Read idege ỊMATIYU 27 Bible Online

ỊMATIYU 27 - idege bible

ỊMATIYU 27

¹Ụka ká ahị pyẹ pwurum, alegbeju nya angịkiliya nya Ohe Oluhye bala ịgabwọ nya ala iJuu wuu kele kaka me obyi gu awụlẹ kpọng-kpọng yẹkẹẹ, ịwa nyị ka nwụ iJisọsị pyii lẹ.

²Ụka ká angịwẹ chị iJisọsị ori mẹnẹ-mẹnẹ wuu lẹ, ị kpọọ kele kaka ju [ịPọntịyọsị] ịPayịleti ọlẹ kọ ri ịgọvụnọ o-ku ọmwakpa nya ịgọmenti nya ala iRom ụ-ụbwọ lẹlẹ.

³Ụka ọlẹ ká iJudasị ọlẹ kọ pịrị iJisọsị ha, yẹ jaabwọ kị ya eje wu iJisọsị ịnyị lẹ, ọ tọọ olujwo ẹ-ẹkpẹ-ẹkpẹ lẹlẹ. Ọọwa lẹ, ọ kpa okpoko onyoowuru ohu kụrụ iwo ọọwa ọlẹ ká alegbeju nya angịkiliya ịwẹ bala alịgabwọ nya ala iJuu wuu ya họọ tịrẹkpẹ kele kịlaa lẹlẹ.

⁴Ọ byaa yẹkẹẹ, “Am họ ang onyobyi bwula ọpịrị ọngọlẹ kọ da ẹlẹlẹhẹ-ka ha ju ka ụbwọ nya igu lẹ.” Ọọwa lẹ, angịwẹ a wẹ byoo yẹkẹẹ, “Ee, oyina a tị́ ri ẹla nyahị ẹ-ẹpwụ nya ọọwa? Ahị bala ahụ tị ra ihi nyahị gu awụlẹ kpá ẹnụmwụ-ẹnụmwụ lẹ.”

⁵Ọọwa lẹ, iJudasị a tụụbwọ hi okpoko ọọwa chụwa u-ube ịgọgọ ọtụka nya Ohe Oluhye nya ala iJuu lẹ, ọ rụ kpehe bwu ụwa kele kaka ju ịlọmwụ orinwa ẹ-ẹgẹhẹ lẹlẹ.

⁶Ọọwa lẹ, alegbeju nya angịkiliya nya Ohe Oluhye ịwẹ a kele kaka go ikpoko ịịwa lẹ, ị yẹkẹẹ, “Ọ́ chịla kahị ka ya okpoko ọlẹ jula ikpoko ịkịla ilube ịgọgọ ọtụka nya Ohe Oluhye kpong-kpong ka. Chajị okpoko ọlẹ ri okpoko nya ịnya nya ịwọ nya ọngọlẹ kị ya eje nya igu wu.”

⁷Ụka kị me obyi gu awụlẹ wuu lẹ, ị hu okpoko ọwẹ ká iJudasị pwa wẹ, kpa kele kaka ra ọpyị ọhẹ ọlẹ kị hunọ nyọka kpa ju egu nya angga ịlịnyaa eji lẹlẹ. Ị ra ọpyị ọọwa bwu ụbwọ nya ọngọhẹ ọlẹ kọ kaa họ ụkụrwọ nya ịta imeme.

⁸Chajị nya okpoko nya iJudasị ọọwa a du kị wụrụ ẹnyị nya ọpyị o-ju ogu eji ọọwa yẹkẹẹ, “Ọpyị nya ịnya nya ịwọ nya ọngọlẹ kị ya eje nya igu wu” lalẹẹ pyịyọọ daalẹ lẹ.

