Read idege ỊMATIYU 26 Bible Online

ỊMATIYU 26 - idege bible

ỊMATIYU 26

¹Ụka ká iJisọsị mẹ iru nya ịngịịwẹ wuu jẹ angịnyị kpá lẹ, ọ byi angịjụgbẹyị nyamwụ yẹkẹẹ,

²“Anụ tị́ jẹ́ ká ụtụrụ imiiye kem a hi ká ụka nya Ang Oriri Ọchịpwụrụ nya ala iJuu ka pwụ lẹlẹ. Ụka ọọwa, ị ka pịrịm am Ọnyị nya ọngịnyị ehe ọlẹ ha lẹ, ị ka gwọọ iloo ba okoji lẹlẹ.”

³Ọọwa lẹ, alegbeju nya angịkiliya nya Ohe Oluhye bala ịgabwọ nya ala iJuu wuu a kele kaka jịra la awụlẹ ụ-ụwa ọdọdẹpwa nya ịKayafasị ọlẹ kọ ri olegbeju nya angịkiliya nya Ohe Oluhye wuu lẹlẹ.

⁴Ọọwa lẹ, ị me obyi gu awụlẹ kpọng kpọng wuu jaabwọ kị ka bwu wu iJisọsị yoyi-yoyi kpa kaka nwụ.

⁵Angịwẹ gbile awụlẹ ụbwọ ụ-ụrụ yẹkẹẹ, “Áhị́ ka họ iJisọsị abwọhẹ lụka nya Ang Oriri Ọchịpwụrụ ọlẹ kpangga ka. Ó-ri ịnyị ka, tụbwọ aalẹ, iru nya angịnyị ịwẹ ka kpa ojigi jigi ọtụka-ọtụka warị o-oluhye nyamwụ.”

⁶Ụka ọhẹ, iJisọsị juwa ẹ-ẹpwa nya ịSayịmọn ọhẹ ọlẹ kọ ri olekpo e-epweji nya ịBẹtanị.

⁷Ụka ká iJisọsị juwa kpa ang ri, ọnyang ọhẹ hu ida ochoru kwọkwọ ọlẹ kọ la ịnya lụmẹ, kpa kele kaka bene hụ iJisọsị e-egbeju. Ị ya ida ọọwa ju ẹpwụ nya ichu-ọta ochiche olido tene ọlẹ kị kpa ẹjwọ nya “alabasịta” họ.

⁸Angịjụgbẹyị nya iJisọsị yẹ ang ọlẹ ká ọnyang ọọwa họ. Ọ waa ẹjẹ lẹ, ị juwa yẹkẹẹ, “Ịịyẹ a tị́ ri apyobwuna nya o-hu ida ọnyịịla ọwẹ bịrị hụrụ ododu mẹ?

⁹Ọkọkọ nya ọwẹ lẹ, ó-ri kị hwoo kpa kaka ra okpoko ọtụka-ọtụka, kị ya gịla ikpehika lẹẹ, ịnọ, ọ́ ka hagụ lẹka?”

¹⁰Ụka ká iJisọsị jẹ́ ang ọlẹ ká angịjụgbẹyị nyamwụ wẹẹ kpa ya ta awụlẹ lẹ, ọ byaa yẹkẹẹ, “Ịịyẹ a tị́ du kanụ juwa ju olo nya abyị ọkpụkpụ chụ ọnyang ọlẹ ododu ịnyị kpong-kpong? Anụ wo mẹ! Ang ọnyịịla nya ịlẹhị-ịlẹhị a wẹ ká ọnyang ọlẹ họ ẹ-ẹga nyam lẹ.

¹¹Chajị, ikpehika ịwẹ lẹ, ị ka jam tanụ pyịyọọ lẹ, anụ ka haa ọnahị ụka myị́ ụka myị́. Ma, am lẹ, ḿ tị ka jam tanụ ịnyị ka.

¹²Ó-ri kanụ jẹ́ ka aalẹ, ida ọlẹ ká ọnyang ọwẹ ya yẹ hụm wẹ lẹ, ọ ri ang ọnwụla ugbinyịrọ nyam nọ gbe ụka ọlẹ kị ka ju ogu nyam eji.

