Read idege ỊMATIYU 9 Bible Online

ỊMATIYU 9 - idege bible

ỊMATIYU 9

¹Ịnyị lẹ, iJisọsị a ju ka ẹpwụ nya ụmwụ nya enyi myịmyị lẹ, ọ kpoye nya ihu ọkịlọlọ ọwẹ kele ka ọnụụka oloye ọkịla lẹlẹ. Ọọwa lẹ, ọ rụ tịrẹkpẹ kele ka epweji nyamwụ ọọwa ayịdang lẹlẹ.

²Ụka ọọwa, angịhyẹ kpa ọlẹng ọhẹ ọlẹ ká ịnyịrọ nyamwụ gbu ba warị wẹ ẹga nya iJisọsị u-uhye nya ịbẹẹdị ọnọnọ nya ọlẹdụrụ ọọwa. Ụka ká iJisọsị yẹ ọmyịmyị ọlala ọtụka nya angịịwa, ọ byi ọlẹng o-gbu ịnyịrọ ba ọọwa yẹkẹẹ, “La ẹjẹ ọkpụ́kpụ mẹ ọnyị nyam, m hịnyọhi ịhọbịrị nyang wuu hang lẹ.”

³Ụka ọọwa, ịtịcha ị-mẹ ehile nya iMosisi jẹ ịlụwa ịhyẹ juwa me irya ẹ-ẹpwụ-ẹpwụ nya ịlaa yẹkẹẹ, ọlẹ ká iJisọsị nyị byi ọlẹdụrụ ọwẹ yẹkẹẹ, ọwa nyị hịnyọhi ịhọbịrị nyang hang lẹ lẹ, ẹla o-ya pyị nya ịlẹhị-ịlẹhị ẹ-ẹga nya Ohe Oluhye nyaa wẹ lẹ.

⁴Ụka ọọwa, iJisọsị ayịdang tị jẹ́ ang ọlẹ kị juwa me irya ẹ-ẹpwụ ọkịlẹtụ nyaa ene-ene lẹ. Ọọwa lẹ, ọ byaa yẹkẹẹ, “Ịịyẹ a tị́ du kanụ juwa me irya onyobyi ọlịịwẹ ẹ-ẹpwụ ọkịlẹtụ nyanụ ịnyị?

⁵Anụ ya jem wẹẹ! Ọ-ka byi ọlẹng ọlẹ yẹkẹẹ, ‘M hịnyọhi ịhọbịrị nyang hang lẹ,’ lee, ọ-ka byoo yẹkẹẹ, ‘Wuleji godayị kọkọ ká jẹdịyẹ mẹ lẹ,’ oyina a tị́ chịkpẹẹ la oyaya gụ ọkịla?

⁶Am ayịdang ka họ ang o-ju ẹjẹẹ hanụ lẹẹlẹẹ chajị kanụ ka jẹ́ yẹkẹẹ, am Ọnyị nya ọngịnyị ehe nyị la ọngịrị ka hịnyọhi ịhọbịrị nya angịnyị ehe haa myị́ ám odehe ọlẹ.” Ọọwa lẹ, iJisọsị a byi ọlẹng o-gbu ịnyịrọ ba ọwẹ yẹkẹẹ, “Ẹnwa ọlẹng, m bying yẹkẹẹ, wuleji godayị kọkọ ká hu ang ọ-da nọnọ nyang, ká rụ ka ẹpwa mẹ.”

⁷Ịnyị, ọlẹng ọwẹ a la gogo wuleji lẹ, ọ hu ang ọ-da nọnọ nyamwụ lẹ, ọ rụ kele ka ẹpwa lẹlẹ.

⁸Ụka ká angịlẹ kị juwa ụ-ụwa, yẹ ụkụrwọ ẹbyẹbyị ọọwa, uhi ọtụka-ọtụka jwaa. Ịwa wuu juwa gwogbo ha Ohe Oluhye, chajị nyọlẹ ká Ohe Oluhye kaa ya ọngịrị ọtụka nyamwụ ọlịịwẹ ha angịnyị ehe.

⁹Ụka ká iJisọsị rụ bwu ẹgẹwẹ, kọ juwa jẹ ịnyịnyịịnyị, ọ yẹ ọlẹng ọ-nyẹ angịnyị ẹpwa ọhẹ kọ hụhụ, ẹ-ẹga ọ-họ ụkụrwọ nyamwụ. Ẹnyị nya ọlẹng ọọwa ri ịMatiyu. IJisọsị byoo yẹkẹẹ, “ỊMatiyu, kẹwẹ ka bam jẹ mẹ.” Ịnyị, ịMatiyu a wuleji ba iJisọsị jẹ ịnyịlẹhị lẹlẹ.

