Read idege ỊMATIYU 5 Bible Online

ỊMATIYU 5 - idege bible

ỊMATIYU 5

¹Ẹnẹhẹ ká iJisọsị yẹ iru nya angịnyị kị juwa dịrọọ, ọ kpụ uhye ka ọka nya ikiti ọhẹ lẹ, ọ hụhụ lẹlẹ. Angịjụgbẹyị nyamwụ kụ dagaga jwọọ.

²Ọọwa, ọ dọmwụ nyọka mẹ ang jaa lẹlẹ. Ọ mẹ ang jaa yẹkẹẹ,

³“Angịlẹ kị ri okpehika ẹ-ẹpwụ nya olegu nyaa, angịịwa ka pyẹẹẹ. Ịpyị-adịrahụ nya epwoohe ri nyaa!

⁴Angịlẹ kị juwa bida, angịịwa ka pyẹẹẹ. Ohe Oluhye ka kpaa ẹjẹ!

⁵Angịlẹ kị la dụmwọ ẹ-ẹpwụ nya ọkịlẹtụ, angịịwa ka pyẹẹẹ. Ịwa-à ka la odehe ọlẹ wuu lẹ!

⁶Angịlẹ ká imyi bala imyi-enyi nyọka họ ang ọnyịịla juwa nwụ, angịịwa ka pyẹẹẹ. Ohe Oluhye tị̀tị ka ya ang ịnyịịla haa nwaa ụga!

⁷Angịlẹ kị kaa yẹ angịnyị ehe aanaa ahyẹẹrwẹrwa, angịịwa ka pyẹẹẹ. Ohe Oluhye ka yaa ahyẹẹrwẹrwa!

⁸Angịlẹ kị la owuru ẹ-ẹpwụ nya ọkịlẹtụ nyaa, angịịwa ka pyẹẹẹ. Ịwa-à ka yẹ Ohe Oluhye ẹ-ẹhị lẹ!

⁹Angịlẹ kị kaa họ ká angịnyị aanaa kaa hụ ta awụlẹ lokpunyi, angịịwa ka pyẹẹẹ. Ịwa ị ka wụrụ anyị nya Ohe Oluhye lẹ!

¹⁰Angịlẹ kị juwa taa pyịpyị o-oluhye nya ọ-họ ang ọnyịịla ọlẹ ká Ohe Oluhye tịtọ, angịịwa ka pyẹẹẹ. Ịpyị-adịrahụ nya epwoohe ri nyaa!”

¹¹“Anụ ka pyẹ̀ẹẹ ụka ká angịnyị á juwa doonu, juwa tụụnụ pyịpyị bala o-juwa me ịnịịkịla la datị-datị baanụ ododu, chajị nyọlẹ kanụ ri angịnyị nyam.

¹²Ụka kị juwa họnụ ịnyị lẹ aalẹ, anụ-ụ̀ juwa chị ọkẹkẹnị okpori-kpori mẹ, chajị uri nyanụ lụmẹ ụ-ụwa e-epwoohe lẹ. Ịwẹ-ịịwẹ ị kpa alọmwụ inyogo nya Ohe Oluhye họ lẹ.”

¹³IJisọsị byi angịjụgbẹyị nyamwụ yẹkẹẹ, “Anụ ayịdang a ri ịpyọ ọlala ha ọhịhị nya alodehe jaabwọ ká ịma ri ịpyọ ọlala nya ang oriri lẹ. Ma, ó-ri ká ịma á gba ịpyọ ọlala nyamwụ daarụ hi ịlọmwụ lẹ, ale, ịma a tị́ ka jẹ́-ẹ ye ịpyọ ọlala nyamwụ bwu myịmyị wẹẹ? Aalẹ, ọ́ ka ju apyobwuna nya ịngịngịhyẹ kaka. Kẹnẹ-kẹnẹ, ọ-tụụbwọ hyọọ hụrụ ká angịnyị ehe ka kpa ata nyaa ba ododoodu ụbwọọmwụ mẹ ịnyị.”