⁹Ọọwa ri ọ-họ jịra nya ẹla ọlẹ ká ọlọmwụ iJeremaya da ene-ene. Ọ yẹkẹẹ, “Ị hu okpoko onyoowuru ohu kụrụ iwo ọlẹ kọ ri ịnya ọlẹ ká ala Isirẹlụ hunọ u-uhye nya ọngọlẹ kọ kpụ ịnya lụmẹ ị-ịlahị nya Ohe Oluhye.

¹⁰Ọọwa lẹ, ị hu okpoko ọọwa kpa kele kaka ra ọpyị nya ọngọ me ịta jaabwọ ká Ọngọlahị Ohe Oluhye dam ehile ene-ene lẹlẹ.”

¹¹Ụka ọọwa, ị kpa iJisọsị kele kaka godayị rịrị ụ-ụwa ị-ịlahị nya ịPayịleti, ịgọvụnọ. Ọọwa lẹ, ọ tọ iJisọsị ịtọ yẹkẹẹ, “Ahụ ayịdang a ri Adịrahụ nya ala iJuu ịnyịlẹhị lẹ?” IJisọsị wẹ byoo yẹkẹẹ, “Ịnyị, ahụ ayịdang a tị́ kpa ọnụ nya ịlọng wụrụm wẹ!”

¹²Ma, ụka ọlẹ ká alegbeju nya angịkiliya nya Ohe Oluhye bala ịgabwọ nya ala iJuu ịwẹ wuu juwa chị ala ba iJisọsị lẹ, ọwa ayịdang á wẹ ẹlẹlẹhẹ bwu ọnụ nyamwụ kpong-kpong ka.

¹³Ọọwa lẹ, ịPayịleti a myịmyị tọ iJisọsị ịtọ yẹkẹẹ, “Ó-ri ahụ ayịdang á wo ala ịlẹ kịị wẹẹ chị bang wuu kpong-kpong ka? Á ka ye ẹlẹlẹhẹ ya kaka?”

¹⁴Ma, iJisọsị hwoo ujiji kpini-kpini. Ọ́ wẹ ẹlẹlẹhẹ ọtụka lee, ochiche kpong-kpong ka, gbee kọ la ịgọvụnọ ọwẹ ayịdang ahịbwuu lụmẹ kaka kpoye.

¹⁵Ọ ri ọhọhọ nya ala iJuu wuu, ẹka myị́ ẹka lụka nya Ang Oriri Ọchịpwụrụ kị ka me ọlagba ọnyị myị ọnyị ọlẹ kọ háa ụchụ, ya je ịgọvụnọ ịPayịleti ọwẹ chajị kọ ka tụụbwọ hi ọngọọwa haa ịwa aluche.

¹⁶Ụka ọọwa, ọngọhẹ ọlẹ kị wụrụ ịBarabasị ká ẹnyị ọkịla nyamwụ ri iJisọsị juwa u-ube nya agba. Ukpilo nya ẹla ọhọhọ nyamwụ ru ohi lụmẹ.

¹⁷Ịnyị, ụka ká aluche ịịwa jịra ẹ-ẹga nya ịPayịleti lẹ, ọ taa wo yẹkẹẹ, “Oowo, anụ tị́ tịtọ kam ka tụụbwọ hi hanụ ihwẹnyị? IJisọsị ọlẹ kị wụrụ ịBarabasị lee iJisọsị ọlẹ kị wụrụ ịKịrayịsị tị́?”

¹⁸Ụka ọwẹ lẹ, ịPayịleti ayịdang jẹ́ yẹkẹẹ, ajị nya imajẹ ọlam-ọlam nyaa du ká angịịwa nyị wu iJisọsị kpa warị wẹ ẹga nya ọọwa ịịwẹ lẹ.

¹⁹Ụka ọlẹ ká ịPayịleti hụhụ ẹ-ẹchị Adịrahụ nya eje ọlala nyamwụ, ahụ nyamwụ du ẹrụ kele kaka byoo yẹkẹẹ, “Ayịbam, a yụbwọ nyang ju ẹla nya ọngọ da ẹlẹlẹhẹ-ka ọwẹ kpong-kpong koo. Chajị, m la ụlaa onyobyi la odu ịnịyẹ o-oluhye nyamwụ lụmẹ.”

