Read idege ỊMATIYU 28 Bible Online

ỊMATIYU 28 - idege bible

ỊMATIYU 28

¹Ụka ká Ẹnụtụrụ Ọhịnyọ Lụkụrwọ nya ala iJuu chịpwụrụ kpá, ká ewu-ụtụrụ nya ẹnụtụrụ nya ịchọọchị warị lẹ, iMeri ọla ịMagịdala bala iMeri ọkịla a hu ang kele ka iworu nya iJisọsị kaka wụlọọ yẹ lẹlẹ.

²Ma, lụka ọkpahị ju ka, ịpyị ọ-hụ́ jigi-jigi ọtụka-ọtụka kpeji ẹ-ẹga nya iworu nya iJisọsị ọọwa. Ụka ọọwa kpangga, olegu-ẹrụ nya Ohe Oluhye ọhẹ a hireji bwu epwoohe kaka rị ẹjwọ ọtụka ọlẹ kị ya tụ ọnang nya ụgbẹyị nya iworu ọọwa ku hyọọ lẹ. Ịnyị lẹ, ọ hụhụ hụ ụ-ụwa u-uhye nya ẹjwọ ọọwa lẹlẹ.

³Ịnyịrọ nya olegu-ẹrụ ọọwa juwa hụ́ myịrị-myịrị lala ahịgboo nya apya ọchịchị. Ịwụrụ ịlịnyịrọ nyamwụ pwowuru keri-keri lala ara.

⁴Ụka ọọwa, ịsọja ịlẹ kị chụ kele kaka gbe iworu nya iJisọsị juwa juhi ọtụka-ọtụka. I juwa hụ́ kpákpakpa, chụwa lala angịlẹ kị dọmwụ gbugbu kpá wuu ene-ene lẹ.

⁵Ụka ká anyang ịwẹ jẹ pwụ iworu ọọwa, olegu-ẹrụ nya Ohe Oluhye ọlẹ kọ hụhụ ụ-ụwa ya ẹla taa yẹkẹẹ, “Anụ juhi kpong-kpong ka. M jẹ́ ká iJisọsị ọlẹ kị gu iloo ba okoji, anụ wẹẹ tịtọ lẹ.

⁶Ma, ọ́ tị jam ẹgẹlẹ kaka. Ọ wuleji bwula igu jaabwọ kọọwa ayịdang ya ene-ene lẹ. Anụ kẹwẹ kaka yẹ ẹga ọlẹ kị ya ogu nyamwụ nọ ẹnụmwụ-ẹnụmwụ lẹẹ mẹ!

⁷Anụ rụ kele ahyaahị kanụ kaka ya je angịjụgbẹyị nyamwụ yẹkẹẹ, ‘IJisọsị wuleji bwula igu lẹ. Ọ juwa rụ jene nyanụ kele ka ịGalili lẹ. Ụ-ụwa, anụ ka yọọ lẹlẹ.’ Anụ tị́ wo jaabwọ kam ya jenu wẹ lẹ. Anụ deeri kokoo!”

⁸Ịnyị lẹ, anyang ịịwa a yegiri bwu ẹgẹwẹ lụnyẹ-lụnyẹ, la uhi ojuju ị-ịnyịrọ bala ọkẹkẹnị ọtụka-ọtụka juwa rụ kele nyọka kaka ya ẹla ọọwa je angịjụgbẹyị nya iJisọsị lẹlẹ.

⁹Lụka ọ-mwaa lẹ, ị chẹhị kaka yẹ iJisọsị ẹ-ẹga nyaa lẹlẹ. Ọ byaa yẹkẹẹ, “Okpunyi a juwa hanụ.” Ọọwa lẹ, anyang ịịwa a kele kaka wu iJisọsị a-ata nyamwụ gbanng juwa gbịgba họọ ụ-ụwa lẹlẹ.

¹⁰IJisọsị byaa yẹkẹẹ, “Anụ juhi kpong-kpong kaka. Anụ kele kaka ya je anyadam ịlaanyị yẹkẹẹ, nyị kele ka ịGalili mẹ. Ụ-ụwa, nyaa ka yẹm lẹlẹ.”