¹⁴“Anụ ayịdang a ri otinika o-hu ahịgboo ha ọhịhị nya alodehe ọlẹ jaabwọ ká ẹnụ oluhye-ọgba wẹẹ hu ahịgboo ha odehe wuu lẹ. Anụ tị́ jẹ́ lẹ, epweji ọlẹ kọ kụ uhye nya ọgbọdọ á jẹ́-ẹ kpụ ịlọmwụ ịbaa myị́ kaka.

¹⁵Ọngọngọhẹ a tị kaa ya ila ju otinika nyamwụ wuu, ọ kaa hu otinika ọọwa kpa kaka kpịbaa ẹ-ẹpwụ nya iboketi nya enyi nyamwụ ka. Ma, ọkọkọ nya ọọwa lẹ, ọ kaa hwọọ kpa kaka rịrị u-uhye nya itebwuru nya otinika ẹ-ẹga kọ ka hu ahịgboo ha angịlẹ wuu kị juwa u-ube.

¹⁶Ịnyịnyị, ọ chịla kanụ ka họ ká ahịgboo nya abwẹla ọnyịịla ọhọhọ nyanụ ka juwa wuru ị-ịlahị nya angịnyị ehe wuu, chajị kị ka yẹ ụkụrwọ ọnyịịla nyanụ, kị ka juwa gwogbo ha Ohe Oluhye Adanụ olepwoohe lẹ.”

¹⁷IJisọsị byaa yẹkẹẹ, “Anụ me kam warị nyọka tụ ehile nya iMosisi ku bala ang ọmẹjẹ nya alọmwụ inyogo nya Ohe Oluhye? Ehe! Ḿ warị nyọka taa ku ka! Ma, m warị chajị kam ka họ ká etu nya ang ọmẹjẹ nyaa ịịwa ka họ jịra ịnyị.

¹⁸Nya ịlẹhị-ịlẹhị m byinu yẹkẹẹ, jaabwọ myị́ abwọ ká epwoohe bala odehe ọlẹ á juwa tata ka ba, ụpịlẹ lee ụbẹẹtụ nya ehile bala ọmẹjẹ nya alọmwụ ịịwa wuu ọhẹ-lọhẹ á ka chị deeji la ọ-ka họ jịra kaka, gbee pwụ ọ myịmyị nya ang wuu.

¹⁹Chajị nya ọọwa lẹ, ọng myị́ ọng ọlẹ kọ ka tụụbwọ hi ụgbẹyị nya ehile nya Ohe Oluhye ọhẹ-lọhẹ deeji pyịnyẹng kụrụ, kọ ka juwa kpa ụgbẹyị nya ahị ọhụhụ nyaa kaka mẹjẹ angịkịla ịnyịnyị lẹ aalẹ, ọngọọwa a ka ri ọhịnyẹnyẹ kpá wuu ị-ịpyị-adịrahụ nya epwoohe lẹlẹ. Ma, ọng myị́ ọng ọlẹ kọ ka juwa ju ehile nya Ohe Oluhye ihi jịra, kọ juwa mẹ ehile ọọwa jẹ angịkịla ịnyịnyị aalẹ, ọngọọwa ka ri ọngọ ọtụka-ọtụka ị-ịpyị Adịrahụ nya epwoohe.

²⁰Anụ wo myịmyị mẹ. Kẹnẹ-kẹnẹ, ó-ri ká abwẹla ọnyịịla ọhọhọ nyanụ anụ á chịla ị-ịlahị nya Ohe Oluhye gụ ịnya ịtịcha ị-mẹ ehile nya iMosisi jẹ bala ala ịFarịsii ịwẹ kpong-kpong ka aalẹ, ánụ ka jụ ka ẹpwụ nya ịpyị-adịrahụ nya epwoohe myị́ kaka.”

²¹IJisọsị myịmyị yẹkẹẹ, “Anụ tị́ wo jaabwọ kị da angị inyogo ehile ene-ene yẹkẹẹ, ‘A nwụ ọngịnyị ka. Ọng myị́ ọng ọlẹ kọ nwụ ọngịnyị aalẹ, ị́ ka dayi la ọ-la ọngọọwa eje, ịị ya eje wọọ kaka.’