¹⁰Ụka ká ịMatiyu kpa iJisọsị ka ẹpwa nyamwụ, kị juwa ri ang oriri la awụlẹ, iru nya angị nyẹ angịnyị ẹpwa bala angịlẹ ká angịnyị wa nya alọhọbịrị i-hi deeji, kele kaka ri ang oriri ọọwa ta iJisọsị bala angịjụgbẹyị nyamwụ.

¹¹Ụka ká ala ịFarịsii chẹhị kaka yẹ iJisọsị ẹ-ẹpwarịrị nya angịịwa, ị tọ angịjụgbẹyị nyamwụ ịtọ yẹkẹẹ, “Ịịyẹ a tị́ du ká ayịbanụ juwa bá ri ang oriri ta angị nyẹ angịnyị ẹpwa bala alọhọbịrị i-hi deeji ịwẹ ịnyị?”

¹²Ụka ká iJisọsị wo ẹla nyaa ọọwa, ọ byaa yẹkẹẹ. “Anụ wo mẹ! Ube utoji ọkaka ka ẹga nya idongkita, á kaa baba ha angịlẹ kị la ịnyịrọ ogogo ka! Kẹnẹ-kẹnẹ, angịlẹ ká ẹdụrụ á jụ ene lẹ, mẹ ịnyị.

¹³Anụ rụ kele kanụ me irya ju etu nya ẹla ọlẹ ká Ụpwụ Ịgọgọ ya lẹ wẹẹ. Ẹga ọọwa yẹkẹẹ, ‘Am Ohe Oluhye á tịtọ nya iyo ịwẹ kanụ wẹẹ kpa kaka kịla iya ham kpong-kpong ka. Ma, olegu nya ahyẹẹrwẹrwa ọlala ẹ-ẹga nya awụlẹ nyanụ, Am Ohe Oluhye a tịtọ kem lẹ.’ Lẹ, anụ wo mẹ! Aangịlẹ kị hu ịlaa nya alabwẹla ọnyịịla, m warị wẹ odehe ọlẹ kam ka wụrụ ka. Ma, m warị kam ka kpa alọhọbịrị nya tịrẹkpẹ warị wẹ ụgbẹyị nya irya ọyẹda ịnyị.”

¹⁴Ụka ọọwa, angịjụgbẹyị nya ịJọn ọngọ hụ enyi Ohe kele ka ẹga nya iJisọsị kaka tọọ wo yẹkẹẹ, “Ayịbahị ee, ịịyẹ a tị́ du kaahị bala ala ịFarịsii kaa nọ limyi ha Ohe Oluhye ịnyịnyịịnyị, ká angịjụgbẹyị nyang ahụ á tị kaa nọ limyi ha Ohe Oluhye kpong-kpong ka?”

¹⁵IJisọsị wẹ byaa yẹkẹẹ, “Anụ ya ká angịlẹ kị wụrụ ẹpwa kaka chị ọkẹkẹnị nya ahụ oyeye ka kele ka ụwa kaka nọ limyi, lụka ọlẹ ká ọrụ-ahụ onyeewe ọọwa juwa taa? Ọ́ ka jẹ́-ẹ la ịnyị kaka. Ma, ụka tị juwa warị kị ka kpa ọrụ-ahụ onyeewe ọọwa rụ hyaa, ọọwa lẹ, angịịwa a ka jẹ́-ẹ nọ limyi myị́ wẹẹ lẹ.”

¹⁶“Anụ wo mẹ, ọngọngọhẹ á kaa kpa apwụ onyeewe ọlẹ kọ tịra ẹnẹnẹhẹ lẹka kele kaka pachị nya awụrụ onyogo ka, chajị ó-ri kị họ ịnyị, awụrụ onyogo ọọwa ka gu ene gbamm gụ olene-ene.

¹⁷Ọngọngọhẹ á tị kaa hu ere onyeewe kpa kaka ju ẹpwụ nya ugu akwọ onyogo kpong-kpong ka ịnyịnyị. Ó-ri kị họ ịnyị, ugu akwọ ọọwa ka bene. Ọọwa lẹ, akwọ ọọwa ayịdang a ka ri iyabwọ lẹ, ere ọlụwa a ka yẹ hụrụ timajẹ ịnyịnyị lẹlẹ. Ọkọkọ nya ọọwa lẹ, ọngọọwa ka ya ere onyeewe ọọwa ju ẹpwụ nya akwọ onyeewe-onyeewe ịnyịnyị chajị kịịwa imimiiye ka godayị rịrị họọ.”

