Read idege ỊMATIYU 8 Bible Online

ỊMATIYU 8 - idege bible

ỊMATIYU 8

¹Ụka ọlẹ ká iJisọsị hireji bwu uhye nya ọgbọdọ kpá, iru nya angịnyị lụmẹ-lụmẹ juwa bọọ jẹ.

²Ịnyị, ọlẹng olekpo ọhẹ a kele ka ẹga nya iJisọsị kaka ya arụụ kụ eji i-ijata nya iJisọsị lẹ, ọ byọọ yẹkẹẹ, “Ọngọlahị, ó-ri ká ka myị, ịnọ, m jẹ́ ká ka la ọngịrị họm uda nya ekpo nyam ọlẹ myị́.”

³Ọọwa lẹ, iJisọsị a nịra ụbwọ nyamwụ kpaa kaka gu olekpo ọọwa lẹ, ọ byọọ yẹkẹẹ, “M myị nya ịlẹhị-ịlẹhị lẹ. La gogo alẹ mẹ!” Ịnyị lẹ, ekpo nya ọlẹng ọọwa a myị́ cheri-cheri iijata-ijata lẹlẹ.

⁴Ụka ọọwa, iJisọsị byi olekpo ọọwa yẹkẹẹ, “Rụ mẹ ẹnwa. A tịrọnụ nya ẹla nya uda ọhọhọ nyang ọwẹ ya je ọngọngọhẹ koo. Ma, kpa ịlọng kele kpụrụrụ ka ẹga nya ọngọkiliya nya Ohe Oluhye kọ wụlang yẹ mẹ. Ká kele kaka hu ọhaha nya iya ọkịlaakịla ha Ohe Oluhye jịra, jaabwọ ká ehile nya iMosisi yẹkẹẹ, ọng myị́ ọng ọlẹ ká ekpo nyamwụ nyị́ myị́ lẹ, nyị họ mẹ. Chajị ká ọngọkiliya ọọwa ka ya ekpo ọ myịmyị nyang ọwẹ dodehe je angịnyị wuu mẹ.”

⁵Ịnyị lẹ, ụka ká iJisọsị kele ka epweji ọhẹ ọlẹ kị wụrụ ịKapẹnawụm lẹ, olegbeju ọgbahị nya ịsọja ohu ịrụ nya ala iRom ọhẹ a kele ka ẹga nya iJisọsị juwa bịlọọ yẹkẹẹ,

⁶“Ọngọlahị, ọnchẹ nyam ọhẹ juwa ẹ-ẹpwa kọ la ẹdụrụ nya ịnyịrọ o-gbu ba. Ọ jwọọ lụmẹ kaka kpoye. Ó wuleji myị́ kpong-kpong kaka.”

⁷IJisọsị wẹ byọọ yẹkẹẹ, “O hiigu. M ka warị kaka họọ uda hang lẹ.”

⁸Olegbeju ọgbahị nya ịsọja ọwẹ byi iJisọsị yẹkẹẹ, “Yẹ mẹ Ọngọlahị, am ayịdang á chịla kpụ, ká ka ya egbeju nyang jụ kpẹẹ wẹ ẹpwa nyam kpong-kpong ka. Ya ẹla ọlọnụ ọlam-ọlam ọlẹ kem mẹ aalẹ, ọnchẹ nyam ka la gogo lẹ.

⁹Chajị am ayịdang kpangga ri ọngọ ji ekpeleji nya ọngịrị nya ehile nya ịsọja alegbeju ị-gụm gụ. Ụka myị́ ụka kaam ayịdang á tị byi ịsọja ilekpeleji nyam ọhẹ-lọhẹ yẹkẹẹ, ‘Ahụ, kele ka ẹga ọlaanyị mẹ,’ ọ kaa kele. Ọ́ tị ri kam byi ọngọkịla yẹkẹẹ, ‘Ahụ, kẹwẹ wẹ ẹgẹlẹ,’ ọngọọwa kaa warị ịnyịnyị. Ọ́ tị ri kam byi ọnchẹ nyam yẹkẹẹ, ‘Ahụ, kẹwẹ ká họ ang ọlẹ ham mẹ,’ ọ kaa họọ ham ịnyịnyị.”

