Read idege ỊMATIYU 7 Bible Online

ỊMATIYU 7 - idege bible

ỊMATIYU 7

¹IJisọsị myịmyị byaa yẹkẹẹ, “A ye ẹla nya ọngịnyị ehe ọọnang ọkịla ya, juwa ya eje wu ọngọọwa ka. Ó-ri ịnyị ka aalẹ, Ohe Oluhye tịtị ka ya eje wung ahụ ayịdang lọgụ-ọgụ ọọwa ịnyịnyị.

²Chajị jaabwọ ká wẹẹ ya eje wu ọngịnyị ehe ọkịla wẹẹ, ịnyịnyị, Ohe Oluhye a ka ya eje wung ahụ ayịdang lẹlẹ. Chajị ang ọlẹ ká wẹẹ kpa me ang ha ọngịnyị ehe ọkịla wẹẹ, ụma-ụma nya ang ọlịnyị, ị ka kpa me ang tịrẹkpẹ hang ahụ ku ịwa ịnyịnyị lẹ.

³Ịịyẹ a tị́ du ká juwa ye ẹla ya rụ́ abyị ọlala nya ọngịnyị ehe ọọnang ọlẹ kọ byẹhị pyịnyẹng lala uhweyi olukilẹhị nyamwụ kpong-kpong? Ụka ọlẹ ká abyị ọlala ọlẹ kọ chụng ahụ ayịdang e-egbeju tị lụmẹ lala ugbile nya okoji ọtụka-ọtụka ọlẹ kaahụ ayịdang kpa u-uhye nya ukilẹhị nya ịlọng ịnyị?

⁴Lẹ ya jem wẹẹ. Ó-ri kaahụ ayịdang á rị ugbile nya okoji ọtụka olukilẹhị nya ịlọng ọọwa daarụ kpá, a jẹ́ juwa yọyị yẹẹyẹẹ ene ka, anyanyị, ahụ ayịdang a tị́ ka jẹ́-ẹ juwa byi ọngịnyị ehe ọọnang ọkịla ọọwa yẹkẹẹ, ‘Ẹnwa, kẹwẹ kam gba uhweyi olukilẹhị nyang ọwẹ daarụ hing mẹ!’ myị?

⁵Ahụ ọlahị imiiye, maga ká jene gba ugbile nya okoji ọtụka nya abyị ọlala hi ukilẹhị nya ịlọng, ká jẹ́ yọyị cheri-cheri ene ká ka jẹ́-ẹ gba uhweyi nya abyị ọlala olukilẹhị nya ọngịnyị ehe ọọnang ọọwa daarụ hyọọ myị́ mẹ.”

⁶IJisọsị myịmyị byaa yẹkẹẹ, “Anụ hu ẹla nya Ohe Oluhye ọlẹ kọ la ịgọgọ lụmẹ bala ọ-la ịnya lụmẹ lala ogbe, kpa kele kaka ya je alekpilo nya angịnyị ịlẹ kị la ọkịlẹtụ ọngịrị bala otiri kpini-kpini ẹ-ẹpwụ nya ẹla ọọwa oyeye ka. Ó-ri ịnyị ka aalẹ, ị ka kpa ata nyaa chị ẹla nya Ohe Oluhye ọọwa dụrụ ịwa lala ikomba a chị ogbe ọlam-ọlam dụrụ ịwa. Ó-ri ịnyị ka aalẹ, angịịwa ka beenu ri kiro-kiro jaabwọ ká okomba ọlụla kaa họ ịnyịnyị.”

⁷IJisọsị myịmyị byaa yẹkẹẹ, “Anụ juwa bịlẹ ang ka ẹpwụtụbwọ nya Ohe Oluhye mẹ! Ohe Oluhye ka ya ang ọọwa hanụ. Anụ juwa tịtọ nya ang ka ẹpwụtụbwọ nya Ohe Oluhye mẹ! Ohe Oluhye ka họ kanụ ka yẹ ang ọọwa lẹ. Anụ yụbwọ kpụ ọnụ ụgbẹyị ịnyịnyịịnyị mẹ! Ohe Oluhye ka wụrụ ụgbẹyị ọọwa hanụ lẹ.

⁸Chajị ọng myị́ ọng ọlẹ kọ juwa bịlẹ ang, ọngọọwa, ị kaa ya ang ọọwa ha lẹ. Ọng myị́ ọng ọlẹ kọ tị juwa tịtọ nya ang, ọngọọwa a kaa yẹ ang ọlẹ kọ juwa tịtọ ịnyịnyị lẹ. Ọng myị́ ọng ọlẹ kọ tị juwa yụbwọ kpụ ọnụ ụgbẹyị ube, ọngọọwa, ụgbẹyị ọọwa a kaa wụrụ ha ịnyịnyị lẹ.