¹⁸Ụka ọlẹ ká iJisọsị juwa kpa ẹla ọọwa ya wẹẹ, olegbeju ọtụka nya ala iJuu ọhẹ kele kaka ya arụụ nyamwụ kụ eji ị-ịlahị nya iJisọsị, ọ byoo yẹkẹẹ, “Ayịbahị, ọnyị ọnyang nyam gbu lalẹ ịnịịnọ, ma, ó-ri ká kele kaka yụbwọ nyang nịrọọ aalẹ, m myị yẹkẹẹ, ọ ka chahị juwa hịhị myịmyị wẹẹ.”

¹⁹Ịnyị lẹ, iJisọsị a wuleji, juwa bọọ kele lẹ, angịjụgbẹyị nyamwụ a juwa dịrọọ ka ụwa ịnyịnyị lẹlẹ.

²⁰Ụka ọọwa, ọnyang ọhẹ juwa ká ẹdụrụ nya ịwọ ọhụhụ jụ lụmẹ-lụmẹ lala ẹka iwo kụrụ imiiye gbẹgbịlẹ lẹ. Ọ kele bwu ẹkpẹ nya iJisọsị kaka yụbwọ nyamwụ gu ụgbọọnụ nya awụrụ ogbileji nya iJisọsị.

²¹Chajị ọnyang ọwẹ byi ịlọmwụ ene-ene yẹkẹẹ, “Ó-ri kam yụbwọ nyam gu awụrụ nya iJisọsị lẹ aalẹ, m jẹ́ kam ka la gogo pyii lẹ.”

²²Ụka ọọwa, iJisọsị jahị kpata, chẹhị kaka yẹ ọnyang ọọwa lẹ, ọ byoo yẹkẹẹ, “Ọnyị nyam ọnyang, la ẹjẹ ọkpụ́kpụ mẹ. Ọmyịmyị ọlala nyang chịng da lẹ. La gogo alẹ mẹ.” Iijata-ijata ọọwa lẹ, ọnyang ọwẹ a la gogo ịnyịlẹhị lẹlẹ.

²³Ịnyị, iJisọsị a pwụ ẹpwa nya olegbeju ọtụka ọọwa lẹ, ọ yẹ jaabwọ ká alayịlọ odudu bala angịkịla lụmẹ e-ejida ọọwa la iru kuu lẹlẹ.

²⁴IJisọsị byi alejida ịịwa yẹkẹẹ, “Anụ rụ kpehe hi ẹgẹlẹ mẹ. Ọnyị ọlẹ á gbu ka. Une ọlam-ọlam, ọ wẹẹ nọ lẹ.” Ọọwa lẹ, alejida ịịwa a juwa hụlọ ẹhụ ju iJisọsị lala ọlẹmwa lẹlẹ.

²⁵Ahyaahị ká iJisọsị ku angịwẹ rụ kpá lẹ, ọ kele ka ẹpwụ nya ube ọlẹ kị ya ogu nya ọnyị nọ lẹlẹ. Ịnyị, ụka ká iJisọsị yụbwọ nyamwụ chị ọnyị ọnyang ọọwa ụ-ụbwọ lẹ, ọnyị ọwẹ a wuleji bwula igu juwa hịhị lẹlẹ.

²⁶Ịnyị lẹ, ị juwa kpa ẹla ọọwa ja oja ju ka ẹga myị́ ẹga nya ọpyị o-oye ọọwa wuu lẹlẹ.

²⁷IJisọsị rụ bwu epweji ọwẹ. Ụka kọ juwa jẹ ụ-ụgbẹyị ịnyịnyịịnyị, alidu angị imiiye ịhyẹ juwa dịrọọ, juwa ya ẹla tọọ gbogbogbo yẹkẹẹ, “Ahụ Ọnyị nya iDevidi, chuchuu yẹhị ahyẹẹrwẹrwa chẹẹ mẹ!”

²⁸Ụka ká iJisọsị jụ ka ẹpwụ nya ube ọlẹ kọ juwa jẹ ka, alidu angị imiiye ịwẹ myịmyị bọọ kele. Ụka ọọwa, iJisọsị taa ịtọ yẹkẹẹ, “Anụ myị yẹkẹẹ, am nyị ka họnụ uda nya idu ọkpụkpụ nyanụ myị́ lẹ?” Ị wẹ byoo yẹkẹẹ, “Ee, Ọngọlahị, ahị myị, ká ka họhị uda myị́ lẹ.”