²²Ma, am kpakpakpa jam byinu yẹkẹẹ, ọng myị́ ọng ọlẹ ká ọngịnyị ọọnamwụ á wụ ẹjẹ aalẹ, Ohe Oluhye á ka dayi la ọ-la ọngọọwa eje, ọọ ya eje wọọ kaka. Ọng myị́ ọng ọlẹ kọ ju ọngịnyị ehe ọọnamwụ ẹpẹ, juwa dọọ ido yẹkẹẹ, ‘Ahụ ọngọ hi deeji ọwẹ,’ aalẹ, ị́ ka dayi la ọwụrụ ọngọọwa eje ka ijata nya ala ịkọtụ nya eje ọgụgụ wuu kaka. Ọng myị́ ọng ọlẹ kọ do ọngịnyị ehe ọọnamwụ ido juwa wụrụ ọngọọwa ólukpilo nya ọngịnyị, aalẹ, ọngọ do ido ọwẹ ayịdang juwa ẹ-ẹpwụ ọnụ nya obwila lẹ.

²³Ụka myị́ ụka ká juwa ka kpa ọhaha ọhẹ-lọhẹ kele kịlahị nya ogidi ọkịla iya nya Ohe Oluhye, ká kpịtịya nya ịngịngịhyẹ ọlẹ ká họ tịpyọ ẹ-ẹga nya ọngọngọhẹ ọkịla lẹ,

²⁴aalẹ, aa tụụbwọ hi ọhaha nyang ọọwa nụwa ọ-ọka kem, ká kele kaka họ okpunyi bala ọngọọwa hiigu-hiigu, ene ká ka tịrẹkpẹ kaka hu ọhaha nyang ọwẹ ha Ohe Oluhye mẹ.”

²⁵“Ahụ ọngọ kpa eje e-egbeju, wo mẹ. Chị agaga kaka họ okpunyi bala ọlẹla nyang ọọwa ụ-ụgbẹyị ene kanụ ka pwụ ube nya eje mẹ. Ó-ri ịnyị ka, kọ ri kọ kpang pwụ ube nya eje ene lẹ aalẹ, ọngọ la eje a ka lang eje, ya eje wung, hung ju olegbeju nya ube nya agba ụ-ụbwọ lẹ, ọ ka kpang rụ kaka ju agba lẹlẹ.

²⁶U-ube nya agba ọọwa, a ka ji gbee pwụ ụka ọlẹ ká ka nwụ uri nya okpoko ọlẹ wuu kị tịtọ ká ka nwụ ene ká ka kpehe bwu ụwa myị́ lẹlẹ.”

²⁷IJisọsị myịmyị byaa yẹkẹẹ, “Anụ wo kị da e-ehile nya iMosisi ene-ene yẹkẹẹ, ‘A họ ụya ka.’

²⁸Ma, am kpakpakpa jam byinu yẹkẹẹ, ọng myị́ ọng ọlẹ kọ chẹhị kaka yẹ ọnyang ọkịla ẹhyang ẹhyang lẹ aalẹ, ọngọọwa họ ụya tọ ọnyang ọọwa ẹ-ẹpwụ nya irya nya ọkịlẹtụ nyamwụ kpá wuu ene-ene lẹ.

²⁹Anụ wo mẹ, ó-ri ugbẹhị upwuriri nyang kọ wẹẹ ka kpang kaka wu ori nya ọhọbịrị ọhọhọ lẹ aalẹ, aa gbọọ daarụ hi ịlọng mẹ. Chajị, ọ ka hiigu hang gụ, ó-ri ká ri ọngọ bwuru ẹhị ookpokpo, gụ ọ-ka juwa la egbahị imimiiye jịra ká tị ka ka ẹpwụ nya obwila lụka ohyẹẹkpẹ.

³⁰Ọ́ tị ri upwuriri nyang kọ wẹẹ ka kpang kaka wu ori nya ọhọbịrị ọhọhọ lẹ aalẹ, a chọọ eku daarụ hi ịlọng mẹ. Chajị ọ ka hiigu hang gụ, ó-ri ká ri oleku ụbwọ, gụ ọ-ka juwa laabwọ nyang imimiiye jịra ká tị ka ka ẹpwụ nya obwila lụka ohyẹẹkpẹ.”

