Read idege ỊMAKỊ 11 Bible Online

ỊMAKỊ 11 - idege bible

ỊMAKỊ 11

¹Ụka ká iJisọsị bala angịjụgbẹyị nyamwụ jẹ ju iJerusalẹm chwẹẹ, kị pwụ ọnụ nya epweji nya ịBẹtịfegi bala ịBẹtanị lẹ, ị jẹ pwụ Ọgbọdọ nya Olivu lẹlẹ. Ụ-ụwa, iJisọsị du angịjụgbẹyị nyamwụ angị imiiye ịhyẹ ẹrụ ji ịlahị nyaa.

²Ọ byaa yẹkẹẹ, “Anụ kele ka epweji ọlịlahị nyahị ọwẹ mẹ. Ahyaahị kanụ pwụ ụwa, anụ ka yẹ ụgba nya ụnyịrẹ okpolo ọhẹ ọlẹ ká ọngọngọhẹ á kụ ẹnẹnẹhẹ lẹka kọ bwọ eji ụ-ụwa. Anụ́-ụ yoo ori kanụ kpọọ warị wam mẹ.

³Ó-ri ká ọngọngọhẹ á tọnụ ịtọ yẹkẹẹ, ‘Ịịyẹ a tị́ du kanụ juwa yi ụgba nya ụnyịrẹ ọwẹ ori ịnyị?’ Aalẹ, anụ́-ụ wẹ byi ọngọọwa yẹkẹẹ, ‘Ọngọlahị la a tịtọ nyamwụ lẹ. Ụka kọ họ kpá, ọ ka myịmyị kpa tịrẹkpẹ wang ahyaahị!’ ”

⁴Ụka ká angịjụgbẹyị nya iJisọsị pwụ epweji ọọwa, ị yẹ ụgba nya ụnyịrẹ ọọwa kọ bwọ eji ụ-ụgbẹyị ọhẹ ọlẹ kọ ju ọnang nya ube ọhẹ chwẹẹ. Ọọwa lẹ, ị juwa yoo ori lẹlẹ.

⁵Ụka ọọwa, angịhyẹ ịlẹ kị godayị rịrị ụ-ụwa taa ịtọ yẹkẹẹ, “Ịịyẹ a tị́ du kanụ juwa yi ụgba nya ụnyịrẹ ọwẹ ori?”

⁶Ụka ká angịjụgbẹyị nya iJisọsị ya je angịwẹ jaabwọ ká iJisọsị mẹjaa lẹ, ị tụụbwọ hyaa rụ la ụnyịrẹ ọọwa lẹlẹ.

⁷Ọọwa lẹ, angịjụgbẹyị nya iJisọsị ịwẹ a kpa ụgba nya ụnyịrẹ ọọwa kele kịla iJisọsị lẹlẹ. Ụka kị go ịwụrụ nyaa ịhyẹ da ụnyịrẹ ọọwa ụ-uhye wuu lẹ, iJisọsị a juwa kwọọ rụ kele ka iJerusalẹm lẹlẹ.

⁸Ụka ọọwa, iru nya angịnyị lụmẹ-lụmẹ go ịwụrụ nyaa da ị-ịpyị ụ-ụgbẹyị ha ụnyịrẹ nya iJisọsị ọọwa. Angị ịkịla kele kaka mwụ abwọ nya ekeji ịlapwụ-lapwụ bwu ẹpwamẹ kpa kaka da ụ-ụgbẹyị gbe ụnyịrẹ nya iJisọsị ọọwa ịnyịnyị.

⁹Ụka ọọwa, angịlẹ kị ji ịlahị nya iJisọsị bala angịlẹ kị ji ẹkpẹ nyamwụ wuu juwa da owiwiyi ọtụka-ọtụka yẹkẹẹ, “Osana! Ahị ọwawa ọtụka a juwa hang, ahụ ọngọlẹ ká wẹẹ warị la ẹnyị nya Ọngọlahị Ohe Oluhye!

¹⁰Ká Ohe Oluhye a wahị kụrụ ịpyị nya Adịrahụ nya iDevidi ọlẹ kọ wẹẹ warị. Ká Osana a juwa hang ahụ Ohe Oluhye ẹ-ẹga oluhye.”

¹¹Ụka ká iJisọsị jụ kele ka epweji nya iJerusalẹm, ọ kele ka ube ịgọgọ ọtụka nya Ohe Oluhye. Ọ kaka yẹ ang myị́ ang ịlụwa dagaga ju wuu. Ma, jaabwọ ká obyi juwa hi lụmẹ lẹ, iJisọsị a gba kpehe rụ kele ka ịBẹtanị bala angịjụgbẹyị nyamwụ angị iwo kụrụ imiiye ẹnụ ọọwa lẹlẹ.

¹²Ụka ká ahị pyẹ, kị juwa tịrẹkpẹ bwu ịBẹtanị kele ka iJerusalẹm, imyi juwa nwụ iJisọsị.