²⁰Ụka ọọwa, alegbeju nya angịkiliya nya Ohe Oluhye ịwẹ bala ịgabwọ nya ala iJuu wuu kele kaka tụ iru nya angịnyị ịịwa wuu tutu nya ịlẹhị-ịlẹhị. I byaa yẹkẹẹ, anụ nyị kele kaka byi ịPayịleti kịị nyị gba ịBarabasị kpehe hi ube nya agba hanụ, kịị nyị wu iJisọsị kpa kaka nwụ pyii mẹ.

²¹Ịnyị lẹ, ịgọvụnọ ọwẹ a taa ịtọ yẹkẹẹ, “Oowo lẹpwarịrị nya angị imiiye ịlẹ anụ tị́ tịtọ kam ka chịda hanụ mẹ?” Ịwa wuu wẹ byoo yẹkẹẹ, “ỊBarabasị ịnyị oo! ỊBarabasị ịnyị oo!”

²²Ụka ọọwa, ịPayịleti taa wo yẹkẹẹ, “Ee lẹ, ịịyẹ m tị́ ka họ ẹ-ẹga nya iJisọsị ọlẹ kị wụrụ ịKịrayịsị lẹẹ mẹ?” Angịwẹ wẹ ịPayịleti yẹkẹẹ, “Ahị tịtọ kị ka gwọọ iloo ba okoji hahị pyii lẹ!”

²³ỊPayịleti myịmyị taa wo yẹkẹẹ, “Ịịyẹ a tị́ du kam ka gwọọ iloo ba okoji? Ẹẹla ịyẹ nya igu, ọ tị́ da kpong-kpong?” Ịwa wuu juwa ya la omyi o-gboo gụ olene-ene yẹkẹẹ, “Ahị tịtọ kị ka gwọọ iloo ba okoji pyii lẹ! Ahị tịtọ kị ka gwọọ iloo ba okoji hahị pyii lẹ!”

²⁴Ụka ká ịPayịleti yẹ jaabwọ ká ọjụgba-jụgba juwa lụmẹ gbee, lala ịnyaa juwa ka kpa ẹla ọtụka-ọtụka weji lẹ, ọ kele kaka chị́ enyi tọ abwọ ị-ịlahị nya aluche nya angịnyị wuu lẹ, ọ byaa yẹkẹẹ, “Ụbwọ lẹta nyam á juwa ẹ-ẹpwụ nya ịwọ nya ọlẹng ọlẹ kpong-kpong kokoo! Ẹ-ẹpwụtụbwọ nyanụ anụ mẹ ịnyị!”

²⁵Ụka ọọwa, iru nya angịnyị ịwẹ wuu wẹ yẹkẹẹ, “Ee, ịwọ nyamwụ a ji uhye egbeju nyahị bala uhye egbeju nya anyị nyahị wuu mẹ oo!”

²⁶Ọọwa lẹ, ịPayịleti a chị ịBarabasị ọwẹ da haa ịnyịlẹhị lẹlẹ. Ịnyị, ụka kị kpa ọngịrị nya ịPayịleti wa iJisọsị ugboji wuu lẹ, ịPayịleti a tụụbwọ hi iJisọsị haa nyị kpọọ kele kaka gu iloo ba okoji ha ala iJuu ịnyịlẹhị mẹ lẹlẹ.

²⁷Ụka ọọwa, ịsọja nya ịPayịleti ịgọvụnọ ịwẹ kpa iJisọsị kele kaka godayị rịrị ọdọdẹpwa nya ịgọvụnọ ọwẹ ayịdang. Ọọwa lẹ, ị wụrụ alogu nya ịsọja ihihi aanaa kaka dọgịlẹ ju iJisọsị ụ-ụwa lẹlẹ.