¹¹Ụka ká anyang ịwẹ juwa rụ kele lẹ, angịhyẹ lẹpwarịrị nya ịsọja i-gbe iworu nya iJisọsị ịwẹ, a rụ tịrẹkpẹ kele ka ẹpwụ nya epweji kaka ya je alegbeju nya angịkiliya nya Ohe Oluhye jaabwọ kị yẹ ang myị́ ang ọlẹ kọ họ ụ-ụwa wuu kaka ba lẹlẹ.

¹²Ụka ọọwa, alegbeju nya angịkiliya nya Ohe Oluhye ịịwa kele kaka la ọjịra-jịra ta ịgabwọ nya ala iJuu wuu lẹ, ị me obyi gu awụlẹ kpọng-kpọng lẹlẹ. Ịnyị lẹ, ị hu iru nya okpoko ọtụka-ọtụka ha ịsọja ịịwa lẹlẹ.

¹³I byi ịsọja ịwẹ yẹkẹẹ, “Anụ kpa ẹlẹwẹ ya je angịnyị jaabwọ kọ la wẹ kpangga kpong-kpong kokoo. Jaabwọ kanụ ka ya je angịnyị a lẹẹ lẹ: ángịjụgbẹyị nya iJisọsị anyị warị la odu kaka hu ogu nyamwụ yoyi kpa rụ lụka ọlẹ kaahị ịsọja igbeji juwa kpa une nọ.

¹⁴Ó-riri ká olegbeju ịgọvụnọ aa wowo aalẹ, ahị ayịdang jẹ́ jaabwọ kahị ka bwu ya jọọ kọ ka wọọ ẹpwụ lẹ. Anụ chị uko nya ịlọnụ u-uhye nya ọọwa kpong-kpong kaka.”

¹⁵Ụka ká ịsọja ịwẹ ye okpoko ọọwa bwu ụbwọ nya angịwẹ kpá wuu lẹ, ị kele kaka me ọnọọkịla ju angịnyị jaabwọ kị byaa wẹ lẹlẹ. O-ya dodehe ọnọọkịla nya ịsọja ịịwa a ri ang ọ-kpa pyebile nya ala iJuu wuu pyịyọọ daalẹ chajị nya owuleji bwula igu nya iJisọsị lẹ.

¹⁶Ụka ọọwa, angịjụgbẹyị nya iJisọsị angị iwo kụrụ ookpokpo kele ka uhye nya Ọgbọdọ i-ịGalili ẹ-ẹga ọlẹ ká iJisọsị ayịdang byaa yẹkẹẹ, nyị kaka godayị gbe ọwa mẹ.

¹⁷Ụka ká angịjụgbẹyị nya iJisọsị ịwẹ pwụ ịGalili kị yẹ iJisọsị ụ-ụwa lẹ, ị juwa gbịgba họọ lẹlẹ. Ma, angịhyẹ lẹpwarịrị nyaa juwa la ịwẹẹ ọdada ẹ-ẹpwụ nya ọkịlẹtụ nyaa.

¹⁸Ịnyị, iJisọsị ayịdang a tụ jwaa chwẹẹ lẹ, ọ byaa yẹkẹẹ, “Ị ya ọngịrị myị́ ọngịrị olepwoohe bala olodehe wuu jum ụ-ụbwọ lẹ.

¹⁹Chajị nya ọọwa lẹ, anụ kpa ẹrụ ọnyịịla nyam ọlẹ kele kaka ya je angịnyị ilepwoja myị́ epwoja nya odehe ọlẹ wuu mẹ. Kanụ họ kịịwa ayịdang a ri angịjụgbẹyị nyam wuu ịnyịnyị mẹ. Kanụ juwa hwaa enyi Ohe la ẹnyị nya Ohe Oluhye Adịda, la ẹnyị nya Ọnyẹwẹ bala ẹnyị nya Olegu Ịgọgọ mẹ.

²⁰Kanụ juwa mẹ ang myị́ ang ọlẹ wuu kam danụ ehile wẹ jaa, chajị kị ka juwa kpa ehile nyam ịịwa họ ụkụrwọ mẹ. Anụ wo mẹ! M ka juwa tanụ ẹ-ẹga myị́ ẹga ụka wuu gbee pwụ ọbaba nya odehe ọlẹ lẹ.”