²⁹Ọọwa lẹ, iJisọsị a kele kaka yụbwọ gwaa egbahị nyaa lẹ, ọ byaa yẹkẹẹ, “Jaabwọ kaanụ ayịdang la ọmyịmyị kaka ba lẹ, ọbaba nyanụ ọọwa a juwa hanụ ịnyị mẹ oo!”

³⁰Ịnyị lẹ, alidu ịwẹ a jẹ́ yọyị ịnyịlẹhị lẹlẹ. Ụka ọọwa, iJisọsị gbilaa ụbwọ ụ-ụrụ nya ịlẹhị-ịlẹhị yẹkẹẹ, “Anụ ya ẹla chajị nya uda ọhọhọ nyanụ ọwẹ je ọngọngọhẹ kpong-kpong koo!”

³¹Ma, ahyaahị ká angịwẹ rụ bwu ụwa, ị juwa kpa oja chajị nya ụkụrwọ ẹbyẹbyị nya iJisọsị ya je angịnyị wuu tụ ẹga myị́ ẹga da o-oye nya ọpyị ọlụwa wuu.

³²Ụka ọlẹ ká alidu ịlẹ ká iJisọsị họ uda kpá, juwa jẹ rụ, angịhyẹ myịmyị kpa ọlẹng ọhẹ ọlẹ kọ ku ọnụ kele ka ẹga nya iJisọsị ka ube ọọwa. Olegu onyobyi a ku ọngọọwa ọnụ lẹ.

³³Ahyaahị ká iJisọsị ku olegu onyobyi ọọwa dodehe lẹ, ọlẹng ọwẹ a jẹ́ ya ẹla lẹlẹ. Ụka ká ẹla ọọwa pyẹ ọng myị́ ọng ọlẹ kọ juwa ọnụ lụmẹ lẹ, ịwa wuu a juwa yẹkẹẹ, “Ẹla ọlẹbyẹbyị ọhẹ-lọhẹ ọlịịlẹ, á họ ọ-ọpyị nya Isirẹlụ ọlẹ ẹnẹnẹhẹ lẹka.”

³⁴Ma, ala ịFarịsii ịlẹ kị juwa lẹ, ị mama chịng ya kịrọrọ yẹkẹẹ, “Anụ jẹ́ ka, tụbwọ aalẹ, olegbeju ọgbahị nya alegu inyibyi ịwẹ a ya ọngịrị ọlẹ ká iJisọsị wẹẹ kpa ku alegu inyibyi ịwẹ wuu dodehe họọ lẹ.”

³⁵Ụka ọọwa, iJisọsị juwa tụ aha, kaka wụla angịnyị yẹ tụ epweji-epweji da, juwa mẹ ang jẹ angịnyị e-ebe ị-mẹ ẹla nya Ohe Oluhye jẹ nya ala iJuu ịnyịnyịịnyị. Ọ juwa ya ẹrụ ọnyịịla rụ́ ịpyị-adịrahụ nya Ohe Oluhye ju angịnyị. Ọ juwa họ angịnyị uda nya ẹdụrụ myị́ ẹdụrụ ọlịnyịrọ bala ịnya olegu nyaa wuu ụka ọọwa ịnyịnyị.

³⁶Ụka ká iJisọsị chẹhị kaka yẹ iru nya angịnyị ịlẹ kị juwa bọọ jẹ, ọkịlẹtụ nyamwụ myị la ahyẹẹrwẹrwa ẹ-ẹga nyaa lụmẹ kaka kpoye. Chajị ịwa wuu chị ẹpẹtẹkẹẹ ẹ-ẹpwụ nya elele ọchịchị lịmahị nyaa. I juwa chị ajama lala ịkpịlọ ịlẹ kị byibyi hi ọngọ kpaa kpa.

³⁷Ịnyị lẹ, ọ byi angịjụgbẹyị nyamwụ yẹkẹẹ, “Anụ wo mẹ! Egbe ịlẹrụ nya Ohe Oluhye Adịda ga kpụ ọhyahya lụmẹ lẹ! Ma, áhị́ tị ye alụkụrwọ ịlẹrụ ọọwa gbuu kaka.

³⁸Lẹ, anụ raabwọ bịlẹ Ohe Oluhye Ayịdọlẹrụ ayịdang chajị kọ ka du alụkụrwọ ị-myị ẹrụ nyamwụ wẹ ẹpwụ nya ẹrụ kaka hya egbe ịịwa họọ mẹ.”