¹³Nya ịlẹhị-ịlẹhị m byinu yẹkẹẹ, ẹga myị́ ẹga ọlẹ kị ka kpa ẹrụ ọnyịịla ọlẹ kaka ya pyẹ ẹ-ẹpwụ nya odehe ọlẹ wuu, alụwa ka kpịtịya nya ọnyang ọlẹ pyii ịnyịnyị lẹ. Chajị, ị ka kpa oja nya ang ọlẹ kọ họ wẹ alẹ pyebile dịrẹ ẹrụ ọnyịịla ọọwa ju ka ẹga myị́ ẹga ịnyịnyị wuu pyii lẹ.”

¹⁴Ịnyị lẹ, iJudasị Isikarọtụ ọlẹ kọ ri ọngọhẹ lẹpwụ nya angịjụgbẹyị angị iwo kụrụ imiiye, a kele ka ẹga nya alegbeju nya angịkiliya nya Ohe Oluhye lẹlẹ.

¹⁵IJudasị taa ịtọ yẹkẹẹ, “Ó-ri kam pịrị iJisọsị hanụ, ịịyẹ anụ tị́ ka ya nwụm uri?” Ọọwa lẹ, angịwẹ a kele kaka wa okpoko onyoowuru iwo ịta chiriri lẹ, ị hwọọ ju iJudasị ụ-ụbwọ lẹlẹ.

¹⁶Bwu ẹnụtụrụ ọọwa kele kịlahị lẹ, iJudasị Isikarọtụ ọwẹ a juwa kụ kee gbe ụka ọlẹ ká ẹga ka chị dọọ chajị kọ ka jẹ́-ẹ pịrị iJisọsị ha lẹlẹ.

¹⁷La ẹnụtụrụ nya ọgbanyẹ nya Ang Oriri nya Ịkaa Ọmịrịị mịrị-ka, angịjụgbẹyị nya iJisọsị kele kaka tọọ wo yẹkẹẹ, “Ayịbahị, ale, a tị́ tịtọ kahị ka kaka nwụla ẹga ọhụhụ nọ hang ká ka hụ ụ-ụwa ri Ang Oriri Ọchịpwụrụ ọlẹ?”

¹⁸IJisọsị wẹ byaa yẹkẹẹ, “Anụ kele ka ẹpwa nya ọlẹng ọhẹ ọlaanyị e-epweji ọwẹ kanụ byoo yẹkẹẹ, ‘Am ọngọmẹjẹ nyị yẹkẹẹ, ụka nyam nyị pwụ lẹ. Lẹ, am bala angịjụgbẹyị nyam nyị juwa ka warị kaka hụhụ ẹ-ẹpwa nyamwụ ri Ang Oriri Ọchịpwụrụ ọlẹ lẹ.’ ”

¹⁹Ịnyị, angịjụgbẹyị nya iJisọsị a kele ka ụwa kaka họ jaabwọ kị byaa wuu lẹ, ị nwụla iwe-ahụrụ nọ gbe ụka nya Ang Oriri Ọchịpwụrụ ọọwa ụ-ụwa lẹlẹ.

²⁰Ụka ká obyi hi ẹnụ ọọwa lẹ, iJisọsị bala angịjụgbẹyị nyamwụ angị iwo kụrụ imiiye a kele kaka hụhụ i-itebwuru ookpokpo, juwa ri Ang Oriri Ọchịpwụrụ ọọwa lẹlẹ.

²¹Ụka kị juwa kpa ang oriri ọọwa ri, iJisọsị byaa yẹkẹẹ, “Nya ịlẹhị-ịlẹhị m byinu yẹkẹẹ, ọngọhẹ lẹpwarịrị nyanụ anụ angịjụgbẹyị nyam juwa ka pịrịm ha lẹ!”

²²Ụka ká angịjụgbẹyị nya iJisọsị wo ẹla ọọwa lẹ, ọ taa olujwo lụmẹ kaka kpoye. Ụka ọọwa, ịwa wuu juwa tọ iJisọsị ịtọ ọngọhẹ ọngọhẹ yẹkẹẹ, “Ọngọlahị am ịnyị? Ọngọlahị am ịnyị?”

