Read idege ỊMATIYU 6 Bible Online

ỊMATIYU 6 - idege bible

ỊMATIYU 6

¹IJisọsị myịmyị byaa yẹkẹẹ, “Ma, anụ́-ụ kpahị ju ịlọnụ ọgwọgụ chajị kanụ ka juwa họ ụkụrwọ nya abwẹla ọnyịịla nyanụ ị-ịlahị nya aluche chajị ká angịnyị ehe ka jẹẹnụ u-uhye nya ọọwa kpong-kpong ka. Chajị ó-ri kanụ juwa họ ọnahị nyanụ ị-ịlahị nya aluche aalẹ, ánụ ka ye uri nya ụkụrwọ ịịwa bwu ẹga nya Ohe Oluhye Adanụ olepwoohe kpong-kpong kaka.”

²“Chajị nya ọọwa lẹ, ụka myị́ ụka kanụ juwa tịtọ kanụ ka họ okpehika ọhẹ-lọhẹ ọnahị bwula ụbwọ ọdada aalẹ, anụ họ ịnyị u-ugbọdọda lee ọ-kpa da ọna ká angịnyị a jẹ́ ka. Chajị ịịwẹ, angịlẹ kị ri alahị imiiye a kaa họ u-ube ọ-mẹ ẹla nya Ohe Oluhye jẹ nya ala iJuu lẹ. Alahị imiiye ịwẹ kaa họ ụkụrwọ ọnahị nyaa ịwa ụ-ụgbẹyị uche nya angịnyị wuu, chajị ká angịnyị ka waa nya alabwẹla ọnyịịla u-uhye nya ọọwa. Nya ịlẹhị-ịlẹhị, m byinu yẹkẹẹ, uri nyaa a wẹ kị wẹẹ ye wuu lẹlẹ.

³Ma ahụ lẹ, ụka ká upwuriri nyang á juwa họ ụkụrwọ ọnahị, a myị ká ụpụpịla nyang ahu jẹ́ kpong-kpong ka.

⁴Chajị ká ụkụrwọ ọnahị nyang ọọwa ka ri ang ịbaa-ịbaa mẹ. Ụka ọọwa, Ohe Oluhye Adang ọlẹ kọ ri Ọngọ jẹ́ ang ịbaa-ịbaa ka nwụng uri nya ụkụrwọ ọnahị nyang ọọwa u-ugbọdọda pyii la ịlọmwụ lẹ.”

⁵IJisọsị myịmyị byaa yẹkẹẹ, “Ụka myị́ ụka kanụ ka raabwọ ha Ohe Oluhye, anụ họ lala alahị imiiye ka. Chajị alahị imiiye ịwẹ kaa kele kaka godayị rịrị u-ube ọ-mẹ ẹla nya Ohe Oluhye jẹ nya ala iJuu lee ogodayị rịrị ụ-ụgbẹyị uche nya angịnyị chajị ká angịnyị á yaa lẹ, kị ka jaa nya angị kaa raabwọ myị́. Nya ịlẹhị-ịlẹhị, m byinu yẹkẹẹ, uri nyaa a wẹ kị wẹẹ ye wuu lẹlẹ.

⁶Ma, ahụ lẹ, ụka ká ka raabwọ ha Ohe Oluhye lẹ, aa rụ kele ka ẹpwụ nya ikwowe nyang, ká tụ ụgbẹyị ku ịlọng, ká ka raabwọ ha Ohe Oluhye Adang ị-ịbaa-ịbaa mẹ. Aalẹ, Ohe Oluhye Adang ọlẹ kọ ri Ọngọ jẹ́ ang ịbaa wuu ka nwụng uri u-ugbọdọda lẹ.”

⁷“Anụ lẹ, ụka kanụ juwa raabwọ ha Ohe Oluhye, anụ juwa ma ẹla ookpokpo ya gbegbegbe jaabwọ ká angị jẹ́ Ohe Oluhye-ka, ịwẹ kaa họ ka. Chajị ịwa ayịdang me irya yẹkẹẹ, Ohe Oluhye nyị ka wo omyi nyịwa bwula abwọ ọrịrị onyudiyo.

