụrụ ọọwa lẹ, ọ wụrwaa ịwa wuu kele kaka ku ang achụ họọ lẹlẹ.

²⁰Ịnyị lẹ, ọnchẹ ọlẹ kọ ye ụnọ nya okpoko ịrụ a gba ụnọ nya okpoko ịrụ ọkịla ha ayịbamwụ lẹ, ọ byoo yẹkẹẹ, ‘Ayịbahị, ịnọ, ụnọ nya okpoko ịrụ kem, a tị́ ya ham lẹẹ ugbeene lẹ! Ma tị yẹ mẹ, m kpa da ọhị gbee lẹ, m ye apyobwuna lala ụnọ ịrụ ọkịla lẹẹ lẹ!’

²¹Ụka ọọwa, ayịbamwụ wẹ byoo yẹkẹẹ, ‘A họ hiigu lụmẹ ẹnwa. A ri ọnchẹ ọnyịịla bala ọngọ chịla o-hu ọkịlẹtụ ha lụmẹ. Jaabwọ kaahụ ayịdang chịla o-hu ọkịlẹtụ ha ẹ-ẹpwụ nya ọkpẹhị rịrị ang ochiche wẹ ịịwẹ lẹlẹ, m tịtị ka hung olegbeju ọkpẹhị rịrị iru nya ang-abwọ ịtụka-ịtụka nyam ham lẹ. Kẹwẹ ká jụ wẹ ẹpwụ nya ọkẹkẹnị ọchịchị okpori-kpori nyam am ayịbang tam mẹ.’

²²Ọnchẹ ọlẹ kọ ye ụnọ nya okpoko imiiye kele ka ẹga nya ayịbamwụ kaka byoo yẹkẹẹ, ‘Ayịbahị, ịnọ ụnọ nya okpoko imiiye kem, a tị́ ya ham lẹẹ ugbeene lẹ! Ma tị yẹ mẹ, m kpa okpoko ọọwa da ọhị gbee lẹ, m ye apyobwuna lala ụnọ imiiye ọkịla lẹẹ lẹ!’

²³Ụka ọọwa, ayịbamwụ wẹ byoo yẹkẹẹ, ‘A họ hiigu lụmẹ, ẹnwa. A ri ọnchẹ ọnyịịla bala ọngọ chịla o-hu ọkịlẹtụ ha lụmẹ. Jaabwọ kaahụ ayịdang chịla o-hu ọkịlẹtụ ha ẹ-ẹpwụ nya ang ochiche ọkpẹhị rịrị wẹ ịịwẹ lẹlẹ, m tịtị ka hung olegbeju ọkpẹhị rịrị iru nya ang-abwọ ịtụka-ịtụka nyam ham lẹ. Kẹwẹ, ká jụ wẹ ẹpwụ nya ọkẹkẹnị ọchịchị okpori-kpori nyam am ayịbang tam mẹ.’

²⁴Ọọwa lẹ, ọnchẹ ọlẹ kọ ye ụnọ nya okpoko ookpokpo a kele ka ẹga nya ayịbamwụ kaka byoo yẹkẹẹ, ‘Ayịbahị, am jẹng, kaahụ ayịdang ri ọngọ lujwo lụmẹ kaka kpoye. Ahụ ayịdang ri ọngọ kaa du ang nya ẹrụ bwu ẹga ọlẹ kaahụ ayịdang á wu ẹrụ ene kpong-kpong ka bala o-ri ọngọ kaa hya egbe bwu ẹga ọlẹ ká ya tọ ene kpong-kpong ka ịnyịnyị.

²⁵Chajị nya ọọwa lẹ, m juhi nyang. Ọọwa lẹ, m hu okpoko nyang kpa kaka chị ụjẹ ju eji lẹlẹ. Lẹ ang nyang lẹẹ lẹ, Adam, ye mẹ!’

²⁶Ụka ọọwa, ayịbamwụ wẹ byoo yẹkẹẹ, ‘Ahụ ọnchẹ onyobyi ọtụbwọ lụmẹ ọwẹ lee! Ịnọ, ọ ri ahụ ayịdang jẹ́ yẹkẹẹ, am nyị ri ọngọ kaa du ang nya ẹrụ bwu ẹga ọlẹ kaam nyị́ wu ẹrụ ene kpong-kpong ka? Am tị kaa hya egbe bwu ẹga ọlẹ kam ya tọ ene kpong-kpong ka ịnyịnyị?