¹⁰Ụka ọlẹ ká iJisọsị wo ẹla ọlẹ ká olegbeju nya ịsọja ọwẹ ya lẹ, ọ lọọ ahịbwuu lụmẹ. Ọ byi iru nya angịlẹ kị juwa bọọ jẹ yẹkẹẹ, “Nya ịlẹhị-ịlẹhị, m byinu yẹkẹẹ, am ayịdang á yẹ ọngọngọhẹ ọlẹ kọ la ọmyịmyị ọlala ịnya ọlẹng ọlẹ ẹ-ẹgẹgẹhẹ nya ọpyị nya ala Isirẹlụ wuu lẹpwụ-lẹpwụ ẹnẹnẹhẹ lẹka.

¹¹Am byinu yẹkẹẹ, anụ ka yẹ iru nya angịnyị kị ka juwa warị bwu ọmwẹnụ-ụtụrụ bala ọmwẹnụ-obyi kaka hụhụ i-itebwuru nya ang oriri olepwedii ta Ebiraham bala Ayịsiki bala iJekọbụ ụ-ụwa ị-ịpyị-adịrahụ nya epwoohe lụka ohyẹẹkpẹ pyii wẹẹ!

¹²Ma, anụ ala Isirẹlụ ayịdang ịlẹ ịnọ, kị nwụla ịpyị-adịrahụ ọọwa nọ gbe, a wẹẹ ka dachichi yẹ ri angịlẹ kị ka ku da ka odehe nya ịpyị-adịrahụ ọọwa kele ka ẹpwụ nya ukpowu ọtụka lẹlẹ. Ụ-ụwa, anụ ka juwa jida, juwa wangịrị nyanụ pyịyọọ lẹlẹ.”

¹³Ịnyị lẹ, iJisọsị a byi olegbeju nya ịsọja ọwẹ yẹkẹẹ, “Rụ ka ẹpwa mẹ ẹnwa! Jaabwọ kaahụ ayịdang myị lẹ, ọ juwa hang ịnyị lẹ.” Ọọwa lẹ, ọnchẹ nya olegbeju ọwẹ a la gogo lụka nya awa ọlẹ ká iJisọsị kpa ya ẹla ọọwa ịnyịlẹhị lẹlẹ.

¹⁴Ụka ọhẹ juwa ká iJisọsị kele ka ẹpwa nya iPita. Ọ yẹ ịnịna ẹpwa nya iPita kọ nọnọ ụ-ụwa la ẹdụrụ nya ila ọchịchị nya ịlẹhị-ịlẹhị.

¹⁵Ịnyị lẹ, iJisọsị a kele kaka yụbwọ gu ịnịna ẹpwa nya iPita ọwẹ ụ-ụbwọ nyamwụ lẹ, ẹdụrụ ọọwa a myị lẹ, ọ wuleji juwa myị ẹrụ ha iJisọsị ụ-ụwa lẹlẹ.

¹⁶Ụka ká obyi hi ẹnụ ọọwa, ị kpa iru nya angịlẹ ká alegu inyibyi wu kele ka ẹga nya iJisọsị. Ọọwa lẹ, iJisọsị a kpụ alegu inyibyi ịịwa ịkata, kwaa rụ kpehe bwu ẹpwụ nya angịịwa wuu lẹlẹ. IJisọsị myịmyị họ alẹdụrụ ịkịla wuu uda ụ-ụwa ịnyịnyị.