⁸Anụ họ lala ịwa koo. Chajị ene kanụ ka bịlẹ ịngịngịhyẹ bwu ẹpwụtụbwọ nya Ohe Oluhye kpá lẹ, Ohe Oluhye Adanụ ayịdang jẹ́ ang ọọwa kpá ene-ene lẹ.

⁹Ịịlẹ anụ ka bwu raabwọ ha Ohe Oluhye lẹlẹ:” “Adahị ọlẹ ká juwa e-epwoohe, kahị chị ịgọgọ ju ẹnyị nyang,

¹⁰ká ịpyị-adịrahụ nyang a wẹ odehe ọlẹ. Kahị họ irya nyang odehe ọlẹ jaabwọ kọ la ụ-ụwa epwoohe.

¹¹Ya ang oriri hahị alẹ, ọlẹ kọ ka nwahị alẹ.

¹²Hịnyọhi uri nya ịhọbịrị ịlẹ kahị họ bang wuu hahị, jaabwọ kaahị ayịdang kaa hịnyọhi ha angịlẹ kị kaa họ ang onyobyi baahị ahị ịnyịnyị.

¹³A myị kahị kpa ụbwọ ka ẹpwụ nya ọmayẹ nya Ohe Onyobyi ọhẹ-lọhẹ ka. Ma, gbahị ụbwọ kpehe hi ẹpwụ nya ang onyobyi ọhọhọ.”

¹⁴IJisọsị myịmyị yẹkẹẹ, “Chajị ó-ri kanụ juwa hịnyọhi ịhọbịrị nya angịlẹ kị họ ang onyobyi baanụ haa aalẹ, Ohe Oluhye Adanụ tịtị ka hịnyọhi ịhọbịrị nyanụ anụ hanụ ịnyịnyị lẹ.

¹⁵Ọ́ tị ri kanụ myị juwa hịnyọhi ịhọbịrị nya angịnyị ehe aananụ ịkịla haa ka aalẹ, Ohe Oluhye Adanụ á tịtị ka hịnyọhi ịhọbịrị nyanụ anụ hanụ ka ịnyịnyị.”

¹⁶IJisọsị myịmyị byaa yẹkẹẹ, “Ụka myị́ ụka kanụ juwa nọ limyi ha Ohe Oluhye nyanụ, anụ bwọ ayiiji, juwa pyị ahị kpanya-kpanya lala alahị imiiye ka. Chajị ụka ká alahị imiiye ịwẹ á juwa nọ limyi ha Ohe Oluhye, ị kaa kpa ịlaa rwee, juwa pyị ahị nyaa kpanya-kpanya, chajị ká ọng myị́ ọng ka jẹ́ yẹkẹẹ, nyị juwa nọ limyi lẹ. Nya ịlẹhị-ịlẹhị, m byinu yẹkẹẹ, uri nyaa a wẹ kịị wẹẹ ye wuu lẹlẹ.

¹⁷Anụ lẹ, ụka kanụ ka nọ limyi ha Ohe Oluhye, anụ́-ụ hyo enyi kpeng-kpeng, kanụ gu ida wụ gbịlẹ-gbịlẹ, kanụ hwo inyi nyanụ hiigu-hiigu ịnyịnyị mẹ.

¹⁸Chajị ká angịnyị ehe á ka jẹ́ datị yẹkẹẹ, anụ nyị juwa nọ limyi ha Ohe Oluhye lẹ kaka mẹ. Kẹnẹ-kẹnẹ, Ohe Oluhye Adanụ ayịdang ọlẹ kọ kpịbaa hi ẹhị nya ọngịnyị ehe ụbwọọmwụ a ka jẹ́ lẹlẹ. Aalẹ, Ohe Oluhye Adanụ ọlẹ kọ kaa yẹ ang ịbaa-ịbaa a ka nwụnụ uri nyamwụ la ịlọmwụ lẹlẹ.”

¹⁹IJisọsị myịmyị byaa yẹkẹẹ, “Anụ tụ ụdụ nyanụ anụ guru ám odehe ọlẹ ka. Chajị ụdụ olodehe ọlẹ kaa ru ịrụ myị́, ikiriwewe kaa ryaa myị́, ị kaa chị ẹga myị́, aloyi tị ka kele kaka gaa yoyi kpa rụ myị́ ịnyịnyị.