²³Ụka ọọwa, iJisọsị wẹ byaa yẹkẹẹ, “Ọngọlẹ kọọwa ayịdang wẹẹ kpa ịkaa hi ọhọ tam ẹja ookpokpo, a wẹẹ ka pịrịm ha lẹlẹ.

²⁴Ọ ri nya ịlẹhị, am Ọnyị nya ọngịnyị ehe ọlẹ ayịdang juwa ka gbu jaabwọ kị da ụ-Ụpwụ Ịgọgọ ene-ene lẹ! Ma, ọngọlẹ kọọ wẹẹ ka pịrị Ọnyị nya ọngịnyị ehe ọlẹ ha-à wẹẹ, ọ ri enyi gu obyi lẹ! Chajị, ó-ri kị dọmwụ ma ọngọọwa warị wẹ ẹpwụ nya odehe ọlẹ kpong-kpong ka, ịnọ, ọ ka hiigu họọ gụ lẹ.”

²⁵IJudasị ayịdang ọlẹ kọ ri ọngọ pịrị iJisọsị ha tọọ wo ịnyịnyị yẹkẹẹ, “Ayịbahị ịtịcha, am ịnyị?” iJisọsị wẹ byoo yẹkẹẹ, “Ahụ ayịdang a tị́ kpa ọnụ nyang ya ịnyị wẹ lẹlẹ.”

²⁶Ụka kị juwa kpa ang oriri ọọwa ri ịnyịnyịịnyị lẹ, iJisọsị a hu ịkaa lẹ, ọ wahị kụrwọọ ẹ-ẹpwụ nya abwọ ọrịrị lẹ, ọ gwọọ ene, hwoo ha angịjụgbẹyị nyamwụ lẹ, ọ byaa yẹkẹẹ, “Anụ ye ịkaa ọlẹ kanụ ri mẹ. Ọwa ku ọmwakpa nya ugbinyịrọ nyam lẹlẹ.”

²⁷Ọọwa lẹ, iJisọsị a hu ukoku nya ere lẹ, ọ ji Ohe Oluhye obe u-uhye nyamwụ lẹ, ọ hwoo ha angịjụgbẹyị nyamwụ ịnyịnyị lẹ, ọ byaa yẹkẹẹ, “Anụ ye kaanụ wuu a ya nwa lawụlẹ mẹ.

²⁸Chajị, ere olukoku ọlẹ a ku ọmwakpa nya ịwọ nyam ọlẹ kam ya yẹ hụrụ wọnụ nya angịnyị ehe ju u-uhye nya iro ọnwanwa onyeewe nya Ohe Oluhye lẹlẹ. M ya ịwọ nyam ọọwa yẹ hụrụ chajị kị ka jẹ́-ẹ hịnyọhi ịhọbịrị nya alodehe ọlẹ wuu haa.

²⁹M jam byinu yẹkẹẹ, am ayịdang á ka nwa ere nya alakọnụ nya alubekee ọwẹ gụ ọlẹ kaka, gbee pwụ ẹnụtụrụ ọlẹ kam ka nwa onyeewe nyamwụ tanụ myịmyị ụ-ụwa ị-ịpyị-adịrahụ nya Ohe Oluhye Adam.”

³⁰Ịnyị, ụka kịịwa ayịdang mwu eje ịgọgọ ọhẹ ụ-ụwa kpá wuu lẹ, ị rụ bwu ụwa kele ka Ọgbọdọ Olivu lẹlẹ.

³¹Ịnyị lẹ, iJisọsị a byi angịjụgbẹyị nyamwụ byaa yẹkẹẹ, “La odu alẹ, abwọ ka chị́ịnụ wuu pyẹpyẹ ẹ-ẹga nyam du kaanụ wuu ka nyi epepe rụ him, jaabwọ ká Ohe Oluhye ya ẹ-ẹpwụ nya Ụpwụ Ịgọgọ ene-ene yẹkẹẹ, ‘Am Ohe Oluhye ka nwụ ọngọgbikpịlọ nyam am ayịdang. Ụka ọọwa, ịkpịlọ ịịwa wuu ka nyi epepe gbanggbang.’”

