Read idege ỊMATIYU 4 Bible Online

ỊMATIYU 4 - idege bible

ỊMATIYU 4

¹Ịnyị, ụka ká Olegu nya Ohe Oluhye kpa iJisọsị kele ka ugbileji lẹ, Ohe Onyobyi a ma iJisọsị yẹ ụ-ụwa lẹlẹ.

²Ụ-ụwa, iJisọsị nọ limyi ha Ohe Oluhye lala ẹnụtụrụ ohu-iye gbẹgbịlẹ tụ odu tụ ẹnụ, ọ́ kpa ịngịngịhyẹ oriri ka ọnụ nyamwụ kpong-kpong ka. Ọọwa lẹ, imyi a juwa nwụ iJisọsị lụmẹ lụka ohyẹẹkpẹ lẹlẹ.

³Ịnyị, Ohe Onyobyi a kele ka ẹga nya iJisọsị lẹ, ọ byọọ yẹkẹẹ, “Ó-ri ahụ ká ri Ọnyị nya Ohe Oluhye ịnyịlẹhị lẹ aalẹ, a tị tị da ajwọ ịwẹ ehile kị yẹ la abẹ nya ịkaa hang ká ri mẹ!”

⁴Ụka ọọwa, iJisọsị wẹ byi Ohe Onyobyi yẹkẹẹ, “Ụpwụ Ịgọgọ yẹkẹẹ, a-ang oriri ọlam-ọlam ọlẹ ụbwọọmwụ, a kaa ya ọngịrị nya ọhịhị ha ọngịnyị ehe ka. Ma, ẹla myị́ ẹla ọlẹ wuu kọ bwu ọnụ nya Ohe Oluhye kpehe a kaa ya ọngịrị nya ọhịhị ha ọngịnyị ehe lẹ.”

⁵Ịnyị lẹ, Ohe Onyobyi a kpa iJisọsị kele kaka godayị rịrị a-achinege nya ube ịgọgọ ọtụka nya Ohe Oluhye nya ala iJuu ọlẹ kị nwụ e-epweji ọlịgọgọ nyaa lẹlẹ.

⁶Ụ-ụwa, Ohe Onyobyi byi iJisọsị yẹkẹẹ, “Ó-ri ahụ ká ri Ọnyị nya Ohe Oluhye ịnyịlẹhị lẹ aalẹ, a tụụbwọ hi ịlọng chabwọ bwu achinege nya ube ịgọgọ ọlẹ kele keji mẹ. Chajị, ị da ụ-Ụpwụ Ịgọgọ yẹkẹẹ,” “ ‘Ohe Oluhye ayịdang ka du alegu-ẹrụ nyamwụ ẹrụ kaka kpẹhị rịrịng. Alegu ẹrụ ịịwa ka kele kaka ya abwọ nyaa ke kị ka hung kpa u-uhye chekeee. Chajị ká ka ya ẹta nyang chị ẹjwọ kpẹng la ọngịrị-ọngịrị kpong-kpong ka.’ ”

⁷IJisọsị wẹ byọọ yẹkẹẹ, “Ụpwụ Ịgọgọ ya ẹ-ẹgẹhẹ ịnyịnyị yẹkẹẹ,” “ ‘A ma Ọngọlahị Ohe Oluhye nyang yẹ chajị nyọka ye Ohe Oluhye nyang ọọwa ẹla kpong-kpong ka!’ ”

⁸Ịnyị lẹ, Ohe Onyobyi a myịmyị kpa iJisọsị kele ka uhye nya ọgbọdọ ọtụka ọhẹ ọlẹ kọ la uhye lụmẹ lẹlẹ. Ọọwa lẹ, Ohe Onyobyi a mẹ ịpyị-adịrahụ nya odehe ọlẹ wuu bala ụdụ ọkpụkpụ ịtụka ịlẹpwụ nyaa bala ihi ọlala ịlẹpwụ nyaa wuu jẹ iJisọsị ụ-ụwa jaabwọ kị la kaka ba lẹlẹ.

⁹Ịnyị, Ohe Onyobyi a byi iJisọsị yẹkẹẹ, “Ó-ri kaahụ ayịdang á hirikpẹẹ ham ẹ-ẹpwụ nya ịgba ọgbagba aalẹ, m ka hu iru nya ịngịịwẹ wuu ká wẹẹ yẹ hang.”

¹⁰IJisọsị wẹ byọọ yẹkẹẹ, “Ahụ Ohe Onyobyi ọwẹ, tụ kele him pyii! Ụpwụ Ịgọgọ yẹkẹẹ,” “ ‘Ọngọlahị Ohe Oluhye nyang ụbwọọmwụ kem a ri ọngọlẹ ká ka raabwọ ha, juwa myị ẹrụ họọ ẹ-ẹpwụ nya ịgba ọgbagba ha kem ịnyịnyị lẹ.’ ”

¹¹Ịnyị lẹ, Ohe Onyobyi a rụ hi iJisọsị lẹ, alegu-ẹrụ nya Ohe Oluhye a kele ka ẹga nya iJisọsị juwa myị ẹrụ họọ ụ-ụwa lẹlẹ.

¹²Ụka ká iJisọsị wo yẹkẹẹ, nyị wu ịJọn ọngọ hụ enyi Ohe kpa kaka ju agba lẹ, iJisọsị a rụ ka ịGalili lẹlẹ.

¹³Ma, ụka ọlẹ kọ rụ kele ka ịGalili lẹ, ọ́ myịmyị kụ ụwa e-epweji nya ịNasareti kaka. Ị mwụ bwu ịNasareti rụ ka epweji nya ịKapẹnawụm. ỊKapẹnawụm ọọwa ju Ihu nya ịGalili chwẹẹ. Ọ ji koye nya ọpyị nya alimwawụ nya iSebulọn bala alimwawụ ịNafụtalị.