²⁰Ọkọkọ nya ọọwa lẹ, anụ nwụla ụdụ nyanụ nọ kele ka epwoohe, ẹ-ẹga ọlẹ ká ikiriwewe á ka jẹ́-ẹ kele kaka ryaa myị́ ụ-ụwa kaka. Lee, ega ọchịchị ọ-ka jẹ́-ẹ bịraa kaka. Lee, aloyi ọ-ka jẹ́-ẹ kele kaka gaa yi oyi kpa rụ myị́ kaka ịnyịnyị.

²¹Chajị ẹga myị́ ẹga ọlẹ ká ụdụ nya ọngịnyị á ji lẹ, ụ-ụwa, irya nya ọkịlẹtụ nyamwụ, ọọwa ayịdang wuu a kaa ji ịnyịnyị lẹlẹ.”

²²IJisọsị myịmyị byaa yẹkẹẹ, “Ugbẹhị ọlẹpwụ ẹhị nyanụ ọwẹ a ri otinika ọ-kpa yọyị ha ugbinyịrọ nyanụ wuu lẹ. Chajị nya ọọwa lẹ, ụka ká ugbẹhị nyanụ ọọwa á la kpakpa lẹ aalẹ, ahịgboo nyamwụ a kaa chị wu ẹga myị́ ẹga nya ugbinyịrọ nyanụ ịnyịnyị lẹlẹ.

²³Ọ́ tị ri ká ugbẹhị nyanụ ọọwa á tị la kpakpa kaka lẹ, ukpowu nyamwụ a kaa chị wu ẹga myị́ ẹga nya ugbinyịrọ nyanụ ịnyịnyị lẹlẹ. Ịnyịnyị, ugbẹhị nya olegu nyanụ a ri otinika ha ugbinyịrọ nyanụ lẹlẹ. Lẹ, ó-ri ká ahịgboo nya olegu ọlẹpwụ nyanụ ọọwa á yẹ la ukpowu lẹ aalẹ, ukpowu onyobyi ọtịyẹ tịyẹ ọtụka, ịnyanụ anụ a ka ri tị tị lẹlẹ.”

²⁴IJisọsị myịmyị byaa yẹkẹẹ, “Ọnchẹ ookpokpo á ka jẹ́-ẹ juwa myị ẹrụ ha ayịbaba imiiye lụka ookpokpo myị́ kpong-kpong ka. Chajị, ó-ri kọ họ ịnyị aalẹ, ayịbaba ọhẹ ka họ́ọ. Ma, ayịbaba ọkịla tị ka wọọ ẹjẹ. Ọ ka ju ọngọhẹ nyaa ihi. Ma, ọ ka ju ọngọkịla nyaa ẹpẹ ịnyịnyị pyii lẹ. Ịnyịnyị, ọ la lẹ. Ánụ́ ka jẹ́-ẹ juwa myị ẹrụ ha ụdụ nya odehe ọlẹ lala ọnchẹ, anụ ka myịmyị jẹ́-ẹ juwa ju Ohe Oluhye ihi kpẹẹkpẹẹ myị́ kpong-kpong kaka.”

²⁵IJisọsị myịmyị byaa yẹkẹẹ, “Chajị nya ọọwa lẹ, m juwa byinu yẹkẹẹ, anụ juwa nwụ ịlọnụ la imahị chajị nya ọhịhị ọlẹ kpong-kpong ka. Anụ chị uko nya ang oriri ọlẹ kanụ ka ri lee ọ-chị uko u-uhye nya ang ọnwanwa nyanụ bala ịwụrụ ịkụrụ-kụrụ nyanụ kpong-kpong ka ịnyịnyị. Lee, ánụ tị́ jẹ́ yẹkẹẹ, ọhịhị nya ọngịnyị ehe nyaa baba gụ ang oriri lẹ ka? Lee, ánụ tị́ jẹ́ ịnyịnyị yẹkẹẹ, ugbinyịrọ nya ọngịnyị ehe ayịdang nyaa baba gụ awụrụ ọkụrụ-kụrụ nyamwụ ịnyịnyị lẹ ka?