¹⁷Ụkụrwọ ẹbyẹbyị ọhọhọ nya iJisọsị ọọwa ri ọ-họ jịra nya ẹla ọlẹ ká ọlọmwụ Ayịsaya, yẹ ọmwụ u-uhye nyamwụ ene-ene yẹkẹẹ, “Ọngọọwa ayịdang warị kaka hu ẹdụrụ myị́ ẹdụrụ ọjụjụ oluhye nya ịnyịrọ bala ẹdụrụ nya olegu nyahị wuu kpa rụ hiihi lẹ.”

¹⁸Ụka ká iJisọsị yẹ jaabwọ ká angịnyị juwa mwụmwụ lala enyi, dagaga jwọọ lụmẹ lẹ, ọ byi angịjụgbẹyị nyamwụ yẹkẹẹ, “Anụ nyị kẹwẹ kịịwa nyị kpoye kele koye ọlaanyị nya Ihu ọkịlọlọ ọlẹ mẹ.”

¹⁹Ụka ọọwa, ịtịcha ọ-mẹ ehile nya iMosisi jẹ ọhẹ kele ka ẹga nya iJisọsị kaka byọọ yẹkẹẹ, “Ayịbahị ịtịcha ee! M tịtọ kam ka bang jẹ ka ẹga myị́ ẹga ọlẹ wuu ká ka ka!”

²⁰IJisọsị wẹ byọọ yẹkẹẹ, “Wo mẹ. Otenyi-ogbo la ụjẹ ọlẹ kọ kaa kụ. Ịchịnụ iluhye-ọgba tị la awụ nyaa ọlẹ kị kaa nọ. Ma, am Ọnyị nya ọngịnyị ehe lẹ, ḿ tị la ube ọhẹ-lọhẹ nya ịlọm ka ya egbeju jụ kpẹẹ ka kpong-kpong ka.”

²¹Ụka ọọwa, ọlẹng ọkịla ọhẹ ọlẹ kọ ri ọngọ ba iJisọsị jẹ, kele kaka byi iJisọsị yẹkẹẹ, “Ọngọlahị chuchuu, hi iwe ham chẹẹ gbee pwụ ụka ọlẹ kam ka ju adam eji kpá ene kam ka tịrẹkpẹ warị kaka bang jẹ mẹ.”

²²IJisọsị wẹ byọọ yẹkẹẹ, “Kẹwẹ ka bam jẹ, ká tụụbwọ hi ọhọhọ nya ogu o-ju eji ha angịlẹ kịịwa ayịdang gbugbu ẹ-ẹpwụ nya olegu ene-ene kpá lẹ mẹ.”

²³Ụka ká iJisọsị ju ka ẹpwụ nya ụmwụ nya enyi, ká angịjụgbẹyị nyamwụ bọọ kele lẹ, ị juwa ju ụmwụ nya enyi ọọwa kpoye koye nya ihu ọkịlọlọ ọwẹ lẹlẹ.

²⁴Lụka ọkpahị ju-ka, igbachịwụ ọtụka-ọtụka ọhẹ gba mịla Ihu ọkịlọlọ ọọwa nmoo lẹ, igbachịwụ ọtụka ọọwa a da enyi pwururu myị ẹpwụ nya ụmwụ nya enyi nyaa tọlọng lẹlẹ. Ma, iJisọsị ayịdang tị juwa kpa une nọ ụka ọọwa.

²⁵Ọọwa lẹ, angịjụgbẹyị nya iJisọsị a kele kaka chọọ ahị-une lẹ, ị byoo yẹkẹẹ, “Ọngọlahị, Ọngọlahị, wuleji ká chịhị da mẹ! Ó-ri ịnyị ka aalẹ, ahị wuu byi-enyi ẹ-ẹgẹlẹ alẹ lẹ!”

²⁶Ịnyị, iJisọsị a wẹ byaa yẹkẹẹ, “Ịịyẹ a tị́ du kanụ juwa juhi ọlịịwẹ ene? Anụ angị la ọmyịmyị ochiche.” Ọọwa lẹ, iJisọsị a wuleji godayị kọkọ lẹ, ọ kpụ igbachịwụ ọtụka ọọwa bala Ihu ọwẹ ịkata lẹ, igbachịwụ bala Ihu a kpụ ba lẹ, ẹga myị́ ẹga a chị nyoo lẹlẹ.

