Read idege ỊMATIYU 3 Bible Online

ỊMATIYU 3 - idege bible

ỊMATIYU 3

¹Ụka ọọwa, ịJọn ọngọ hụ enyi Ohe rụ kele ka ugbileji nya iJudiya juwa ya ẹla nya Ohe Oluhye ju angịlẹ wuu kị bọọ kele ka ụwa.

²Egbeju nya ẹla nya Ohe Oluhye ọlẹ ká ịJọn juwa ya jaa ri yẹkẹẹ, “Anụ yẹ irya da bwu ẹpwụ nya ịhọbịrị ịhọhọ nyanụ wuu mẹ. Chajị ụka nya ịpyị-adịrahụ nya epwoohe ju chwẹẹ lụmẹ lẹ.”

³ỊJọn ọwẹ, Ayịsaya ọlọmwụ nya Ohe Oluhye a yẹ ọmwụ chajị nyamwụ ụ-ụpwụ ọlẹ kọ da lẹ. Ọ yẹkẹẹ, “Omyi nya ọngọhẹ lalẹẹ da ọna gboo u-ugbileji yẹkẹẹ, ‘Anụ angịnyị ehe wuu, anụ nwụ ọhịhị nyanụ rịrị kpakpakpa kọ pwoku ụgbẹyị nya ọhịhị nya Ọngọlahị mẹ. Kanụ juwa la ọhịhị ọlẹ kọ la kpụrụrụ ị-ịlahị nya Ọngọlahị ọlẹ kọọ wẹẹ ka warị, jaabwọ kị kaa nwụla ụgbẹyị ọchịpwụrụ bwu nya adịrahụ ọtụka-ọtụka nọ gbọọ mẹ.’ ”

⁴ỊJọn ọngọ hụ enyi Ohe kụrụ ịwụrụ ịlẹ kị kpa egbii nya ụnyịrẹ-ịkamẹlụ họ. Ugba nya iyo kem, ị kpa họ ugba ọ-chị ọhị nya ịJọn ọwẹ lẹ. Ang oriri nyamwụ ri ịyịrị bala inwa ọnẹnẹ.

⁵Ụka ọọwa, iru nya angịnyị lụmẹ-lụmẹ juwa kele ka ẹga nya ịJọn bwu iJerusalẹm bala ọpyị nya iJudiya wuu bala alepweji ịlẹ kị kụ dagaga ju Ihu ịJọdan wuu.

⁶Angịịwa ya ịhọbịrị ịlẹ kị họ dodehe je ịJọn. Ọọwa lẹ, ịJọn a hwaa enyi Ohe ẹ-ẹpwụ nya Ihu ịJọdan la ẹnyị nya Ohe Oluhye lẹlẹ.

⁷Ụka ká iru nya alegbeju nya ala iJuu ịhyẹ ịlẹ kị wụrụ ala ịFarịsii bala ala ịSadusii juwa ka ẹga nya ịJọn kọ ka hwaa enyi Ohe ịnyịnyị lẹ, ịJọn a byaa yẹkẹẹ, “Anụ angị byịbyị ọ-ọkịlẹtụ lala ịgbịjị ịwẹ lee! Oowo, a tị́ gbileenu ụbwọ ụ-ụrụ du kanụ lẹẹ yẹ gụrwẹ gụrwẹ hi agbama nya Ohe Oluhye tụtụm wẹẹ?

⁸Ọ hiigu. Ó-ri ịnyị lẹ aalẹ, anụ́-ụ juwa họ abwẹla ọnyịịla ọlẹ kọ ka mẹjẹ yẹkẹẹ, anụ nyị yẹ irya da bwu ẹpwụ nya ịhọbịrị ịhọhọ nyanụ wuu lẹ mẹ.

⁹Anụ pịrị ịlọnụ ju yẹkẹẹ, ịwa nyị tị́ kiji ri anyị nya Ebiraham riri lẹlẹ, ịwa nyị juwa ka be hi eje owuwu nya Ohe Oluhye u-uhye nya ịhọbịrị ịhọhọ nyịwa lẹ, ka! Chajị, m jam byinu yẹkẹẹ, ọ chị Ohe Oluhye kpẹẹ nyọka họ ká ajwọ ịlam-ịlam ka yẹ ri anyị nya Ebiraham myị́.