³¹IJisọsị myịmyị byaa yẹkẹẹ, “Anụ wo kị da e-ehile nya iMosisi ene-ene yẹkẹẹ, ‘Ene ká ọrụ-ahụ ọnyị myị ọnyị ka pwa ahụ nyamwụ, ọ ka da ụpwụ ọ-pwa ahụ pwa ha ahụ nyamwụ ọọwa nya ang ibeenu pyii ene.’

³²Ma, am kpakpakpa jam byinu yẹkẹẹ, ọrụ-ahụ ọnyị myị ọnyị ọlẹ kọ pwa ahụ nyamwụ lẹ aalẹ, ọlẹng ọọwa a wẹẹ du ahụ nyamwụ ọọwa ẹrụ kele kaka họ ụya lẹlẹ, kọ ri ká ụya ọhọhọ á ri abwẹla ọhọhọ nya ahụmwụ ọọwa ene ka. Ọlẹng ọnyị myị ọnyị ọlẹ kọ kele kaka ye ahụ ọlẹ kị pwapwa ịnyị lẹ aalẹ, ụya a wẹ ká ọlẹng ọọwa họ ịnyịnyị lẹlẹ.”

³³IJisọsị myịmyị byaa yẹkẹẹ, “Anụ wo jaabwọ kị da angị inyogo ehile ene-ene yẹkẹẹ, ang myị́ ang ọlẹ ká ọngịnyị á myị ọnụ ha Ohe Oluhye u-uhye nyamwụ ẹ-ẹpwụ nya iro ọnwanwa ene lẹ aalẹ, ọ́ ka dayi la ọ-họ ang ọọwa jịra pyii kaka.

³⁴Ma, am kpakpakpa jam byinu yẹkẹẹ, anụ nwa iro kpong-kpong ka. Anụ kpa ẹnyị nya epwoohe nwa iro kpong-kpong ka. Chajị epwoohe a ri ẹchị Adịrahụ nya Ohe Oluhye lẹ.

³⁵Anụ kpa ẹnyị nya odehe ọlẹ nwa iro kpong-kpong ka. Chajị odehe ọlẹ a ri ẹga ọ-ya ẹta rịrị nya Ohe Oluhye lẹ. Anụ kpa ẹnyị nya epweji nya iJerusalẹm nwa iro kpong-kpong ka. Chajị iJerusalẹm ọwẹ a ri ẹpwa-ụtụrụ nya Adịrahụ ọlẹ kọ gụ ịdịrịhụ ịkịla wuu lẹ.

³⁶Anụ dọmwụ kpa egbeju nya ịlọng nwa iro kpong-kpong ka ịnyịnyị. Chajị ánụ a ka jẹ́-ẹ họ inyi nya ịlọnụ ọhẹ-lọhẹ o-olowuru lee, olobiri myị́ kpong-kpong ka.

³⁷Anụ myị ká ẹla myị́ ẹla ọmyịmyị nyanụ wuu a ri, ‘Ee’ kem, ká ẹla ọpwapwa nyanụ ọnyị myị ọnyị wuu a ba, ọọ ‘Ehe’ kem, ịnyịnyị mẹ. Ó-ri kanụ ya ẹlẹlẹhẹ ọkịla kpoye nya ọwẹ lẹ aalẹ, ọ ri ọhọbịrị lẹ.”

³⁸IJisọsị myịmyị byaa yẹkẹẹ, “Anụ wo kị da e-ehile nya iMosisi ene-ene yẹkẹẹ, ugbẹhị nyaa ka kwiwa nya ugbẹhị lẹ. Ẹngịrị nyaa ka kwiwa nya ẹngịrị ịnyịnyị lẹ.