³²IJisọsị myịmyị byaa yẹkẹẹ, “Ma, ụka kam wuleji bwula igu kpá, m ka ji ịlahị nyanụ rụ kele ka ịGalili.”

³³IPita ya ẹla dodehe byi iJisọsị yẹkẹẹ, “Ọngọlahị, am lẹ, óo-riri ká abwọ á ka chị́ angịkịla wuu chị́ pyẹpyẹ kị ji ẹkpẹ nyaa ji dang, tụbwọ aalẹ, aḿ ka họ ịnyị kpá ẹnẹnẹhẹ kaka.”

³⁴IJisọsị wẹ byi iPita yẹkẹẹ, “Nya ịlẹhị-ịlẹhị m bying yẹkẹẹ, ene ká ọwọọwọ ka da ịgbụ la odu ọlalẹ kpá, ahụ iPita ọwẹ ka pwam rwarụ ugbabwọ ịta.”

³⁵IPita wẹ byoo yẹkẹẹ, “Ọngọlahị ee, ọ dọmwụ ri igu, kam ka gbu tang wẹwẹ aalẹ, m ka pwang rwarụ kpong-kpong kaka.” Ọọwa lẹ, angịjụgbẹyị nya iJisọsị ihihi ịkịla wuu a juwa ya ịnyịnyị-ịnyịnyị lala iPita lẹlẹ.

³⁶Ịnyị, iJisọsị bala angịjụgbẹyị nyamwụ a kele ka ẹgẹhẹ ọlẹ kị wụrụ iGetisemeni lẹlẹ. Ụ-ụwa, ọ byaa yẹkẹẹ, “Anụ hụhụ ẹ-ẹgẹlẹ gbem, kam kele kịlahị ka ẹga ọlaanyị kaka raabwọ ha Ohe Oluhye ụ-ụwa wẹẹ.”

³⁷Ụka ọọwa, iJisọsị kpa iPita bala anyị alẹng imiiye nya iSebidi ba ịlọmwụ kele ka ụwa ịnyịnyị. Ọọwa lẹ, olo nya imahị bala ang ọjụjụ ọtụka-ọtụka a myị ọkịlẹtụ nya iJisọsị nya ịlẹhị-ịlẹhị ụ-ụwa lẹlẹ.

³⁸Ịnyị lẹ, ọ byaa yẹkẹẹ, “Anụ wo mẹ! Ugbodu okpukpuru nyam myị la olo nya ang ọjụjụ lụmẹ kaka kpoye, gbee pwụ igu lẹ! Chajị nya ọọwa lẹ, anụ hụ ám ẹgẹlẹ kanụ juwa gbeji tam mẹ.”

³⁹Ọọwa lẹ, iJisọsị ayịdang a rụ tụ kele kịlahị chẹẹ lẹ, ọ ya ahị nyamwụ kụrụ eji, juwa raabwọ ha Ohe Oluhye ụ-ụwa lẹlẹ. Ọ yẹkẹẹ, “Oo! Ahụ Ohe Oluhye Adam, ó-ri kọ ka chịkpẹẹ aalẹ, A họ ká ukoku nya nya ang ọjụjụ ọtụka ọlẹ a chịpwụrụ him chẹẹ mẹ! I-irya nyam am ayịdang a tị ka họ koo! Ma, ọlẹ kọ ri irya nyang Ahụ Adịda ịnyị!”

⁴⁰Ụka ká iJisọsị warị wẹ ẹga nya angịjụgbẹyị nyamwụ angị ịta ịwẹ lẹ, ọ yaa kị juwa kpa une nọ lẹlẹ. Ọ byi iPita anyị yẹkẹẹ, “Ahyu! Ọ ri yẹkẹẹ, anụ ayịdang á ka gbeji tam la awa ookpokpo ọlam-ọlam ọlẹ myị́ ka?