²⁷Ụka ọọwa, ọng myị́ ọng ọlẹ kọ juwa ụ-ụwa juwa yẹkẹẹ, ụma nya ọngịnyị ọlanyị a tị́ lẹẹ, ká igbachịwụ bala ihu jẹ́ juwa ju omyi ẹla nyamwụ ihi ịnyị?

²⁸Ụka ọọwa, iJisọsị anyị jẹ gbee kị pwụ ọpyị nya ala ịGadara o-oye ọlaanyị nya Ihu ọkịlọlọ ọwẹ. Ahyaahị ká iJisọsị dehe pwụrụ, alẹng angị imiiye ịhyẹ ịlẹ ká alegu inyibyi wu, gba kpehe bwu ẹpwụ nya agbụ ịlẹ kị ri ẹga o-ju ogu eji nya alụwa kaka tọọ ụ-ụgbẹyị. Jaabwọ ká ụla ọhyahya nya alẹng angị imiiye ịịwa la ọngịrị lụmẹ lẹ, ọngọngọhẹ á kaa chịpwụrụ bwu ụgbẹyị ọọwa myị́ kpong-kpong kaka chajị nyaa.

²⁹Ịnyị lẹ, alẹng imiiye ịwẹ a juwa ya ẹla gbogbogbo ta iJisọsị yẹkẹẹ, “Ẹla ịyẹ a tị́ kpa warị wẹ ẹga nyahị, ahụ Ọnyị nya Ohe Oluhye? Lee, a tị́ juwa tịtọ ká ka yẹhị akama jene nya ụka ohyẹẹkpẹ lẹ?”

³⁰Ụka ọọwa, angịhyẹ juwa kpa iru nya ikomba lụmẹ-lụmẹ ri ang ju ẹga ọọwa chwẹẹ.

³¹Ọọwa lẹ, alegu inyibyi ịwẹ a byi iJisọsị yẹkẹẹ, “Ó-ri ká tịtọ ká ka kuhi kpehe pyii lẹ aalẹ, a chuchuu, ká kuhi rụ ka ẹpwụ nya ikomba ịlaanyị chẹẹ mẹ!”

³²Ịnyị lẹ, iJisọsị a byi alegu inyibyi ịịwa yẹkẹẹ, “Anụ gba kpehe, kanụ rụ ka ẹpwụ nya ikomba ịlaanyị mẹ!” Ọọwa lẹ, alegu inyibyi ịwẹ a gba kpehe hi ẹpwụ nya alẹng angị imiiye ịịwa rụ ka ẹpwụ nya ikomba ịịwa ịnyịlẹhị lẹlẹ. Ọọwa lẹ, ikomba ịịwa a rụnyẹ pwọ ụka ọtụka nya Ihu ọkịlọlọ ọọwa lẹga-lẹga kaka ju ka ẹpwụ nya enyi jurum lẹ, ị ta ayịreji ụ-ụwa wuu lẹlẹ.

³³Ọọwa lẹ, alẹng ịlẹ kị juwa kpẹhị rịrị ikomba ịịwa a rụnyẹ kele ka epweji nyaa kaka ya je alụwa, ang myị́ ang ọlẹ wuu kọ họ ẹ-ẹga nya ikomba nyaa bala alẹng angị imiiye ịlẹ kị ku alegu inyibyi ịịwa kpehe hi lẹlẹ.

³⁴Ọọwa lẹ, ọng myị́ ọng olepweji ọọwa a juwa rụnyẹ ka ẹga nya iJisọsị lẹlẹ. Ụka kị pwụ ụwa kị yẹ iJisọsị lẹ, ị bịlọọ yẹkẹẹ, “Ahụ nyị chuchuu kaahụ nyị rụ hi epweji nyịwa bala ọpyị nyịwa ahyaahị-ahyaahị mẹ.”