⁹Anụ ya jem wẹẹ, adịda ọ-ma ọnyị oyina a tị́ juwa ẹ-ẹpwarịrị nyanụ, ká ọnyị nyamwụ ka bịlọọ ịkaa kọ ka hu ẹjwọ ha ọnyị ọọwa ọkọkọ nya ịkaa ọlẹ kọ bịlẹ?

¹⁰Lee, ó-ri ká ọnyị ọọwa á bịlẹ adamwụ iyenyi, adamwụ tị́ ka hu ilo ha ọnyị nyamwụ ọkọkọ nya iyenyi ọọwa?

¹¹Ee lẹ, ó-ri kaanụ angịnyị ehe angị tịpyọ a-abwẹla ịwẹ, á jẹ́ kaa hu ang ịnyịịla ga ha anyị nyanụ myị́ lẹ, anyanyị, anụ tị́ me irya ká Ohe Oluhye Adanụ olepwoohe á ka jẹ́-ẹ hu ang ịnyịịla ga ha anyị nyamwụ ịlẹ kị juwa bịlọọ ang ịịwa kaka dachichi mẹ?”

¹²IJisọsị myịmyị byaa yẹkẹẹ, “Ang myị́ ang ọnyịịla ọlẹ kọ wẹẹ mang ahụ ayịdang ma ká angịnyị angịkịla ka họ hang lẹ, aa jene-jene họ ang ọọwa ha angịkịla mẹ. Chajị ọhịhị ọlịịwẹ ọlala a ri ukpunogu ọlabẹkpẹ nya etu nya ehile nya iMosisi wuu bala ang ọmẹjẹ nya alọmwụ inyogo nya Ohe Oluhye wuu ịnyịnyị lẹlẹ.”

¹³IJisọsị myịmyị byaa yẹkẹẹ, “Anụ maga kanụ jụ bwu ọnụ ụgbẹyị okpiilee nya ọhịhị ka ẹpwụ nya ọhịhị ọmyịmyị-ka mẹ, chajị ụgbẹyị nya ọhịhị ọlẹ kọ la pwọọ bala ọchịkpẹẹ la obwubwu, a ri ụgbẹyị ọlẹ kọ kaa kpa ọngịnyị ka ẹpwụ nya obwila lẹ. Ma, ụgbẹyị ọ-pwọọ ọọwa pyii, iru nya angịnyị ehe a tị wẹẹ dịrẹ lẹ.

¹⁴Ọnụ ogirigba nya ọhịhị ọmyịmyị-ka ayịdang la kpiilee lụmẹ. Ụgbẹyị nya ọhịhị ọmyịmyị-ka ọọwa tị la ujwo la obwubwu lụmẹ ịnyịnyị. Angịnyị angị ịmanyị-ịmanyị kem a tị wẹẹ dịrẹ ụgbẹyị olujwo ọọwa lẹ.”

¹⁵IJisọsị myịmyị byaa yẹkẹẹ, “Anụ kpahị ju ịlọnụ ọgwọgụ ẹ-ẹga nya alọmwụ ịnịịkịla mẹ! Ị ka kpa ịnyịrọ nya ịgọgọ ọlala warị wẹ ẹpwarịrị nyanụ la ijẹẹhị. Chajị jaabwọ ká ijwo ọlẹ kọ juwa tịtọ kọ ka wu ọkpịlọ ri, kaa da ugba nya ọkpịlọ kụrụ ene kọ kaa kele ka ẹpwụ nya iru nya ịkpịlọ wẹẹ, ịnyịnyị alọmwụ ịnịịkịla ịwẹ a wẹẹ họ lẹ.

¹⁶Ma, anụ ayịdang tị ka jáa datị bwula ụma nya ọhịhị ọlẹ kị ka ya chị ehe a-ahịgboo ị-ịlahị nyanụ, jaabwọ kahị kaa jẹ́ okoji bwula ugbe nyamwụ. Chajị ujwo owuru ọhẹ-lọhẹ á ka jẹ́-ẹ nwụ́ ugbe nya alakọnụ ọnẹnẹ kpá myị́ ẹnẹnẹhẹ kaka. Lee, okoji nya ụpaa, ọ ka jẹ́-ẹ nwụ́ ugbe nya ụtụ kaka ịnyịnyị.

¹⁷Chajị okoji ọnyịịla ọnyị myị ọnyị ka nwụ́ ugbe ọnyịịla pyii lẹ. Okoji ọtịpyọ ọnyị myị ọnyị tị ka nwụ́ ugbe ọtịpyọ ịnyịnyị pyii lẹ.