⁴¹Anụ juwa gbeji giri-giri, kanụ juwa raabwọ ha Ohe Oluhye ọgwọgụ ịnyịnyị, chajị kanụ ka chabwọ ju ka ẹpwụ nya ọmayẹ nya ang onyobyi ọhọhọ kaka mẹ. Olegu ọlẹpwụ nyanụ lẹ, ọ la ila ọchịchị lụmẹ juwa lẹ! Ma, ugbinyịrọ tị la dẹwụ-dẹwụ lụmẹ kaka kpoye.”

⁴²IJisọsị myịmyị mwẹẹkpẹ rụ kele kaka raabwọ ụka oheeye yẹkẹẹ, “Oo! Ohe Oluhye Adam, ó-ri ká ukoku nya ang ọjụjụ ọtụka ọlẹ á ka chịpwụrụ him kaka, kam ka nwọọ pyii lẹ aalẹ, irya nyang, A họ mẹ.”

⁴³IJisọsị myịmyị tịrẹkpẹ wẹ ẹga nya angịjụgbẹyị nyamwụ angị ịta ịwẹ. Ọ myịmyị yaa kị juwa kpa une nọ ụka oheeye, chajị une go rịraa a-ahị la egbahị nyaa juwa laa ilo nya ịlẹhị-ịlẹhị.

⁴⁴IJisọsị myịmyị rụ bwu ẹga nya angịjụgbẹyị nyamwụ kele kaka raabwọ ụka ọhata juwa ma ala ịlẹ kọ ya, ene-ene ya ụka ọhata ụ-ụwa.

⁴⁵Ọọwa lẹ, iJisọsị a tịrẹkpẹ kele ka ẹga nya angịjụgbẹyị nyamwụ ịwẹ myịmyị ụka ọhata lẹ, ọ byaa yẹkẹẹ, “O ri anụ jam nune, jam mwụ ịnyọ pyịyọọ da warị wẹ ụka ọlẹ wẹẹ? Anụ yẹ mẹ! Ụka ọlẹ kị ka kpa tụụbwọ him am Ọnyị nya ọngịnyị ehe ọlẹ ju alọhọbịrị ụ-ụbwọ pwụ lẹ!

⁴⁶Anụ wuleji kahị rụ mẹ. Anụ yẹ mẹ! Ọngọlẹ kọ juwa ka pịrịm ha ji ọnaabwọ lụmẹ lẹ!”

⁴⁷Ụka ọlẹ ká iJisọsị juwa kpa ẹla ọọwa ọnụ ya wẹẹ lẹ, iJudasị Isikarọtụ ọlẹ kọ ri ọngọhẹ lẹpwarịrị nya angịjụgbẹyị angị iwo kụrụ imiiye a pwụ eji warị wẹ ẹga nya iJisọsị lẹlẹ. IJudasị kpa angịnyị lụmẹ-lụmẹ ba ịlọmwụ. Angịịwa kpa oge bala ekwiji a-abwọ nyaa. Alegbeju nya angịkiliya nya Ohe Oluhye bala ịgabwọ nya ala iJuu a du angịịwa ẹrụ ọọwa kele lẹ.

⁴⁸IJudasị ọngọ pịrị iJisọsị ha ọwẹ ya je alogu ẹdịyẹ nyamwụ ịịwa ene-ene yẹkẹẹ, “Ọngọlẹ kam wẹẹ ka ju ọnụ a ri iJisọsị ọọwa lẹlẹ. Anụ́-ụ woo mẹ!”

⁴⁹Ahyaahị ká iJudasị pwụ ẹga nya iJisọsị lẹ, ọ rụ kpụrụrụ kele ka ẹga nyamwụ juwa da ọnụ chọọ yẹkẹẹ, “Oo! Wụraba, Ayịbahị!” Ọọwa lẹ, ọ ju iJisọsị ọnụ ụ-ụwa lẹlẹ.

⁵⁰IJisọsị wẹ byoo yẹkẹẹ, “IJudasị, ẹnwa oligu nyam, ẹla ịyẹ a kpang kpa wẹ ẹgẹlẹ?” Ọọwa lẹ, alogu ẹdịyẹ nya iJudasị ịwẹ a kele kaka wu iJisọsị, yụbwọ dụrwọọ kịrẹkpẹ, kpọọ ụ-ụwa gogoogo lẹlẹ.