¹³Ụka ọọwa, iJisọsị chẹhị kaka yẹ okoji ifigi ọhẹ ẹ-ẹga ọlụrụ, ká apwụ nyamwụ ju nya ịlẹhị-ịlẹhị. Ọọwa lẹ, ọ kele ka ẹga nyamwụ kaka wụlọọ yẹ, ó-ri kọ ka ye ugbe ọhẹ hya ri bwu ụwa lẹlẹ. Ma, ụka ká iJisọsị pwụ ụwa, ọ́ ye ugbe ọhẹ-lọhẹ hya ri ka. Apwụ-apwụ kem, ọ yẹ chum-chum ụ-ụwa lẹ, chajị ụka ọọwa á ri ụka nya egbe nya ifigi kpangga lẹka.

¹⁴Ọọwa lẹ, iJisọsị a byi okoji ifigi ọwẹ yẹkẹẹ, “Ahụ okoji ọwẹ lẹ, ọngọngọhẹ á ka ye ugbe hya ri bwu uhye nyang kpá ẹnẹnẹhẹ kaka.” Angịjụgbẹyị nyamwụ wo ụka kọ juwa ya ẹla ọọwa.

¹⁵Ụka kị pwụ iJerusalẹm, iJisọsị kele ka ube ịgọgọ ọtụka nya Ohe Oluhye nya ala iJuu. Ọ ku angịlẹ kị juwa kpa ihi ra ta awụlẹ u-ube ịgọgọ ọọwa rụ kpehe. Ọ kele kaka gu itebwuru nya angịlẹ kị juwa kpa okpoko ha angịnyị nyẹ ụ-ụwa cheji ịnyịnyị. Ọ gu ekeji ị-da hụhụ nya angịlẹ kị juwa kpa ikiripete ra ụ-ụwa cheji ịnyịnyị.

¹⁶Ụka ọọwa, iJisọsị pwa yẹkẹẹ, ọngọngọhẹ nyị kpa olo nya ịngịngịhyẹ chịpwụrụ bwu ụgbẹyị ichwiiwa ọlẹ kị da bwu ọdọdẹpwa nya ube ịgọgọ ọtụka nya Ohe Oluhye ọọwa kpong-kpong ka.

¹⁷Ụka ọọwa, iJisọsị byi angịlẹ kọ juwa mẹ ang jẹ ụ-ụwa yẹkẹẹ, “Ohe Oluhye ya ẹla ụ-Ụpwụ Ịgọgọ yẹkẹẹ, ‘Ube nyam Am Ohe Oluhye ka ri ube nya abwọ ọrịrị ham nya alepwoja myị́ epwoja wuu!’ Ma, anụ tị mwọọgịlẹ jam hu ube ịgọgọ ọọwa nya ube nya ọjịra-jịra nyanụ anụ angị họ angịnyị ri lala aleyi lẹ!”

¹⁸Ụka ká alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ wo ẹla ọọwa ọlẹ ká iJisọsị ya lẹ, ị juwa maga nya ụgbẹyị ọlẹ kị ka bwu kpa nwụ iJisọsị lẹlẹ. Ma, ịwa ayịdang tị juwa juhi nya ịlẹhị-ịlẹhị, chajị ị jẹ́ yẹkẹẹ, ang ọmẹjẹ nya iJisọsị ọọwa nyị la iru nya angịnyị ịwẹ wuu ahịbwuu lụmẹ kaka kpoye.

¹⁹Ụka ká obyi hi ẹnụ ọọwa, iJisọsị bala angịjụgbẹyị nyamwụ rụ bwu epweji nya iJerusalẹm ọwẹ.

²⁰La ụtụrụ ká iJisọsị bala angịjụgbẹyị nyamwụ juwa tịrẹkpẹ nya bwu ụgbẹyị ọlịnịyẹ, angịjụgbẹyị nyamwụ ịwẹ chẹhị kaka yẹ jaabwọ ká okoji ifigi ọlịnịyẹ ọlẹ ká iJisọsị gọlọ ju, gbu wuu ju ka ụtẹ nyamwụ.

²¹Ụka ká iPita kpịtịya nya ang ọlẹ kọ họ lẹ, ọ byi iJisọsị yẹkẹẹ, “Ayịbahị, chẹhị kaka yẹ okoji nya ifigi ọlẹ ká gọlọ ju kọ gbu lalẹẹ mẹ oo!”

²²IJisọsị wẹ byoo yẹkẹẹ, “Anụ kpa ọkịlẹtụ nyanụ wuu myị la Ohe Oluhye mẹ.

²³Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ ka byi ọgbọdọ ọtụka ọlẹ yẹkẹẹ, ‘Ahụ ọgbọdọ ọwẹ, wuleji ká mwụ bwu ẹgẹlẹ, kele kaka ju ka ẹpwụ nya ihu ọtụka ọlaanyị mẹ!’ Ko ri ká ọngọọwa á ka la ịwẹẹ ọdada ẹ-ẹpwụ nya ọkịlẹtụ nyamwụ kpong-kpong ka, ma, kọ ka la ọmyịmyị ẹ-ẹpwụ nya ọkịlẹtụ nyamwụ yẹkẹẹ, ala ịwẹ kọọwa nyị ya bwu ọnụ nya ọọwa lẹ, nyị ka chịpwụrụ ịnyịlẹhị lẹ aalẹ, ang ịịwa á ka dayi la ọhọhọ jịra họọ kaka.