²⁷Ee lẹ, ịịyẹ a tị́ du ká tị kpa okpoko nyam ọwẹ kọ ri ịnyam lụbwọ-lẹta kpangga kele kaka ju ọhị chajị kam ka ye okpoko ọọwa bala apyobwuna nyamwụ kaka, tị wẹ mẹ?’

²⁸Ayịbaba ọwẹ byi anchẹ ịkịla yẹkẹẹ, ‘Anụ kele kaka ye okpoko nyamwụ ọwẹ, kanụ kpa kịla ọngọlẹ kọ da ọhị gbee ká okpoko nyamwụ ri ụnọ iwo chiriri mẹ.

²⁹Chajị ọng myị́ ọng ọlẹ kọ kpa ang ọlẹ kọ la, maga gbee kọ chị ọnyị da ịlọmwụ lẹ aalẹ, ọngọọwa, ị ka myịmyị-ị̀ ya iru nya ang ịkịla ha kaka ba ọlẹ kọ la juwa ene u-uhye gbee kọ ka la chọba-lọba lẹlẹ. Ma, ọng myị́ ọng ọlẹ kọ tị kpa ang ọlẹ kọ la maga kpụ, ọ-chị ọnyị ọhẹ-lọhẹ da ịlọmwụ ka aalẹ, ang ochiche ọlẹ kọ la juwa ene lẹ, ị ka nọọ ang ọọwa hi abwabwọ pyii.

³⁰Lẹ, anụ kam kaka wu ọnchẹ o-ju apyobwuna-ka ọwẹ, da ẹjwọ kpehe kele ka ẹpwụ nya ukpowu olodehe ọlaanyị mẹ. Ụ-ụwa, ọ ka juwa chị eko onyobyi bala o-juwa wangịrị pyịyọọ lẹlẹ.’ ”

³¹IJisọsị myịmyị byaa yẹkẹẹ, “Ụka juwa warị ká Ọnyị nya ọngịnyị ehe ọlẹ ayịdang ka warị la ogbo nyamwụ bala alegu-ẹrụ nyamwụ wuu, kọ ka kaka hụhụ u-uhye nya ẹchị adịrahụ olihi-ihi nyamwụ lala adịrahụ.

³²Ụka ọọwa, alepwoja myị́ epwoja nya odehe ọlẹ wuu ka kele kaka jịra ị-ịlahị nyamwụ. Ọọwa lẹ, ọwa ayịdang a ka chaa ebwo imiiye lala ọngọgbikpịlọ a chị ịkpịlọ nyamwụ ebwo hi ịmwụ embiri nyamwụ lẹlẹ.

³³Ụka ọọwa, ọ ka chị ịkpịlọ ịịwa ebwo koye upwuriri nyamwụ. Ọ ka chị embiri ịịwa ebwo koye ụpụpịla nyamwụ ịnyịnyị.

³⁴Ụka ọọwa, adịrahụ ka byi angịlẹ kị ji upwuriri nyamwụ yẹkẹẹ, ‘Anụ kẹwẹ, anụ angịlẹ kanụ ri angịnyị nya ahị ọwawa nya Adam, kanụ ri ugu nya ịpyị Adịrahụ nya epwoohe ọlẹ kị nwụlanọ gbenu bwu ọmwụ ọdada nya odehe ọlẹ mẹ.

³⁵Chajị ụka kam juwa la imyi lẹ, anụ ya ang oriri ham ri. Ụka kam juwa la imyi-enyi lẹ, anụ chị́ enyi ọnwanwa ham nwa. Ụka kam ri ọngga lẹ, anụ kpam wẹ ẹpwa.

³⁶Ụka kam juwa lọhị-lọhị lẹ, anụ ya ang ọkụrụ-kụrụ ham. Ụka kam juwa la ẹdụrụ ọjụjụ lẹ, anụ warị kaka kpẹhị rịrịm. Ụka kam juwa u-ube nya agba lẹ, anụ warị kaka wụlam yẹ ụ-ụwa.’