¹⁴Ọọwa ri ọ-họ jịra nya ẹla ọlẹ ká Ayịsaya ọlọmwụ ya ene-ene yẹkẹẹ,

¹⁵“Ahụ ọpyị nya iSebulọn bala ịNafụtalị ọlẹ ká ẹnyị ọkịla nyanụ ri ịGalili nya ala iJentayịlị, ọlẹ ká juwa o-oye ọlaanyị nya Ihu ịJọdan, ọlẹ kọ ji koye nya Ihu ọtụka-ọtụka ọkịlọlọ ọlẹ kị wụrụ iMeditareniya lẹ,

¹⁶anụ angịnyị ehe ịlụwa wuu ịlẹ kanụ juwa ẹ-ẹpwụ nya ukpowu ene-ene lẹ, anụ ka yẹ ahịgboo ọtụka-ọtụka ugbẹnyị lẹ. Anụ angịlẹ wuu kanụ juwa ẹ-ẹpwụ nya ukpowu okpem-kpem nya ikpokpo arụrụ nya igu ene-ene lẹ, ahịgboo ọtụka-ọtụka ka chị kụrụụnụ ugbẹnyị ịnyịnyị lẹ.”

¹⁷Bwu ụka ọọwa, iJisọsị juwa dọmwụ nya ẹla Ohe nyamwụ oyaya je angịnyị yẹkẹẹ, “Anụ angịnyị ehe wuu, anụ yẹ irya da bwu ẹpwụ nya ịhọbịrị ịhọhọ nyanụ wuu mẹ. Chajị ụka nya ọwẹwẹ nya ịpyị-adịrahụ nya epwoohe ju chwẹẹ lụmẹ lẹ.”

¹⁸Ụka ká iJisọsị juwa jẹ tụ ọnụụka nya ihu ọtụka ọkịlọlọ nya ịGalili da ịnyịnyịịnyị, ọ yẹ anyịnịna alẹng angị imiiye ịhyẹ ịlẹ kị wụrụ ịSayịmọn iPita bala Andụrụ. I juwa kpa ụgbọwụ nyaa da urwe enyi ẹ-ẹpwụ nya ihu ọtụka ọọwa, chajị, ị ri alurwe enyi.

¹⁹IJisọsị be ẹkọ wụrwaa, byaa yẹkẹẹ, “Anụ kẹwẹ kaka bam jẹ mẹ. Am ka họ kanụ ka ri angị da urwe nya angịnyị ogogo kpa wam lẹ.”

²⁰Ahyaahị ká ịSayịmọn bala Andụrụ wo ẹkọ obebe nya iJisọsị ọọwa lẹ, ị tụụbwọ hi ụgbọwụ nyaa ịịwa lẹ, ị ba iJisọsị jẹ ịnyịlẹhị lẹlẹ.

²¹Ụka ká iJisọsị myịmyị bwu ẹgẹwẹ jẹ chẹẹ, ọ yẹ anyịnịna alẹng imiiye ịkịla ịlẹ ká ẹnyị nyaa ri iJemsi bala ịJọn anyị nya iSebidi. I juwa ẹ-ẹpwụ nya ụmwụ nya enyi nyaa bala iSebidi adaa, juwa kpa ụgbọwụ nyaa ọlẹ kọ bịrị nwụla. Ọọwa lẹ, iJisọsị a be ẹkọ wụrwaa ịnyịnyị lẹlẹ.

²²Ịnyị lẹ, ịwa angị imimiiye a tụụbwọ hi ụmwụ nya enyi nyaa bala iSebidi adaa ụ-ụwa lẹ, ị ba iJisọsị jẹ ahyaahị ịnyịlẹhị lẹlẹ.

²³Ụka ọọwa, iJisọsị juwa ga tụ ẹga myị́ ẹga nya ọpyị nya ịGalili da juwa mẹ ang jẹ e-ebe ị-mẹ ẹla nya Ohe Oluhye jẹ nya ala iJuu ịlụwa ịnyịnyịịnyị. Ọ juwa ya ẹrụ ọnyịịla dodehe rụ́ ang chajị nya ịpyị Adịrahụ nya epwoohe. Ọ juwa họ angịnyị uda nya ụma nya ẹdụrụ myị́ ẹdụrụ ọlịnyịrọ bala olegu onyobyi la datị-datị ụ-ụwa ịnyịnyị.

²⁴Ịnyị lẹ, oja chajị nya ụkụrwọ ẹbyẹbyị ọlẹ ká iJisọsị juwa họ ụ-ụwa a ru ohi ju ka ọpyị nya ala iSiriya wuu lẹlẹ. Ọọwa lẹ, angịnyị a juwa kpa iru nya alẹdụrụ la datị-datị kele ka ẹga nya iJisọsị lẹlẹ. Angịhyẹ nyaa kị ji ẹpwụ nya akama bala ang ọjụjụ la datị-datị lala angịlẹ ká alegu inyibyi wu bala angịlẹ kị kpoyi bala angịlẹ wuu ká une nya ịnyịrọ nyaa ọhẹ gbu ba. Ọọwa lẹ, iJisọsị a haa ịwa wuu uda lẹlẹ.

²⁵Ịnyị, iru nya angịnyị lụmẹ-lụmẹ a juwa ba iJisọsị jẹ lẹlẹ. Ị bwu ẹga la datị-datị lala ịGalili bala iDikapolisi ọlẹ ká etu nyamwụ ri epweji iwo chiriri bala iJerusalẹm bala iJudiya bala epweji ịkịla ịlẹ kị kụ o-oye nya Ihu ịJọdan ịnyịnyị.