²⁸Ịnyị, ị pwọ iJisọsị awụrụ nyamwụ lẹ, ị hu awụrụ ọnyọmịla ogbileji kụrwọọ lẹlẹ.

²⁹Ị kele kaka họ okpo nya ejwo-ejwo kụrụ iJisọsị e-egbeju. Ị kele kaka mwụ okoji ọhẹ eku ju iJisọsị ụ-ụbwọ upwuriri, ku ọmwakpa nya otuma nya adịrahụ. Ọọwa lẹ, ị juwa ya arụụ nyaa kụ eji ha iJisọsị, juwa kpọọ họ ụ-ụwa yẹkẹẹ, “Ịjachi! Adịrahụ nya ala iJuu, a ka hịhị gbe oyi myị́ oyi.”

³⁰Ọọwa lẹ, ị juwa chị́ ide hwọọ ụ-ụwa lẹ, ị kele kaka nu okoji ọọwa bwu ụbwọ nya iJisọsị juwa kpa mịlọọ e-egbeju lẹlẹ.

³¹Ụka kị kpọọ họ kpá nwa ịlaa lẹ, ị pwọ awụrụ ọnyọmịla ogbileji ọọwa hi iJisọsị lẹ, ị go ịwụrụ nya ịlọmwụ kụrwọọ lẹlẹ. Ọọwa lẹ, ị juwa kpọọ rụ kele kaka gu iloo ba okoji lẹlẹ.

³²Ụka kị juwa kpa iJisọsị kele ka ẹga ọ-ka gwọọ iloo ba okoji lẹ, ị tọ ọlẹng ọhẹ ọlẹ kị wụrụ ịSayịmọn ụ-ụgbẹyị lẹlẹ. Ọ bwu epweji nya ịSayịrin. I wu ịSayịmọn ọwẹ la agbụrụ byoo yẹkẹẹ, nyị kpa agurube nya iJisọsị tọọ pyii mẹ.

³³Ị jẹ gbee kị pwụ ẹgẹhẹ ọlẹ kị wụrụ iGolugota ọlẹ ká etu nyamwụ ri “Ẹga nya ogo nya egbeju.”

³⁴Ụka kị pwụ ụwa, ị hu ere ọnwanwa ọlẹ kị ya utoji olujujwo lala ụpyị ju ha iJisọsị kọ ka nwa. Ma, ụka ká iJisọsị kpa ere ọọwa ka ọnụ lẹ, ọ pwa ọnwanwa lẹlẹ.

³⁵I-iGolugota ọwẹ, ịsọja ịịwa a gu iJisọsị iloo ba okoji lẹ. Ọọwa lẹ, ị go ịwụrụ nyamwụ gịla awụlẹ, juwa diwo jwaa lẹlẹ.

³⁶Ịnyị, ị hụhụ ụ-ụwa, juwa mwụụrụ yẹ iJisọsị kele ka ẹga ọlẹ kọ chọpịla lẹlẹ.

³⁷Ị da ịnaaba nya ẹla ọlẹ kị chị ba iJisọsị u-uhye nya agurube ọlẹ kị gwọọ iloo ba kele koye nya egbeju nya iJisọsị. Ị da yẹkẹẹ, “Ọngọlẹ a ri iJisọsị, Adịrahụ nya ala iJuu lẹ.”

³⁸Angịwẹ gu aleyi alẹng imiiye ịhyẹ iloo ba okoji ju iJisọsị chwẹẹ ịnyịnyị. Ọngọhẹ nyaa ji koye upwuriri nya iJisọsị, ọngọkịla nyaa ji koye ụpụpịla nyamwụ.

³⁹Ụka ọọwa, angịlẹ wuu kị juwa chịpwụrụ bwu ẹga nya agurube nya iJisọsị juwa kpọọ họ juwa ya abwọ nyi akụ lẹhụ-lẹhụ lẹ, ị juwa nyi egbeju kile-kile ịnyịnyịịnyị lẹlẹ.