⁵¹Ọngọhẹ lẹpwarịrị nya angịlẹ kị juwa ta iJisọsị, gbile oge nyamwụ pịlala lẹ, ọ hụla ụrụ ọhẹ nya ọnchẹ nya olegbeju ọgbahị nya angịkiliya nya Ohe Oluhye wuu hwaarịị dụwa ị-ịpyị lẹlẹ.

⁵²IJisọsị byi ọngọọwa yẹkẹẹ, “Tụ ụbwọ hi oge nyang ju ka ẹpwụ nya apile nyamwụ lẹẹlẹẹ mẹ. Chajị angịlẹ wuu kịịwa ayịdang á juwa kpa ẹma nya ẹwụ jahị da angịnyị angị ịkịla, ẹma nya ẹwụ a tịtị kaa ri angịịwa ịnyịnyị lẹ.

⁵³Ó-ri á jẹ́ yẹkẹẹ, ó-ri kọ hám nya ọọwa, kaam ayịdang á raabwọ bịlẹ Ohe Oluhye Adam yẹkẹẹ, Ọ ya angị dẹwụ du wam lẹẹlẹẹ mẹ. Ịnọ, Ọwa ayịdang nyị ka tụụbwọ hi alegu-ẹrụ nyamwụ lala ụnọ ukuku ebwo iwo kụrụ imiiye du warị wam ahyaahị ịnyịlẹhị ka?

⁵⁴Ó-ri kam họ ịnyị lẹ, anyanyị, ẹla ọlẹ ká Ụpwụ Ịgọgọ ya, nyị ka họ u-uhye nyam, a tị́, tị tị ka jẹ́-ẹ ka họ jịra myị́ wẹẹ?”

⁵⁵Ụka ọọwa, iJisọsị byi alogu ẹdịyẹ nya iJudasị Isikarọtụ ịwẹ yẹkẹẹ, “Ọlẹ kanụ wẹẹ kpa ẹma nya ẹwụ bala ekwiji ịwẹ warị wẹ la ọ-ka wum wu lẹ, m ri oloyi nyanụ? Ụka kaam ayịdang juwa kaa mẹ ang jẹ ẹnẹnẹẹnụ u-ube ịgọgọ ọtụka nya Ohe Oluhye nya ala iJuu lẹ, ánụ jụm jụ wuwu myị́ ka!

⁵⁶Ma, ang ịlẹ wuu jam họ alẹ, chajị nyọka ri ang ọ-họ jịra nya ala ịlẹ ká alọmwụ nya Ohe Oluhye da ẹ-ẹpwụ nya Ụpwụ Ịgọgọ ene-ene.” Ịnyị lẹ, angịjụgbẹyị nya iJisọsị wuu a rụnyẹ rụ, nyi epepe hyọọ ụ-ụwa lẹlẹ.

⁵⁷Ụka ọọwa, angịlẹ kị wu iJisọsị kpọọ kele ka ẹpwa nya ịKayafasị, ọlẹ kọ ri olegbeju ọgbahị nya angịkiliya nya Ohe Oluhye wuu. Ụ-ụwa ịtịcha ị-mẹ ehile nya iMosisi jẹ bala ịgabwọ nya ala iJuu wuu a jịra lẹ.

⁵⁸Ụka ọọwa, iPita juwa ba iJisọsị anyị jẹ ẹ-ẹkpẹ-ẹkpẹ hwẹẹ, gbee kọ pwụ ọdọdẹpwa nya olegbeju ọgbahị nya angịkiliya ọwẹ kaka hụhụ ụ-ụwa ta ịdanggeri igbeji ịlụwa. Chajị kọ ka jẹ́-ẹ yẹ ọbaba nya ang myị́ ang wuu.

⁵⁹Ụka ọọwa, alegbeju nya angịkiliya nya Ohe Oluhye wuu ịwẹ bala angị hihi nya alịkọtụ nya eje ọgụgụ ọgbahị nya ala iJuu ọwẹ wuu, juwa tịtọ kị ka kpa ibeenu ọnọọkịla chị ẹla ba iJisọsị ụ-ụwa. Chajị nyọka ya eje nya igu wọọ.