¹⁸Okoji ọnyịịla ọhẹ-lọhẹ á ka jẹ́-ẹ nwụ́ ugbe ọtịpyọ kaka. Okoji ọtịpyọ ọhẹ-lọhẹ á tị ka jẹ́-ẹ nwụ́ ugbe ọnyịịla myị kaka ịnyịnyị.

¹⁹Okoji ọnyị myị ọnyị kọ myị nwụ́ ugbe ọnyịịla ka aalẹ, ị ka tụrwọọ kị ka hwọọ kpa kaka ju ka ẹpwụ nya ila pyịyọọ.

²⁰Chajị nya ọọwa lẹ, anụ ka jẹ́ ọhịhị nya alọmwụ ịnịịkịla ịịwa datị bwula abwẹla ọhọhọ nyaa ịnyịlẹhị pyii lẹ.”

²¹IJisọsị myịmyị byaa yẹkẹẹ, “Ọ-ọng myị́ ọng ọlẹ kọ juwa wụrụm Ọngọlahị, Ọngọlahị, a ka ju ka ẹpwụ nya ịpyị Adịrahụ nya epwoohe ka. Aalẹ, kẹnẹ-kẹnẹ, angịlẹ wuu kị juwa họ irya nya Ohe Oluhye Adam ọlẹ kọ juwa e-epwoohe lẹ mẹ ịnyị.

²²Ụka ọlẹ ká ẹnụtụrụ nya eje ohyẹẹkpẹ nya Ohe Oluhye ka pwụ, iru nya angịnyị ehe lụmẹ-lụmẹ ka byim yẹkẹẹ, Ọngọlahị, Ọngọlahị, ahị ayịdang kpangga a ri angịlẹ kahị kaa kpa ẹnyị nyang yẹ ọmwụ dodehe je angịnyị lẹ. Ahị a kaa kpa ẹnyị nyang ku alegu inyibyi dodehe bala ọ-kaa kpa ẹnyị nyang họ ụkụrwọ ẹbyẹbyị ịkịla la datị-datị ịnyịnyị lẹ.

²³Ma ụka ọọwa, m ka wẹ byi angịịwa yẹkẹẹ, anụ tụ kịnyaa hi ịlahị nyam mẹ. Am jẹẹnụ nya angịnyị nyam kpong-kpong ka, chajị anụ ri angị họ abwẹla inyibyi lụmẹ.”

²⁴IJisọsị myịmyị byaa yẹkẹẹ, “Anụ wo mẹ. Ọng myị́ ọng ọlẹ kọ warị wẹ ẹga nyam kaka wo ẹla ọmẹjẹ nyam, kọ juwa kpa ẹla ọọwa họ ụkụrwọ ịnyịnyị aalẹ, ọngọọwa ka lala ọlẹng ọ-jẹ́ ẹla ọhẹ ọlẹ kọ kele kaka me ube nyamwụ u-uhye nya ẹjwọ.

²⁵Ukpenyi ọtụka-ọtụka do mịla ube ọọwa. Enyi myị yẹ rịrị ube ọọwa yịlọlọ. Igbachịwụ ọtụka-ọtụka warị kaka mịla ube ọọwa nmoo ịnyịnyị. Ma, ube ọọwa á tị tụrụ ju eji myị́ kpong-kpong ka, chajị, ị nwọ́ọ rịrị u-uhye nya ẹjwọ.”

²⁶“Ma, ọng myị́ ọng ọlẹ kọ wo ẹla ọmẹjẹ nyam kọ tị myị kpa ẹla ọọwa họ ụkụrwọ ka aalẹ, ọngọọwa ka lala ọlẹng oluchi ọhẹ ọlẹ kọ kele kaka nwụ́ ube nyamwụ u-ugburuja.

²⁷Ukpenyi ọtụka-ọtụka do mịla ube ọọwa. Enyi myị yẹ rịrị ube ọọwa yịlọlọ. Igbachịwụ ọtụka-ọtụka warị kaka mịla ẹpwang ọọwa nmoo ịnyịnyị. Ọtụrụ-tụrụ nya ube ọọwa họ anụ ọtụka-ọtụka gbedem.”

²⁸Ụka ká ang ọmẹjẹ nya iJisọsị ọwẹ chị eju kpá, ejiri nya ang ọmẹjẹ nyamwụ ọọwa wu iru nya angịnyị ịlẹ wuu kị juwa ẹ-ẹga ọọwa.

²⁹Ang ọmẹjẹ nya iJisọsị ayịdang datị hi ịnya ịtịcha ị-mẹ ehile nya iMosisi jẹ ọlẹ kị kaa mẹjẹ. Chajị ọngịrị nya Ohe Oluhye ayịdang, iJisọsị a kpa mẹ ang jẹ lẹ.