⁴⁰I juwa byi iJisọsị yẹkẹẹ, “Ahụ ọngọlẹ ká yẹkẹẹ, ọwa nyị ka tụrụ ube ịgọgọ ọtụka nya Ohe Oluhye nya ala iJuu ju eji kọọwa nyị ka mọọ nwụ́ myị́ ẹ-ẹpwụ nya ụtụrụ ịta kẹnẹ-kẹnẹ lẹ! Ó-ri ahụ ayịdang ká ri Ọnyị nya Ohe Oluhye ịnyịlẹhị lẹ aalẹ, a chị ịlọng da ká hireji bwu uhye nya agurube ọwẹ kahị yẹ tịtị mẹ!”

⁴¹Alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ bala ịgabwọ nya ala iJuu wuu ayịdang anyị juwa kpa iJisọsị họ ụ-ụwa ịnyịnyị-ịnyịnyị.

⁴²I juwa yẹkẹẹ, “M me ọwa a tị́ kaa chị angịkịla da lụmẹ lẹẹ, kọ rụ́? Ọ tị jụ ịlọmwụ chị da myị́ kaka wẹ lẹ! Ó-ri ọwa ayịdang kọ ri Adịrahụ nya ala iJuu wuu ịnyịlẹhị lẹ aalẹ, ọ hireji bwu uhye nya agurube ọwẹ lẹẹlẹẹ mẹ! Aalẹ, ahị ka myị lọọ lẹ.

⁴³Ọwa ayịdang a tị́ ri ọngọ kaa dahịhile ha Ohe Oluhye lụmẹ bala o-ri Ọnyị nya Ohe Oluhye ayịdang kọ rụ́ lẹlẹ. Ó-ri ịnyị lẹ aalẹ, Ohe Oluhye ọọwa a warị kaka chọọ da lẹẹlẹẹ kahị yẹ tịtị mẹ! Chajị kahị ka jẹ́ yẹkẹẹ, ọwa ayịdang há Ohe Oluhye lụmẹ ịnyịlẹhị mẹ.”

⁴⁴Aleyi ịlẹ kị gu iloo ba okoji ụ-ụwa ịkịka nya iJisọsị, juwa ya achala ba iJisọsị ịnyịnyị-ịnyịnyị lala angịkịla.

⁴⁵Ịnyị, ukpowu ọtụka-ọtụka a chị kpem kpem ụ-ụwa ọ-ọpyị nya ala iJuu wuu bwu ụka nya oje iwo kụrụ imiiye nya ẹnụ gbee ju ka ụka nya oje ịta nya obyi lẹlẹ.

⁴⁶Ụka ọlẹ ká oje ịta nya obyi họ lẹ, iJisọsị a chị eko la omyi ogboo yẹkẹẹ, “Elayị, Elayị lama sabakitani” ọlẹ ká etu nyamwụ ri yẹkẹẹ, “Ohe Oluhye nyam, Ohe Oluhye nyam, ịịyẹ a tị́ du ká juwa ji ẹkpẹ dam ịnyị?”

⁴⁷Ụka ọọwa, angịhyẹ ịlẹ kị godayị rịrị ụ-ụwa kị wo ẹlẹwẹ kọ ya, juwa yẹkẹẹ, “Anụ wo jaabwọ ká ọlẹng ọwẹ lalẹẹ be ẹkọ wụrụ Ịlayịja wẹẹ!”

⁴⁸Ịnyị lẹ, ọngọhẹ ụ-ụwa a rụnyẹ ahyaahị kele kaka hu akuruhya kpa kaka kpụ ẹpwụ nya ere ọ-chagbịlangịrị ọhẹ lẹ, ọ ya chị ori ba okoji lẹ, ọ hwọọ kpa kaka ju iJisọsị ọ-ọnụ kọ ka nwa lẹlẹ.