³⁷Ụka ọọwa, angị ri alabwẹla ọnyịịla ịịwa ka wẹ byoo yẹkẹẹ, ‘Ọngọlahị, ụka oyina ahị tị́ yẹ ká juwa la imyi, kahị ya ang oriri hang ri lee o-juwa la imyi-enyi kahị chị́ enyi ọnwanwa hang nwa?

³⁸Lee, ụka oyina, ahị tị́ yẹng ká ri ọngga, kahị kpang warị wẹ ẹpwa lee o-juwa lọhị lọhị kahị ya ang ọkụrụ-kụrụ hang?

³⁹Lee, ụka oyina ahị tị́ yẹng ká juwa la ẹdụrụ ọjụjụ lee o-juwa u-ube nya agba kahị warị kaka wụlang yẹ?’

⁴⁰Ụka ọọwa, adịrahụ ka wẹ byaa yẹkẹẹ, ‘Nya ịlẹhị-ịlẹhị m byinu yẹkẹẹ, ụka ọlẹ kaanụ ayịdang wẹẹ họ ịngịịwẹ wuu ha anyadam ịlẹ ká angịnyị wẹẹ ju ẹpẹpẹ odehe ọlẹ lẹ, am ayịdang kpangga a wẹ kanụ wẹẹ họ ang ịịwa wuu ha lẹ!’ ”

⁴¹“Ụka ọọwa, ọ ka byi angịlẹ kị ji koye ụpụpịla nyamwụ yẹkẹẹ, ‘Anụ tụ kịnyaa hi ẹga nyam, anụ angịlẹ ká ọlọ ọ-ga ju nya Ohe Oluhye wuwu kpá ene-ene lẹ. Anụ rụ kele ka ẹpwụ nya ila o-gbe oyi myị́ oyi ọlaanyị kị nwụlanọ gbe Ohe Onyobyi bala alegu-ẹrụ nyamwụ wuu mẹ!

⁴²Chajị ụka kam juwa la imyi lẹ, ánụ myị ya ang oriri ham ri ka. Ụka ká imyi-enyi juwa nwụm lẹ, ánụ myị chị́ enyi ọnwanwa ham nwa ka.

⁴³Ụka ọlẹ kam ri ọngga lẹ, ánụ myị kpam warị wẹ ẹpwa nyanụ ka. M juwa lọhị-lọhị lẹ, ánụ myị ya ang ọkụrụ-kụrụ ọhẹ-lọhẹ ham ka. M juwa la ẹdụrụ bala o-juwa u-ube nya agba lẹ, ánụ myị warị wẹ kaka kpẹhị rịrịm lee ọ-wụlam yẹ kpong-kpong ka ịnyịnyị.’

⁴⁴Ụka ọọwa, angịwẹ ka wẹ byoo yẹkẹẹ, ‘Ọngọlahị, ụka oyina ahị tị́ yẹng ká juwa la imyi, lee o-juwa la imyi-enyi lee o-ri ọngga lee o-juwa lọhị lọhị lee o-juwa la ẹdụrụ lee o-juwa u-ube nya agba, kahị myị họ hang jaabwọ kọ pwoku kpong-kpong ka ene?’

⁴⁵Ụka ọọwa, adịrahụ ọwẹ ka wẹ byaa yẹkẹẹ, ‘Nya ịlẹhị-ịlẹhị m byinu yẹkẹẹ, ụka ọlẹ kaanụ ayịdang á wẹẹ myị-ị da anyadam ilodehe ịlẹ ká angịnyị wẹẹ ju ẹpẹpẹ ụbwọ kpong-kpong ka lẹ, am ayịdang kpangga a wẹ kanụ wẹẹ pwa ọ-da ụbwọ ịnyịnyị lẹ.’

⁴⁶Ụka ọọwa, ị ka ku angị inyibyi ịwẹ wuu rụ kele ka ẹpwụ nya akama o-gbe oyi myị́ oyi. Ma, alabwẹla ọnyịịla wuu tị ka jụ ka ẹpwụ nya ọhịhị ọmyịmyị-ka.”