²⁶Anụ me irya chajị nya ịchịnụ iluhye-ọgba wẹẹ. Anụ dọmwụ yẹ ọchịnụ ọhẹ-lọhẹ kọ kaa wu ẹrụ lee o-juwa tọ ang ẹ-ẹrụ lee o-juwa hu ang bwu ẹrụ nyamwụ kpa kaka gu ukuna nyamwụ kpong-kpong ẹnẹnẹhẹ lẹ? Ma, Ohe Oluhye Adanụ olepwoohe tị wẹẹ kpaa la ang oriri ẹnụ myị́ ẹnụ wuu. Ọ ri ánụ jẹ́ kpong-kpong yẹkẹẹ, ịwa nyaa ri ang nya ịlẹhị ọ-kpụ ịnya ọtụka ị-ịlahị nya Ohe Oluhye gụ ịchịnụ ịwẹ ka?

²⁷Oowo lẹpwụ nyanụ a tị́ ka jẹ́-ẹ hu ụka ochiche-ochiche ọhẹ-lọhẹ da ehe oriri nya ịlọmwụ uhye wẹ myị́ bwula uko ọchịchị nyamwụ kpong-kpong?”

²⁸“Ịịyẹ a tị́ du kanụ juwa nwụ ịlọnụ la olo nya uko ọchịchị u-uhye nya awụrụ ọlẹ kanụ ka ya kụrụ ịnyịrọ nyanụ? Anụ me irya chajị nya idodo nya ọkpakụ bala ikoko nya ekeji bala amẹ ịnyịịla-ịnyịịla wuu wẹẹ. Ịwa ayịdang á kaa họ ụkụrwọ ọhẹ-lọhẹ la ịlaa ka. Ị́ tị kaa nụ apwụ ọhẹ-lọhẹ duru ịlaa kpong-kpong ka ịnyịnyị.

²⁹Ma, m̀ tị juwa byinu yẹkẹẹ, adịrahụ iSolomọn onyogo kọ ri ọlụdụ ọtụka chakụ-chakụ ri lẹ, ọ́ la ịwụrụ ịkụrụ-kụrụ ịnyịịla ju iru lala ịnya ekeji bala amẹ ịwẹ myị́ kpong-kpong kaka.

³⁰Ee lẹ, ó-ri ká Ohe Oluhye á juwa ya ịwụrụ kụrụ amẹ ịlẹpwamẹ ịlẹ kị nwa alẹ, ká angịnyị kaa nwaa ijuju, jwaa ila hụrụ lẹ, anyị, anụ tị́ me irya ká Ohe Oluhye ọọwa tịtị ka kụrụụnụ anụ ịwụrụ lụmẹ kaka ba? Anụ angị la ọmyịmyị ochiche!”

³¹“Chajị nya ọọwa lẹ, anụ juwa nwụ ịlọnụ la uko ọchịchị u-uhye nya ang oriri ọlẹ kanụ ka ri lee u-uhye nya ang ọnwanwa ọlẹ kanụ ka nwa lee u-uhye nya awụrụ ọlẹ kanụ ka kụrụ kaka ịnyịnyị.

³²Chajị, ala iJentayịlị ịlẹ kị jẹ́ Ohe Oluhye ka lẹ, ụma nya ang ịlịịwẹ wuu, ị kaa hu irya nyaa wuu lẹpwụ-lẹpwụ kpụ nịrọ lẹ. Ma, Ohe Oluhye Adanụ olepwoohe ayịdang tị jẹ́ ene-ene yẹkẹẹ, ang ịlịịwẹ wuu nyị baba hanụ ene-ene lẹ.

³³Ọkọkọ nya imahị omeme lẹ, anụ tụtụ jene juwa kpa irya nyanụ wuu tịtọ nya ọhịhị nya ịpyị-adịrahụ nya Ohe Oluhye bala abwẹla ọnyịịla nya Ohe Oluhye odu mẹ. Ó-ri kanụ họ ịnyị aalẹ, Ohe Oluhye ayịdang ka ya ang ịkịla ịwẹ wuu hanụ ịnyịnyị lẹ.

³⁴Chajị nya ọọwa lẹ, anụ juwa nwụ ịlọnụ la olo nya uko ọchịchị chajị nya ijuju kaka! Chajị ijuju ayịdang ka họ ịlọmwụ kpáá. A kpa olo nya ijuju kaka mwụ ịlọng ido alẹ kaka. Irya nya ọlalẹ a nwa mẹ!”