⁴⁹Ụka ọọwa, angịkịla ịlẹ kị juwa ụ-ụwa yẹkẹẹ, “Anụ ba! Kahị yẹ mẹ! Ó-ri ká Ịlayịja á ka warị kaka chọọ da lẹ, kahị yẹ mẹ.”

⁵⁰Ọọwa lẹ, iJisọsị a myịmyị chị eko gboo lẹ, ọ chị ẹjẹ lẹlẹ.

⁵¹Ụka ọọwa, apwụ ọtụka ọlẹ kị ya ke ẹ-ẹpwụ nya ube ọlịgọgọ ọgụgụ olube ịgọgọ ọtụka nya Ohe Oluhye nya ala iJuu, a gu ene imiiye bwu uhye-ọgba lalala kaka gu eji lẹlẹ. Ịpyị ọ-hụ́ kpákpakpa ọtụka-ọtụka ọlẹ kọ họ ká ajwọ ịtụka-ịtụka gu ene kpeji ụ-ụwa ịnyịnyị.

⁵²Ọọwa lẹ, iworu nya angị gbugbu a wụrụ dụwa dodo lẹ, iru nya angịnyị nya Ohe Oluhye ịlẹ kị gbugbu wuu ene-ene a wuleji bwula igu lẹlẹ.

⁵³Ụka ọlẹ ká iJisọsị ayịdang wuleji bwula igu kpá lẹ, angịnyị nya Ohe Oluhye ịịwa ịlẹ kị wuleji bwula igu, a gba kpehe bwu ẹpwụ nya iworu nyaa, juwa ga e-epweji ịgọgọ lẹ, Iru nya angịnyị lụmẹ-lụmẹ a yaa ụ-ụwa lẹlẹ.

⁵⁴Ụka ọlẹ ká olegbeju ọgbahị nya ịsọja ohu ịrụ bala ịsọja ilekpeleji nyamwụ ịlẹ kị juwa kpẹhị rịrị iJisọsị, yẹ ịpyị ọ-hụ́ jigi-jigi ọwẹ bala ang ịkịla ịlẹ kị họ ụ-ụwa wuu lẹ, ọ laa uhi-uhi lụmẹ-lụmẹ lẹlẹ. Ọọwa lẹ, ị juwa yẹkẹẹ, “Nya ịlẹhị ịnyị, Ọlẹng ọlẹ ayịdang ri Ọnyẹwẹ nya Ohe Oluhye ayịdang ịnyịlẹhị!”

⁵⁵Ụka ọọwa, iru nya anyang lụmẹ-lụmẹ ịhyẹ godayị rịrị ẹ-ẹga ọlụrụ juwa kpẹhị nyaa yẹ ang myị́ ang wuu ọlẹ kọ juwa họ ụ-ụwa. Anyang ịịwa a ri angịlẹ kị juwa ba iJisọsị bwu ịGalili, kị kaa dọọ ụbwọ ịnyịnyịịnyị lụka kọ juwa la ọhịhị wẹẹ lẹ.

⁵⁶Angịhyẹ lẹpwarịrị nya anyang ịịwa ri iMeri ọla ịMagịdala bala iMeri ọlẹ kọ ma iJemsi bala iJosẹfụ bala ọnyang ọlẹ kọ ri ịnịna nya anyị alẹng nya iSebidi.

⁵⁷Ụka ká obyi juwa hi ẹnụ ọọwa lẹ, ọnyị ọlẹng ọhẹ ọlẹ kọ ri ọngọ kpụ ụdụ lụmẹ a pwụ eji kele lẹlẹ. Ẹnyị nyamwụ ri iJosẹfụ. Ọ bwu epweji nya Arịmatiya. Ọwa ayịdang ri ọngọhẹ lẹpwụ nya angị ba iJisọsị jẹ.