⁶⁰Ma, ẹ-ẹpwụ nya angịlẹ wuu kị gba kpehe juwa me ịnịịkịla ịịwa lẹ, ọnọọkịla nyaa ọhẹ-lọhẹ á ju egbeju ị-ka jẹ́-ẹ ya ẹta rịrị kpa la iJisọsị eje myị́ kaka. Ọọwa lẹ, alibeenu ịnịịkịla imiiye ịhyẹ a gba kpehe ka ụda lẹlẹ.

⁶¹Ọọwa lẹ, ị ya dodehe byi aluche yẹkẹẹ, “Ahị wo ká ọlẹng ọlẹ juwa ya dodehe yẹkẹẹ, ọwa ayịdang nyị ka la ọngịrị bịrị ube ịgọgọ ọtụka nya Ohe Oluhye ọlaanyị, ene kọọwa nyị ka myịmyị-ị̀ ma ube ọọwa nwụ́ ẹ-ẹpwụ nya ẹnụtụrụ ịta kẹnẹ-kẹnẹ.”

⁶²Olegbeju ọgbahị nya angịkiliya wuleji godayị kọkọ lẹ, ọ tọ iJisọsị wo yẹkẹẹ, “A tị́ wo ala ịlẹ wuu kị chị bang wẹ lẹ. Ahụ ayịdang la ẹlẹlẹhẹ ka dọnụ waa kpong-kpong?”

⁶³Ma, iJisọsị hwoo ujiji kpini-kpini. Ọ́ wọọ ẹlẹlẹhẹ bwu ọnụ ka. Ọọwa lẹ, olegbeju ọgbahị nya angịkiliya ọwẹ a myịmyị byi iJisọsị yẹkẹẹ, “M jam kpa ẹnyị nya Ohe Oluhye ọlẹ kọ juwa hịhị dang ehile la iro ọnwanwa ká ka ya ẹla nya ịlẹhị jehi lẹẹlẹẹ lẹ. Ahụ ayịdang a ri ịKịrayịsị Ọnyị nya Ohe Oluhye ịnyịlẹhị lẹ?”

⁶⁴IJisọsị wẹ byoo yẹkẹẹ, “Ahụ ayịdang a tị́ kpa ọnụ nya ịlọng ya ịnyị wẹ lẹlẹ. Ma, nya ịlẹhị-ịlẹhị, m jam byinu yẹkẹẹ, ụka kọ nọ chẹẹ ị-ịlahị, Ọnyị nya ọngịnyị ehe ọlẹ ayịdang juwa ka rụ kele kaka hụhụ u-upwuriri nya ọngịrị nya Ohe Oluhye Agụgụ gbee, pwụ ụka ọlẹ ká Ọnyị nya ọngịnyị ehe ka hi ehe u-uhye nya egbamwụ nya epwoohe ụka kọ ka mwọọgịlẹ warị myịmyị.”

⁶⁵Ụka ọọwa, olegbeju ọgbahị nya angịkiliya ọwẹ a gu ịwụrụ ịlịnyịrọ nya ịlọmwụ ene hwanng lẹ, ọ yẹkẹẹ, “Anụ tị́ wo jaabwọ kọọwa ayịdang kpa ọnụ nya ịlọmwụ wẹẹ ya ẹla pyị ẹ-ẹga nya Ohe Oluhye lẹ. Anụ ya ká ibeenu ọkịla ọhẹ ji, ahị ka tịtọ gụ ọlẹ wẹẹ? Anụ wuu tị́ kpa ụrụ nyanụ wo ẹla oyaya pyị ẹ-ẹga nya Ohe Oluhye bwula ọlẹ kọ yẹkẹẹ, ọwa nyaa ri Ọnyẹwẹ nya Ohe Oluhye ịlẹhị lẹ wẹ lẹ.”