³⁹Ma, am kpakpakpa jam byinu yẹkẹẹ, anụ họ ọngọngọhẹ ịngịngịhyẹ kwiwa nya ang onyobyi ọlẹ kọ họnụ kpong-kpong ka. Ó-ri ká oluji nyang á wang-abwọ ụbaa olupwuriri nyang aalẹ, aa ji ụbaa ọlụpụpịla nyang dọọ kọ myịmyị wang-abwọ ụ-ụwa ịnyịnyị mẹ.

⁴⁰Ó-ri ká oluji nyang á da ụpwụ wung, kpang ka ịkọtụ chajị kọ ka nung awụrụ ochiche olekpeleji nyang aalẹ, a pwọ awụrụ oluhye ogbileji nyang ba ochiche u-uhye ha ọngọọwa ịnyịnyị mẹ.

⁴¹Ó-ri ká olegbeju ọtụka nya ọngịrị ọnyị myị ọnyị á tọng ụ-ụgbẹyị kọ wung la agbụrụ yẹkẹẹ, ahụ nyị kpa olo ta ọwa lala ịmaalị ookpokpo mẹ aalẹ, aa kpa tọọ lala ịmaalị imiiye.

⁴²Ahụ ọngọ la ang, ọng myị́ ọng ọlẹ kọ bịlẹng ang, a ya ang ọọwa ga ha ọngọọwa mẹ. Ọng myị́ ọng ọlẹ kọ tịtọ nya ang ọkpịla kpịla warị wẹ ẹga nyang, aa ya kpịla ọngọọwa ịnyịnyị.”

⁴³IJisọsị myịmyị byaa yẹkẹẹ, “Anụ wo jaabwọ kị da e-ehile nya iMosisi ene-ene yẹkẹẹ, ‘Aligu nyang a háng ka ẹpwụ ọkịlẹtụ nyang, ká aluji nyang wuu a wụng ẹjẹ.’

⁴⁴Ma, am kpakpakpa jam byinu yẹkẹẹ, aluji nyanụ a háanụ ka ẹpwụ ọkịlẹtụ nyanụ wuu, kanụ juwa raabwọ ha Ohe Oluhye chajị nya angịlẹ wuu kị juwa tụụnụ pyịpyị ịnyịnyị,

⁴⁵chajị kanụ ka mẹjẹ angịnyị wuu yẹkẹẹ, anụ ayịdang nyị ri anyị nya Ohe Oluhye Adanụ olepwoohe ịnyịlẹhị mẹ. Anụ tị yẹ jaabwọ ká Ohe Oluhye Adanụ ayịdang kaa chị ẹnụ bala o-do enyi ha alabwẹla ọnyịịla bala alabwẹla onyobyi ị-ịlahị nyamwụ meme wẹ lẹ.

⁴⁶Chajị ó-ri kanụ juwa la ọháha u-uhye nya angịlẹ kị juwa la ọháha ẹ-ẹga nyanụ kem lẹ, ịịyẹ Ohe Oluhye a tị́ ka nwụnụ uri nyamwụ tịtị mẹ? Ánụ́ jẹ́ yẹkẹẹ, ụma nya ọháha ọlala o-kwiwa ọlịịwẹ, angị nyẹ angịnyị ẹpwa ịlẹ kanụ wẹẹ ju ẹpẹpẹ lala alọhọbịrị nyaa la ịnyịnyị ka-á?

⁴⁷Ó-ri kọ ri aligu aligu nyanụ kem, kanụ juwa da ọnụ chị, juwa ya ẹla ọgẹnẹ-gẹnẹ taa ịwa kem ịnyịnyị aalẹ, ịịyẹ a tị́ ka ri ang ọdatị ẹ-ẹga nya ọhịhị nyanụ bala ọhịhị nya angịlẹ kị jẹ́ Ohe Oluhye kpong-kpong ka? Ọ-ọhịhị nya ọháha oye-oye ọlala ọlịnyịnyị, angịwẹ a kaa la ka-á?

⁴⁸Chajị nya ọọwa lẹ, ọ chịla kanụ ka la ọhịhị ọkpẹẹkpẹẹ nya ọháha ọlala nya Ohe Oluhye Adanụ olepwoohe lala ọwa ayịdang ịnyịnyị pyii lẹ.”