¹⁰Ị dọmwụ ya eje o-be ọwụ nọ ọ-ọmwụ nya okoji ọnyị myị ọnyị lẹ! Okoji ọlẹ kọ myị nwụ́ ugbe ọnyịịla ka aalẹ, Ọngọlahị ka kpa eje o-be ọwụ ọọwa hu okoji ọọwa latẹ latẹ, ene kọ ka hwọọ ju ka ẹpwụ nya ila wurum.

¹¹Am lẹ, m jam kpa enyi ọlam-ọlam hụnụ enyi Ohe la ẹnyị nya Ohe Oluhye kọ ka ri ang o-ju ẹjẹẹ yẹkẹẹ, anụ yẹ irya da bwu ẹpwụ nya ịhọbịrị ịhọhọ nyanụ wuu lẹ. Ma, ọngọhẹ ọlẹ kọ wẹẹ ka warị ẹ-ẹkpẹ nyam lẹ, Olegu Ịgọgọ bala ila, ọ ka kpa hụnụ enyi Ohe lẹ. Ọngọọwa ri ọngọ ọtụka gụm lụmẹ kaka kpoye. Lẹ, ḿ dọmwụ chịla ị-ịlahị nyamwụ kpụ, m ka kpa ugbẹtẹ nyamwụ họọ kpong-kpong ka.

¹²Ọngọọwa kpa ọngịrị nya eje ọlala nyamwụ ụ-ụbwọ lala ụda ọ-kpa hịrị ang. Ụka kọ kpa ụda nya eje ọlala ọọwa hịrị angịnyị ehe kpá wuu lala igbi lẹ, ọ ka go ịlẹ kị ri ajẹ kpa kaka gu u-ube lẹlẹ. Ọọwa lẹ, ọ ka go ịlẹ kị ri ewoo nyaa kpa kaka ju ka ẹpwụ nya ila ọtụka ọlẹ kọ ka jẹ́-ẹ mịrị kpá ẹnẹnẹhẹ myị́ kaka pyịyọọ lẹlẹ.”

¹³Ụka ọọwa, iJisọsị bwu ịGalili kele ka Ihu ịJọdan ka ẹga nya ịJọn ọngọ hụ enyi Ohe, chajị ká ịJọn ka hwọọ enyi Ohe ụ-ụwa ịnyịnyị.

¹⁴Ịnọ, ịJọn juwa tịtọ kọ ka da enyi Ohe ọhụhụ nya iJisọsị ọọwa yi. Chajị, ọ byi iJisọsị yẹkẹẹ, “Ayịbahị, am a chịla kam ka wẹ ẹga nyang kaka hụ enyi Ohe lẹ. Ọọwa a jam wẹ ẹga nyam kam ka hụng enyi Ohe dachichi lẹlẹ?”

¹⁵IJisọsị wẹ byọọ yẹkẹẹ, “ỊJọn, ba kọ la ịnyị mẹ ẹnwa! Chajị ọ chịla kahị ka họ ang myị́ ang ọlẹ kọ ri abwẹla ọnyịịla nya Ohe Oluhye ọhọhọ jịra pyii lẹ.” Ọọwa lẹ, ịJọn a myị ju iJisọsị lẹlẹ.

¹⁶Ahyaahị ká ịJọn hụ iJisọsị enyi Ohe Ihu ịJọdan kpá lẹ, iJisọsị a gba kpehe bwu ẹpwụ nya enyi lẹlẹ. Ụka ọọwa, epwoohe wụrụ hwoo ha iJisọsị lẹ, ọ yẹ Olegu Ịgọgọ kọ juwa hireji bwu uhye la abwụma nya enewulo kaka kwọọ u-uhye lẹlẹ.

¹⁷Ịnyị lẹ, omyi ọhẹ a juwa ya ẹla bwu epwoohe yẹkẹẹ, “Ọngọlẹ ri Ọnyẹwẹ nyam ọlẹ ká ẹla nyamwụ hám lụmẹ. Ang myị́ ang nya ọhịhị nyamwụ wuu kpụm ịpyọ lụmẹ.”