⁵⁸Ọọwa lẹ, iJosẹfụ ọwẹ a kele ka ẹga nya ịPayịleti ịgọvụnọ kaka bịlọọ ogu nya iJisọsị lẹlẹ. ỊPayịleti myị ọnụ ha angịnyị nyamwụ yẹkẹẹ, nyị tụụbwọ hi ogu nya iJisọsị ha iJosẹfụ mẹ.

⁵⁹Ọọwa lẹ, iJosẹfụ a kele kaka hu ogu nya iJisọsị kpa rụ lẹ, ọ rọọ apwụ onyeewe-onyeewe onyoowuru o-ju ogu eji wuu yẹẹyẹẹ lẹlẹ.

⁶⁰Ịnyị, iJosẹfụ a hu ogu nya iJisọsị kpa kele kaka ju eji i-iworu onyeewe-onyeewe nya ịlọmwụ ọlẹ kọ bebe u-uhye nya ẹjwọ lẹlẹ. Ọọwa lẹ, ọ rị ẹjwọ ọtụka-ọtụka ọhẹ tụ ọnang nya ụgbẹyị nya iworu ọọwa ku kpịlẹ wuu lẹ, ọ rụ ka ẹpwa nyamwụ lẹlẹ.

⁶¹IMeri ọla ịMagịdala bala iMeri ọkịla kele kaka hụhụ jahị da iworu ọọwa kpakpakpa juwa kpẹhị yọọ.

⁶²Lụka nya ẹwụ obyi nya ẹnụ nya ịFụrayịde ọlẹ kọ kaa ri ụka ọ-kpa nwụlanọ gbe Ẹnụtụrụ Ọhịnyọ Lụkụrwọ nya ala iJuu lẹ, alegbeju ikịla iya bala ala ịFarịsii a kele ka ẹga nya ịPayịleti lẹlẹ.

⁶³I byoo yẹkẹẹ, “Ayịbahị, ahị kpịtịya nya ẹla ọlẹ ká ọlọnọọkịla ọwẹ ya lụka ọlẹ kọ jam la ọhịhị wẹẹ. Ọ yẹkẹẹ, ọwa ayịdang nyị ka wuleji bwula igu, la ẹnụtụrụ ọhata juwa hịhị myịmyị pyii.

⁶⁴Chajị nya ọọwa lẹ, ahị tịtọ ká ka da angịnyị nyang ehile kị ka kele kaka gbe iworu nyamwụ gbee ju ka ẹnụtụrụ ọhata ọọwa. Chajị ká angịjụgbẹyị nyamwụ ka jẹ́-ẹ kele kaka hu ogu nyamwụ yoyi kpa rụ, ene kị ka byi angịnyị yẹkẹẹ, Ayịbịwa nyị wuleji bwula igu lẹ, myị́ kaka mẹ. Ó-ri ịnyị ka, tụbwọ aalẹ, ọnọọkịla olugbẹnyị ka tịpyọ lụmẹ gụ ịnya ọgbanyẹ-ọgbanyẹ ọlẹ kọ me wẹẹ.”

⁶⁵Ụka ọọwa, ịPayịleti wẹ byaa yẹkẹẹ, “O hiigu. Ó-ri ịnyị lẹ aalẹ, anụ chụ ịsọja ịhyẹ kanụ kpaa kele kaka gbe iworu ọọwa jaabwọ myị́ abwọ kọ háanụ mẹ.”

⁶⁶Ọọwa lẹ, angịịwa a rụ bwu ẹga nya ịPayịleti lẹlẹ. Ị kele kaka hu ori do bwọ ẹjwọ ọlẹ kị ya tụ ọnang nya ụgbẹyị nya iworu ọọwa ku lẹ, ị kpa ọja jwọọ ẹjẹẹ chajị ká ọngọngọhẹ á ka jẹ́-ẹ wụrwọọ myị́ kaka lẹlẹ. Ọọwa lẹ, ị chụ ịsọja ịhyẹ kaka gbe iworu nya iJisọsị ọọwa giri-giri lẹlẹ.