⁶⁶Ọọwa lẹ, olegbeju ọgbahị nya angịkiliya ọwẹ a byi aluche ịwẹ yẹkẹẹ, “Anụ ya jem mẹ. Ịịyẹ a tị́ ri irya nyanụ u-uhye nya ẹla ọlẹ?” Ịwa wuu wẹ byoo yẹkẹẹ, “Eje nya igu woo lẹ. Ọ ka gbu pyii lẹ.”

⁶⁷Ụka ọọwa, angịhyẹ nyaa a juwa chị́ ide hụ iJisọsị a-ahị juwa mịlọọ nyi kukuku, angịkịla nyaa juwa wọọ abwọ ịnyịnyị.

⁶⁸Angị wọọ abwọ ịịwa juwa byoo yẹkẹẹ, “Ahụ ịKịrayịsị ọlọmwụ ọtụka, bwuru ẹnyị nya ọngọlẹ kọ wang-abwọ wẹ ịnịịnọ ya jehi mẹ.”

⁶⁹Ụka ká iPita hụhụ odehe nya ọdọdẹpwa nya olegbeju ọgbahị nya angịkiliya ọwẹ, ọnchẹ ọnyang ọhẹ nya ayịdẹpwa ọọwa kele ka ẹga nya iPita kaka byoo yẹkẹẹ, “M jẹ́ kaahụ ayịdang ri ọngọhẹ la ẹpwụ nya angịnyị nya iJisọsị ola ịGalili ọlaanyị ịnyịnyị!”

⁷⁰Ụka ọọwa, iPita pwa rwarụ ụ-ụwa ị-ịlahị nya alụwa wuu yẹkẹẹ, “Eheehe! Ḿ jẹ́ etu nya ẹlẹwẹ ká wẹẹ ya tam kpong-kpong ka.”

⁷¹Ọọwa lẹ, iPita a wuleji bwu ẹgẹwẹ rụ kele ka ọnụ ogirigba nya ọdọdẹpwa ọọwa lẹlẹ. Ụ-ụwa, ọnchẹ ọnyang ọkịla ọhẹ mwụụrụ yẹ iPita chịng lẹ, ọ byi angịhyẹ ịlẹ kị godayị rịrị ụ-ụwa yẹkẹẹ, “Ọngọlẹ ri ọngọhẹ lẹpwụ nya angịnyị nya iJisọsị ọla ịNasareti ịnyịnyị!”

⁷²IPita myịmyị pwa rwarụ la iro ọnwanwa juwa yẹkẹẹ, “Am jẹ́ ọlẹng ọlẹ ká wẹẹ ya ẹla rụ́ kpong-kpong ka.”

⁷³Ụka kọ nọ chẹẹ lẹ, angịhyẹ ịlẹ kị godayị rịrị ụ-ụwa a kele ka ẹga nya iPita kaka byoo yẹkẹẹ, “Nya ịlẹhị ịnyị, ahụ ayịdang ri ọngọhẹ lẹpwụ nya angịnyị nya ọngọwẹ. Chajị ẹla ọlọnụ nyang mẹjẹ yẹkẹẹ, a ri ola ịGalili ịnyịlẹhị lẹ, ọ gbe ẹla jung ene lẹ.”

⁷⁴Ma, iPita gọlọ ju ịlọmwụ, juwa pwa rwarụ myịmyị yẹkẹẹ, “Am jẹ́ ọlẹng ọlẹ kanụ wẹẹ ya ẹla rụ́ kpong-kpong ka.” Ahyaahị ká iPita ya ịnyị kpá bwaaa lẹ, ọwọọwọ a da ịgbụ lẹlẹ.

⁷⁵Ụka ọọwa, iPita kpịtịya nya ẹla ọlẹ ká iJisọsị ya tọọ ene-ene yẹkẹẹ, “Ene ká ọwọọwọ ka da ịgbụ kpá, ahụ iPita ọwẹ ka pwam rwarụ ugbabwọ ịta yẹkẹẹ, ọwa nyị́ jẹ́m ka.” Ịnyị, ọ ta iPita olujwo lụmẹ lẹ, ọ gba kpehe ka odehe kaka jida onyuujujwo ụ-ụwa nya ịlẹhị-ịlẹhị lẹlẹ.