²⁴Chajị nya ọọwa lẹ, m juwa byinu yẹkẹẹ, ang myị́ ang ọlẹ kọ baanụ, kanụ bịlẹ Ohe Oluhye ẹ-ẹpwụ nya abwọ ọrịrị lẹ. Aalẹ, anụ myị yẹkẹẹ, ịwa nyị ye ang ọọwa bwu ẹga nya Ohe Oluhye lẹ mẹ aalẹ, Ohe Oluhye ka họ ang ọọwa hanụ ịnyịlẹhị lẹ.

²⁵Ụka myị́ ụka kanụ godayị ị-ịlahị nya Ohe Oluhye juwa kpa abwọ rị aalẹ, anụ́-ụ la ọhịnyọhi ẹ-ẹga nya aananụ angị ịkịla ịlẹ kị họ ang onyobyi baanụ mẹ. Chajị ká Adanụ ọlẹ kọ juwa e-epwoohe tịtị ka hịnyọhi ịhọbịrị ịhọhọ nyanụ wuu hanụ ịnyịnyị mẹ. [

²⁶Ọ́ tị ri kaanụ ayịdang á myị juwa hịnyọhi ịhọbịrị nya angịnyị ehe aananụ haa ka, tụbwọ aalẹ, Ohe Oluhye Adanụ á tịtị ka hịnyọhi ọhọbịrị nyanụ anụ hanụ ka ịnyịnyị.]”

²⁷Ụka ọọwa, iJisọsị bala angịjụgbẹyị nyamwụ tịrẹkpẹ kele ka iJerusalẹm. Ụka ká iJisọsị juwa ga tụ ube ịgọgọ ọtụka nya Ohe Oluhye nya ala iJuu da, alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ bala ịgabwọ nya ala iJuu ịhyẹ kele ka ẹga nyamwụ.

²⁸Ị tọ iJisọsị ịtọ ọhẹ yẹkẹẹ, “Ayịbahị ịtịcha, ya jehi wẹẹ. Ale, ọngịrị nyang ọlẹ ká wẹẹ kpa họ ụkụrwọ ẹbyẹbyị ịwẹ wuu a tị́ bwu? Oowo a tị́ ye ọda nya ọọwa hang kpong-kpong?”

²⁹IJisọsị wẹ byaa yẹkẹẹ, “Anụ wo mẹ! Am ayịdang ka tọnụ ịtọ ookpokpo. Ó-ri kanụ wẹm ịtọ ọọwa lẹ aalẹ, m tịtị ka ya jenu ẹga ọlẹ kam ye ọngịrị ọ-kpa họ ụkụrwọ ịịwa wuu bwu ịnyịnyị lẹlẹ.

³⁰Anụ ya jem wẹẹ. Kpakpakpa lẹẹ, ụka nya ịJọn ọngọ hụ enyi Ohe lẹ, o-owo a tị́ ya ọngịrị ọlẹ kọ kaa kpa hụ angịnyị enyi Ohe họọ kpong-kpong? Ọngịrị ọọwa tị́ bwu epwoohe hireji lee ẹga nya angịnyị ehe, ọ tị́ bwu?”

³¹Ịnyị lẹ, angịwẹ a juwa kụ ẹla ọọwa ha awụlẹ jaabwọ kị ka bwu wẹ iJisọsị lẹlẹ. I byi awụlẹ yẹkẹẹ, “Ó-ri kahị yẹkẹẹ, ‘O bwu epwoohe hireji,’ ọ ka byihi yẹkẹẹ, ‘Ee lẹ, ịịyẹ a tị́ du kanụ tị tị myị la ịJọn kaka mẹ?’

³²Lee, ahị tị́ wẹ byoo yẹkẹẹ, ‘Ọngịrị ọọwa bwu ẹga nya angịnyị ehe lẹ,’ mẹ?” Ma, o-ya ịnyị tị laa uhi-uhi lụmẹ, chajị ị ri ibeenu yẹkẹẹ, iru nya angịnyị wuu nyị jẹ́ ká ịJọn nyị ri ọlọmwụ nya Ohe Oluhye nya ịlẹhị-ịlẹhị.

³³Ọọwa lẹ, angịwẹ a wẹ byi iJisọsị yẹkẹẹ, “Ahị ayịdang á jẹ́ ọwẹwẹ nya ịtọ nyang ọwẹ ka ya jeng ka.” IJisọsị tịtị wẹ byaa yẹkẹẹ, “O hiigu. Aalẹ, am ayịdang á tịtị ka ya jenu ẹga ọlẹ ká ọngịrị ọ-kpa họ ụkụrwọ ẹbyẹbyị nyam ịlẹ wuu bwu kaka ịnyịnyị.”